Efésios 3 - Tradução Bíblica Pacaas Novos

Ca pijim' mi' cocon pain capijacon Iri' Jam co om judeu nana Paulo

¹ Je ca tomi' mi' xuhu' con Iri' Jam ca'. Wata' pain ca Paulo ta' ca', pe inain xirinain ca tao' to tao' to to wa ca'. Xi om ne ca taramaja mi' ara ton Cristo Jeju pain ca quep xiho' xuhu' pain ca om judeu hwe ma' quem.

² Om ca taxi' mahu' pain ca mi' capa' pain ca taramaja wa Iri' Jam cwa' ra, pain ca pijim' hwet roron pain ca xiram pa' tamana toton oro wari' co om judeu nana ta napa' pahu' ra? Taxi' mahu' pain ca tomi' ac i ma' capa' ca' ira.

³ Mi' napa' pain ca taraju pa' tain ca coromicat xo' nucun ca om an hwet querec ca pane. Wirico co tomi' xo' pan napa' pain pane. Je ca xirao' mi' xuhu' pain carta ne ca', xirao' mi' pije' ca' inuhu' pain.

⁴ Mo ta noro hwein ca xirao' ne ca', taxi' ac mahu' tara pain ca taraju pa' tain ca coromicat xo' nucun ca om an hwet querec ca con Cristo pane.

⁵ Om ca mi' tococwa pain ca taraju pa' wa oro hwanana cara pane. Pain xocori ca' iri na ne, mi' ac tococwa na pain ca taraju pa' wa oro apóstolo nucun cocon oro profeta nucun cwa'. Je Tamataracon Iri' Jam ca mi' nonon pain.

⁶ Je i ca' ca coromicat xo' nucun ca joc xim ca ira: Oro carawa ca awi ca mi' toton caparut Iri' Jam pain ca judeu urut ca', cut pin xin hwein pain ca om judeu hwe ma' quem. Xi om ne ca howa howa pi' pin ara xin capijacon ca tomi' hwet napari' con Cristo Jeju. Win ma' ne pin xijexi' quem. Mi' mi' pi' pin napari' pain oro ca param nucun ca wara tomi' pe pin capari' con Cristo Jeju.

⁷ Hwara' opa pe ho' napa' Iri' Jam pane, xi xiram pa' ara capa' pain ca mi' capa' pain ca taramaja ne ca', pain ca pijim' hwet roron pain capija con Panxita' oro wari' ta capa' pane.

⁸ Om paxi' na ca awi ta' pane. Awi tiquin' ca' paxi' nanapa' oro xucucun wari' nucun Iri' Jam cwa'. Ane mi' pan capa' pain ca pijim' mi' wa capijacon ne. Xiram pa' napa' pain ca pijim' mi' roron pain capija oro wari' co om judeu nana ta capa' pane. Pijim' hwet roron pain carawa ca awi tamana ca mi' toton capari' Cristo ta napa'. Xi na capari' pain ca querec pin' pi' pin xin ta.

⁹ Tomi' napa' Iri' Jam co tomi' ma' tomi' ma' pi' pin nain oro carawa jimao pane: Om paxi' na ca an hwet mi' toton cocon oro hwanana ca coromicat an pe xo' ne con Cristo pain cara pane napa'. Ane tomi' ac i ca' capa' pain xocori ca' ne: Tomi' xo' ho' roron oro wari' pain ca ara pin tain ca coromicat xo' ne con ne napa'. Ma' ta taraju pa' taraju pa' pi' pin cacain ta napa'.

¹⁰ Ca' na ca coromicat nucun cocon oro jam cocon oro taramaxicon nucucun co hwara' opa to nanain pawin ma': Mo ta querec cocon co howa nonon Panxita' cwa', pain ca win ma' ne pin xucucun ca', querec pin' ac cacapa' tara pain oro ca taxi' tamana ne ca' na ca coromicat nucun.

¹¹ Wara coromicat xo' ac i ma' na Iri' Jam pain cara pane, pain ca om quep querec cain macan' pane. Ara nain quem, ara pin nain ca coromicat nucun pain ca mam' capari' con Taramaxicon nexi' Jeju Cristo.

¹² Win cwere pin urun Cristo. Xi om ne ca howa ara xun ta. Je ca om hehe xun Iri' Jam quem. Taxi' urun pain ca om miri'om capari' pain ca tomi' xun xi' ca'.

¹³ Je ca tomi' xuhu' ca': Jain jain paxi' ina pain ca quep em' cacapa' pain ca pijim' mi' xuhu' pain capijacon Iri' Jam ca'. Je i ma' ira, ta tomi' xaxa' tomi' xaxa' naro pin hwe me ta. Tomi' querec te pan e' je, xi quep xiho' ara cuhu' oro carawa ca ara napa' ta.

Ca tomi' mi' inuhu' con Iri' Jam cocon Paulo

¹⁴ Je ca tomi' mi' xuhu' con Cotere' cwa'. Pe torotop mi' inon.

¹⁵ Te Te pi' pin urun pain ca to to wet xin macan' ca', te te pi' pin nonon oro co to pin nanain pawin ma' quem.

¹⁶ Ca' na ca tomi' mi' xuhu' con: Mi' roron pain ca hwara' opa caca pain iri' ximicocon, mam' to' hwara' opa roron pain Tamataram inon pahu'. Win ne ca hwara' opa tamana ma pain ca awi tamana ma ma' inon.

¹⁷ E' pe ho' tarain ximicocon Cristo ta inon pahu' quem. Win ne ca howa cocon ma' inon pahu'. Mi' roron pain ca om noc camain' quequem je pain ca om noc camain' xucucun quem. Hwara' opa tatara, om ta camara' caca pain ca caracat wa ta inon pahu'.

¹⁸ Mi' roron pain ca querec pin' cocon Cristo pain ca om noc camain' caparut ma' inon pahu'. Oro wari' nem quem, mi' mi' xam' roron pain inon pahu'. Querec pin' wi totoron Cristo pain ca om noc camain' caparut ma', pain ca tomi' querec te tomi' querec te xam' caparut ma' inon pahu'. Querec pin' totoron pain ca wara om noc caparut pain cara pane, pain ca tomi' querec te cara toton caparut quem, pain ca om tomi' querec te paxica' camain' caparut quem inon pahu'.

¹⁹ Om paxi' na ca querec pin' ac urut con Cristo pain ca om noc camain' caparut. Xi noc camain' caparut ta inon pahu'. Ane tomi' cara xim cocon ne, mi' roron pain ca querec pin' cocon Cristo pain ca om noc caparut. Ma' ta an xiho' quequem pain iri' xumum ta, ac i ma' na ca tomi' ton Iri' Jam pahu'.

²⁰ Tomi' querec te xun Iri' Jam co hwara' opa tamana ta. Ha' ha' pi' pin non oro carawa. Ha' ha' tiquin' ca' nain ca param iri' ca' con. Ha' ha' tiquin' ca' cain ca coromicat iri' ca' quem. Win ne ca hwara' opa pe ho' capari' pain ximixi' ca'.

²¹ Tomi' querec te xun ta. Tomi' querec te xun pain ca howa xun ca'. Tomi' querec te xun pain ca win cwere xun Cristo Jeju quem. Tama' tomi' querec te cara xun ta. Amém, iri'o' na ca tomi' ne ta.