Colossenses 4 - Tradução Bíblica Pacaas Novos

¹ Tomi' inuhu' pain ca taramaxicon hwe ma' quem. Querec wet xo' jujun co taramaja mi' e' nunuhu' ma'. Ara xo' je cocon, ta tomi' querec te paxica' huhun me ta. Xi om ne ca taxi' ara hwein i ca' quem, pain ca ma' pan cuhu' iri' Taramaxicon co pe nain pawin cain.

Ca hu tococwa pain ca tomi' cocon Iri' Jam, je pain ca to ho' cocon oro xucucun wari'

² Ta an pe camain' hwein ca tomi' hun Iri' Jam me. Ta coromicat ni ca' hun pain ca tomi' hun me. Tomi' querec te jun pain ca tomi' hun quem.

³ Tomi' iri jun ne, tomi' mi' ac maparut con tara quem. Mi' roron pain ca pijim' wa capijam ta jun. Tao' pe ara xi' nanapa' pain xirinain ca tao' to tao' to to wa ca', xi om ne ca pijim' hwet ara toton pain capijacon Iri' Jam oro wari' ta. Je ca tomi' xut pahu' ca': Tomi' mi' xut con Iri' Jam me, ma' ta ha' caparut pain ca pijim' pijim' tiquin' xut pain ca coromicat an pe xo' nucun Iri' Jam ca tomi' hwet pin capari' con Cristo pain xocori ca'.

⁴ Tomi' mi' xine con Iri' Jam me, ma' ta ha' capa' pain ca pijim' hwet xo' toton con Cristo oro wari' ta, ma' ta taraju pa' caca quem ina. Na e' na pain ca pijim' ac i ma' ta' ta.

⁵ Xuruxut xo' je cocon oro co om howa nana ma'. Coromicat xo' je cocon. Ta miri'om camain' huhun me, ma' ta ha' cuhu' pain ca tomi' hwet huhun con Cristo ta.

⁶ Tama' tomi' toto jujun, taraju hohot totoron ca tomi' nuhu'. Ma' ta ha' cuhu' pain ca tomi' xo' huhun pain ca tomi' querec cucuhu' pain ca om taraju pa' nucucun.

Ca pi' pin ne ca xirao' nucun Paulo

⁷ Tomi' hwet turuhu' pain oro carawa ca ara napa' coxari' Tíquico cwa', co tomi' querec te iri' cwa'. Taramaja xo' na Tíquico cwa'. Taramaja wi napa' pain ca taramaja mi' urut con Taramaxicon nexi'.

⁸ Je ca hwet roron ta ton pahu'. Ma' ta taxi' cacaparut pain oro carawa ca ara naparut ca', ma' ta to' hwara' opa momon pain iri' ximicocon quem inon pahu'.

⁹ Ja' ja' ron inon coxarut Onésimo co tomi' querec te urut cwa', co win ma' ne hwe pain ca wari' nein cidade nuhu' ca ma'. Howa iri'o' non Jeju. Je ca tomi' xuhu' ca', tomi' hwet tuturuhu' pain oro carawa ca ara naparut pain i ca'.

¹⁰ Mam' pe wet inonon ta nuhu' Aristarco co win tao' pe ta' cwa'. Mam' pe wet inonon ta nuhu' Marcos coxa' ca Barnabé cwa' quem. Wara tomi' xo' inuhu' con Marcos cwa'. Mo ta hwet cuhu', tomi' querec te jun me.

¹¹ Mam' pe wet inonon ta nuhu' Jeju co Justo na xijein wixicon cwa' quem. Aristarco con Marcos con Justo cwa', taramaja wi nanapa' pain ca pijim' mi' urut cocon con Iri' Jam oro wari' ma', pain ca taramaxicon pe ho' xim ta capari'. Hwara' opa ra e' nanapa'. Pain ca taramaja wi cacapa' oro win ma' ne cwa', xica' to nana caram cwa' co judeu nana.

¹² Mam' pe wet inonon ta nuhu' win ma' nuhu' Epafras cwa', co taramaja mi' non Cristo Jeju cwa'. Mija na ca tama' tomi' mi' cuhu' con Iri' Jam quem. Ma' ta ximicon hwanana caca ma', ma' ta hwara' opa caca pain ca howa nucucun ma', ma' ta om tara con ta'a camain' quequem pain oro ca param nem ca ara je momon ma' non pain ca tomi' mi' cuhu' con Iri' Jam.

¹³ Taramaja tamana na Epafras pain ca quep xiho' xim cuhu', je pain ca quep xiho' toton cocon oro co howa to nanain xijein cidade ma', pain Laodiceia je pain Hierápolis ma'. Taxi' inon pain ca taramaja tamana nucun.

¹⁴ Mam' pe wet inonon ta nuhu' doutor Lucas co tomi' querec te iri' cwa'. Wirico Demas cwa', mam' pe wet inonon ta nuhu' quem.

¹⁵ Mam' pe wet urut cocon oro xerexi' co to nanain Laodiceia cwain. Wiricam Ninfa cocon oro xerexi' co cut in to nanain xiricam ma', mam' pe wet urut cacam quem.

¹⁶ Noro iri jein carta ca xirao' mi' xuhu' ca' ne, mi' mi' tiquin' ac hun pain tara oro co howa to nanain Laodiceia cwain. Co howa to nanain Laodiceia quem iri tara ne, mi' mi' tiquin' ac cuhu' pain tara carta ca xirao' mi' toton ca' quem.

¹⁷ Tomi' ca' jun Arquipo ma': Ara xo' ara xo' pi' pin rain ca taramaja nem ca mi' xima ma', xi om ne ca win cwere ara mon Taramaxicon nexi' ta jun.

¹⁸ Wata' pain ca Paulo ta' ca', xirao' pan inain wuxu pain tawirinain ca xirao' ne ca'. Mam' pe wet xine pain ca tao' pe pe cacapa' pain xirinain ca tao' to tao' to to wa ca'. Param inon Iri' Jam pain ca quep xiho' cuhu' ma', pain ca mi' e' cuhu' pain ca param nucun ma'. Je i ca' ca xirao' ne ca'.