Filipenses 3 - Tradução Bíblica Pacaas Novos

Ca tomi' querec te je tococwa

¹ Tomi' xim inuhu' pain i ca' quem xere: Tomi' querec te je, xi om ne ca win cwere ara hun Taramaxicon nexi' ta. Ca xirao' mi' xuhu' ca', xirao' mi' paxi' inuhu' pain. Ane om horoman capa' pain ca xirao' mami' xuhu' pain ne. Quep xiho' turuhu' ca xirao' ne ca' quem, to' hwara' opa turuhu' pain ca ari huhun co pijim' mixein xim nunuhu' ta.

² Ma' tara xumuhu' cocon caram ma' co an xiho' nonon caxicon oromijac ma', co pan teretem nana ma', co tomi' ximama' nonon co om judeu nana pain ca wac xirac jein taparinain ca xirac nuhu', ma' ta wari' nucun Iri' Jam pin hwe ta cocon ma'.

³ Xi iri' wari' nucun Iri' Jam pan caca ta. Wari' pan, pain ca howa xun Cristo cwa', wari' co iri' wari' ne ca Iri' Jam ta. Tamataracon pan ca mi' napari' pain ca in ac xun ca'. Tomi' querec te pan urun Cristo Jeju co to' wari' nucun Iri' Jam napari' quem. Om ca howa camain' xin carawa ca ara pan iri' ca', om na.

⁴ Hohot paxi' xira pain ca coromicat mi' ca' xije: Wari' nucun Iri' Jam ina, xi om ne ca tomi' ha' cara ara tain oro ca ara ra capa' ta, hohot paxi' xira pain ca coromicat mi' ac i ma' xije. Ma' ara xi' nana co coromicat ac i ma' nana quem, xi om ne ca tomi' ha' ara cacain oro ca ara je cocon Iri' Jam ta. Je xi coromicat ac i ma' ta' quem? Xi om ne ca tomi' ha' tiquin' ca' ara toton pain oro ca ara ra capa' Iri' Jam ta. Ca' paxi' ina pane:

⁵ Wac xirac nanain taparinain ca xirac ne pain ca pije' ne pane, pain ca 8 pin capa' xec pain ca xo' pan' qui' ne pane. Iri' wari' nein Israel ina quem. Iri' hwanana ne nonon Benjamim waram jeo' pane quem. Iri' hebreu ina. Fariseu ina quem, tomi' ha' xo' inain oro ca xirao' nucun Moisés pane.

⁶ Win xumu tamana inain ca howa nuxut pain ca judeu urut ca', pain ca tomi' ha' jein ca xirao' nucun Moisés ta toton oro win ma' ne. Je ca ja' tequi' ja' tequi' quep em' toton oro judeu co howa pin nonon Jeju pane quem. Tomi' ha' inain oro ca xirao' nucun Moisés pane, om ca hwet camain' ne wuxu pain ca om tomi' ha' wa quem.

⁷ Quep xiho' tamana napa' xi' ma inain oro i ma' pane ira, ac i ma' paxi' na ca coromicat ne pane. Ane querec pin' tain pain xocori ca' ne. Om ca quep xiho' capa' oro ca tomi' ha' tain ca xirao' nucun Moisés ma', quep xiho' e' napa' Cristo ta.

⁸ Om ca noc xica' pe tain oro ca ara ta' cocon hwanana ne pane, noc noc pi' pin inain oro ca hohot napa' pane quem, xi om ne ca hohot tamana pin ara capa' Taramaxicon ne Cristo Jeju ta. Noc pin inain, om ca howa mami' tain oro ca ara ta' pane. Ac oro carawa ca wixicaracao' pin wa ma' napa', noc pin inain ta. Ma' ta iri' wari' nucun Cristo ta' ina, ac i ma' pin na ca coromicat ne ca'.

⁹ Win cwere ton ta inon quem. Om na ca xirao' nucun Moisés ca to' hohot napa' con Iri' Jam ta, om na. Wirico Iri' Jam pan co to' hohot pin napa', xi om ne ca howa ara ton Cristo ta. Howa inon Cristo, je ca to' hohot pin capa' Iri' Jam.

¹⁰ Querec pin' xiton na inon Cristo ta, je ca param ta' ca'. Mi' xirapa' na inon pain ca hwara' opa nucun ca pe ho' non pain ca to' e' mami' tocwa pane. Jain jain wi xiton na ina pain oro ca to' i'ina non pane, ac wirico pain ca mi' pin nucun xita' na ina quem.

¹¹ Ma' ta e' mami' ta' ta ina quem. Je ca howa ta' ca'. Mi' pin iri ta' ne, e' mami' ac ta' tara ta.

Ca win xumu cara jun Cristo Jeju ta tococwa

¹² Taxi' paxi' xije pain ca om om wet capa' oro ca ara mi' xim capa' Cristo Jeju cwa'. Om om wet paxi' na ca to' iri' wari' pin capa' quem. Ane win xumu cara ton ta' ne. Ma' ta aram aram ac wirico ta' ta ina. Je ca param mi' capa', je ca wari' ne capa' ca' quem.

¹³ Tomi' ca' inuhu' ta xere: Om ca coromicat mi' xije pain ca ma' pin capa' oro ca ara mi' xim capa' ca'. Om ca coromicat mi' xije pain ca iri' wari' pin ta' ca' quem. Ma' xica' pe na carawa ca ara ta' ta' ca': Om ca mam' pe wet mami' tain oro carawa ca ara napa' pain cara pane. Win xumu e' inain oro carawa ca ara xim napa'.

¹⁴ Win ca wari' co mo ma', pain ca jein hwet xin tawiri wana cocon oro win ma' ca ma'. Om ca noro in cain waracon. Mo mip e' na, hwet cain' tain tawiri wana, ma' ta an tain carawa ca awi ta na. Ac i ma' ina quem. Win xumu e' inon Cristo Jeju, ma' ta aram aram mi' xim capa' pain ca param nucun Iri' Jam pain pawin ina.

¹⁵ Je ca tomi' xuhu' ca'. Wari' pain ca ximicon hwanana iri' con Cristo cwa', coromicat ac i ma' coromicat ac i ma' xam' ac iri' tara ta. Tara pahu' pain ca coromicat jimama' hwe ma'. Mo ta coromicat jimama' hwe, main mi' turuhu' pain ca coromicat xo' wa Iri' Jam quem.

¹⁶ Xuruxut xo' xi'. Tomi' ha' tomi' ha' tiquin' xun Iri' Jam. Win ne ca wara tomi' ha' je capari' pain cara pane.

¹⁷ An xiho' an xiho' pi' pin xine pain ca xut xo' ne ca' xere. Querec pin' jujun co an xiho' nanaparut pain ca xuruxut xo' nuxut ca an hwet mi' urut pahu' ca'.

¹⁸ Xi mija ara caca co xuruxut pan teretem nana ma'. Xuruxut an xiho' ara xi' nonon co noc nonon Cristo ma', pain ca pijim' hwet tocwa pain ca mi' pin pe cain pana pane. Wara hu inuhu' cocon pane, hu ho' hu ho' inuhu' cocon pane. Tomi' xaxa' ina cocon, aca xoc ina pain ca hu mami' xuhu' cocon ca'.

¹⁹ Mama' tatarain cote ne xe, xi om ne ca win xumu ara cacain ca param pan nucucun ta. Ac ca iri' jam ne cacain na ca param pan nucucun. Xec xec nana pain ca pan teretem nucucun, xi wixipa' pan caca pain ta. Coromicat e' nanain oro caramaji macan'.

²⁰ Ane om ac i ma' iri' ne. Wari' nein pawin iri', je i cain ca pe ne iri' macaraxi'. Maqui' tarain i cain Taramaxicon nexi' Jeju Cristo co to' witan napari'. Winim' urun, jain jain urun pain ca maqui' ta' nucun.

²¹ To' jimama' tarain oro cwerexi' ca om hwara' opa ca', ca cono' taxipa' ca'. An xiho' ac xin tara curucun ca awi tamana ma', ca om mi' pin camain' ma'. To' jimama' tarapari' pain iri' ca hwara' opa nucun. Ha' toron pain ca to' jimama' capari' quem, xi om ne ca to' jimama' xim ara capari' pain ca hwara' opa nucun ca mam' taramaxicon pe ho' tococwa oro wari' je oro carawa ta.