Colossenses 3 - Tradução Bíblica Pacaas Novos

Ca hu tococwa pain ca xuruxut xo' je, ma' ta hohot hun Iri' Jam ta tococwa

¹ Je ca tomi' xuhu' ca': Ma' pin nuhu' xocori ca e' wa pain ca howa hun Cristo. Ac ca to' e' mami' wi xihwe con na. Je ta win xumu qui' hwein oro caramaji pawin cain, ca xao pe pe ca Cristo cwain, pain ca xao pe ho' cain iri' curucun Iri' Jam cwain, pain ca taramaxicon wi pin con co Te ca quem.

² Coromicat cara jein caramaji pawin cain. Ta coromicat cara hwein caramaji macan' me.

³ Xi cono' ca' ara hwein caramaji macan' ta. Xocori ca e' nuhu' ma', ac ca joc xa mi' xine na con Cristo pain ca win cwere hun ma'. Ac ca wara to ho' hun na Iri' Jam ma' quem.

⁴ In qui' iri tara Cristo co mi' nuhu' pain xocori ca e' nuhu' ma' ne, maqui' wi ac hun tara, an xiho' ac hun tara pain ca awi tamana nucun quem.

⁵ Je ca tomi' xuhu' ca'. To' om pin jein oro ca param pan teretem ne wara curuhu' ma', ac ca to' parapa' pin hwein tara. Ta quep hwem xequem narima' me. Wahu' quem, pain ca narima' hwe ma', quep e' turuhu' taxuhu' ma'. Ta mam' pe wet hwein oro ca quep ximama' wa me. Ta jain jain hwein oro ca om awi wa me. Ta param hwein ca pan teretem wa me. Ta param ximama' hwein oro carawa me. Wari' co param ximama' nanain oro carawa ma', ac ca Iri' Jam ne cacain na.

⁶ Ta ara ac i ma' camain' hwe me ta, xi om ne ca wap xun ara tococwa oro wari' co om tomi' ha' ac i ma' nana ta. Iri' Jam pan tara co wap toton nonon.

⁷ Ac i ma' paxi' na ca xuruxut nuhu' pain cara pane, pain ca param ximama' ac i ma' hwe pane.

⁸ Ane na e' ne pain ca an to an to pi' pin hwein oro i ca' pain xocori ca' ne. Mo na: Oro ca mana' wa, oro ca hwerehwet ne ca mixita wa, oro ca pan teretem wa, oro ca tomi' napat wa, oro ca tomi' xine caji topac ca om hohot ma' quem, an to an to pi' pin jein.

⁹ Ta tomi' mixein xujuhu' me. An pe pin ara xi' hwein wara curuhu' ta. An to pin hwein oro ca ara taxipa' hwe pain ca om howa querec hun Cristo pane.

¹⁰ Xocoricon wari' pin hwe quem. Tama' to' xocoricon to' xocoricon ac wata' pin hwe ta nuhu' Iri' Jam quem. Ma' ta querec pin' mip mahu' ta nuhu'.

¹¹ Pain ca to' xocoricon wari' pin capari' Iri' Jam cwa', om ca jimama' ca' xijexi' pain ca wari' nexi' ca'. Wahu' pain ca om judeu hwe ma', pain ca om wac xirac xihwe ma', warut quem, pain ca judeu urut ca', pain ca wac xirac urut pain taparinain ca xirac nuxut ca' quem, om ca jimama' ca' xijexi' pain ca to' xocoricon wari' pin capari' Iri' Jam cwa'. Oro wari', oro tatirim co capija ni ca' nonon oro xucucun wari' ma', oro co om to xo' nana pain ca to e' cacain mi ma' quem, oro co taramaja mi' e' nonon xucun wari' ma', oro co taramaja mi' pan xucucun ma' quem, om ca jimama' ca' xucucun. Ac wiricoco ac wiricoco ari nana, xi om ne ca to' xocoricon wari' pin ara tococwa ta. Wirico pan ara xi' na Cristo co iri' taramaxicon. Om na xucun co win hwara' opa ca. Wirico co win cwere win cwere pi' pin napari' pain ca howa xun ca' quem.

¹² Tora' nuhu' Iri' Jam, iri' wari' ne nuhu'. Om ca noc camain' cuhu'. Je ca hohot ne pain ca xiram pa' tamana xujuhu' ma'. An hwet mi' xujuhu' pain ca awi wa. Ta xec xec hwe me ta. Tomi' wixite xujuhu'. Tomi' pan hot xujuhu' quem.

¹³ Ma' iri tara ca to' i'ina nuhu' cocon oro win ma' hwe ne, tomi' pan hot ac xujuhu' tara. Ji'am pin jein ca mana' nuhu' pain ca ara cup xujuhu' quem. Win ca Taramaxicon nexi' pain ca ji'am pin cain ca caracat nexi' ca', ac i ma' tara ca ji'am pin hwein ca mana' nuhu' pain ca ara cup xujuhu' ma' quem.

¹⁴ Ta noc camain' xujuhu' me, je ca param mip ca Iri' Jam ma', pain ca om noc camain' xujuhu' ma'. Pain ca tomi' querec te tamana xijexi' ca', je ca to' jao jao ma' capari' pain ca xica' pe pin ne ximixi'.

¹⁵ Wirico Cristo co mi' nuhu' pain ca tomi' querec te xujuhu', je pain ca xin ne xujuhu' ma'. Tomi' ha' jun pain ca coromicat xo' je cuhu' pain oro ca ara xi' hwe ma' quem. Je ara xi' na ca param mi' cuhu' Iri' Jam pain ca xo' howa xine qui' cuhu' pane. Tomi' querec te xujuhu' pain ca jao jao ma' xujuhu', xi om ne ca xica' pe ara ne xumuhu' ta nuhu'. Tama' tomi' querec te jun pain oro ca ara mi' cuhu' quem.

¹⁶ Mam' pe wet cara jein capijacon Iri' Jam con Cristo ta. Coromicat xo' je pain ca ca' na xujuhu' pain, je pain ca hu xujuhu' ma' quem. Com jein oro xijein tamara' ma' quem, oro salmo ca xirao' to xine pain capijacon Iri' Jam ma', je oro xijein tamara' ca in ac non Iri' Jam, je oro xijein tamara' ca mi' cuhu' Tamataracon Iri' Jam quem. Mam' com je pain ca tomi' querec te hun Cotere' Iri' Jam pain oro ca ara mi' cuhu' ma' quem.

¹⁷ Pain oro ca ara xi' hwe ma', je pain oro ca tomi' xi' hwe ma' quem, querec pin' pan tuturuhu' oro wari' pain ca taramaja mi' hun Taramaxicon nexi' Jeju. An hwet jein wixicon Jeju pain ca tomi' querec te hun Cotere' Iri' Jam quem.

Ca xuruxut xo' nexi' cocon oro win ma' nexi' cwa'

¹⁸ Tomi' inuhu' pain ca narima' hwe pain ca ma' cuhu' tarama' ma': Tomi' ha' jujun taxuhu'. Hohot ara xi' na pain ca tomi' ha' huhun ma', xi om ne ca win cwere ara hun Taramaxicon nexi' ta.

¹⁹ Wahu' quem, pain ca cut hwehwem narima' ma', tomi' inuhu' quem: Ta noc hwehwem manahu' me. Ta tomi' mana' hwehwem me, tomi' wixite e' jem ta.

²⁰ Wahu' quem oro hwijima', tomi' inuhu' quem: Tomi' ha' jun cote hwe cam juhu' ma'. Tama' tomi' ha' jejem pain oro ca ara je cucuhu' ma'. Xi om ne ca hohot ara con Taramaxicon nexi' pain ca tama' tomi' ha' hwehwem ta.

²¹ Wahu' quem, pain ca wanxi' hwe ma', tomi' inuhu' quem: Ta tomi' taparam' mana' hwehwem mana panxihwe me. Mo ta tomi' taparam' mana' hwehwem, naro ac cacama tara.

²² Tomi' inuhu' pain ca taramaja mi' e' huhun taramaxicon nuhu' pain macan' ca' quem. Tama' tomi' ha' jujun pain oro ca ara je cucuhu' ma'. Ta tomi' ha' e' huhun pain ca querec hohot xuxun pain ca ja' noro cacapari' ta hwe me. Tomi' ha' iri'o' jujun, tomi' ha' querec te tara iri' xumuhu' ta, xi tomi' ha' pan ara hun Taramaxicon nexi' ta.

²³ Oro ca ara xi' hwe ma', mam' ara jein pain iri' ca tomi' querec te nuhu'. An xiho' jujun wari' co taramaja mi' nonon Taramaxicon nexi' ma'. Ta an xiho' huhun wari' co taramaja mi' e' nonon wari' me ta.

²⁴ Xi om ne ca taxi' ara hun Taramaxicon nexi' pain ca main mi' xuhu' pain carawa ca taramaja mi' hwe pane cuhu' ma'. Mi' xuhu' pain iri' caramaju ca wara tomi' pe mi' xuhu' pane ta nuhu'. Wirico Taramaxicon nexi' Cristo co taramaja mi' hwe ma' ira.

²⁵ Oro wari' co pan teretem nana ma', win hwe pane ac cocon tara Iri' Jam, wap wap ac tococwa tara pain ca pan teretem nucucun. Xi tomi' querec te paxica' ca Iri' Jam ta.