Efésios 6 - Tradução Bíblica Pacaas Novos

Ca hu tococwa hwijima' cocon mana cote caca cacam waram jicocon

¹ Tomi' inuhu' pain ca hwijima' hwe ma': Tomi' ha' jujun mana cote hwe cacam waram juhu'. Je ca param mi' cuhu' Taramaxicon nexi'. Tomi' ha' jejem ta nuhu'.

^2-3 Win ne ca tomi' ne capijacon Iri' Jam pane. Tomi' ca' na: Tomi' ha' ron cote ma cam jim ta. Ma' ta hohot quem oro ca ara ma ma', ma' ta e' cara pe main macan' ca'. Ac i ma' na ca tomi' nein. Pain ca tomi' ha' je tococwa oro hwanana pane, je ca win tomi' pe mi' tococwa pain carawa ca awi co tomi' ha' nana pane.

⁴ Wahu' quem, pain ca wanxi' hwe ma'. Wahu' quem oro narima' pain ca wijima hwe ma' quem, tomi' inuhu' quem: Ta tomi' taparam' mana' hwehwem mana panxihwe me. To' horon xo' jejem. Hu xo' jejem pain oro ca param nucun Taramaxicon nexi' ca', je oro ca param nucun ca ara je capari' pain ca howa xun ca'.

Ca hu tococwa oro taramaxicon cocon oro wari' co taramaja mi' e' nonon

⁵ Tomi' inuhu' pain ca taramaja mi' e' huhun oro taramaxicon nuhu' ma' quem. Tomi' ha' jujun co taramaja mi' e' hwe pain macan' ca'. Ac ca tomi' ha' hun Cristo ma' tara pain ca tomi' ha' huhun. Ta tomi' ha' inon mixein hwe me. Tomi' ha' iri'o' jujun. Tomi' ha' querec te tara iri' xumuhu' ta.

⁶ Ta tomi' ha' e' huhun pain ca ja' noro cucuhu' me. Ma' nana co taramaja ac i ma' nana, ma' ta in ac cacapa' pain ca taramaja xo' ne ca' nana. Ta taramaja ac i ma' hwe me. Na e' na pain ca taramaja querec te hwe pain iri' xumuhu' ta. Ac ca taramaja mi' e' hun Cristo ma' tara pain ca taramaja mi' huhun ma'. Param nuhu' pain ca taramaja xo' wa Iri' Jam quem.

⁷ Taramaja querec te je me. Ac ca taramaja mi' e' hun Taramaxicon nexi' ma' tara. Ac ca om taramaja mi' e' hun wari' tara.

⁸ Xi taxi' ara hun Taramaxicon nexi' pain ca mi' mi' xam' ton cocon pain carawa ca awi oro wari' co taramaja xo' nana ma'. Co taramaja mi' e' nonon taramaxicon nucucun ma', co taramaja mi' pan xucucun ma' quem, mi' ac tococwa tara pain oro ca awi wa pain ca taramaja xo' nucucun.

⁹ Wahu' quem, pain ca taramaxicon nuhu' ma', tomi' inuhu' quem. Ma' tara xumuhu' cocon oro wari' nuhu' co taramaja mi' e' nunuhu' ma'. Ara xite jujun. Ta tomi' noro huhun me. Xi taramaxicon ne wi ara hun Taramaxicon nexi' co pe pawin ta. Wahu', wiricoco co taramaja mi' e' nunuhu' ma' quem, Taramaxicon ne wi hun ma' ira. Taxi' ara xi' hwein i ma' ta. Ac wiricoco ac wiricoco ari hwe con. Om ca tomi' querec te paxica' camain' cuhu'.

Oro ca mam' mixita wa ca mi' capari' Iri' Jam, ma' ta narain ho' xujuhu' con Caxicon Jam napari'

¹⁰ Tomi' xim inuhu' pain i ca' quem: Win cwere cara jun Taramaxicon nexi' ta, ma' ta to' hwara' opa cuhu' ca hwara' opa tamana nucun.

¹¹ Cut cut pi' pin jein oro ca mam' narain ho' xujuhu' ca mi' cuhu' Iri' Jam ma'. Ma' ta ha' cuhu' pain ca hwara' opa hwe pain ca mixein mixein joc camara' pin xim cuhu' Caxicon Jam ta.

¹² Xi wari' caca co mixita iri' ta. Oro caxicon jam nana co mixita iri'. Mixita ururun oro caxicon jam cocon oro taramaxicon nucucun co taramaxicon to ho' nanain oro ca om awi wa pain macan' ca', cocon oro wari' co ac ca to cacain ca jitacat nein na pain ca ari cocon Iri' Jam ma' quem. Mixita ururun oro caxicon jam co hwara' opa to nanain nanawin cain quem. Wiricoco co mixita iri' ta.

¹³ Je ta cut pi' pin qui' hwein oro ca mam' narain ho' xujuhu' ca mi' cuhu' Iri' Jam ta. Maqui' iri tara xec nein ca joc camara' pin xim cuhu' Caxicon Jam ne, na ac cuhu' tara pain ca mam' mixita hun pain oro ca mam' narain ho' xujuhu' ca mi' cuhu' Iri' Jam. Hwara' opa hwara' opa to wet ac hwe ma' tara ta.

¹⁴ Awori to je. Ac ca cut hwein tara oro ca mam' narain ho' xujuhu' pain ca mixita hun Caxicon Jam. Noro jun soldado co cut xo' nain oro ca mam' narain ho' xucun pain ca mixita con wari' co noc non ma'. Tucu na pain ximijacon cinturão nucun. Je ca mam' to' hwara' opa pan xucun. Ac i ma' je pain ca iri'o' e' hwe ma' quem. Ta mixein camain' hwe me ta. Xuruxut xo' je, ara e' jein ca param nucun Iri' Jam ta. Na ac cuhu' tara pain ca narain ho' xujuhu' con Caxicon Jam. Ac i ma' na soldado pain ca pe cain arain too ca pe caho' nain quimacon je waracon ma' quem. Na ac con na pain ca nain ho' xucun.

¹⁵ Noro jun soldado pain ca pe cain caji caxim pain caximacon quem. Ma' ta om i'ina xut ta' ca' na, ma' ta om toron capa' xumu pain ca xut ta' ca' na. Ac i ma' je quem, ac ca to hwein caji caxim pain caximahu' tara pain ca win xumu hwein capijacon Iri' Jam con Jeju ma', co to' om pin nain ca toron ne ximixi' ca' quem. Na ac cuhu' tara pain ca hwara' opa cara hwe ta.

¹⁶ Ca howa tocwa Iri' Jam ma', je ca an xiho' nain pana ca mam' tac caho' xucun soldado ma' quem. Je ca tomi' xuhu' ca': Howa cara jun Iri' Jam ta. Na ac cuhu' tara pain ca narain ho' xujuhu' con Caxicon Jam pain ca caracat je taxipa' cuhu' ma'. Win ca soldado pain ca mam' wap jo' pin cain pain pana nucun oro conacocon oro wari' co mixita xun nonon ma', ac i ma' tara pain ca mam' narain ho' xujuhu' pain ca howa nuhu' ta.

¹⁷ Noro jun soldado pain ca pe cain caji waji' pain winacon ma' quem. Mam' quep caho' nain winacon pain caji waji' nucun. Ac i ma' je quem, ac ca quep caho' hwein tara ca coromicat nuhu' ma', pain ca mam' pe wet cara hwein i ca' con Jeju quem, pain ca to' witan ca' cuhu' pain ca wap wa pain ca caracat nuhu' ma'. Noro jein capijacon Iri' Jam ca an xiho' nain cote ne quit nucun soldado ca mam' mixita ca ma' quem. Mam' tomi' napari' pain capijacon Iri' Jam Tamataracon. Na e' na pain ca noro hwein pain ca tomi' ha' hwein ta. Na ac cuhu' tara pain ca mam' ari hun pain Caxicon Jam.

¹⁸ Tama' tomi' jun Iri' Jam ma', pain ca cut hwein oro ca mam' narain ho' xujuhu' ca mi' cuhu' ma'. Pain ca mi' cuhu' pain oro ca tomi' wa Tamataracon ma', je tara ca tomi' hun ta. Ma' tara xumuhu' me. Ta pi'am ca' hun pain ca tomi' hun me. Ta an to pin hwein ca tomi' wa quem me. Tama' tomi' mi' tomi' mi' pi' pin jujun con oro wari' nucun quem.

¹⁹ Wata' quem, tomi' mi' xine con quem. Ma' ta mi' capa' pain ca pijim' xo' wa pain ca aram aram pijim' ta' ta' ca'. Ma' ta pijim' quereme tain capijacon Iri' Jam ca an hwet mi' capari' con Jeju ma', pain ca to' witan toton capari' ca'.

²⁰ Wirico Cristo co pijim' rain capija napa' pane. Wirico co mi' napa' pain ca tomi' hwet tain iri' capijacon. Je ca tao' pe cacapa' ca'. Tomi' mi' xine con Iri' Jam me. Ma' ta pijim' quereme ta'. Je ca param mi' capa' ca'.

Ca pi' pin ne ca xirao' nucun Paulo

²¹ Coxari' Tíquico cwa', co om noc ta' cwa', co taramaja mi' xo' non Taramaxicon nexi' cwa', pijim' hwet turuhu' pata'. Taxi' ac mahu' tara pain carawa ca ara napa'.

²² Je ca hwet roron ta ton ca' pahu'. Tomi' hwet roron pain carawa ca ara naparut ca' inon pahu'. To' hwara' opa roron pain ximicocon quem inon pahu'.

²³ Param inon Cotere' Iri' Jam con Taramaxicon nexi' Jeju Cristo pain ca mi' cucuhu' pain ca om toron ne xumuhu'. Param inonon pain ca mi' cucuhu' pain ca om noc xujuhu' je pain ca howa cara hwe ma' quem.

²⁴ Wahu' pain ca om noc cara hun Taramaxicon nexi' Jeju Cristo ma', param inon Iri' Jam pain ca quep xiho' quep xiho' xam' cuhu' pain ca mi' e' cuhu' pain ca param nucun. Je i ca' ca xirao' ne ca'.