Gálatas 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Apóstolo ina, xi om ne ca tomi' hwet rain capija ara capa' Jeju Cristo ta. Om ca wari' caca co apóstolo ra nanapa', om ca wari' ca co mi' napa' pain ca taramaja ne pain ca apóstolo ta' ca' quem, om na. Wirico Jeju Cristo co apóstolo ra napa'. Wirico Cotere' Iri' Jam ma', co to' e' mami' non Jeju pane, wirico co apóstolo ra napa' ta.

² Xirao' mi' inuhu' pain ca howa hun Jeju ma', pain ca cut in xujuhu' pain Galácia ma'. Mam' pe wet urut cocon ta nunuhu' oro xerexi' co to ho' nanapa' cwa' quem.

³ Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

⁴ Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

⁵ Hohot na pain ca tomi' querec te cara xun Iri' Jam co awi tamana ta! Amém, iri'o' na ca tomi' ne ta.

Ca ma' xica' pe ne capijacon Iri' Jam ca tomi' hwet napari' con Jeju

⁶ Wa inuhu' pain ca an pe hap pin hun Iri' Jam ma', co tora' nuhu' pane. Om xi tora' cuhu', ane xiram pa' e' cuhu' Cristo ne. Je xi om howa ni ca' hwein capijacon Iri' Jam ca tomi' hwet napari' con Cristo quem? Ac ca howa hwein na xijein topac ca tomi' hwet napari' con Cristo ta!

⁷ Xi ma' ne xijein capijacon Iri' Jam ca tomi' hwet napari' con Cristo ta. Tomi' e' inain i ma' pahu', pain ca xijein capijacon Iri' Jam con Cristo ta xuhu' ca', xi om ne ca ma' ara caca wari' co to' i'ina nunuhu' ma', co pijim' jimama' nunuhu' pain ca an in xin paxi' cacain capijacon Iri' Jam con Cristo ma'.

⁸ Taraju wet xine e'. Oro wari' co pijim' ni ca' nanain capijacon Iri' Jam ca pijim' urut pahu' pane, tomi' noro ac tococwa tara ta. Am warut xira, mo xi pijim' ni ca' urut pain capijacon Iri' Jam ca wara pijim' urut pahu' pane, tomi' noro ac caparut xira Iri' Jam. Am jam co taramaja mi' non Iri' Jam ma', co maqui' nain pawin cain xira, mo xi pijim' ni ca' cain capijacon Iri' Jam ca wara pijim' urut pahu' pane, tomi' noro ac tocwa xira quem.

⁹ Je ca tomi' urut pahu' pain cara pane. Tomi' mami' inuhu' pain xocori ca' quem. Wari' co pijim' ni ca' nuhu' pain capijacon Iri' Jam con Cristo ma', pain ca pijim' ni ca' cain capijacon Iri' Jam ca wara howa hwe pane, na e' na pain ca tomi' noro tocwa ta!

¹⁰ Cain' ca coromicat mi' mahu' pain ca xirao' mi' ac i ca' xuhu' ca' quem? Tomi' querec te xirarapa' na nonon oro wari' ta mahu' ra, ac i ma' na ca coromicat mi' mahu' quem? Om na ta! Tomi' querec te pan xirapa' Iri' Jam na ina. Mo xi win xumu toton oro wari' pain ca tomi' querec te pan tatarapa' ta toton ca', mo xi coromicat ac i ma' ta', om xi ha' capa' pain ca taramaja mi' ton Cristo. Taramaja mi' e' xitoton oro wari'.

¹¹ Je ca tomi' xuhu' ca' xere, taraju pa' jein ca tomi' xuhu' ca'. Capijacon Iri' Jam ca pijim' xuhu' con Jeju Cristo cwa', om ca maqui' nein ca coromicat nucun wari'.

¹² Om ca wari' ca co tomi' hwet napa' pain. Om ca wari' ca co tomi' xo' napa' pain. Wirico Jeju Cristo co an hwet mi' napa' pain ta.

¹³ Wara taraju mahu' pain oro ca ara ta' pain cara pane, pain ca tomi' ha' taxipa' tain oro ca tomi' ha' caca oro win judeu ta' pane. Taxi' mahu' pain ca ja' tequi' ja' tequi' quep em' toton oro wari' nucun Iri' Jam co cut in xucucun pain ca howa cocon Jeju pane. Om ca xiram pa' camain' toton, howa maho' jun Jeju ta inonon, to' om to' om pi' pin toton ta inonon ira.

¹⁴ Tomi' ha' taxipa' inain oro ca xirao' nucucun oro hwanana ne pane. Ma' nana oro win judeu ta' co win camara' nanapa' pain ca pije' nuxut pane quem, ma' paxi' nana co tomi' ha' taxipa' nanain quem. Ane tomi' ha' tiquin' ca' toton pain oro xucucun win judeu ta' ne. Jain jain tamana ina pain ca tomi' ha' tomi' ha' pi' pin tain oro ca xirao' nucucun hwanana nuxut pane.

¹⁵ Ane xiram pa' pan capa' Iri' Jam ne. Wara tora' napa' pain ca pe pe wet tain monocwam na' pane, pain ca om pan' querec ta' pane. Wara taramaja mi' ne ta napa' pane. Om xi tora' capa', xi iri' wari' ta' ta. Ane xiram pa' pan capa' ne. Maqui' pin iri na xec nein

¹⁶ ca an hwet mi' xim capa' con Panxica ne, mi' ac capa' na pain ca querec pin' ton pain iri' xumu ca'. Ma' ta pijim' hwet momon con oro wari' co om judeu nana ta napa'. Tomi' ac i ma' iri napa' ne, om ca pirao' camain' ton wari' pain ca cain' cain' xita' ne ton, om na.

¹⁷ Om ca mao hap tain Jerusalém, om ca hwet toton co wara apóstolo ca' nanapa' quem, om na. Mao e' inain macarain Arábia cain. Aram aram in mao ac tain na Damasco ma', je i ma' wixinain cidade ca mao ta' pane.

¹⁸ Ma' 3 pin iri napa' cawaxi' pain ca howa ton Jeju ne, mao ac tain na Jerusalém. Querec ton Pedro ta ina, hwet ac ton na, ma' 15 ac ne na xec pain ca pe ho' ton pane.

¹⁹ Querec inon Tiago coxa' ca Taramaxicon nexi' quem. Om ca querec toton oro xucucun apóstolo, xica' to ac caca na caram ma' Pedro con Tiago co querec ta' pain ca xo' mao tain Jerusalém pane.

²⁰ Iri'o' na ca xirao' mi' xuhu' ca', taxi' napa' Iri' Jam pain ca om mixein xuhu' ca'.

²¹ In ca' iri inain Jerusalém ne, mao ac tain na macarain Síria je macarain Cilícia ma'.

²² Om ca querec pin' querec cacapa' oro co howa nonon Cristo pain oro xijein cidade pain Judeia pane, om om wet na ca querec cacapa' pain tucu pane.

²³ Taraju e' nanain ca tomi' nucucun oro co howa nana pane, pain ca tomi' hwet xucucun pata'. Wirico co ma' wari' co ja' tequi' quep em' napari' pain ca howa xun Jeju pane, howa maho' jun Jeju ta paxi' napari' pane, ane pijim' pin cain capijacon Iri' Jam con Jeju pain xocori ca' ne na ca tomi' hwet xucucun pata' pane.

²⁴ Tomi' querec te tamana ac cocon na Iri' Jam pata'. Awi na Iri' Jam, to' howa pin non Paulo ta nana pata'.