Gálatas 6 - Tradução Bíblica Pacaas Novos

Ca quep xiho' xujuhu' pain ca ma' cuhu' carawa ca to' i'ina nuhu' ta tococwa

¹ Tomi' xim inuhu' pain ca tomi' ha' taxipa' hwein Tamataracon Iri' Jam ma' xere. Mo ta ma' ca win ma' nuhu' co pan' mao pain ca caracat nucun ma', quep xiho' jun. An in jun, ma' ta xut xo' mami' ca. Tomi' xun iri jun ne, tomi' wixite e' jun. Ma' tara xumuhu' quem. Ma' ta om an xiho' hun pain ca caracat nucun.

² Ma' iri tara carawa ca to' i'ina nuhu' ne, quep xiho' caracan ac xujuhu' tara. Quep xiho' ac i ma' iri xujuhu' ne, tomi' ha' hwein ca tomi' nucun Cristo.

³ Tomi' xun wari' co xec xec ma', co coromicat ca' ma': Awi tiquin' ca' inonon oro win ma' ne cwa', ac i ma' na ca coromicat nucun. Cain' cain' xira quem? Om na ximicon, xi awi tiquin' ca' cocon oro win ma' ca ta.

⁴ Je ca tomi' xuhu' ca'. Noro xo' noro xo' xam' xin ximixi' pain ca xuruxut nexi'. Xuruxut xo' iri iri' ne, je i ma' tara ca ja' tomi' querec te napari'. Om ta tomi' querec te e' iri' pain ca awi tiquin' ca' xuxun xi' ma ururun oro win ma' nexi' ta.

⁵ Ma' ma' xam' ara xi' napari' carawa ca to' i'ina napari'. Ma' tara ximixi' pain ta.

⁶ Ca' na iri tata pain capijacon Iri' Jam oro wari' ne, xiram pa' ac cocon tara co ca' na nonon ma'. Mi' totoron pain oro carawa ca awi.

⁷ Ma' tara xumuhu' me, coromicat xo' je. Om ca tatam' tatam' tomi' xirac ac tocwa Iri' Jam ta. Tocwi ca oin' ca wari' pain totacon ma', je tara tocwi ca cut ta' ca quem, om ta cut cain xijein tocwi.

⁸ Ac i ma' iri' pain ca wari' nexi' pain ca xuruxut nexi' quem. Mo ta oin' e' xin ca pan teretem wa pain ca ara e' xin ca param ximama' pan nexi' ca', cut ac xin tara ca cono' wa pain ca wap capari' Iri' Jam. Mo ta oin' xin ca xuruxut xo' wa pain ca tomi' ha' e' xin Tamataracon Iri' Jam ma', cut ac xin tara ca e' cara wa. Je Tamataracon Iri' Jam tara ca mi' xim napari' pain ta.

⁹ Om ta horoman capari' ca quep xiho' caracan xijexi' pain ca ara mi' xijexi' pain ca awi wa ta. Mo ta om naro iri' pain, mo ta ara mi' ara mi' tiquin' xijexi' pain, main cut ac xin tara carawa ca mi' xim capari' Iri' Jam.

¹⁰ Je ca tomi' xuhu' ca'. Ma' iri nana wari' co ximin nana ma' ne, quep xiho' ac xuxun tara, je cwerexi' mao tara. Oro win ma' nexi' co nari iri' cwa', pain ca howa wi xun Cristo cwa', wiricoco tatara co quep xiho' tamana iri' quem.

Ca hu mam' tococwa pain ca win pi' pin ne ca xirao' nucun Paulo

¹¹ Xirao' pan inain tawirinain ca xirao' ne ca'. Querec pin' jein ca horonain ne ca xirao' ne ca'.

¹² Oro wari' co wac xirac jein taparinain ca xirac nuhu' ta nunuhu' ma', xec xec e' nana. Querec pin' tataraparut oro win judeu urut pain ca tomi' ha' taxipa' urut pain oro ca xirao' nucun Moisés ta nana. Jin' nonon oro win ma' caca. Tomi' ca' nana: Mo ta pijim' e' xut pain ca mi' pin nucun Cristo ma', pain ca to' witan e' napari' ca mi' pin nucun ta urut ca', mo ta pijim' ac i ma' urut, quep em' ac cacaparut tara ta na ca coromicat pan teretem nucucun. Je ca wac xirac jein ta cucuhu'.

¹³ Caram ma' co coromicat pan teretem ac i ma' nunuhu' ma', wac xirac paxi' xucucun, ane om tomi' ha' tomi' ha' pi' pin cacain ca xirao' nucun Moisés ta. Xec xec e' nana pahu', param e' nunuhu' pain ca wac xirac xihwe ma', ma' ta querec pin' cacaparut oro wari' pain ca tomi' tomi' na pin urut pahu' ta nunuhu'.

¹⁴ Wata' iri na ne, noc inain ca xec xec wa. Ac ca xec xec e' ta' na pain ca tomi' querec te ton Taramaxicon nexi' Jeju Cristo pain ca mi' pin caho' capari' pain pana pane. Ac ca xec xec e' tain na panaxicon ta. Horoman pin napa' oro caramaji macan' ca', horoman pin napa' oro ca param ximama' wa ca' quem. Ac ca cono' ca' capa' na, xi win xumu mami' tain ta.

¹⁵ Mo ta wac xirac cacapari', mo ta om wac xirac cacapari', an an ari na con Iri' Jam. Om ca noro capari' pain i ma'. Noro e' nain ximixi' pain ca to' xocoricon wari' pin capari' ca'.

¹⁶ Tomi' mi' tomi' mi' pi' pin inonon con Iri' Jam oro wari' co xuruxut xo' nana pain ca tomi' ha' cacain ca xirao' ne ca'. Mi' roron pain ca om toron ne ximicocon, xiram pa' roron quem inon cocon. Oro co xuruxut xo' nana pain ca tomi' ha' cacain ca xirao' ne ma', wiricoco nana co iri' wari' nucun Iri' Jam nana ta. Win caca oro wari' nein Israel co iri' wari' ne ca pane quem.

¹⁷ Tomi' xim inuhu' pain i ca' quem: Ta to' i'ina mami' cacapa' oro wari' me. Ha' ara xi' na pain ca querec pin' mahu' pain ca taramaja mi' ton Jeju cwa', xi ma' ara capa' oro jaminain ca quep em' cacapa' pain cwere pain ca taramaja mi' ton ca'.

¹⁸ Param inon Taramaxicon nexi' Jeju Cristo pain ca quep xiho' cuhu' ma' xere, pain ca mi' e' cuhu' pain ca param nucun pain iri' xumuhu' ta. Amém, iri'o' na ca tomi' ne ta. Je i ca' ca xirao' ne ca'.