Efésios 2 - Tradução Bíblica Pacaas Novos

Ca to' witan pin capari' Iri' Jam pain ca xiram pa' e' capari' ca'

¹ Pain cara pane, pain ca om howa querec hun Cristo pane, ac ca cono' pin hwe na. Xi caracat taxipa' ara hwe pane ta. Om ca tomi' ha' jun Iri' Jam na hwe.

² Pan teretem taxipa' hwe, je curuhu' pane. An xiho' e' huhun oro wari' co om howa nonon Iri' Jam. Tomi' ha' taxipa' hun Caxicon Jam co taramaxicon pe ho' nonon oro caxicon jam co taramaja mi' nonon pain nanawin ma'. Wirico Caxicon Jam co taramaja pe ho' nain ximicocon oro wari' co om tomi' ha' camain' nana cwa', wirico co tomi' ha' hwe pane.

³ Je cwerexi' pane quem. Ac i ma' ac i ma' pi' pin iri' pane ira. Ara e' irin ca param ne cwerexi'. Tomi' ha' e' irin ca param pan teretem ne cwerexi' pain ca coromicat pan teretem nexi'. Wap xim napari' Iri' Jam pane quem. Win ne ca wap wap pi' pin tococwa oro wari' co pan teretem nana ma'.

⁴ Ane xiram pa' tamana capari' Iri' Jam ne. Om ca noc camain' capari'.

⁵ Cono' pin paxi' iri' pane, xi tomi' ha' xun ta. Ane to' win cwere pin capari' con Cristo ne. Mi' ac capari' na pain xocori ca e' wa. Om xi to' witan cuhu', ane xiram pa' e' cuhu' ne. To' witan e' nuhu' pain ca xiram pa' cuhu' Iri' Jam ta.

⁶ To' e' mami' wi napari' con Cristo Jeju Iri' Jam pane. Mi' ac capari' na pain ca xao to ho' xun pain pawin quem. Xi om ne ca win cwere ara hun Cristo Jeju napari'.

⁷ Ac i ma' napari' Iri' Jam pane. Ma' ta querec pin' cara mahu' pain ca xiram pa' tamana xuhu' ca', pain ca mi' xuhu' pain ca win cwere pin hun Cristo Jeju ta napari'.

⁸ Je ca tomi' xuhu' ca': To' witan e' nuhu' Iri' Jam pain ca xiram pa' nucun pahu'. Xi om ne ca howa ara hun ta. Om ca mam' to' witan cuhu' pain carawa ca awi ca ara xi' paxi' hwe ma', om na. To' witan e' pan nuhu' ta.

⁹ Om ca tomi' ca' ac hwe: To' witan napa', xi om ne ca xut xo' ara ta' ca', om ca tomi' xec xec ac i ma' ac hwe ta.

¹⁰ Wirico ara xi' na Iri' Jam co to' xocoricon wari' pin napari' pain ca win cwere pin xun Cristo Jeju. Ma' ta ara hwein ca awi wa ca wara coromicat an pe mi' xuhu' pane napari' pain ca ara tatarain ta capari' pain cara pane.

Ca win ma' ne pin xijexi' con Jeju

¹¹ Mam' pe wet jein i ca': Om paxi' na ca judeu hwe ma'. Om ca wari' nucun Iri' Jam hwe nunuhu' oro judeu ma'. Xi wac xirac hwein taparinain ca xirac nuhu' ta nunuhu'. Tomi' ca' nunuhu' quem: Warut pain ca judeu urut ca', wari' nucun Iri' Jam urut, xi om ne ca wac xirac ara urut pain taparixut ca' nunuhu'.

¹² Mam' pe wet jein i ca': Om ca querec pin' hun Cristo pane. Om ca win ma' ne huhun oro wari' nein Israel co tora' ca Iri' Jam pane quem. Om ca taxi' hwein oro ca tomi' an pe xo' tococwa pain ca tomi' pe pin qui' cocon pain ca tomi' nucun Iri' Jam pane. Ximin hwe pain ca to ho' huhun oro caracat pain macan' ca' pane. Om ca main witan xi' camain' hwe pane ira. Om ca querec pin' camain' hun Iri' Jam pane.

¹³ To pira ca' paxi' hun Iri' Jam pane. Ane cut in pan cuhu' pain xocori ca' ne. Xi om ne ca win cwere ara hun Cristo Jeju ta. To' wixicam pin nuhu' con. Xi om ne ca ao mao ara ne quicon Cristo pain ca mi' pin caho' capari' pane ta.

¹⁴ Wirico ara xi' na Cristo co mi' napari' pain ca noc noc om pin xijexi'. Warut pain ca judeu urut ca', wahu' pain ca om judeu hwe ma' quem, om ca tatirim hwe mami' xijexi'. Win ma' ne pin xijexi' con. To' om pin nain oro carawa ca to' noc pin xijexi' pane.

¹⁵ Mi' pin iri na Cristo ne, to' om pin ac cain na ca hwara' opa nein ca xirao' nucun Moisés pain oro ca tomi' ha' je nucun. Ma' ta xucun wari' xucun wari' om pin hwe ta napari'. Win ma' ne pin xijexi' con. Mi' napari' pain ca nari pin xijexi' pain ca win cwere pin xun quem. Ac i ma' na ca to' om pin cain ca noc xijexi' pane.

¹⁶ Xucun wari' xucun wari' om pin xijexi'. Taxipa' pin xijexi'. Ac ca xica' pe pin ne na ximixi' con. Mi' napari' pain ca in hwet xun Iri' Jam. Xi om ne ca mi' pin pe ara cain pana pane ta.

¹⁷ Maqui' nain macan' Cristo pane. Pijim' ac tococwa na oro wari'. Pijim' nuhu' pain ca to pira ca' hun Iri' Jam pain ca om judeu hwe ma', pijim' naparut pain ca wara to ja' pan urut con pain ca judeu urut ca' quem. Na pin nuhu' pain ca tomi' querec te pin xujuhu' pain ca win ma' ne pin xujuhu' ta, ac i ma' na ca pijim' capari' pane.

¹⁸ Wirico Cristo co mi' napari' pain ca corom hwet xun Cotere' pain ca tomi' xun ca'. Warut pain ca judeu urut ca', wahu' pain ca om judeu hwe ma' quem, mi' mi' xam' napari' pain ca corom hwet xun. Xi xica' pe ara ne Tamataracon ca pe ho' pe ho' pi' pin napari' ta.

¹⁹ Je ca tomi' xuhu' ca': Wahu' pain ca howa pin hun Cristo pain ca om judeu hwe ma', warut pain ca howa pin urut con Cristo pain ca judeu urut ca' quem, tatirim tatirim om pin xijexi'. Win ma' ne pin xijexi' pain ca iri' wari' nucun Iri' Jam iri' ca'. Te pin urun, xere pin xijexi' pain ca mana panxica Iri' Jam iri' ca' quem.

²⁰ Ac ca quep cain xirim ara xi' na Iri' Jam. Oro apóstolo cocon oro profeta ma', ac oro pacun pain caximain xirim nana. Wari' pain ca howa xun Jeju cwa', ac oro pacun ca mam' quep cain Iri' Jam iri'. Jeju Cristo iri na ne, wirico co ac iri' cote ne pacun ca to' teren nain xirim pain caximain ma' quem.

²¹ Wirico Cristo co to' teren napari', horon horon tiquin' ac iri' na, ac iri' xiricon Iri' Jam pin ac iri' na quem.

²² Wahu' pain ca om judeu hwe ma', win cwere pin hun Cristo. Quep wi nuhu' Iri' Jam cocon oro xucucun wari' co howa nonon quem. Ma' ta xuru hwe ta nuhu'. Xi om ne ca pe ho' ara cuhu' Tamataracon ta.