Filipenses 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Wirico Timóteo cwa' quem, xirao' mi' urut pahu'. Wari' nucun Cristo Jeju urut pain ca taramaja mi' urut con ca'. Xirao' mi' xirao' mi' pi' pin urut pahu' pain ca wari' nucun Iri' Jam ma', pain ca win cwere hun Cristo Jeju hwe ma', pain ca to hwein Filipos ma'. Wahu' pain ca pastor hwe pain ca querec wet huhun oro co howa nana ma', wahu' pain ca diácono hwe ma' quem, xirao' mi' urut pahu' quem.

² Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Ca tomi' mi' tococwa con Iri' Jam, je pain ca tomi' querec te urut con Iri' Jam pahu' ta tococwa quem

³ Mam' pe wet iri inuhu' ne, tomi' querec te taxipa' ac ton na Iri' Jam ne pahu'.

⁴ Pain oro ca tomi' ton Iri' Jam cwa', tama' tomi' querec te inon pain ca tomi' mi' xuhu' con,

⁵ xi om ne ca quep xiho' ara mahu' pain ca pijim' tain capijacon Iri' Jam ca tomi' hwet napari' con Jeju ta. Wara quep xiho' mahu' pain cara pane, pain ca xo' howa ten qui' hwe pane, quep xiho' quep xiho' wet mahu' pain xocori ca' quem.

⁶ Wara meo nain xumuhu' Iri' Jam pane, wirico co ara nain ca awi wa pain xumuhu' ma', pain ca to' xocoricon wari' pin cuhu' ma'. Taxi' inon pain ca meo meo tiquin' tain cain xumuhu' quem. Aram aram maqui' pa' ac cuhu' tara xec nein ca in qui' ta' nucun Cristo Jeju ma', awori pin ac ne tara oro ca awi wa ca ara pe cain xumuhu' ma' quem.

⁷ Ac i ma' na ca coromicat mi' coromicat mi' pi' pin xuhu' ca'. Hohot na quem, xi tomi' querec te ara xuhu' pain iri' xumu ta. Taramaja wi iri', xi om ne ca quep xiho' quep xiho' xam' ara mahu' pain ca taramaja ne ca mi' capa' Iri' Jam ta. Quep xiho' mahu' pain ca tao' pe cacapa' pain xirinain ca tao' to tao' to to wa ca', quep xiho' mahu' pain ca tomi' xo' toton co tomi' napat nanain capijacon Iri' Jam ca tomi' hwet napari' con Jeju cwa', je pain ca tomi' tomi' na pin toton pain ca iri'o' nein ca' quem.

⁸ Mija na ca coromicat xuhu' ta, jain jain inuhu'. Tomi' iri'o' ina, taxi' napa' Iri' Jam pain ca coromicat tamana xuhu' ca'. Tomi' querec te tamana inuhu'. Win ne ca tomi' querec te tamana cuhu' Cristo Jeju cwa', ac i ma' na ca tomi' querec te xuhu' ca'.

⁹ Je i ca' ca tomi' ton Iri' Jam pain ca tomi' mi' xuhu' con: To' hwara' pin rain ca tomi' querec te cara xucucun ta inon pahu'. Mi' roron pain ca querec pin' quequem, je pain ca taraju pa' taraju pa' pi' pin cacain oro ca param nem quem inon pahu'.

¹⁰ Ma' ta querec pin' cacain iri' ca xuruxut xo' wa ta inon pahu'. Ma' ta om pan teretem caca, ma' ta om ma' camain' cocon oro ca to' em' nonon pain xec nein ca aram aram in qui' ta ca Cristo ma' inon pahu'.

¹¹ Ma' ta ara taxipa' cacain oro ca awi wa ta inon pahu'. Wirico tara Jeju Cristo co mi' nuhu' pain oro ca ara xo' wa ma'. Querec pin' ac tocwa tara Iri' Jam pahu', pain ca hwara' opa nucun, je pain ca awi tamana nucun quem.

Ca pijim' pijim' tiquin' xine capijacon Iri' Jam, xi om ne oro ca ara non Paulo

¹² Je ca tomi' xuhu' ca' xere, taraju pa' jein ca tomi' xuhu' ca'. Oro carawa ca ara napa' pain xirinain ca tao' to tao' to to wa ca', om paxi' na ca to' i'ina capa'. Xi om ne ca pijim' tiquin' ara xine capijacon Iri' Jam ca tomi' hwet napari' con Cristo ta.

¹³ Je ca taxi' taxi' pi' pin cacapa' oro soldado co querec wet nanain xiricon taramaxicon ca', taxi' taxi' pi' pin nanapa' oro wari' cwa' quem. Taxi' nanapa' pain ca tao' pe capa' taramaxicon pain xirinain ca tao' to tao' to to wa ca', xi om ne ca pijim' taxipa' ara tain capijacon Iri' Jam con Cristo ta.

¹⁴ Mija nana oro xerexi' co pijim' hwet nanain capijacon Iri' Jam quem. Taxi' iri nanapa' pain ca pe tain xirinain ca tao' to tao' to to wa ca' ne, to' hwara' opa ac tococwa na. Wirico Taramaxicon nexi' co to' hwara' opa nonon ma', pijim' hwara' opa ac caca na quem. Om ca pijim' jin' caca.

¹⁵ Ma' paxi' nana co om xumu xo' nana pain ca pijim' hwet cacain capijacon Iri' Jam con Cristo quem, xi om ne ca joc in pin xun Paulo ta ara caca pain ca noc mi' cacapa' pain ca pijim' ne ta. Je i ma' ira ina cocon ta. Oro xucucun iri nana ne, xumu xo' nana pain ca pijim' caca ma', pain ca quep xiho' xim ta cacapa' ma' quem.

¹⁶ Co quep xiho' xim nanapa' ma', pijim' hwet nanain capijacon Iri' Jam, xi om ne ca tomi' querec te ara cacapa' ta. Taxi' nanapa' pain ca wara tomi' capa' Iri' Jam pane, pain ca tomi' xo' roron co tomi' napat nanain capija ca tomi' hwet nuhu' con Cristo cwa' capa' pane. Je ca pijim' caca ma'.

¹⁷ Oro xucucun ma' iri nana ne, co noc mi' nanapa' pain ca pijim' ne ca', pijim' paxi' nanain capijacon Iri' Jam, ane om xumu xo' caca pain ca pijim' nucucun ne. Pijim' capijacocon e' nana. Querec pin' tatarapari' oro wari' pain ca pijim' awi nexi' ta nana. Coromicat ca' nana quem: Taraju iri tara Paulo pain ca pijim' awi nexi' ca' ne, tomi' xaxa' tamana tara, hwara' pin tara ca jain jain nucun pain xirinain ca tao' to tao' to to wa ta nanapa'.

¹⁸ Je i ma' ira ina ta! Co xumu xo' nana pain ca pijim' nucucun ma', co om xumu xo' nana quem, je i ma' ira. Na e' na pain ca pijim' hwet xine capijacon Iri' Jam con Cristo ta. Je ca tomi' querec te ta' ca'. Tomi' querec te tomi' querec te tiquin' ta' quem.

¹⁹ Ma' paxi' na oro carawa ca to' i'ina napa' ca', ane tomi' mi' mahu' con Iri' Jam ne. Quep xiho' napa' Tamataracon Jeju Cristo quem. Je ca taxi' ton Iri' Jam pain ca mi' xim capa' pain ca hwet ca' tain xirinain ca tao' to tao' to to wa ca'.

²⁰ Param tamana inain i ca' quem, jain jain inain: Ara xo' xitain na inain oro ca ara ra capa' Iri' Jam cwa' ina. Noc tamana inain ca ara wa carawa ca to' wixipa' napa' ta. Om ta pijim' jin' ta', pijim' hwara' opa ta'. Win ne ca om pijim' jin' ta' pane. Mo ta e' e' tiquin' ta', mo ta mi' pin ta' ta' quem, param e' inon Cristo pain ca querec pin' tocwa pain ca awi tamana nucun pata'.

²¹ Ca' na ca coromicat ne ca': Mo ta e' e' tiquin' ta' pain macan' ca', param e' inon Cristo pain ca querec pin' tocwa pain ca awi tamana nucun pata'. Mo ta mi' pin ta' ta', hohot tarapa' quem. Hwet ton ara xi' inon pain ca aram aram mi' pin ta' ne ta.

²² Mo ta e' e' tiquin' ta' pain macan' ca', ha' ac capa' tara pain ca taramaja taramaja tiquin' ta' ca', pain ca taramaja mi' ton Cristo. Tara pata' ta'a, om ca taxi' tain ca param ne.

²³ Param param pi' pin paxi' inain. Param inain ca e' e' tiquin' wa, param inain ca mi' pin wa ca' quem. Param paxi' inain ca mi' pin wa, pe ho' xiton Cristo na ina. Hohot tamana xirapa' ca mi' pin wa ta.

²⁴ Ane hohot tamana pan ne ca e' e' tiquin' ta' ne. Ha' ac capa' tara pain ca quep xiho' xuhu' quem.

²⁵ Je i ma' tara pata', e' e' tiquin' ta' ta, taxi' ina. Quep xiho' quep xiho' pi' pin xuhu'. Ma' ta hwara' opa hwara' opa tiquin' hwe pain ca howa nuhu' ma', ma' ta tomi' querec te tomi' querec te tiquin' hwe pain quem inuhu'.

²⁶ Je ca tomi' xuhu' ca'. Hwet iri xuhu' ne, tomi' querec te tamana ac hun tara Cristo Jeju pain ca pe ho' mami' xuhu' ta.

²⁷ Je ca tomi' xuhu' ca', win xumu cain' jein ca xuruxut xo' wa ta. Ac oro wari' co xuruxut xo' nana pain ca howa cacain capijacon Iri' Jam ca tomi' hwet napari' con Cristo ta je, ac i ma' tara ca xuruxut xo' nuhu' ta. Am ha' capa' pain ca hwet xuhu', am om ha' capa'. Am taraju e' xuhu' pain ca tomi' hwet xihwe pain ca xuruxut nuhu' ma', je i ma' ira. Taxi' xuxuhu' na inuhu' pain ca hwara' opa hwe pain ca ac ca xica' pe ne ne xumuhu' ma', pain ca tomi' in pin wi huhun oro wari' co ari nanain capijacon Iri' Jam ca tomi' hwet napari' con Cristo ta.

²⁸ Quereme jujun oro wari' co ari nunuhu' ma', ta jin' camain' huhun me. Quereme iri jujun ne, querec pin' caracan ac xucucun tara pain ca to' quiji' pin xun tococwa ma'. Querec pin' pan ac xujuhu' tara pain ca witan xi' hwe ma' quem. Wirico Iri' Jam tara co ara tain nain i ma' pahu'. Wirico pan tara co to' quiji' pin nonon, wirico pan tara co to' witan xim nuhu' ma' quem.

²⁹ Xi om ne ca xiram pa' ara cuhu' pain ca mi' cuhu' pain ca howa hun Cristo ta. Om ca xiram pa' e' cuhu' pain ca mi' cuhu' pain ca howa hun, xiram pa' nuhu' pain ca mi' cuhu' pain ca to' i'ina cuhu' oro carawa pain ca howa hun quem.

³⁰ Jain jain ara xi' hwe pain ca to' i'ina cuhu' oro carawa pain ca howa hun ma'. Win ta' pane, querec mahu' pain ca to' i'ina capa' oro carawa pane. Taxi' mahu' pain ca to' i'ina to' i'ina wet capa' pain xocori ca' quem.