Gálatas 5 - Tradução Bíblica Pacaas Novos

Ca to' witan capari' Cristo

¹ To' witan napari' Cristo, to' witan ca' napari' pain ca ac ca quep xat capari' ne ca xirao' nucun Moisés ma', pain ca tomi' ha' cara jein ta capari' ca'. To' witan iri'o' ca' napari' pain. Je ta hwara' opa cara qui' hwe pain ca howa nuhu' ta. Ari jujun oro wari' co mixein nunuhu' ma', pain ca tomi' ha' mami' jein oro ca xirao' nucun Moisés ca to' hohot nuhu' con Iri' Jam ta cucuhu' ma'.

² Taraju wet xine e'. Wata' pain ca Paulo ta' ca', tomi' inuhu'. Mo ta coromicat ca' hwe: Wac xirac xin taparinain ca xirac nexi' ca', ma' ta hohot xun Iri' Jam ta, mo ta coromicat ac i ma' hwe, om ta quep xiho' camain' cuhu' Cristo pain ca mi' pin caho' cuhu' ta.

³ Tomi' mami' inonon co wac xirac xin nanain taparinain ca xirac nucucun ma': Mo ta wac xirac xihwe, na e' na pain ca tomi' ha' xo' tomi' ha' xo' pi' pin hwein oro ca xirao' nucun Moisés ta.

⁴ Wahu' pain ca to' hohot xijexi' pain ca tomi' ha' xin ca xirao' nucun Moisés hwe ma', to ni ca' hun Cristo. To' hohot xijexi' pain ca tomi' ha' xin ca xirao' nucun Moisés ta iri hwe ne, noc pin ac hun na Iri' Jam pain ca xiram pa' e' cuhu' ma'.

⁵ Ane taxi' xun Iri' Jam pain ca to' hohot capari' pain ca howa xun Cristo ne. Je Tamataracon ca to' taxi' napari' pain. Je ca winim' iri' pain ca howa xun quem.

⁶ Xi quep xiho' capari' ca wac xirac xine taparinain ca xirac nexi' ta. Pain ca howa xun Cristo Jeju pain ca to' hohot pan capari' ca', mo ta wac xirac cacapari', mo ta om wac xirac cacapari', an an ari na con Iri' Jam. Om ca tocojin' capari' pain i ma'. Noro e' nain ca howa nexi' pain ca howa xun Cristo. Om iri na ca noc caracan xijexi' ne, querec pin' ac capari' na pain ca howa xun quem.

⁷ Hohot paxi' hwe pain ca ja' ja' hun Cristo pain cara pane. Ma' co to' i'ina nuhu' pain xocori ca' quem? Ma' co tomi' tomi' na pin nuhu' pain ca tomi' ha' tomi' ha' om pin hwein capijacon Iri' Jam con Jeju ca iri'o' ma' quem?

⁸ Om ca Iri' Jam ca co ara nain i ma' pahu', xi om ne ca wirico ara ca co howa xine ta nuhu' ma'.

⁹ Mam' pe wet jein ca tomi' taxipa' iri' ca', pain ca to' memerem nein capam' ma': Maxoc wijimain iri xin ne, to' memerem to' memerem pi' pin ac nein na capam'.

¹⁰ Ane taxi' xuhu' ne, xi om ne ca win cwere pi' pin ara xun Taramaxicon nexi' ta. Taxi' inuhu' pain ca coromicat xo' mami' xi' hwe. Wari' co to' i'ina nuhu' pain ca pijim' nucun ma' iri na ne, am wirico ca co hwara' opa ma', am xucun ca co hwara' opa ma' quem, tara con. Main wap ac tocwa tara ta.

¹¹ Tomi' xo' xim inuhu' pain i ca' quem xere: Ma' nana co tomi' em' nanapa'. Tomi' ca' nana: Wac xirac tatarain taparinain ca xirac nucucun oro wari' ta na Paulo ta nanapa' ma'. Cain' cain' xirara quem? Mo xi pijim' pijim' wet ac i ma' ta', je xi om quep em' quep em' tiquin' cacapa' oro win judeu ta' cwa'? Mo xi pijim' ac i ma' ta', om xi mana' cacapa' pain ca pijim' hwet toton con Jeju oro wari' ma', pain ca mi' pin caho' napari' pain pana Cristo ta toton ca'.

¹² Wa inonon co to' i'ina nunuhu' pain ca ja' teretem cucuhu' ma', pain ca wac xirac xirarain ca xirac nucucun oro wari' ta caca ma'. Wac pit pan xirarain ca xirac nucucun na inonon ta!

¹³ Je ca tomi' xuhu' ca' xere. Howa xine nuhu' Iri' Jam. Ma' ta witan ca' hwein ca tomi' ha' cara wa ca xirao' nucun Moisés pain ca witan xi' wa ta nuhu'. Ane om ha' ne pain ca coromicat ca' hwe ne: Ara ximama' xin oro ca param nexi' ca', xi om ne ca witan ca' ara xin ca tomi' ha' cara wa ca xirao' nucun Moisés ma', ta coromicat ac i ma' camain' hwe me ta. Quep xiho' caracan e' xujuhu' pain ca om noc cara xujuhu' ta.

¹⁴ Je ca hu capari' ca xirao' nucun Moisés quem: Ta noc momon oro win ma' ma me ta. Win ne ca om noc pan xijem ma' quem napari'. Mo ta tomi' ha' hwein i ma' con, ac ca wara tomi' ha' tomi' ha' pi' pin hwein na oro ca xirao' nucun ta.

¹⁵ Ma' tara xumuhu' me. Mo ta om tomi' querec te caracan xujuhu' ma', mo ta an xiho' hun oro caxicon oromijac co quio quio cono' pin xucun pain ca mana' nucun ma', to' quiji' pin ac xujuhu' tara ta.

Ca xuruxut nexi' pain ca tomi' ha' xin Tamataracon Iri' Jam

¹⁶ Je ca tomi' xuhu' ca': Tomi' ha' e' jein Tamataracon Iri' Jam. Om ac ne tara ca tomi' ha' hwein oro ca param ximama' ne curuhu' ta.

¹⁷ Oro ca param ximama' nexi' ca', noc taxipa' nain Tamataracon Iri' Jam. Ca param pan ne Tamataracon Iri' Jam ma' iri na ne, noc taxipa' nain ca param ximama' nexi' quem. Mixita xijein. Je ca om ara ac xin ca param pan nexi'.

¹⁸ Je ca tomi' xuhu' ca', tomi' inuhu' pain ca tomi' ha' xin hwein Tamataracon Iri' Jam ca o mama' nuhu' ma'. Mo ta tomi' ha' hwein, witan ca' ac hwein tara ca xirao' nucun Moisés ca ac ca quep xat cuhu' ne ma', pain ca tomi' ha' cara jein, ma' ta hohot hun Iri' Jam ta cuhu' ma'.

¹⁹ Querec pin' irin oro ca ara nucucun wari' co tomi' ha' e' nanain ca param nucucun. Mo na ca ara nucucun: Quep nanam oro xequem narima', quep xut nonon oro xucun tarama' pain ca narima' nequequem quem. Mam' pe wet e' nanain oro ca quep ximama' wa, jain jain ximama' nanain. Tamanain to nana pain ca win xumu cacain oro ca om awi wa.

²⁰ Pe torotop mi' querec te nanain oro caji pacun ca Iri' Jam xi' ma caca ma'. Ara xirac nonon oro wari'. Noc nonon oro win ma' caca, mana' ximama' nonon. Narain ho' xucucun pain oro caramaxicocon. Hwerehwet na mixitacocon. Joc in pin nonon oro win ma' caca pain ca wata' co taramaxicon ta caca. Ja' teretem nonon oro win ma' caca pain ca to' coromicat ni cocon. Tomi' querec te e' nonon oro win ma' caca co xin ne nonon.

²¹ Noc mi' xucucun pain oro carawa. Toc tamanain to nanain oro comi uva ca mana'. Tamanain to nana pain ca waraju ximama' nucucun. Ma' nonon oro xijein ca pan teretem wa ca an xiho' nain ca xirao' ne ca' quem. Je ca tomi' xuhu' ca', wara hu inuhu' pain cara pane, hu mami' inuhu' pain xocori ca' quem. Oro wari' co ara taxipa' nanain oro ca pan teretem wa ca xirao' ta' ca', om ta mi' tococwa pain ca to ho' cocon Iri' Jam ma', pain ca taramaxicon pe ho' toton cocon oro wari' nucun ta.

²² Ane to' jimama' capari' Tamataracon Iri' Jam ne. Mo na oro ca ara mi' capari': Mi' napari' pain ca om noc xijexi'. Ja' tomi' querec te napari'. Mi' napari' pain ca om toron ne ximixi'. Mi' napari' pain ca tomi' pan hot xijexi', je pain ca xiram pa' xijexi' quem. Mi' napari' pain ca awi wa pain ca xuruxut xo' wa. Mi' napari' pain ca om tomi' capijacocon e' iri' pain ca ara taxipa' xin oro ca tomi' pe iri' quem.

²³ Mi' napari' pain ca tomi' wixite xijexi'. Mi' napari' pain ca om ara e' xin ca param pan nexi' quem. Ara iri xin oro ca mi' capari' Tamataracon Iri' Jam ca' ne, om ca tomi' em' capari' ca xirao' nucun Moisés ta.

²⁴ Wari' cwa', pain ca wari' ne pin capari' Cristo Jeju cwa', om ca ara mami' xin ca param pan nexi'. Ac ca to' pa' pin xin na ca param pan nexi'. Oro ca param ximama' nexi' ca', je oro ca win xumu ximama' xin ca om awi wa ca', ac ca tatatain mi' xin na pain panaxicon Cristo.

²⁵ Mi' napari' pain xocori ca e' nexi' Tamataracon Iri' Jam. Je ca tomi' ha' cara xin quem.

²⁶ Om ca ha' ne pain ca xec xec iri'. Om ca ha' ne pain ca tomi' taparam' xijexi'. Om ca ha' ne pain ca noc mi' xijexi' pain oro carawa quem.