Efésios 5 - Tradução Bíblica Pacaas Novos

Ca xuruxut nexi' pain ca mana panxica Iri' Jam iri' ca'

¹ Mana panxita' pin nuhu' Iri' Jam. Om ca noc cuhu'. Je ta an xiho' hun quem.

² Ta noc camain' xujuhu' me. Win ca Cristo pain ca om noc qui' capari' pain ca om narain ho' qui' xucun pari' pane, ac i ma' je pain ca om noc xujuhu' me. Mi' pan xucun con Iri' Jam Cristo. Ma' ta mi' pin caho' toton ta non pari' pane. Hohot tamana non Iri' Jam quem, hohot tamana non pain ca mi' pin caho' capari'.

³ Tomi' inuhu' pain ca tarama' hwe ma': Om ca na ne pain ca quep hwem xequem narima'. Wahu' quem oro narima', quep e' turuhu' waram taxuhu' ma'. Ta coromicat camain' hwein ca quep ximama' wa me. Ta tomi' camain' hwein me. Ta param ximama' hwein oro carawa quem me. Xi hohot cuhu' pain ca wari' nucun Iri' Jam hwe ta.

⁴ Ta tomi' hwein caji topac me. Ta tomi' ximama' hwe me. Ta tomi' ximama' tatam' pin huhun oro wari' pain carawa ca om awi hwe ta. Om ca hohot ne i ma' pahu'. Ta ac i ma' hwe me. Tomi' querec te pan e' jun Iri' Jam pain oro carawa ca mi' cuhu' ma'.

⁵ Taxi' jein i ca' quem: Ximin tara wari' co quep nam xequem narima', ximin tara narima' co quep ne non xucun tarama' ma' quem. Ximin tara co coromicat ximao nain quem. Ximin tara wari' co param ximao nain oro carawa ca om awi ma'. Param ximao iri nain oro caramaji macan' wari' ma' ne, ac ca howa cain na, ac Iri' Jam non carawa ca param ximao ca ma'. Wari' co ac i ma' ma', om ta mao camain' cain ca taramaxicon pe ca Cristo con Iri' Jam ta.

⁶ Ta tomi' mixein cuhu' wari' co tomi' ximao nuhu' ma' me, pain ca hohot na pain ca ara hwein i ma' ta cuhu' ma'. Oro wari' co om tomi' ha' nonon Iri' Jam ma', co ara ximama' nanain oro ca om awi wa ma', wap totoron Iri' Jam ta.

⁷ Je ta om taxipa' camain' huhun oro wari' co ara ac i ma' nana ta.

⁸ To paxi' hwein ca jitacat nein pane, pain ca om querec pin' querec hun Iri' Jam pane. Ane to pin hwein xec pain xocori ca' ne. Xi om ne ca win cwere pin ara hun Taramaxicon nexi' ta. Je ca tomi' xuhu' ca': Xuruxut xo' je. Win caca oro wari' co to nanain xec ma'.

⁹ To pin iri irin xec ne, awi ac iri' na. Iri' wari' ac iri' na. Iri'o' ac iri' na quem.

¹⁰ Je ca tomi' xuhu' ca': Ara xi' iri jein carawa ma' ne, tomi' querec mam' ac xujuhu' tara: Hohot toron Taramaxicon nexi' pain ca ara xin i ca' ra, ac i ma' xujuhu' me. Ma' ta taxi' hwein carawa ca hohot non Taramaxicon nexi' ta.

¹¹ Ta caracat wi hwe cocon oro wari' co to nanain ca jitacat nein ma', co pan teretem ximama' nana ma'. Pan to' jein taraxicocon pain ca pan teretem nucucun. Querec pin' ac tococwa tara.

¹² Xi awi camain' ne ca pan teretem nucucun ca ara noc xa caca ta. Om ca tomi' ac xine. Wixipa' xixi'.

¹³ Mo ta pan to' xine ca taraju wa pain ca pan teretem wa ma', ac ca toha mi' xine na pain naran. Querec pin' ac xine na pain ca pan teretem wa.

¹⁴ Je cwerein pain ca toha mi' xin capari' naran ma'. Querec pin' xin. Je ca xirao' pe xine pain capijacon Iri' Jam. Wum ma', co ac ca pi'am ma na, querec ra e'! Wum ma', co ac ca mi' pin ma na, e' pin ra e'! Toha mi' ac quem tara naran nucun Cristo ta. Ac i ma' na ca xirao' pe nein.

¹⁵ Ma' tara xumuhu' me. Am xuruxut xo' hwe, querec querec je me. Ta an xiho' huhun co om coromicat xo' nana me. An xiho' e' jujun co coromicat xo' nana ma'.

¹⁶ Ta om camain' hwe pain ca ara hwein ca awi wa me. Mija ara xi' na ca caracat wa pain oro xec nexi' ta.

¹⁷ Je ca tomi' xuhu' ca': Ta an xiho' huhun oro wari' co om coromicat xo' nana me. Taxi' xixin na jein oro ca param mi' cuhu' Taramaxicon nexi'.

¹⁸ Ta quep cuhu' comi uva ca mana' me. To' em' pin ara xi' napari' comi uva ca mana' ta. Param pan jein Tamataracon Iri' Jam. Pe ho' mip turuhu' ca hwara' opa nein ta.

¹⁹ To' hwara' opa xujuhu' pain ca com hwein oro xijein tamara', oro salmo pain capijacon Iri' Jam ma', je oro xijein tamara' ca in ac non Iri' Jam, je oro xijein tamara' ca mi' cuhu' Tamataracon Iri' Jam quem. Com tara iri' xumuhu' pain ca com mi' hun pain Taramaxicon nexi'.

²⁰ Tama' tomi' querec te jun Cotere' Iri' Jam pain oro ca ara mi' cuhu' ma'. An hwet jein wixicon Taramaxicon nexi' Jeju Cristo pain ca tomi' querec te hun quem.

Ca hu tococwa tarama' cacam manacocon

²¹ Tomi' ha' caracan xujuhu', xi om ne ca in ac ara hun Cristo ta.

²² Tomi' inuhu' pain ca narima' hwe ma', pain ca ma' cuhu' tarama' ma'. Tomi' ha' tomi' ha' xam' jujun waram taxuhu'. Ac ca tomi' ha' hun Taramaxicon nexi' ma' tara pain ca tomi' ha' hun ma'.

²³ Tarama' ma', taramaxicon pe ho' ara xi' nam manacon. Ac winacam na. An xiho' non Cristo co taramaxicon pe ho' napari' pain ca howa xun ca'. Ac winaxi' na, ac curucun ac iri' na quem. Wirico Cristo co to' witan napari' pain ca howa xun ca'.

²⁴ Je ca tomi' xuhu' quem oro narima': Tomi' ha' jujun waram taxuhu', tomi' ha' jujun pain iri' xumuhu'. Win ne ca tomi' ha' xun Cristo pain ca howa xun ca'.

²⁵ Wahu' quem, pain ca tarama' nuhu', tomi' inuhu' quem. Ta noc hwem manahu' me. Win ca Cristo pain ca om noc capari' pain ca howa xun ca', pain ca om narain ho' xucun pari' pane. Mi' pin caho' ara xi' napari' pane.

²⁶ Ma' ta to' hohot cuhu' Iri' Jam xuhu' ta napari'. Ac ca hohoc pin capari' na pain com ma'. Mam' to' om pin napari' pain ca em' nexi' pain capijacon quem.

²⁷ Ac i ma' napari', ma' ta querec hohot mahu' ta napari'. To' wari' ne xuhu', to' awi xuhu'. To' om pin tain ca caracat nuhu', to' om pin tain oro ca xirac nuhu' ta napari' pain ca howa xun ca'.

²⁸ Je ca tomi' xuhu' pain ca tarama' nuhu' ca': Ta noc hwehwem oro manahu' ta. Ac ca om noc hwein curuhu' ma' tara pain ca om noc hwehwem ma'. Wari' co om noc nam manacon ma', om ca noc pan xucun.

²⁹ Xi ma' ca wari' co noc nain curucun ta. Om ca noc camain' xucun. Pa' mi' pan xucun, ara xite xucun quem. Win capari' Cristo pain ca howa xun ca' quem.

³⁰ Ac oro coximinain curucun Cristo pan ara xi' iri'.

³¹ Ma' na ca xirao' pe xine pain capijacon Iri' Jam ca'. Ca' na con: An ta' iri tara narima' tarama' ne, pe ho' pe ho' om pin ac con tara cote ca cam jicon. Pe ho' pin ac cam tara manacon. Ac ca xica' pe pin ne tara cwerequequem. Ac i ma' na ca tomi' nucun.

³² Pain capijacon Iri' Jam ca tomi' ta' ca', con tarama' co pe ho' pin nam manacon ma', awi tamana na ca coromicat nucun ca an hwet mi' capari' ca', ca om taraju pa' iri' ira. Ca' na ca taraju pa' ne quem: Tomi' non Cristo pain ca om noc capari' pain ca howa xun ca', ac i ma' na ca taraju pa' ne.

³³ Tomi' paxi' ta Cristo pain ca om noc capari' pain ca howa xun ca'. Ane tomi' tomi' xam' cuhu' pain ca tarama' nuhu' pain ca ma' cuhu' narima' quem ne. Ta noc hwehwem manahu' ta. Win ne ca om noc pan xujuhu' ma'. Wahu' quem oro narima', na e' na pain ca tomi' ha' huhun waram taxuhu' ma' quem.