Filipenses 4 - Tradução Bíblica Pacaas Novos

¹ Je ca tomi' xuhu' pain ca tomi' querec te xuhu' ca' xere. Coromicat tamana inuhu'. Ja' tomi' querec te mahu' quem. Taraju iri inuhu' pain ca xuruxut xo' nuhu' ne, tomi' querec te tamana ac ta' na. Mija na ca om noc xuhu' ta! Je ca tomi' xuhu' ca': Hwara' opa cara je pain ca howa hun Taramaxicon nexi' ta.

Ca hu tococwa

² Hu xim inem Evódia. Wum quem Síntique, hu xim inem quem. Tomi' querec te xujuhu' me. Ac ca xica' pe ne tara ca coromicat nuhu' pain ca win cwere hun Taramaxicon nexi' ta.

³ Wum co taramaja wi taxipa' napa' pain ca taramaja ne pane, tomi' xim inem quem. Quep xiho' raram, ma' ta tomi' querec te mami' xequequem. Xi wara quep xiho' tamana ara cacapa' pain ca taramaja ne pane ta. Wiricacam, wirico Clemente, wiricoco oro xucucun co quep xiho' nanapa' pane, pain ca pijim' hwet tain capijacon Iri' Jam con Jeju pane, xirao' to ta wixicacam pain tapari carawa ca xirao' to xine wixicocon oro co e' cara xi' nana quem.

⁴ Tama' tomi' querec te je me, xi om ne ca win cwere ara hun Taramaxicon nexi' ta. Tomi' mami' inuhu': Tomi' querec te je me.

⁵ Tomi' toto e' jujun oro wari', querec pin' querec pin' pi' pin tuturuhu' pain ca tomi' wixite nuhu'. Wixicam pin ara xi' na ca in qui' nucun Taramaxicon nexi' ta.

⁶ Ta toron camain' ne xumuhu' pain oro carawa me. Tomi' hwet e' jun pain Iri' Jam ta. Tomi' xun iri hun ne, tomi' hwet tomi' hwet pi' pin ac hun tara pain. Xiram pa' xut pain jun. Tomi' querec te jun pain ca xiram pa' xut pain hun quem.

⁷ Mo ta tomi' ac i ma' hun pain Iri' Jam ma', to' om pin ac cain tara ca toron ne xumuhu'. Om ca mam' camain' tocwa wari' co to' om ac i ma' nain ca toron ne ca xumu wa ta, om om na. To' om pin iri tarain ca toron ne xumuhu' ne, querec wet ac cain tara quem. Ac ca narain ho' cain tara pain oro ca toron ximao wa. Mi' turuhu' pain ca coromicat xo' wa quem, xi om ne ca win cwere ara hun Cristo Jeju ta.

⁸ Tomi' xim inuhu' pain i ca' quem xere: Coromicat e' jein oro ca iri'o' wa pain ca om mixein wa ma'. Coromicat e' jein oro ca hohot ma'. Coromicat e' jein oro ca ara xo' wa ma'. Coromicat e' jein oro ca om pan tem wa ma'. Coromicat e' jein oro ca om noc wa ma'. Coromicat e' jein oro ca om tomi' napat wa ma'. Oro ca awi ma', oro ca hohot ne pain ca in ac iri', je i ma' tara ca coromicat e' hwe.

⁹ Tama' ara jein oro ca ca' na xuhu' ca'. Tama' ara jein oro ca xin ne mahu' pain. Tama' ara jein ca taraju hwe pata', je pain ca querec mahu' pain oro ca ara ne ca' quem. Ara taxipa' jein. Pe ho' ac cuhu' tara Iri' Jam co to' om pin nain ca toron ne ximixi' quem.

Ca tomi' querec te tococwa pain ca quep xiho' cocon

¹⁰ Tomi' querec te tamana inuhu' pain ca xiram pa' mami' mahu' pain xocori ca', pain ca quep xiho' mahu' ca'. Tomi' querec te inon Taramaxicon nexi' pahu'. Wara xiram pa' paxi' mahu' pane, taxi' inuhu' pain. Ane om an hwet mi' mami' ac mahu' pain ne.

¹¹ Pain ca tomi' ac i ma' xuhu' ca', om ca xiram pa' xirarapa' pain ca ximin ne na xuhu', om na. Tomi' hwet e' inuhu' pain ca coromicat ne ca'. Xi om ne ca taxi' pin ara ton Iri' Jam pain ca querec wet pan capa' ta. Ma' iri napa' carawa ne, tomi' querec te ac ta' na. Om iri napa' carawa ne, tomi' querec te ac ta' na quem, je je ari na pata'.

¹² Wara ma' napa' oro xec pain ca ximin ta' pain ca om capa' carawa pane, wara ma' napa' oro xec pain ca mija capa' carawa pane quem. Taxi' inon Iri' Jam pain ca ja' tomi' querec te capa' pain oro ca ara napa'. Ja' tomi' querec te napa' pain ca ma'am ta', ja' tomi' querec te napa' pain ca pe' ta' quem. Ja' tomi' querec te napa' pain ca ma' capa' carawa, ja' tomi' querec te napa' pain ca ximin ta' quem.

¹³ Quereme quereme pi' pin inain oro ca ara napa', xi om ne ca wirico ara ca co to' hwara' opa napa' ta.

¹⁴ Ane hohot tamana capa' pain ca quep xiho' mahu' ne, pain ca xiram pa' mahu' pain oro ca to' i'ina napa' ca'.

¹⁵ Wara taxi' hwein i ca' quem: Wahu' pain ca cut in xujuhu' pain Filipos ma', pain ca xo' taraju ten qui' hwein capijacon Iri' Jam con Jeju pain cara pane, xica' to hwe pain ca quep xiho' mahu' pane. Pain ca xo' paca' qui' tain macarahu' pane, pain Macedônia ma', xica' to hwe pain ca xiram pa' mahu' pane. Oro co cut in xucucun pain ca howa to cacain oro xijein cidade pain Macedônia ma', om ca quep xiho' cacapa'. Xica' to hwe pain ca quep xiho' mahu'.

¹⁶ Om pin iri napa' carawa pain ca pe qui' tain Tessalônica pane ne, quep xiho' ac mahu' na, mam' ac mahu' na pain carawa, aram aram mam' mami' ac mahu' pain na quem.

¹⁷ Tomi' hwet e' inuhu' pain, om ca mam' mami' xine pain carawa me xuhu' ca', om na. Param e' inon Iri' Jam pain ca ara mi' tamana cuhu' pain ca awi wa, xi om ne ca quep xiho' ara mahu' ta.

¹⁸ Je ca tomi' xuhu' ca'. Epafrodito cwa', mi' napa' pain carawa ca mam' mahu' con. Cut mi' cut mi' pi' pin napa' pain, moin' pin napa' quem. Ma' pin napa' oro carawa ca param ta', ma' tiquin' ca' napa' pain ca param ne. Carawa ca mam' mahu' ca', mi' pan hun pain Iri' Jam quem. Hohot tamana non pahu', tomi' querec te tamana nuhu' pain quem.

¹⁹ Iri' Jam ne cwa', co taramaja mi' ta' cwa', mija tamana na oro caramaxicon. Je ca ha' con pain ca mi' mi' pi' pin xim cuhu' pain oro ca param nuhu' pain ca ximin nuhu' ma'. Xi om ne ca win cwere ara hun Cristo Jeju ta.

²⁰ Na e' na pain ca tomi' querec te xun Cotere' Iri' Jam co awi tamana cara ta! Amém, iri'o' na ca xirao' ne ta.

Ca pi' pin ne ca xirao' nucun Paulo

²¹ Mam' pe wet mam' pe wet pi' pin inuhu' pain ca wari' nucun Iri' Jam hwe ma', pain ca win cwere hun Cristo Jeju ma'. Tomi' tomi' pi' pin nunuhu' oro xerexi' co to ho' nanapa' pain i ca' quem: Mam' pe wet urut cocon ta nunuhu'.

²² Oro wari' nucun Iri' Jam cwa', wiricoco co taramaja to nanain xiricon taramaxicon César ma' quem, mam' pe wet urut cocon ta nunuhu'.

²³ Param inon Taramaxicon nexi' Jeju Cristo pain ca quep xiho' cuhu' ma', pain ca mi' e' cuhu' pain ca param nucun pain iri' xumuhu' ta. Amém, iri'o' na ca xirao' ne ta. Je i ca' ca xirao' ne ca'.