Gálatas 4 - Tradução Bíblica Pacaas Novos

Ca mana panxica Iri' Jam pin iri'

¹ Je ca tomi' xuhu' ca', pain ca mana panxica Iri' Jam iri' ca'. Noro jun panxica wari' co caramaju ma'. Main cut tarain oro caramaxicon cote ca. Pain ca pije' pije' wet nucun ma', main cut tain paxi' nain oro caramaxicon cote ca. Ane om cut querec cain ne. An xiho' e' nonon oro wari' co taramaja mi' e' nonon cote ca.

² Ma' nana wari' co querec wet nonon pain ca pije' pije' wet ca ma', ma' nana co querec wet nanain caramaxicon cote ca quem. Querec wet querec wet ca' nonon, maqui' pa' ac con na xec nein ca wara coromicat an pe xo' ca cote ca pane, pain ca hwara' pin iri tara panxita' cwa' ne, cut pan ac cain tara caramaju, mene ac cain tara quem ca pane.

³ Ac i ma' paxi' iri' pain ca om witan querec iri' pane. Ac hwijima' iri', tomi' ha' ximama' e' irin oro ca howa ximama' iri' pain macan' ca'. Om ca tomi' in pin ac xin.

⁴ Ane maqui' pa' capari' iri' xec nein ca coromicat an pe xo' ca Iri' Jam ne, pain ca mam' xim xuhu' con Panxita' cwa' capari' pane. Hwet roron oro wari' pain macan' ta non pari'. Wari' pin na, wari' na jicon co wijima non. Judeu na quem, tomi' ha' taxipa' nain ca xirao' nucun Moisés pane.

⁵ Mam' napari' con, ma' ta to' witan ca' cuhu' pain ca wap wa pain ca om tama' tomi' ha' ac hwein ca xirao' nucun Moisés ta napari'. Ma' ta mana panxita' pin xuhu' ta napari' quem.

⁶ Mana panxica Iri' Jam iri' ca' ira. Je ca mam' capari' pain Tamataracon Panxica. Corom pe rain ximicocon ta nain pari'. Je Tamataracon Panxica ca tomi' wi napari' pain ca Te Iri' Jam xun Cotere' cwa' quem.

⁷ Je ca tomi' xuhu' ca'. Om ca an xiho' mami' xuxun oro wari' co taramaja mi' e' nonon xucun wari', co tama' tomi' ha' tomi' ha' je wawa ma'. Mana panxica Iri' Jam pin iri'. Wara mi' napari' pain oro caramaxicon. Xi mana panxita' pin ara capari' ta.

Ca toron ne ximicon Paulo cocon oro wari' nein Galácia

⁸ Pain cara pane, pain ca om taxi' querec hun Iri' Jam pane, taramaja mi' e' hwein oro ca Iri' Jam xi' ma hwe pane. Tomi' ha' ximama' hwein. Xi Iri' Jam ne ta!

⁹ Ane querec pin' hun Iri' Jam pain xocori ca' ne. Xirao' ca' e' xita', wirico Iri' Jam pan na co querec pin' nuhu' ta, ac i ma' xira ca xirao' ta' ca'. Je ca tomi' querec xuhu' ca': Para in hwet xin hwein warahu' quem? Ma' na ca in hwet ac hwein warahu' pain ca tomi' ha' ximama' mami' hwein oro ca howa ximama' hwe pain macan' ca'? Xi quep xiho' taxi' cucuhu' ta. Om ca hwara' opa ne quem. Para tomi' ha' ximama' mami' xixin na hwein oro ca howa ximama' nuhu' ma' quem?

¹⁰ Wahu' pain ca om judeu hwe ma', ara ximama' hwein oro ca ara caca oro judeu ma' quem. Mam' pe wet ximama' hwein oro xec ca mam' pe wet taxipa' caca ma', mam' pe wet ximama' taxipa' hun oro panawo' ca mam' pe wet taxipa' caca ma' quem, je oro ca tomi' querec te taxipa' xucucun, je pain oro cawaxi' ca tomi' querec te ximama' caca ma' quem. Cain' cain' xihwe quem? Para ac i ma' hwe quem?

¹¹ Toron tamana napa' xumu pahu' ta. Am taramaja ximao ta' pain ca pijim' xuhu' ca'.

¹² Je ca tomi' xuhu' ca' xere, jain jain ina pain ca tomi' mip xuhu' ca'. An xiho' xine pain ca om jain jain mami' tain oro ca tomi' ha' xine ca xirao' nucun Moisés ca'. Win ne ca an xiho' xuhu' pain ca om judeu nuhu' pane, pain ca om jain jain hwein ca tomi' ha' xine ca xirao' nucun Moisés pane. Tomi' querec te tamana paxi' mahu' pain cara pane.

¹³ Mam' pe wet mahu' pain ca xo' pijim' mi' ten qui' xuhu' pain capijacon Iri' Jam ca tomi' hwet napari' con Jeju quem? Caxi ina pane. Je ca mon pe ho' xuhu', pijim' ac xuhu' na pane.

¹⁴ To' i'ina tamana paxi' inuhu' pain ca caxi ne pane. Ane om tomi' napat mahu' ne, om ca noc camain' mahu' pane. Tomi' querec te e' mahu'. Ac ca tomi' querec te hun jam co taramaja mi' non Iri' Jam na pain ca tomi' querec te mahu' pane. Ac ca tomi' querec te hun Cristo Jeju na, ac i ma' na ca tomi' querec te mahu' pane.

¹⁵ Tomi' querec te tamana mahu' pain ca pe ho' xuhu' pane. Xiram pa' tamana mahu', taxi' inuhu' pane. Mo xi ha' cuhu', horohot mi' ximahu' pain tucuhu' pane, ac i ma' na ca tomi' querec te mahu' pane. Ma' carawa ca ara nuhu' pain xocori ca' quem? Para tomi' querec te tomi' querec te om pin mahu' quem?

¹⁶ Cain' cain' xihwe quem? Tomi' xo' inuhu' pain capijacon Iri' Jam ca iri'o' ca', pain ca hu xuhu' ca'. Je ca noc pin mahu' pain xocori ca' ra?

¹⁷ Om ca ara xo' caca caram ma' co jain jain nunuhu' ma', pain ca tomi' ha' jein oro ca xirao' nucun Moisés ta cucuhu' ma'. Quep xiho' xim paxi' nunuhu', ane om quep xiho' iri'o' cucuhu' ne. Param e' nunuhu' pain ca noc pin mahu', param nunuhu' pain ca to ni ca' mahu'. Ma' ta tomi' querec te e' maparut ta nunuhu'.

¹⁸ Awi paxi' na pain ca tomi' querec te huhun oro wari' co quep xiho' iri'o' xim nunuhu'. Win ne ca tomi' querec te mahu' pain ca pe ho' pe ho' wet xuhu' pane. Param inuhu' pain ca tomi' querec te ac i ma' mahu' pain ca om pe ho' xuhu' ca' quem.

¹⁹ Jain jain inuhu' ta hwijima', ac ca mana panxita' xuhu' ara xi' na. Wara jain jain inuhu' pain ca xo' pijim' ten qui' xuhu' pane. Jain jain mami' inuhu' pain xocori ca' quem. An xiho' inam narima' co jain jain pain ca pan' ta' ca cawinacam ma', ac i ma' na ca jain jain mami' ta' pahu'. Jain jain tamana inuhu', an xiho' pin xiroron Cristo pain iri' ximicocon ta inuhu'.

²⁰ Pe ho' xuxuhu' na inuhu' pain xocori ca'. Tomi' toto ac xijexi' xira. Toron tamana napa' xumu pahu'.

Sara cam Agar

²¹ Wahu' pain ca tomi' ha' xin ca xirao' nucun Moisés hwe ma', tomi' querec xim inuhu'. Taraju pa' hwein ca pijim' capari' Moisés pain ca xirao' nucun ra?

²² Xi xirao' pe ara xine pain capijacon Iri' Jam ta: Ma' 2 nana mana panxica Abraão pane. Xucun panxica ma', wijima non Agar co taramaja mi' e' nam manacon. Xucun ma' iri na ne, wijima non iri' manacon ma', Sara ma', co om taramaja mi' non xucun wari'.

²³ Panxica co wijima cama Agar co taramaja mi' e' nam Sara ma', pan' qui' ac ca na, xi om ne ca coromicat an pe xo' ara ne ca wari' wa ta. Xucun co wijima cama Sara co om taramaja e' ma' iri na ne, pan' qui' ac ca na, xi om ne ca wara tomi' pe nucun Iri' Jam ta.

²⁴ Carawa ca ara nanam Agar cam Sara pane, tomi' joc mam' mi' ta pain ca tomi' nucun Iri' Jam pane, pain ca tomi' an pe xo' qui' con Moisés con Abraão pain cara pane. Pain ca tomi' an pe xo' qui' tocwa Moisés pain cote ne pacun pain Sinai pane, tomi' joc mam' mi' ta cam Agar. Oro wari' co taramaja mi' e' nanain ca xirao' nucun Moisés ma', tomi' joc mam' mi' tata cam Agar con cawinacam ma'.

²⁵ Cote ne pacun Sinai ma', ca pe nain Arábia ma', tomi' joc mam' mi' ta cam Agar ma'. Ac i ma' na Jerusalém ca pe nain macan' pain xocori ca' quem, tomi' joc mam' mi' ta cam Agar. Oro wari' nein Jerusalém ma', ac ca taramaja mi' e' cocon na xucun wari' pain ca taramaja mi' e' cacain ca xirao' nucun Moisés. Win cama Agar con cawinacam pane, pain ca taramaja mi' e' cocon xucun wari' pane.

²⁶ Jerusalém ca pe pawin cain iri na ne, tomi' joc mam' mi' ta cam Sara ma'. Xi ma' ca wari' co taramaja mi' e' cama ta. Wiricam na co na' iri', ac ca wijima capari' na.

²⁷ Je ca wara xirao' an pe xine pain capijacon Iri' Jam ca': Wum pain ca om wijima camain' ma ma', querec te ra. Wum pain ca om panim' camain' mon pije' ma', merem querec te ra. An pe paxi' nem taxim, ane mija caca humajum ne. Mija tiquin' ca' nonon humaxicam cam ma' co ma' nam tarama' ma'. Ac i ma' na ca xirao' an pe xine pain capijacon Iri' Jam pane.

²⁸ Je ca tomi' xuhu' ca' xere. An xiho' hun Isaque cara pane, co wara tomi' pe wa con Abraão cam Sara pane. Mana panxita' pin nuhu' Iri' Jam quem. Xi om ne ca wara tomi' pe ara cuhu' con Abraão pane ta.

²⁹ An xiho' hun Isaque pain ca to' i'ina tocwa pane quem. Noro jun cwaji' ca pane, co wijima cama Agar pain ca coromicat an pe xo' nein ca wari' wa ta. To' i'ina non coxa' ca co wijima cama Sara pain ca coromicat an pe xo' nein Tamataracon Iri' Jam. Je ca ara ne pain xocori ca' quem.

³⁰ Ane ma' ne ca xirao' pe xine pain capijacon Iri' Jam cocon ne. Cain' ca tomi' capari' cocon quem? Tomi' ca' napari': Tomi' mo pin ram cam ma' co taramaja mi' e' non xucun wari' ma'. Tomi' mo pin ron cawinacam quem. Xi om ne ca ma' ara ca cawinacam co om taramaja mi' e' non xucun wari' ta. Om ta cut wi camain' cacain caramaxicon cote caca, ac i ma' na ca xirao' an pe xine pain capijacon Iri' Jam.

³¹ Je ca tomi' xuhu' ca' xere. Om ca wijima capari' narima' co taramaja e' ma'. Wijima napari' narima' co om taramaja e' ta.