Gálatas 3 - Tradução Bíblica Pacaas Novos

Ca om to' hohot capari' ca tomi' ha' xin ca xirao' nucun Moisés. Ca to' hohot e' capari' ca howa xun Cristo

¹ Je ca tomi' xuhu' ca' oro win howa ta' pain Galácia. Wa inuhu' me, xi coromicat xo' hwe ta. Ma' co mixein nuhu' ma' quem? Om ca pijim' hwet xo' xuhu' pain ca mi' pin nucun Jeju Cristo pain ca mi' pin pe cain pana pane ra?

² Ma' xica' pe e' na ca tomi' querec xim xuhu' ca', tomi' xo' xine e': Para mi' cuhu' pain Tamataracon Iri' Jam quem? Mam' mi' nuhu' pain Tamataracon pain ca tama' tomi' ha' hwein ca xirao' nucun Moisés ra? Om ca mam' mi' cuhu' pain Tamataracon pain ca howa hwein oro ca pijim' urut pahu' ra? Je ca tomi' xuhu' ca', mi' nuhu' pain Tamataracon, xi om ne ca howa ara hwein oro ca pijim' urut pahu' pane ta.

³ Cain' cain' xihwe quem? Para om coromicat xo' hwe ma' quem? Pain ca xo' howa ten qui' hun Cristo pane, je Tamataracon Iri' Jam ca meo nuhu' pain ca taramaja nein xumuhu'. Ma' tara ca ara pan ac hwein ca taramaja nein Tamataracon Iri' Jam pain ca to' hohot pan xijexi' ta hwe pain xocori ca' ra?

⁴ To' i'ina pin iri nuhu' oro carawa pain ca xo' howa ten qui' hwe pane ne, jain jain tamana ac hwe na pain ca quep em' wa. Cain' cain' hwe quem? Jain jain ximama' hwe ra? Tara pahu' ta, am jain jain ximama' hwe.

⁵ Para mi' cuhu' pain Tamataracon Iri' Jam quem? Para ara mi' cuhu' pain oro ca om ara taxi' ne ca wari' wa quem? Ara ac i ma' nuhu' pain ca tomi' ha' hwein oro ca ara je cuhu' pain ca xirao' nucun Moisés ra? Om na ta! Howa ara xi' hwein oro ca pijim' xihwe con Cristo ta. Je ca mi' cuhu' pain Tamataracon. Je ca ara mi' cuhu' pain oro ca om ara taxi' ne ca wari' wa quem.

⁶ Je ca xirao' an pe xine pain capijacon Iri' Jam con Abraão pane: Howa non Iri' Jam Abraão. Je ca tomi' tocwa ma', tomi' pan non Iri' Jam. To' hohot pin inem, xi om ne ca howa ara mapa' ta non.

⁷ Je ca tomi' xuhu' ca', taraju wet je e'. Oro wari' co an xiho' nonon Abraão ma', pain ca howa cocon Iri' Jam ma', wiricoco co iri' hwanana ne nonon Abraão.

⁸ Je ca xirao' pe xine ca wara coromicat an pe xo' nucun Iri' Jam pane: Mo ta howa cacapa' oro wari' co om judeu nana ma', to' hohot pin ac toton tara ta. Je ca tomi' con Abraão ma' quem: Param mi' toton pain ca awi wa oro wari' pain oro xijein macan' pum ta non.

⁹ Je ca taxi' xin i ca' quem: Oro wari' co howa nonon Iri' Jam ma', param mi' ac tococwa na pain ca awi wa. Win ca Abraão pane. Howa non Iri' Jam, param mi' ac tocwa na pain ca awi wa quem.

¹⁰ Ane om ac i ma' ne cocon oro wari' co howa e' nanain ca tomi' ha' pan nucucun ne. Main tomi' noro toton pan nonon Iri' Jam, wap xuhu' ta nonon. Xi xirao' pe ara xine pain capijacon Iri' Jam ta: Oro wari' co om tomi' ha' cara pi' pin nanain oro ca ara je toton pain ca xirao' nucun Moisés ca', tomi' noro toton, main wap toton ta, ac i ma' na ca xirao' pe xine pain capijacon Iri' Jam ta.

¹¹ Tomi' iri'o' ina, wara taxi' irin i ca': Om ca to' hohot xuhu' camain' capari' Iri' Jam pain ca tomi' ha' xin paxi' xin oro ca ara je capari' pain ca xirao' nucun Moisés. Je ca xirao' pe ne pain capijacon, xirao' pe ca' na: To' hohot ton inon wari' co howa napa'. E' cara tara quem. Ac i ma' na ca xirao' pe xine pain capijacon Iri' Jam.

¹² Pain ca tomi' cocon oro hwanana Iri' Jam pane, tomi' ca' tata: Mo ta tomi' ha' cara hwein oro ca ara je xuhu' pain ca xirao' nucun Moisés ca', e' cara ac hwe tara ta tata pane. Om ca howa xine pain ca xiram pa' e' xuhu' ca' tococwa pain, tomi' ha' cara e' jein ta tata.

¹³ Tomi' noro napari' Iri' Jam, xi tomi' ha' xo' ac xin ca xirao' nucun Moisés ta. Ane to' witan pan capari' Cristo ne, to' witan ca' napari' pain ca tomi' noro nucun Iri' Jam. Pe pan tain maxuhu', tomi' noro e' tarapa' pahu' ta napari'. Xi xirao' pe ara xine pain capijacon Iri' Jam ta: Oro wari' co to' pa' pin wawa pain ca tatatain mi' wawa pain pana ma', wiricoco co tomi' noro ca Iri' Jam ta na capijacon Iri' Jam.

¹⁴ To' witan ca' napari' pain ca tomi' noro nucun Iri' Jam Jeju Cristo, ma' ta hwet cocon ca wara param mi' tocwa Abraão oro wari' co om judeu nana ta na pain ca param mi' toton pain ca awi wa oro co howa nanapa' ta tococwa. Ma' ta mi' xuhu' pain ca wara tomi' pe ne ca', pain ca mam' mi' xuhu' pain Tamatara pain ca howa hun Cristo ta napari' Iri' Jam quem.

Ca om an in ac xine ca wara tomi' pe nucun Iri' Jam

¹⁵ Tomi' xin i ca' quem xere, pain ca tomi' xo' xijexi' pain ca wari' nexi' ca'. Am ma' 2 caca wari' co tomi' xo' xucucun ma', wara tomi' pe mi' xucucun pain ca tomi' nucucun. Xirao' an pe iri nanain ca tomi' xo' nucucun ne, xirao' xo' ac cacain na wixicocon. Om ca ma' camain' ca wari' co ha' non pain ca xic am cain ca tomi' xo' nucucun, om ca ma' camain' ca wari' co ha' non pain ca an in cain quem. Xirao' an to iri nanain wixicocon pain ne, maxinain cara ac ne na.

¹⁶ Ac i ma' na ca tomi' pe nucun Iri' Jam con Abraão pane quem. Wum, winam co main pan' ta' ma', tomi' pe mi' inuhu' pain ca param mi' xuhu' pain ca awi wa ta non pane. Om ca tomi' ac i ca' con: Tomi' pe inem cocon waram winam co main camara' xi' nana ma', om ca xirao' pe ac i ma' ne pain capijacon pane. Xi mija caca waram winacon co tomi' mi' ca pane ta. Tomi' ca' e' non: Tomi' pe inem con winam co main pan' ta' ma' ta non. Xica' pe na winacon co tomi' mi' ca, wirico Cristo ta.

¹⁷ Je ca tomi' xuhu' ca', taraju pa' je e': Win ne ca om xic am ac xine ca tomi' xo' xucucun wari' ma', om ca xic am ac xine ca tomi' an pe xo' nucun Iri' Jam con Abraão quem. Tomi' xo' iri non pane ne, om ca tomi' xo' querec con Moisés pane, ame hwe e'. Pi' pin iri na ca 430 ne cawaxi' pain ca tomi' xo' qui' con Abraão pane ne, ma' ac ca na Moisés. Xirao' pe rain ca tomi' ne ca', tomi' ha' tatarain oro wari' ne ta ac con na Iri' Jam. Ca xirao' nucun Moisés ma', om ca to' om pin ac nein ca wara tomi' an pe xo' nucun Iri' Jam con Abraão.

¹⁸ Mo xi tomi' ca' capari' Iri' Jam: Mo ta tomi' ha' cara hwein oro ca ara je xuhu' pain ca xirao' nucun Moisés ma', ara mi' ac xuhu' tara pain ca wara tomi' pe xuhu' ca', pain ca to' witan e' xuhu' ta, mo xi tomi' ac i ma' capari', om xi tomi' pe e' capari' pain. Ane tomi' pe e' con pain Abraão Iri' Jam ne, ara mi' e' xim pain ca wara tomi' pe xim ca', om ta pagar mapa' pain, ara mi' e' xim pain ta na ca tomi' pe con pane.

¹⁹ Para mi' cain ca xirao' nucun Moisés Iri' Jam quem? Om na, tomi' pe cain' non pain ca tomi' nucun Abraão pane, aram aram mi' ac cain na ca xirao' nucun Moisés. Ma' ta querec pin' xujuhu' pain ca caracat nuhu' ta nonon oro wari' nucun. Mao ac ne ma' tara pahu', maqui' pa' ac cain tara winacon Abraão co wara tomi' pe ta' pane nonon. Oro jam co taramaja mi' nonon Iri' Jam pane, wiricoco nana co tomi' hwet nonon pain Moisés pane, tomi' hwet tiquin' mi' ac tococwa na pain ca tomi' nucucun oro wari' nucun quem.

²⁰ Ane om ca wari' co tomi' hwet tiquin' mi' non pain Abraão ca tomi' pe nucun Iri' Jam ne. Wirico pan Iri' Jam co tomi' hwet non pain Abraão.

²¹ Cain' ca coromicat mi' hwein ca xirao' nucun Moisés quem? Tomi' in pin nain oro ca tomi' pe nucun Iri' Jam pain ca tomi' xo' con Abraão pane ra? Om na, om ca tomi' in pin camain' xijein ta! Mo xi to' e' cara capari' ca tomi' ha' nexi' ca', je i ma' xira ca to' hohot nuhu' ca xirao' nucun Moisés ta qui' capari' quem.

²² Ane xirao' pe ca' xine capijacon Iri' Jam ne: Caracat caracat pi' pin nana oro wari' ta napari'. Ac ca quep xat capari' na ca hwara' opa nein ca caracat wa. Ma' ta ara mi' xuhu' pain ca wara tomi' pe mi' xuhu' ca' napari' Iri' Jam. Mo ta howa hun Jeju Cristo, ara mi' ac xuhu' tara pain ca wara tomi' pe mi' xuhu' ca' napari'.

²³ Warut pain ca judeu urut ca', pain ca om maqui' querec ne xec nein ca howa pin tocwa Cristo pane, ac ca quep xat cara caparut na ca xirao' nucun Moisés. Ac ca tao' to caparut na pain xirinain ca tao' to tao' to to wa. Pain pain, aram aram an hwet mi' ac caparut na pain ca tomi' pe nucun Iri' Jam ma', pain ca to' witan xim caparut pain ca howa xut con Cristo.

²⁴ Ac i ma' na ca querec wet caparut ca xirao' nucun Moisés pain ca om maqui' querec ca Cristo pane. Hu naparut, tomi' xo' naparut, xuruxut xo' je ta naparut. Pain xocori ca' iri na ne, pain ca maqui' pin ca Cristo cwa', to' hohot pin ac caparut na, xi om ne ca howa pan ara xut con ta.

²⁵ Je ca tomi' xuhu' ca', maqui' pin na Cristo pain xocori ca'. Howa pin ac urut con na. Je ca om hwara' opa mami' caparut ca xirao' nucun Moisés pain ca tama' querec wet caparut quem.

²⁶ Je ca tomi' xuhu' ca'. Wahu' pain ca judeu hwe ma', wahu' pain ca om judeu hwe ma' quem, mana panxica Iri' Jam mana panxica Iri' Jam pi' pin hwe, xi om ne ca howa ara hun Cristo Jeju ta.

²⁷ Xi win cwere pin ara hun Cristo pain ca an hwet hwein ca howa nuhu' pain ca ja' xihwe pain com pane ta. Ac ca to hun na, win ne ca to xun xocoricon wom cwa', ac i ma' hun Cristo pain ca win cwere pin hun.

²⁸ Pain ca win cwere pin xun ca', an xiho' pin xijexi', om ca querec jimama' ca' xijexi' con Iri' Jam. Warut pain ca judeu urut ca', wahu' pain ca om judeu hwe ma' quem, an an ari xijexi'. Co taramaja mi' e' nonon xucun wari' ma', co om taramaja mi' nonon xucun wari' ma' quem, an an ari xucucun. Ca tarama' nexi' ca', ca narima' nequequem oro narima' ma' quem, an an ari xijexi'. Ac ca xica' pe ne na ximixi' pain ca wari' nexi'. Xi om ne ca win cwere ara xun Cristo Jeju ta.

²⁹ Je ca tomi' xuhu' ca'. Pain ca mene pin cuhu' Cristo ma', iri' hwanana ne pin ac hun na Abraão cara pane. Wara ara mi' xihwe pain oro ca wara tomi' pe nucun Iri' Jam. Win ne ca wara tomi' pe con pain Abraão pane ta.