Gálatas 2 - Tradução Bíblica Pacaas Novos

Ca tomi' querec te cocon Paulo oro xucucun apóstolo

¹ Cawaxi' pa' ac capa' na, cawaxi' pa' mami' ac capa' na, ma' 14 pin iri na cawaxi' pain ca querec qui' toton pain Jerusalém pane ne, in mao ac tain na Jerusalém. Ja' ja' napa' Barnabé. An mao inon Tito quem.

² Mao inain Jerusalém, xi om ne ca mao rain i cain ara capa' Iri' Jam ta. Tan' mama' iri urut ne, cut in ac xujuxut na cocon oro co querec wet nonon co howa nana ma', co ac ca taramaxicon caca na ma'. Xica' to urut pain ca cut in xujuxut. Tomi' xo' ac toton na pain ca taramaja ne ca', pain ca pijim' toton co om judeu nana ma', pain ca pijim' hwet toton pain capijacon Iri' Jam ca tomi' hwet napari' con Jeju. Ma' ta taxi' mahu' pain ca pijim' ta' ca' inonon, ma' ta hohot na ca pijim' nem mahu' quem inonon. Mo xi om hohot cocon ca pijim' ne ca', taramaja ximao ac ta' xira pain ca pijim' toton oro co om judeu nana ta.

³ Om paxi' na ca judeu ca Tito ma', co ja' ja' napa' pain ca hwet toton pane, ane om cuc cuc cocon pain ca wac xirac tatarain taparinain ca xirac nem ta cocon ne.

⁴ Ma' paxi' nana oro xucucun co wac xirac teterem ta nonon Tito. Corom hwet taparu nanaparut pain ca cut in nuxut, mixein nana, ac ca howa iri'o' ta' ca' tara me nana. Tocojin' nanaparut pain ca om tomi' ha' mami' urut pain oro ca xirao' nucun Moisés pane, je pain ca to' witan pin caparut Cristo Jeju pain ca win cwere pin urut con quem. Je xi tomi' ha' cara hwein oro ca xirao' nucun Moisés pane quem nanaparut.

⁵ Om ca ha' camain' urut cocon. Ma' ta om wanan xine ca pijim' mixein wa pain ca pijim' iri'o' wa ta urut cocon. Ma' ta howa cara hwein capijacon Iri' Jam ca iri'o' con Jeju ta urut pahu' quem.

⁶ Hohot na ca pijim' nem, pijim' pijim' tiquin' rain ta nanapa' co querec wet nonon co howa nana pain Jerusalém ma', co ac ca taramaxicon caca ne ma'. Tara cocon, am taramaxicon caca, am om taramaxicon caca. Je i ma' ira ina, xi ac wirico ac wirico pi' pin ara iri' con Iri' Jam ta.

⁷ Je i ma' ta, je ca tomi' xuhu' cocon, tomi' ca' nanapa' co querec wet nonon co howa nana: Hohot na ta nanapa', xi om ne ca querec pin' ara cacapa' pain ca tomi' capa' Iri' Jam ta. Pijim' roron co om judeu nana ta nem Iri' Jam, pijim' roron pain capija con Panxita' ta nem ta nanapa'. Win ne ca pijim' roron oro judeu ta con Pedro cwa' quem nana.

⁸ Iri' Jam ma', co quep xiho' non Pedro pain ca pijim' cocon co judeu nana ma', wirico co quep xiho' napa' pain ca pijim' toton co om judeu nana ma' quem.

⁹ Je ca tomi' cacapa' Tiago con Pedro con João ma', co querec pin' wawa pain ca to' hwara' opa cocon co howa nana ma', querec pin' ac cacapa' na pain ca mi' pan capa' pain ca taramaja wa Iri' Jam cwa'. Tomi' querec te ac cacaparut na, tomi' querec te nanapa', tomi' querec te nonon Barnabé cwa' quem. Taramaja wi iri' ca' ira nanaparut. Wahu', hwet jujun co om judeu nana ma'. Warut iri na ne, hwet ac urut cocon tara co judeu nana cwa'. Ac i ma' tara ca taramaja wi xi' ca' nanaparut. Ma ac urut cocon na quem.

¹⁰ Xica' pe na i ca', pain ca hu cacaparut: Ta ji'am pin huhun co om nonon carawa me ta nanaparut. Wara coromicat ac i ma' ina quem, wara quep xiho' tamana inonon co om nonon carawa.

Ca pan to' cain taraxicon Pedro Paulo

¹¹ Ane ma' pin ne carawa ca to' i'ina naparut pain Antioquia ne. Maqui' iri nain Antioquia Pedro ne, tomi' in pin ac ton na pain iri' tocon. Om ca ara xo' ma ta inon. Em' ma ta inon.

¹² Xi om ne ca pan tem ac i ca' ara ca pane ta: Pain ca xo' hwet caparut pain Antioquia pane, cao' pe ho' taxipa' nonon oro xerexi' co om judeu nana. Maqui' pin iri nanain Jerusalém oro win ma' ca Tiago ne, co cuc cuc nonon co om judeu nana pain ca wac xirac tatarain taparinain ca xirac nucucun ta cocon ma', cao' pe ho' cao' pe ho' om pin ac cocon na co om judeu nana Pedro. Xi jin' ara tococwa co xo' maqui' nana ta.

¹³ Oro xucucun xerexi' co judeu nana ma', an xiho' pin nonon Pedro pain ca ac ca iri'o' ta' ca' tara me ca ma' quem. Querec pin' paxi' nonon pain ca om ara xo' ca ma', ane an xiho' cocon ne. Wirico Barnabé ma' quem, an xiho' pin nonon pain ca mixein nucucun.

¹⁴ Querec pin' iri inonon pain ca om xuruxut xo' nucucun ne, pain ca om tomi' ha' cacain oro ca hu nucun Jeju ca iri'o' ma', ca ara je capari' ma', tomi' in pin ac ton na Pedro. Taraju taraju pi' pin nanapa' pain ca tomi' in pin ton quem. Tomi' ca' inon: Cain' cain' xima quem Pedro, ac i ma' na ca tomi' ton ca'. Judeu paxi' ma, ane om an xiho' mami' momon oro hwanana nexi' co tomi' ha' taxipa' nanain oro ca xirao' nucun Moisés ne. An xiho' pin momon co om judeu nana cwa'. Cain' cain' xima quem? Ac ca cuc cuc momon a xira co om judeu nana ma', ac ca an xiho' jujun oro judeu pain ca tomi' ha' cacain oro ca xirao' nucun Moisés ta momon na. Ac i ma' na ca tomi' in pin ton ma'.

¹⁵ Tomi' tomi' tiquin' ac ton na: Judeu pan iri' pain ca wari' iri' ca', xi om ne ca judeu ara caca mana cotere' cacam waram xi' ta. Om ca an xiho' xuxun oro co om judeu nana ma', co om querec pin' nonon Iri' Jam ma'.

¹⁶ Ac i ma' paxi' iri' pain ca judeu iri' ca'. Ane taxi' xin i ca' ne: Om ca to' hohot capari' Iri' Jam pain ca tomi' ha' taxipa' xin oro ca ara je capari' pain ca xirao' nucun Moisés ma', om na. To' hohot napari' pain ca howa xun Jeju Cristo. Je ca howa iri' con Cristo Jeju pain ca judeu iri' ca' quem. Ma' ta to' hohot capari' Iri' Jam pain ca howa xun Cristo ta iri'. Om ca to' hohot capari' pain ca tomi' ha' xin oro ca ara je capari' pain ca xirao' nucun Moisés ta iri'. Xi to' hohot ac tocwa wari' pain ca tomi' ha' e' cain oro ca ara ra con Iri' Jam pain ca xirao' nucun Moisés ta iri', ac i ma' na ca coromicat nexi' pain ca howa pin xun Cristo Jeju ta.

¹⁷ Jain jain tamana urun Iri' Jam pain ca to' hohot capari' pane, xi om ne ca win cwere ara xun Cristo pain ca howa xun ta urun. Caracat hwe ta ac cacapari' na oro win judeu iri' quem. Win caca oro co om judeu nana ma', co om tomi' ha' nanain oro ca ara je cocon Iri' Jam pain ca xirao' nucun Moisés ta nanapari'. Cain' cain' xirara quem? Wirico Cristo xira co to' caracat napari' ra? Om na ta!

¹⁸ Taraju wet ne e', tomi' pan xije pain ca tomi' ha' tain ca xirao' nucun Moisés pain cara pane. Tomi' ha' inain ira. Querec pin' iri inon Cristo ne, querec pin' iri inain oro ca xirao' nucun Moisés pain ca om to' witan ac capa' ne, an pe pin ac tain na. Mo xi in hwet tain, mo xi tomi' ha' mami' tain, ma' ta witan ta', mo xi coromicat ac i ma' ta', je i ma' xira ca caracat pan ta'.

¹⁹ Tomi' ha' tain paxi' inain oro ca xirao' nucun Moisés pane, ma' ta hohot ton Iri' Jam ta ina pane. Ane om to' hohot pin capa' con ne. Je ca ma' pin capa' xumu ca'. Ac ca mi' pin ca' tain na pain ca an pe pin tain quem, ma' ta tomi' ha' e' ton Iri' Jam pain ca win xumu ton ta ina.

²⁰ Ac ca mi' pin wi ta' na con Cristo quem, pain ca mi' pin pe cain panaxicon pane. E' e' wet paxi' ina, ane om e' pan ta' ne. Wirico Cristo co e' pe ho' napa' pain cwere. Tomi' ha' e' inain ca param nucun. Pain ca e' e' wet ta' pain macan' ca', howa cara inon Panxica Iri' Jam co om noc napa' cwa', co om nain ho' xucun pata' pain ca mi' pin caho' xim ta capa' ca'.

²¹ Om ca miri'om ton Iri' Jam pain ca xiram pa' e' capa' quem, om na. Mo xi to' hohot capari' ca tomi' ha' xin ca xirao' nucun Moisés ma', je i ma' xira ca mi' pin ximao ca Cristo ta.