Colossenses 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Apóstolo ra napa' Cristo Jeju pane, pain ca tomi' hwet roron pain capija oro wari' capa' pane. Xi om ne ca wirico ara ca Iri' Jam co param mi' napa' pain ta. Wata', wirico coxari' Timóteo cwa', ca' urut pain ca xirao' mi' urut pahu' ca'.

² Xirao' mi' urut pahu' pain ca to hwein Colossos ma', pain ca wari' nucun Iri' Jam hwe ma', je pain ca tomi' ha' cara hun Cristo pain ca howa hun ma' quem xere. Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Ca tomi' querec te urut con Iri' Jam pahu' ta tococwa

³ Tomi' mi' iri urut pahu' con Iri' Jam co Te ca Taramaxicon nexi' Jeju Cristo ne, tama' tomi' querec te urut con pahu'.

⁴ Xi om ne ca taraju ara urut pahu' pain ca howa hun Cristo Jeju ta. Taraju urut pahu' pain ca tomi' querec te tomi' querec te pi' pin huhun oro wari' nucun Iri' Jam quem.

⁵ Howa hun Cristo Jeju, tomi' querec te huhun oro wari' nucun Iri' Jam quem, xi om ne ca howa ara hun pain ca an to xo' mi' cuhu' pain oro ca awi wa pain pawin cain. Wara tomi' hwet xihwe pain pane, taraju hwein cocon co tomi' hwet nunuhu' pain capijacon Iri' Jam ca iri'o' ma', ca tomi' hwet cucuhu' con Jeju co to' witan xim napari' ma'.

⁶ Capijacon Iri' Jam con Jeju ca pijim' hwet xihwe pane, pijim' hwet pijim' hwet xam' tata pain oro wari' pain oro xijein macan' quem. Oro co howa nanain ma', to' jimama' pin ac tococwa na. Win cuhu' pain ca xo' taraju ten qui' hwein pain cara pane, pain ca xo' querec pin' ten qui' hun Iri' Jam pain oro ca xiram pa' iri'o' capari' ma'.

⁷ Wirico Epafras co ca' na nuhu' pain capijacon Iri' Jam con Jeju pane. Tomi' querec te tamana urut con Epafras cwa'. Taramaja wi naparut, taramaja xo' na pain ca quep xiho' cuhu' pain ca taramaja mi' con Cristo quem.

⁸ Wirico co tomi' hwet naparut pahu' quem. Tomi' hwet naparut pain ca meo cuhu' Tamataracon Iri' Jam ma', pain ca mi' cuhu' pain ca tomi' querec te huhun oro wari' nucun ma' quem.

Ca tomi' mi' tococwa con Iri' Jam

⁹ Je ca tama' tomi' mi' urut pahu' con Iri' Jam quem. Je curuxut mao na, pain xec nein ca xo' taraju qui' urut pahu' pain ca tomi' hwet caparut Epafras pane, mao ac ne ma' na pain ca tomi' mi' urut pahu' con Iri' Jam. Mi' roron pain ca querec pin' cacain oro ca param nem ta urut con pahu'. Mi' roron pain ca taxi' taxi' pi' pin cacain ta urut con pahu'. Je Tamataram tara ca mi' nonon pain ca taraju pa' cacain oro ca param nem ta urut con pahu'.

¹⁰ Tomi' mi' ac i ma' urut pahu' con, ma' ta xuruxut xo' hwe pain ca howa hun Taramaxicon nexi' ma'. Ma' ta hohot hun pain oro ca ara hwe ma', pain ca ara cara hwein oro ca awi wa ta urut pahu'. Ma' ta horon horon tiquin' hwe pain ca querec pin' hun Iri' Jam ta urut pahu'.

¹¹ Param urut con Iri' Jam pain ca to' hwara' opa cuhu' ma', mam' to' hwara' opa turuhu' pain ca hwara' opa pan nucun. Ma' ta tomi' querec te cara hwe pain ca quereme hwein oro ca to' i'ina nuhu', je pain ca om toron ne xumuhu' pain quem urut pahu'.

¹² Ma' ta tomi' querec te hun Cotere' quem urut pahu'. Wirico pan co to' hohot napari', pain ca main mi' xim xuhu' pain oro caramaju ca wara tomi' pe mi' xuhu' ca' capari' pain ca wari' ne capari' ca'. Ame hwe e', main cut xin irin pain pawin cain, ca toha pe ne naran nucun cain.

¹³ Xi wirico ara ca co to' witan ca' napari' con Caxicon Jam ma', co taramaxicon pe nain ca jitacat nein xim ma'. To' witan ca' napari' con, an to pin ac capari' na pain ca taramaxicon pe ca Panxica co om noc ca ma'.

¹⁴ Wirico Panxica co to' witan napari' cwa'. Wirico co xic am pin nain ca caracat nexi' ca'.

Ca hwara' opa tiquin' ca' cocon oro co hwara' opa nana Cristo

¹⁵ Om paxi' na ca querec ac tocwa Iri' Jam, ane querec pan tocwa Cristo ne. An tan pan non Iri' Jam, ac iri' wirico na. Wara ma' na pain ca om om wet ne oro carawa pane. Iri' Taramaxicon na, hwara' opa tiquin' ca' nain oro ca tomi' ma' pin ca Iri' Jam quem.

¹⁶ Xi om ne ca wirico ara ca co win mu pan ca Iri' Jam pain ca tomi' ma' tomi' ma' pi' pin cain oro carawa pane. Win mu non Cristo Iri' Jam pain ca tomi' ma' pin cain oro carawa ca to nain pawin ma', ca to nain macan' ca' quem, oro ca querec iri', oro ca om querec iri' quem, win mu non Cristo Iri' Jam pain ca tomi' ma' pin cain pane. Win mu non pain ca tomi' ma' pin cain oro carawa, oro wari' cocon oro jam ma' quem, oro co taramaxicon to nanain pawin ma', co hwara' opa nana ma', win mu non Cristo pain ca tomi' ma' tomi' ma' pi' pin tococwa pane. Ma' ta querec pin' xim pain ca awi tamana nem ta non.

¹⁷ Wara ma' ma' xam' ca' nain oro carawa Cristo, wirico co to' teren nain. Wara ma' ma' xam' ca' nonon oro wari' cocon oro jam ma' quem, to' teren to' teren pi' pin nonon. Wara ma' na pain ca om tomi' ma' querec tocwa wari' cocon oro jam ma' quem.

¹⁸ Wirico co taramaxicon pe ho' napari' pain ca howa xun ca', taramaxicon pe ho' napari' pain ca ac curucun iri' ca'. Wirico co to' e' napari', xi om ne ca wirico ara ca co e' mami' cain' ta. Ma' ta Iri' Taramaxicon ma ta non Iri' Jam.

¹⁹ Je ca param ca Iri' Jam pane. An tan pan ne pain ca Iri' Jam ne ta, an tan pan ne pain iri' xumum ta non Cristo.

²⁰ Ao mao tara cocum pain ca mi' pin pe main pana, ma' ta in hwet in hwet pi' pin cacapa' oro wari', je oro carawa quem, in hwet in hwet pi' pin tatarapa' oro co to nanain macan' je pawin ta. Tomi' querec te mami' tatarapa', taxipa' taxipa' pi' pin ac cacapa' tara quem. Ac i ma' na ca tomi' con Cristo Iri' Jam ma'.

²¹ Wahu' ma', pain ca om howa querec hwe pane, to pira ca' hun Iri' Jam. Noc hun pane. Xi om ne ca pan teretem ara hwe pain ca coromicat nuhu', je pain ca xuruxut nuhu' pane ta.

²² Ane cut in pan cuhu' pain xocori ca' ne. Xi om ne ca mi' pin pan ara ca Cristo pain ca wari' nucun pane ta. Mi' pin na, ma' ta om pin cuhu' ca caracat wa ta nuhu', ma' ta om ma' camain' cuhu' ca to' em' nuhu' pain ca aram aram o mi' xuhu' con Iri' Jam ta nuhu'.

²³ Mo ta howa tiquin' howa tiquin' hun Cristo ma', mo ta hwara' opa cara hwe pain ca howa nuhu' ma', mi' ac cuhu' tara pain ca om ma' camain' cuhu' ca to' em' nuhu' ma'. Ta howa ni ca' camain' hwein capijacon Iri' Jam con Cristo me ta. Howa howa tiquin' jein oro ca wara tomi' pe nucun ca ara mi' xim cuhu' con. Wara pijim' xihwe pain pane, taraju hwein. Pijim' hwet pijim' hwet xam' tata pain oro xijein macan' oro wari' quem. Je ca taramaja ne ca' quem. Wata' pain ca Paulo ta' ca', pijim' hwet taxipa' inain capijacon Iri' Jam con Cristo.

Ca taramaja ne pain ca pijim' tain capijacon Iri' Jam con Cristo

²⁴ Jain jain paxi' ina pain xocori ca', xi om ne oro ca taramaja ne pain ca quep xiho' toton oro win ma' nuhu' pain ca om judeu hwe ma'. Ane tomi' querec te pan ta' ne. Ac ca jain jain wi ta' con Cristo na, ac ca moin' pin ne na ca jain jain ne pahu'. Xi om ne ca quep xiho' ara xihwe pain ca jain jain ne ca', pain ca ac curucun iri' pain ca howa xun ca'.

²⁵ Mi' napa' pain ca taramaja ne Iri' Jam ma', pain ca taramaja mi' roron co howa nanapa' ta capa' pahu'. Ara tain quem ina. Je ca pijim' mi' pijim' mi' pi' pin toton pain capijacon Iri' Jam oro win ma' hwe pain ca om judeu hwe ma'.

²⁶ Om paxi' na ca taraju pa' cacain ca coromicat nucun oro hwanana pane. Ane an hwet pin cain pain xocori ca' ne, an hwet mi' napari' pain capijacon pain ca wari' ne capari' pain xocori ca'.

²⁷ Awi tamana na ca coromicat nucun Iri' Jam ca an hwet pin ca pain xocori ca'. Ac i ca' na ca coromicat mi' cuhu' pain ca om judeu hwe ma': Pe ho' turuhu' Cristo, win cwere turuhu' pain iri' xumuhu'. Wirico co to' taxi' nuhu' pain ca aram aram to ho' xun hun pain pawin cain.

²⁸ Pijim' hwet pijim' hwet pi' pin urut cocon con Cristo oro wari' ta. Hu hu pi' pin urut cocon, ca' na xo' ca' na xo' pi' pin urut cocon pain capijacon Iri' Jam pain ca taraju pa' urut pain quem. Ma' ta querec pin' xihwe pain ca iri' wari' pin hwe, je pain ca ximicon hwanana pin hwe pain ca win cwere pin hun Cristo ta urut cocon. Wara ac i ma' tatara ta urut pahu' pain ca aram aram o mi' xut pahu' con Iri' Jam ta, ac i ma' na ca coromicat nuxut.

²⁹ Je ca taramaja tamana ta' ca', mija na ca taramaja ta' ca'. Mam' taramaja inain ca hwara' opa nucun Cristo co pe ho' napa' cwa' quem.