Colossenses 2 - Tradução Bíblica Pacaas Novos

¹ Xirao' mi' ac i ma' inuhu', ma' ta taxi' mahu' pain ca taramaja tamana mi' xuhu' ca'. Jain jain ina pain ca quep xiho' xim xuhu'. Wahu', oro co howa to nanain Laodiceia ma', oro xucucun xerexi' co om querec pin' querec nanapa' ma' quem, jain jain jain jain pi' pin inuhu' pain ca quep xiho' xim xuhu' ca'.

² Jain jain inuhu', ma' ta hwara' opa hwe pain xumuhu' ta inuhu'. Ma' ta xica' pe ne xumuhu' pain ca tomi' querec te caracan xujuhu' ma' inuhu'. Ma' ta taraju pa' taraju pa' pi' pin hwein ca coromicat nucun Iri' Jam ca om taraju pa' hwe con Cristo ira inuhu'. Ma' ta querec pin' iri'o' hun ta inuhu'.

³ Wirico Cristo co an hwet mi' napari' pain ca taxi' tamana nucun Iri' Jam ca awi, wirico co an hwet mi' napari' pain ca taraju pa' xin quem.

⁴ Tomi' ac i ma' inuhu', ma' ta om howa huhun co ac ca iri'o' xi' ca' tara me nana pain ca tomi' ximama' nucucun pain ca tomi' tomi' na xun paxi' cucuhu' ma'.

⁵ Pira ca' paxi' inuhu' pain cwere ca', ane mam' pe wet xuhu' ne. Ac ca pe ho' xuhu' na pain xumu ca'. Tomi' querec te inuhu', xi om ne ca taxi' ara xuhu' pain ca xuruxut xo' hwe ma', je pain ca hwara' opa hwe pain ca howa hun Cristo ma'.

Ca xuruxut nexi' pain ca win cwere xun Cristo

⁶ Je ca tomi' xuhu' ca'. Xuruxut xo' xuruxut xo' tiquin' je pain ca win cwere hun Cristo Jeju ma'. Win ne ca howa hwein ca pijim' xihwe con, pain ca Taramaxicon na ta xihwe con pane.

⁷ Win ne pana ca hwara' opa ma', pain ca corom mama' nein paxicom caximain ma', ac i ma' tara pain ca hwara' opa hwe con Taramaxicon nexi'. Horon horon tiquin' je pain ca win cwere hun ma'. Howa mip jein oro ca pijim' xihwe con pane. Tama' tomi' hwet tomi' hwet tiquin' jein ca tomi' querec te nuhu' con Iri' Jam quem.

⁸ Ma' tara xumuhu' me. Ma' ta om cuc cuc cucuhu' oro co tomi' tomi' na xim nunuhu' ma', pain ca pijim' pijim' camara' pin xim cucuhu' pain ca coromicat pan teretem nucucun je pain ca pijim' mixein nucucun ma'. Oro ca pijim' ximama' nucucun ma', maqui' nain ca coromicat pan nucucun oro wari'. Maqui' nain oro ca howa ximama' nucucun pain macan' ca'. Om ca maqui' con Cristo.

⁹ Wari' paxi' na Cristo. Ane pe ho' pan con Iri' Jam ne. Iri' wirico na pain oro ca coromicat nucun, je pain oro ca ara nucun, je pain oro ca hwara' opa nucun quem.

¹⁰ Je ca ma' ma' pi' pin cuhu' oro ca to' hwara' opa nuhu' ma', xi om ne ca win cwere ara hun pain ca iri' Taramaxicon ca ma', pain ca hwara' opa tiquin' ca' cocon oro co hwara' opa paxi' nana ma', co taramaxicon nana ma'.

¹¹ Oro judeu ma', wac xirac xucucun pain taparinain ca xirac nucucun ma', ma' ta querec pin' cacapari' oro wari' pain ca wari' nucun Iri' Jam iri' ca' nana. Wahu' iri na ne, pain ca win cwere hun Cristo ma', je ca iri' wari' nucun Iri' Jam pin hwe quem. Om ca wari' ca co to' iri' wari' nucun Iri' Jam pin nuhu' ma', om na. Wirico Cristo co to' iri' wari' nucun Iri' Jam pin nuhu' ma'. To' jimama' pin nuhu', an ca' nuhu' pain wara curuhu' ca caracat taxipa' ma'.

¹² Ja' iri xihwe pain com pane ne, ac ca cut corom to wi xihwe con na, ac ca e' mami' wi hwe con na quem. Xi om ne ca howa ara hun Iri' Jam pain ca hwara' opa nucun ma', pain ca ha' con pain ca to' e' mami' con Cristo pane.

¹³ Wahu' pain ca om judeu hwe ma', pain ca om an ca' querec xihwe pain wara curuhu' ca to' caracat nuhu' pane, ac ca cono' hwe na pain xumuhu' pane, xi om ne ca caracat taxipa' ara hwe ta. Ane to' e' cuhu' Iri' Jam ne. To' e' wi nuhu' con Cristo. Xic am xic am pi' pin nain oro ca caracat nexi' quem.

¹⁴ Xic am pin nain ca xirao' pe nein oro ca dever iri' pain ca caracat nexi' pain ca om tomi' ha' xin oro ca ara je capari' pane, je pain ca coromicat an pe pin cain ca wap xim capari' pane ira. To' om pin nain. Ac ca tatatain mi' cain na pain panaxicon Cristo pane.

¹⁵ To' quiji' pin iri tata oro caxicon jam co taramaxicon nana ma', co hwara' opa paxi' nana ma', querec pin' querec pin' pi' pin ac tococwa na pain ca hwara' opa hwara' opa om pin caca ma'. Wirico Iri' Jam co hwara' opa tamana ma', xi om ne ca ara pan ara ca Cristo pain ca mi' pin pe cain pana ta.

¹⁶ Je ca tomi' xuhu' ca'. Miri'om jujun oro wari' co tomi' em' nunuhu' pain ca om ein hwein oro ca cao' wa pain oro ca toc wa ma', je pain ca om tomi' querec te wi huhun pain ca mam' pe wet cacain oro xec nucucun, je pain ca om tomi' querec te wi huhun pain ca xo' hwet xo' hwet ca panawo' ma', je pain ca om xao to wa wi huhun pain xumuhu' pain oro sábado ma' quem.

¹⁷ Oro i ma' ca ara caca oro judeu ma', ca tomi' ha' je caca co tomi' em' nunuhu' ma', tomi' joc mam' mi' e' nain oro ca ara ta' ne con Cristo pain ca om maqui' querec ca ira. Ane maqui' pin ca ne. Wara ara pin nain oro ca tomi' joc mam' mi' nein con.

¹⁸ Oro co hohot urut xi' ma nana pain ca in ac cocon oro jam co taramaja mi' nonon Iri' Jam ma', tomi' ca' nunuhu': Win ne ca tohwein' urut ca' nana, tomi' hwet tomi' hwet ac cucuhu' na pain oro coximinain ca tohwein' nucucun ma'. Mo ta om tomi' ha' hwein ca tomi' hwet urut pahu' ca', om ta witan hwe ta nunuhu'. Je ca tomi' xuhu' cocon: Miri'om jujun. Xec xec ximama' e' nana, xi om ne ca coromicat an xiho' ara cacain ca wari' wa ta.

¹⁹ An pe pin nonon Cristo co Taramaxicon ne iri' cwa', co hu napari' pain ca ac curucun iri' ca'. Ac winaxi' ara xi' na Cristo, xi om ne ca Taramaxicon pe ho' ara capari' ta. Wirico co to' hwara' opa napari', wirico co to' jao jao ma' napari' quem. Win ne oro carapitaxi' pain oro caramaxi' ca to' wi nain oro araxi' pain caramaxi' ma', pain cwerexi' ca', ac i ma' napari' Cristo cwa'. To' jao jao ma' napari', to' horon horon tiquin' ac capari' na pain ca howa nexi' ca' quem. Je ca param mi' capari' Iri' Jam.

²⁰ Wahu' pain ca howa hun Cristo ma', ac ca cono' wi hwe con na. Je ca cono' ca' hwein oro ca howa ximama' nucucun oro wari' nein macan' ca'. Om ca hwara' opa mami' cuhu' oro ca hu nucucun quem. Je xi miri'om huhun quem? Ac ca hwara' opa hwara' opa wet cucuhu' a xira ta. Para tomi' ha' tomi' ha' wet huhun pain ca hu cucuhu' quem?

²¹ Hu ca' nunuhu': Ta an main i ma' me. Ta cao' main i ma' me. Ta quep main i ma' me, ac i ma' nunuhu'.

²² Cain' cain' xihwe quem? Oro ca narain ho' cucuhu' ma', mo ta an pin hwein, mo ta cao' pin hwein, mo ta quep pin hwein quem, om pin ac ne na. Je ca tomi' xuhu' ca': Oro ca hu nucucun co narain ho' ximama' nana ma', maqui' e' nain ca coromicat nucucun.

²³ Ac ca hohot ne paxi' na ca hu nucucun pain ca narain ho' xucucun pain oro carawa. Ac ca win xumu iri'o' cocon na Iri' Jam, ac ca tomi' iri'o' caca na pain ca om ca xec xec urut ta caca ma', ac ca miri'om iri'o' cacain na ca param pan nucucun ma'. Ane om iri'o' caca ne. Om ca quep xiho' camain' tococwa oro wari' co an xiho' nonon quem, xi ha' cocon pain ca an to pin cacain oro ca param pan teretem nucucun ta.