Filipenses 2 - Tradução Bíblica Pacaas Novos

Ca om xec xec nucun Cristo Jeju

¹ To' hwara' opa napari' Cristo, xi om ne ca win cwere ara xun ta. Ta noc xujuhu' me napari'. Jao jao ma' xijexi' pain ca pe ho' capari' Tamataracon Iri' Jam. Xiram pa' tamana napari' quem.

² Je ca tomi' xuhu' ca', ac je ac je ari tara ca coromicat nuhu'. Ta noc xujuhu' me. Ac ca xica' pe ne tara xumuhu' pain oro ca coromicat nuhu', ac je ac je ari tara ca coromicat nuhu' pain ca om noc xujuhu' ma' quem. Mo ta ac i ma' hwe, ja' tomi' querec te tamana ac mahu' tara ta.

³ Ta win xumu e' hwein ca param nuhu' pain oro ca xuruxut nuhu' me. Ta coromicat ca' hwe me: Querec pin' tatarapa' oro wari' pain ca xut xo' ne ta, ta coromicat ac i ma' camain' hwe me ta. Ta xec xec hwe me. Coromicat ca' je: Awi ca' nanapa' oro win ma' ne cwa', ac i ma' tara ca coromicat nuhu' ta.

⁴ Je ca tomi' xuhu' ca', tomi' tomi' xam' inuhu': Ta win xumu e' hwein ca param pan nuhu' me. Win xumu jein ca param nucucun oro win ma' hwe ma' quem.

⁵ Ca coromicat nuhu' ma', an xiho' e' tarain ca coromicat nucun Cristo Jeju ta.

⁶ Iri' Jam paxi' na Cristo pain iri' ximicon pane, ane om jain jain cain ca hwara' opa nucun ne. Om ca coromicat ca' ca: Om ta wari' pin ta' ta, xi Iri' Jam ara ta' ta, om ca coromicat ac i ma' camain' ca pane.

⁷ Coromicat ca' e' na: An pe pin tain ca ac Iri' Jam wa ta na. Wari' pin ta' ta na. Ac wari' co taramaja mi' e' non xucun wari' pin ta' ta na.

⁸ Pain ca wari' pin ca ma', tomi' ha' cara non Cote ca pain ca om xec xec nucun. Xin ne pan non pain ca to' pa' pin teterem ta con. Om ca nain ho' pan xucun pain ca tomi' noro tocwa ma', pain ca tatatain mi' tocwa pain pana pane.

⁹ Je ca mi' con pain iri' ca hwara' opa wa Iri' Jam ta. Mi' non pain ca iri' ca Taramaxicon pin wa. Om na xucun co win Taramaxicon ca quem.

¹⁰ Ma' ta pe torotop mi' cocon oro wari' ta na Iri' Jam. Co to nanain pawin cain, co to nanain macan' ca', co wara cono' nana quem, pe torotop mi' pe torotop mi' pi' pin totoron Jeju.

¹¹ Querec pin' totoron pain ca hwara' opa nucun quem. Iri' Taramaxicon na Jeju Cristo ta tatara oro wari' pain oro xijein macan'. Ac i ma' tara ca an hwet pe cacain ca awi nucun Cotere' Iri' Jam ma' quem.

Ca an hwet jein ca howa nuhu' tococwa

¹² Je ca tomi' xuhu' pain ca tomi' querec te xuhu' ca'. Pain cara pane, pain ca pe ho' xuhu' pane, tama' tomi' ha' hun Iri' Jam. Je ta tomi' ha' mip qui' hun pain ca pe ni ca' xuhu' pain xocori ca' quem. Tiquin' ca' tarain ca wara tomi' ha' nuhu' ta, win xumu mip jun pain ca tomi' ha' tamana nuhu'. An hwet pe jein ca xuruxut xo' nuhu', ma' ta querec pin' cucuhu' oro wari' pain ca to' witan pin cuhu' Iri' Jam. Querec pin' tuturuhu' pain ca in ac tamana hun quem.

¹³ Xi om ne ca wirico Iri' Jam ara ca co mi' nuhu' pain ca tomi' ha' xixi' na wa ma', wirico co mi' nuhu' pain ca ara hwein iri' ca param nucun quem.

¹⁴ Ara xo' jein oro ca ara hwe pain ca tomi' ha' hun Iri' Jam. Ta tomi' wijimi hwe pain me, ta tomi' mana' xujuhu' pain me.

¹⁵ Ma' ta querec pin' xihwe pain ca xumu xo' nuhu' ma', pain ca om hwet ne wuxuhu' pain ca caracat wa ma'. To ho' paxi' huhun oro caracat co pan teretem nana ma', co ara taxipa' nanain oro ca om awi wa ma'. Ane om hohot camain' ne pain ca ma' cuhu' oro ca to' em' nuhu' pain ca caracat wa pain ca mana panxica Iri' Jam hwe ne. Ac oro pijo' co toha to nain pawin je. Ac ca toha mi' huhun tara pain naran ma', to' querec pin' jujun pain ca xuruxut xo' wa ta.

¹⁶ Tomi' hwet cara jujun pain capijacon Iri' Jam ca to' e' napari' ca'. Mo ta ac i ma' hwe, tomi' querec te tamana ac xuhu' tara pain xec nein ca in qui' ta' nucun Cristo. Taxi' ac xije tara pain ca om taramaja taramaja jam' pin ximao ta' ca' pahu'.

¹⁷ Pain ca howa hun Iri' Jam ma', ac ca mi' hun na pain carawa ca awi ca hohot non ma'. Mo ta param mi' capa' pain ca mi' pin wa pain ca pijim' xuhu' pain capijacon ca', mo ta quep xiho' cuhu' pain ca howa nuhu' ca mi' pin ne quem, je i ma' ira ina, mi' pin ma' ta' ne pahu' ta ina. Ac ca mi' wi xun tara pain carawa ca awi Iri' Jam quem. Tomi' querec te tamana ac ta' tara pain ca howa nuhu', tomi' querec te wi ac xuhu' tara quem.

¹⁸ Je ca tomi' xuhu' ca'. Tomi' querec te je quem, tomi' querec te wi xi' ta.

Timóteo con Epafrodito

¹⁹ Param inon Timóteo pain ca hwet xim cuhu' ta. Mo ta tomi' ron ta capa' con Taramaxicon nexi' Jeju ma', tomi' ac ton tara, hwet roron ta ac ton tara pahu', ma' ta ja' tomi' querec te capa' pain ca aram aram pijim' hwet xim capa' pahu' ta ton pahu'.

²⁰ Xi om ne ca toron tamana ara ne ximicon pain ca xiram pa' iri'o' cuhu' ta. Om napa' xucun co an xiho' non pain ca quep xiho' xitoton na cuhu' ma'.

²¹ Oro xucucun cwa', win xumu win xumu pi' pin nanain oro ca param pan nucucun. Om ca win xumu cacain ca param pan nucun Jeju Cristo.

²² Ane querec pin' hun Timóteo ne. Taxi' hun pain ca taramaja xo' nucun ca', pain ca quep xiho' capa' pain ca pijim' wi urut pain capijacon Iri' Jam con Jeju. Win ca co xo' ho' tarama' ma', co taramaja wi non cote ca ma', ac i ma' na ca taramaja wi capa' Timóteo pain ca tomi' hwet urut cocon oro wari' con Jeju.

²³ Je ca param ton pain ca hwet xim cuhu' ma'. Taxi' pin iri tain carawa ca ara xim napa' ca' ne, tomi' ac ton tara, hwet roron ta ac ton tara pahu'.

²⁴ Ane howa ton Taramaxicon nexi' pain ca mi' xim capa' pain ca hwet pan xuhu' ne. Om ta om om ta', hwet xuhu' ta.

²⁵ Coromicat ca' ina con coxari' Epafrodito cwa', co quep xiho' napa' pahu'. Taramaja wi napa', ari wi urut cocon oro wari' co noc nonon Cristo cwa'. Wara mam' paxi' mahu' con pane. Hwet ron, quep xiho' ron ta hun pain cara pane. Quep xiho' paxi' napa' pain oro ca to' i'ina napa' ca' quem. Ane na e' ne pain ca in hwet roron oro win ma' nem ta ton pahu' ne.

²⁶ Xi om ne ca coromicat pan ara cuhu' ta. Coromicat coromicat pi' pin nuhu', toron tamana na ximicon pahu', xi om ne ca taraju ara hun pain ca caxi nucun pane ta.

²⁷ Tomi' iri'o' ina quem, caxi na pane, mi' pin na ira. Ane xiram pa' con Iri' Jam ne. Om ca xiram pa' xica' pe con, xiram pa' napa' quem. Ma' ta om hwara' tiquin' hwara' tiquin' ne ca tomi' xaxa' nem ta napa'.

²⁸ Je ca tomi' ho' ton ta' ca', in hwet roron oro win ma' nem ta ton pahu', ma' ta tomi' querec te hwe pain ca aram aram querec mami' hun ma' inuhu'. Ma' ta wa pin capa' xumu con ta inon quem.

²⁹ Je ca tomi' xuhu' ca'. Tomi' querec te jun. Win ne ca tomi' querec te tamana xijexi' pain ca howa wi xun Taramaxicon nexi' cwa', ac i ma' tara ca tomi' querec te tamana hun ta. Querec pin' querec pin' xam' jujun oro wari' co an xiho' nonon.

³⁰ Xi om ne ca win xumu ara con Cristo ta. Je ca mi' pin ta' ca ira. Om iri na ca ha' cuhu' pain ca quep xiho' pan mahu', quep xiho' pan ac capa' na. Om ca nain ho' cain curucun pain ca quep xiho' xim ta capa' pahu'.