Filemom 1 - Tradução Bíblica Pacaas Novos

¹ Paulo ina pain ca xirao' mi' xim ca' Filemom. Tao' pe nanapa' pain xirinain ca tao' to tao' to to wa ca', xi om ne ca taramaja mi' ara ton Cristo Jeju ta. Wata', wirico coxari' Timóteo cwa' quem, xirao' mi' urut pum pain ca tomi' querec te tamana urut pum ca', je pain ca taramaja wi maparut ma'.

² Xirao' mi' urut pahu' quem we Áfia con Arquipo ma'. Wum Arquipo, taramaja wi maparut, jain jain wi maparut pain ca pijim' hwet xin capijacon Iri' Jam con Cristo ma'. Xirao' mi' urut cocon oro xerexi' co cut in to nanain xurum ma' quem Filemom.

³ Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Ca tomi' querec te inon Iri' Jam pum ta con

⁴ Je ca tomi' xim ca' Filemom. Tomi' mi' iri inem con Iri' Jam ne ne, tama' tomi' querec te inem con.

⁵ Xi om ne ca taraju ara toton oro wari' co tomi' hwet nanapa' pum, pain ca howa mon Taramaxicon nexi' Jeju ma'. Tomi' hwet nanapa' pain ca tomi' querec te tomi' querec te pi' pin momon oro wari' nucun quem.

⁶ Tomi' mi' inem con Iri' Jam, ma' ta tomi' hwet tomi' hwet tiquin' momon pain ca howa nem oro wari' ma', ma' ta querec pin' querec pin' tiquin' main oro ca awi wa ca mi' capari' Cristo pain ca win cwere xun ca'.

⁷ Ja' tomi' querec te tamana mapa' xa'. To' hwara' opa mapa' quem. Xi om ne ca tomi' querec te ara momon oro wari' nucun Iri' Jam ma', pain ca to' hwara' opa pin momon pain ximicocon ma'.

Ca xiram pa' ron Onésimo cwa' con Filemom Paulo

⁸ Je ca tomi' xim ca'. Hohot paxi' na pain ca tomi' ha' ne ta xim pain ca tomi' xim xim ca'. Wirico ara xi' na Cristo co mi' napa' pain ca hu xim xim ca'.

⁹ Ane tomi' toto e' xim pain ne, xi om ne ca tomi' querec te ara xim ta. Wata' pain ca Paulo ta' ca', pain ca horon pin ta' ca', pain ca tao' pe pin cacapa' pain ca taramaja mi' ton Cristo Jeju ca',

¹⁰ tomi' toto e' inem. Xiram pa' ron Onésimo cwa', co ac panxita' cwa'. Ac ca wanxi' ton na, xi om ne ca howa pin ara ca pain ca tomi' hwet ton con Cristo pain xirinain ca tao' to tao' to to wa ca'.

¹¹ Om paxi' na ca quep xiho' xo' quem pain cara pane. Ane quep xiho' pin capari' pain xocori ca' ne. Quep xiho' nem, quep xiho' napa' quem.

¹² In hwet ron taramaxicon nem ta inon pum. Ac ca mam' xim na pain iri' xumu ca', xi om ne ca tomi' querec te tamana ara ton ta.

¹³ Om ca quep xiho' ac mapa' pain xirinain ca tao' to tao' to to wa ca'. Je ca pe ho' cara xirapa' na ton Onésimo cwa', ma' ta quep xiho' capa' pum inon. Ac ca pe cain maxum xira, quep xiho' ac capa' xira pain ca tao' pe cacapa' pain xirinain ca tao' to tao' to to wa ca', pain ca pijim' tain capijacon Iri' Jam con Jeju cwa'.

¹⁴ Ane om ha' ne pain ca ara e' tain ca param ne con ne, noc inain. Mo xi wara tomi' xo' xim con, mo xi wara xiram pa' ne, pe ho' cara xirapa' na inon, mo xi wara tomi' xo' ac i ma' xim con. Ane om ha' ne pain ca tomi' tomi' na xim con ne, pain ca tomi' ha' ne con ta xim ca'. Awi na pain ca ara pan main ca param nem con.

¹⁵ Am coromicat ac i ca' ca Iri' Jam con pum, pe ni pije' ca' nem, ma' ta pe ho' cara xim quem, ac je tara ca coromicat nucun pahu'.

¹⁶ Om ta pe ho' cara e' quem, pain ca taramaja mi' quem ma'. Pe ho' cara terem, xi om ne ca aji' pin ara quem con Cristo ta. Xa' pin mon quem, tomi' querec te tamana ac xujuhu' tara ta. Tomi' querec te tamana inon pain ca xa' pin ton ca'. Wum iri na ne, pain ca xa' pin mon pain ca howa wi hun Cristo ma', je ta tomi' querec te tamana mip qui' mon ta.

¹⁷ Je ca tomi' xim ca' Filemom. Om ca win ma' ne xijexi' pain ca howa xun Cristo ra? Win ma' ne xijexi' ca' ira. Je ta xiram pa' qui' mon Onésimo pain ca in hwet xim quem. Tomi' querec te ron. Ac ca tomi' querec te mapa' tara pain ca tomi' querec te mon ta.

¹⁸ Am ara cup quem pane, am ma' ne carawa ca dever quem, pain ca mo ca' quem pane. Tomi' xo' ne pain me. Pagar ac xim pain tara con.

¹⁹ Wata' pain ca Paulo ta' ca', xirao' pe xo' pan inain ca tomi' ne ca': Dever iri nem pain carawa Onésimo ma' ne, pagar pan ac xim pain tara con. Ac i ma' tara ca xiram pa' ton. Xiram pa' ne con quem. Win ne ca xiram pa' xim pain ca pijim' hwet xim con Jeju pane. Je ca ma' pin quem ca om pi' ra ha' ne ca e' wa ma' quem.

²⁰ Je ca tomi' xim ca' xa'. Xiram pa' ne con me inem. Quep xiho' ne con me. Win ne ca ma' capari' Taramaxicon nexi' cwa'. To' hwara' opa ne pain xumu ca'. Win cwere ara xi' urun Cristo cwa'.

²¹ Je ca xirao' mi' xim ca'. Taxi' inem pain ca tomi' ha' xim mapa' ma'. Taxi' inem pain ca tomi' ha' tiquin' ca' tain main ca tomi' xim ca' quem.

²² Tomi' xim inem pain i ca' quem: Wara quep xo' mi' ne pain ca pi'am pe ta' pain xuruhu' ma'. Xi om ne ca winim' ara ton Iri' Jam pain ca om pin xim cacapa' pain xirinain ca tao' to tao' to to wa ca'. Win ne ca tomi' mi' mahu' con, ha' turuhu' quem. Hwet ac xuhu' tara ta.

Ca pi' pin ne ca xirao' nucun Paulo

²³ Mam' pe wet inon ta nem Epafras co win tao' pe ta' cwa'. Tao' pe nonon Epafras, xi om ne ca taramaja mi' ara con Cristo Jeju ta.

²⁴ Mam' pe wet urut con ta nenem Marcos con Aristarco con Demas con Lucas cwa' quem. Wiricoco co taramaja wi nanapa' pain ca taramaja mi' urut con Iri' Jam.

²⁵ Param inon Taramaxicon nexi' Jeju Cristo pain ca quep xiho' quep xiho' xam' cuhu' ma', pain ca mi' e' cuhu' pain ca param nucun pain iri' xumuhu' ta. Je i ca' ca xirao' ne ca'.