Efésios 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Apóstolo ra napa' Cristo Jeju pane, pain ca tomi' hwet roron pain capija oro wari' capa' pane. Wirico Iri' Jam co param mi' napa' pain. Xirao' mi' inuhu' pain ca to hwein Éfeso ma', pain ca wari' nucun Iri' Jam hwe ma', je pain ca tomi' ha' hun Cristo Jeju pain ca howa hun ma'.

² Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Ca ja' tomi' querec te capari' Iri' Jam con Cristo

³ Tomi' querec te xun Iri' Jam co Te ca Taramaxicon nexi' Jeju Cristo. Ja' tomi' querec te napari' pain iri' ximixi' ca' quem. Xi mi' mi' pi' pin ara capari' pain oro caramaxicon ca awi ca to pawin cain. Win cwere ara xi' urun Cristo.

⁴ Wara tora' napari' Iri' Jam pain cara pane, pain ca om tomi' ma' querec qui' cain macan' je oro carawa pane. Xi om ne ca win cwere ara xun Cristo ta. Tomi' ca' napari' pane: Iri' wari' ne inuhu'. Om ca ma' camain' cuhu' ca caracat wa pain ca querec joc mam' mi' xuhu' con Panxita' cwa' ta napari' pane. Om ca noc capari'.

⁵ Je ca an pe xo' mi' capari' pain ca coromicat nucun pane. Wara tora' napari'. Mana panxita' xuhu', xi win cwere pin ara hun Jeju Cristo ta napari'. Je ca param mi' xuhu' ca' napari' pane.

⁶ Je ta tomi' querec te xun pain ca quep xiho' tamana capari' ta. Xi xiram pa' pan ara capari' pain ca mi' e' capari' pain ca win cwere pin xun Cristo co om noc ca ma'.

⁷ To' witan ca' napari' pain ca caracat nexi' Cristo. Xi ao mao ara ne quicon pain ca mi' pin caho' capari' pane. Je ca xic am pin cain ca caracat nexi' Iri' Jam quem. Xiram pa' tamana e' napari' ta.

⁸ Mija na ca xiram pa' e' capari'. Taxi' tamana na. Ma' na ximicon.

⁹ Je ca ara pin cain ca wara coromicat an pe xo' ca pane. An hwet mi' ac capari' na pain ca param nucun ca om an hwet querec ca ira. Wirico Cristo tara co ara mi' nuhu' pain napari'.

¹⁰ Ca' na ca param nucun ca om an hwet querec ca ira: Maqui' iri tara xec nein ca wara an pe xo' ta' ne, cut in xo' cut in xo' pi' pin ac toton tara oro wari' co to nanain pawin je macan' ma', querec joc mam' mi' ac toton tara con Cristo, taramaxicon pe ho' pan ac cocon tara quem. Ac i ma' tain oro carawa quem, cut in xo' pi' pin tain, querec joc mam' mi' ac tain tara con Cristo, taramaxicon pe ho' pan ac cain tara quem.

¹¹ Oro ca ara ca Iri' Jam cwa', ara nain ca wara coromicat an pe xo' nucun. Win ne ca param ta' ca' na, ara ara ac cain na. Je ca wara tora' caparut pain ca judeu urut ca'. Wari' ne naparut. Xi om ne ca ma' ara cuhu' Cristo ta naparut.

¹² Ma' ta tomi' hwet hwein ca awi tamana ne ta naparut pain ca howa cain' urut con Cristo pain ca winim' urut con ca'.

¹³ Ac i ma' nuhu' pain ca wari' ne pin cuhu' pain ca om judeu hwe pane quem. Taraju iri hwein capijacon ca iri'o' ca' ne. Taraju iri hwein capijacon ca tomi' hwet nuhu' pain ca to' witan xim cuhu' ne. Howa pin iri hwein ne. Mi' ac cuhu' na pain Tamataracon ca wara tomi' pe mi' cuhu' ma', ca to' querec pin' nuhu' pain ca wari' nucun hwe ma'.

¹⁴ Tamataracon ca pe ho' napari' pain ximixi' ca', je ca to' taxi' napari' pain ca aram aram mi' toton capari' pain ca tomi' pe mi' capari' Iri' Jam pain ca wari' ne capari' ca'. Je ca taxi' xun pain ca aram aram to' witan pin toton capari' ca' quem. Je ca na e' ne pain ca tomi' hwet xin ca awi tamana nucun ta.

Ca tomi' cocon co howa nonon Jeju Paulo

¹⁵ Je ca tomi' xuhu' ca'. Taraju iri inuhu' pain ca howa hun Taramaxicon nexi' Jeju ne. Taraju iri inuhu' pain ca tomi' querec te tomi' querec te pi' pin huhun oro wari' nucun Iri' Jam ne.

¹⁶ Om ca pi' ra ha' ne ca tomi' querec te xuhu' ca'. Tama' an hwet mi' inon pain ca tomi' querec te ne Iri' Jam pahu'. Tama' tomi' mi' inuhu' con quem.

¹⁷ Tomi' inon Cotere' co awi tamana ma', pain ca om caracat nucun pain ca hwara' opa tamana nucun ma', co Iri' Jam ne ca Taramaxicon nexi' Jeju Cristo. Tomi' mi' ac i ca' inuhu' con: Mi' roron pain ca taxi' wa, mi' roron pain ca taraju pa' wa quem, mam' mi' roron pain Tamataram, ma' ta querec pin' quequem pain iri' xumum, ac i ma' na ca tomi' mi' xuhu' con.

¹⁸ Tomi' mi' inuhu' con. Ma' ta mi' cuhu' pain ca taraju pa' wa pain iri' xumuhu' ma'. Ac ca toha mi' cuhu' tara pain ca coromicat nuhu'. Ma' ta querec pin' hwein oro ca howa iri' ca', ca mi' toton capari' pain ca xo' howa xine qui' capari' pain ca wari' ne capari' pane.

^19-20 Ma' ta querec pin' hwein ca hwara' opa tamana nucun ca taramaja pe ho' napari' pain ca howa xun ca' quem. Ca hwara' opa nucun ca', ca pe ho' napari' ca', je ca mam' to' e' pin con Cristo pane. Je ca mam' mi' con pain ca xao pe ho' pin con pain iri' curucun pain pawin cain.

²¹ Iri' taramaxicon pin na Cristo. Taramaxicon hwara' opa tiquin' ca' nonon oro jam co taramaxicon paxi' nana cwa', co hwara' opa to paxi' nanain macan' je nanawin quem, hwara' opa tiquin' hwara' opa tiquin' pi' pin ca' tata. Hwara' opa tiquin' ca' tata pain oro xec nexi' pain xocori ca', hwara' opa tiquin' ca' ac tococwa tara pain ca aram aram in qui' nucun quem.

²² Wirico Iri' Jam co taramaxicon pe ho' roron oro wari' ta non Cristo. Oro wari', pi' pin nana, oro carawa quem, taramaxicon pe ho' taramaxicon pe ho' pi' pin roron ta non quem. Taramaxicon pe ho' roron co howa nenem quem non pari'. Ac winacocon ra ta non Cristo pari' pain ca howa xun ca'.

²³ Curucun iri' pain ca howa xun ca'. Wirico co win cwere napari' pain ca mi' capari' pain ca hwara' opa tamana nucun, wirico co mi' napari' pain ca taxi' tamana nucun quem. Pe ho' pe ho' pi' pin nain oro carawa quem.