Efésios 4 - Tradução Bíblica Pacaas Novos

Ca curucun Cristo pin iri' pain ca howa xun ca'

¹ Je ca tomi' xuhu' ca'. Wata' pain ca tao' pe pin cacapa' pain ca taramaja mi' ton Taramaxicon nexi' ca', hu ca' inuhu': Xuruxut xo' je ta inuhu'. Win ne ca xuruxut xo' je cuhu' Iri' Jam pain ca xo' howa xine qui' cuhu' pane.

² Ta xec xec hwe me. Tomi' wixite xujuhu'. An hwet pe jein ca om noc xujuhu' pain ca tomi' pan hot xujuhu' ma'.

³ Je Tamataracon Iri' Jam na ca mi' nuhu' pain ca win ma' ne xujuhu' ma'. Je ca tomi' xuhu' ca': Param jein ca xica' pe ne xumuhu' pain ca tomi' querec te xujuhu' ma'. Jain jain jein. Ma' ta win ma' ne cara xujuhu' ma'.

⁴ Je ca xica' pe tara xumuhu' me xuhu' ca'. Xi om ne ca ac ca ma' xica' pe ne ara ne cwerexi' con Cristo pain ca howa xun ca'. Ma' xica' pe na Tamataracon Iri' Jam ca pe ho' napari' pain ximixi' quem. Ac i ma' na ca ma' xica' pe ne carawa ca winim' iri' ca', ca tomi' pe mi' capari' pain ca xo' howa xine qui' capari' Iri' Jam pane.

⁵ Ma' xica' pe na Taramaxicon nexi'. Ma' xica' pe na co howa iri'. Ma' xica' pe na co tomi' hwet iri' pain ca ja' iri' com quem, pain ca howa inon Jeju Cristo ta iri' pane.

⁶ Ma' xica' pe na Iri' Jam co Te Te xam' iri'. Taramaxicon ne Taramaxicon ne pi' pin urun. Hu hu pi' pin napari' pain ca ara jein ca param pan ne capari'. Win cwere win cwere xam' napari' quem.

⁷ Ane om xica' pe ne ca taramaja nexi' ca mi' capari' Cristo ne. Mi' mi' xam' napari' pain oro xijein ca taramaja taxi' wa. Mi' pan napari' pain ca param nucun. Om xi mi' capari' pain, xi iri' wari' iri' ta. Ane xiram pa' pan e' capari' ne. Mi' pan xuhu' pain napari'.

⁸ Je ca tomi' ne capijacon Iri' Jam ca'. Tomi' ca' na: Piri' mao iri na ne, cut mama' mija ac tococwa na oro wari' co pao' to ca ma'. Xiran xo' ac caca na, o mama' ac tococwa na. Mi' e' ac tococwa na pain carawa ca awi oro wari' nucun ma' quem, ac i ma' na ca tomi' ne capijacon Iri' Jam ca'.

⁹ Cain' ca tomi' mao ne capijacon Iri' Jam pain ca piri' mao na ta ne ma' quem? Om na, tomi' ca' ta' na ira: Wara quiji' qui' cain' na pain macan' ca'.

¹⁰ Cristo co wara quiji' qui' nain macan' pane, wirico co piri' mao nain pawin cain. Tiquin' mao na pain iri' pawin cain. Ma' ta taramaxicon pe ho' taramaxicon pe ho' pi' pin toton oro wari' pain oro carawa pain oro xijein macan' je oro pawin ta na pane.

¹¹ Wirico Cristo co mi' nain oro ca taramaja taxi' wa. Ma' nana co mi' wawa pain ca apóstolo wa pain ca tomi' hwet cacain capijacon Jeju. Ma' nana xucucun co mi' wawa pain ca profeta wa pain ca tomi' hwet cacain capijacon Iri' Jam quem. Ma' nana xucucun co mi' wawa pain ca evangelista wa, ma' ta tomi' hwet huhun oro wari' pain ca mi' pin caho' toton ta tata. Ma' nana xucucun co mi' wawa pain ca pastor wa pain ca ca' na wa capijacon Iri' Jam quem.

¹² Ma' ta ca' na tococwa oro wari' nucun Iri' Jam pain ca taramaja taxi' wa pain ca taramaja mi' cocon ta tata oro wari' nucun. Ma' ta horon horon tiquin' hwe pain ca howa nuhu' ma', pain ca ac cwere hwe ne pain ca win cwere xijexi' ca' napari'.

¹³ Mo ta pijim' ac i ma' cacapari', horon horon tiquin' pi' pin ac iri' tara, horon horon tiquin' pi' pin ac iri' tara, win ma' ne pin ac xijexi' tara pain ca howa wi xun Panxica Iri' Jam pain ca querec pin' wi pin xun quem. Ximicon hwanana ac iri' tara, an xiho' pin ac xun tara Cristo pain ca awi tamana nucun quem.

¹⁴ Ma' ta an xiho' an xiho' om xuxun hwijima' pain ca param ximama' nucucun ta. Om ta xin ne ximama' xuxun oro wari' co pijim' camara' pin toton nanapari' pain ca ac ca iri'o' ta' ca' tara me cacapari' pain ca pijim' pan teretem nucucun. Om ta an xiho' mami' xin mam' horoho wa ca ho in ho in pain com ca nocom nocom pain hotowa ma'. Mixein e' nanapari', param e' nanapari' pain ca pan teretem wa oro wari' co pijim' ac i ma' nanapari' ma'.

¹⁵ Om ta pijim' pan teretem ac i ma' xijexi'. Pijim' hwet e' xijexi' pain oro ca iri'o' wa con Iri' Jam. An hwet pe xin ca om noc xijexi' pain ca pijim' nexi' quem. Ca horon horon ac iri' tara, ca horon horon ac iri' tara, horon pin ac iri' tara con Cristo co ac winaxi' pain ca curucun pin iri' ca'.

¹⁶ Ac curucun pan iri' quem. Noro jein iri' cwerexi' ca'. Je winaxi' ca taramaxicon pe ho' nain oro coximixi' ca'. Ac taramaxicon na winaxi'. Je oro carapitaxi' pain oro caramaxi' ca to' wi nain oro araxi' pain coximixi' ca' quem. Mo ta taramaja xo' ne oro coximixi' ca', horon xo' ac iri' na, hwara' opa pin ac iri' na quem. Ac i ma' na pain ca curucun Cristo iri' quem. Mo ta om noc xijexi', mo ta ara xo' xin ca taramaja nexi' ca ara je capari' quem, horon tiquin' ac iri' tara pain ca hwara' opa nucun Cristo.

Xocori ca e' nexi' con Cristo

¹⁷ Je ca tomi' xuhu' ca'. Ac ca tomi' mip cuhu' na Taramaxicon nexi' pata'. Ta an xiho' mami' huhun oro wari' co om howa nonon Cristo me. Coromicat ximama' ara xi' nana.

¹⁸ Om ca taraju pa' caca. Ac ca pe ho' cocon na ca jitacat nein xim. Om nonon ca e' nucun Iri' Jam. Xi querec pin' camain' cocon ta. Noc nanain ca querec pin' wa quem.

¹⁹ Om ca wixipa' mami' caca pain ca pan teretem nucucun. Ara e' nanain oro ca om awi wa, je oro ca quep ximama' wa quem. Win xumu e' nanain.

²⁰ Ane om ac i ma' je urut pahu' pain ca pijim' mi' urut pahu' con Cristo ne.

²¹ Tomi' hwet ara xi' urut pahu' con, hu xo' ara xi' urut pahu' pain ca pijim' nucun Jeju ca iri'o' quem.

²² Ca' na ca tomi' urut pahu' pane: An to pin jein wara curuhu' ca ara taxipa' hwe pain ca om howa querec hun Iri' Jam pane. Oro ca param ne wara curuhu' ma', mixein nuhu'. To' em' nuhu'.

²³ Tomi' ca' jun Iri' Jam urut pahu' pane: Mi' xut pain ca xocori mami' ne xumuxut pain ca coromicat nuxut ca' jun.

²⁴ Tomi' ca' urut pahu' pane quem: Param jein ca xocoricon wari' wa. Ac ca to hun xocoricon wom ma' tara pain ca param hwein ma'. Wirico Iri' Jam na co ara mi' nuhu' pain. An xiho' xun pain ca om caracat camain' nucun pain ca iri'o' nucun ma' quem.

²⁵ Je ta tomi' mixein maho' qui' xujuhu' quem. Tomi' iri'o' tomi' iri'o' xam' xujuhu' pain ca win ma' ne xujuhu' ma'. Xi om ne ca xica' pe pin ara ne ximixi' pain ca curucun Cristo iri' ca'.

²⁶ Mo ta mana' xujuhu', ta caracat hwe pain me. An to pin jein. Om ta irawin pa' cuhu' pain ca mana' nuhu'.

²⁷ Ta ha' camain' hun Caxicon Jam pain ca mana' cara xujuhu' cuhu' me.

²⁸ Wari' co wara an noc xa pane, om ta an noc xa mami' ca quem. Taramaja xo' tara. Ma' ta cut ca dinheiro pain ca taramaja nucun. Ma' ta ma' con carawa ca mam' quep xiho' cocon co ximin nana pain ca om cocon carawa ta.

²⁹ Ta tomi' xirac camain' hwe me. Tomi' xo' e' je. Ma' ta to' hwara' opa huhun oro win ma' nuhu' pain carawa ca to' i'ina nonon ma'. Ma' ta quep xiho' huhun oro wari' co taraju nunuhu' ma' quem.

³⁰ Ta ja' tomi' xaxa' hwein Tamataracon Iri' Jam me. Mi' iri nuhu' pain ne, ac ca xirao' cuhu' pain na wixicon. Ac i ma' na ca mene inuhu' ta cuhu' ma'. Pe ho' cara turuhu'. To' taxi' pin nuhu' pain ca main maqui' ta' ne xec nein ca to' witan pin xihwe pain oro ca caracat wa.

³¹ An to pin jein oro ca juhum' ne xumuhu'. Oro ca hwerehwet ne mixitahu' ma', oro ca mana' wa ma' quem, an to pi' pin jein. Ta tomi' merem xujuhu' me. Ta tomi' napat xujuhu' me. Ta noc xujuhu' me.

³² Ca' je, xiram pa' xujuhu'. Quep xiho' xujuhu'. Mo ta ara cup xujuhu', ta mana' xujuhu' pain me. Mana' mana' om pin xujuhu' pain ca caracat nuhu' pain ca ara cup xujuhu' ma'. Win cuhu' Iri' Jam ma', pain ca ji'am pin cain ca caracat nuhu' con Cristo.