Atos 7 - Tradução Bíblica Pacaas Novos

Ca pijim' cocon oro taramaxicon Estêvão

¹ Tomi' querec ac con Estêvão na sacerdote co iri' taramaxicon: Iri'o' na ca tomi' nucucun pain ca tomi' em' quequem ca'? Ac i ma' na ca tomi' querec con ma'.

² Tomi' ac ca na Estêvão: Taraju wet xine me xere cocon oro taramaxicon ma'. Iri' Jam co howa iri' cwa', co in ac iri' pain ca hwara' opa tamana nucun ma', hwet pa' non hwanana nexi' Abraão cara pane, pain ca pe pe wet cain macaracon pain Mesopotâmia pane, pain ca om mao querec cain xijein cidade pain Harã pane. Tomi' ac con na:

³ Paca' rain macaram ca'. Paca' roron oro ca nari nem cwa'. Mao rain xijein macan' ca tomi' mi' xim xim ca' ac con na.

⁴ Paca' ac cain na macaracocon oro wari' nein Caldeia pane, wara ca' na xijein cidade pain Harã ma', mon to wet ac cain na i cain. Mi' pin iri na cote ca ne, o qui' ac con na Iri' Jam. O qui' non pain macaraxi' ca to iri' ca'.

⁵ Om paxi' na ca mi' con pain macan' pane. Om ca mi' wijimain camain' con pain, om om na. Ane tomi' pe con pain capijacon ne. Tomi' ca' non: Main mi' xim pain macan', main mene rain. Mi' pin iri ra ne, mene ac cacain tara waram winam quem, ac i ma' na ca wara tomi' pe con Iri' Jam pane. Pain ca wara tomi' pe con pain capijacon Iri' Jam pane, om om wet na ca wanxi' ca Abraão.

⁶ Ca' na ca wara tomi' pe con pane: Tatirim to tatarain xijein macan' oro waram winam co wanxi' tiquin' xi' nana pa'ao'. Quep em' ac tococwa tara pain ca taramaja je taramaja je xun tococwa pain macaracocon oro tatirim. Om ta cut mi' tococwa pain dinheiro pain ca taramaja e' caca quem. Ma' 400 tara cawaxi' pain ca quep em' xun tococwa.

⁷ Aram aram wap ac toton tara oro tatirim co taramaja mi' e' xi' caca quem. Paca' ac cacain tara macaracocon, tan' qui' ac cacain i ca' tara, pe torotop mi' querec te to ac cacapa' tara pain i ca' quem. Ac i ma' na ca tomi' con Abraão Iri' Jam pane.

⁸ Tomi' xo' ac con na: Wac xirac jein taparinain ca xirac nuhu' pain ca tarama' nuhu' ta. Ma' ta querec pin' xihwe pain ca na ra mahu' pain ca tomi' xo' xuhu' ca', pain ca wara tomi' an pe xo' mi' xuhu' pain capija ca' inuhu' ta non. Aram aram wanxi' ac ca na Abraão, pan' qui' ac ca na panxica, wirico Isaque cara pane. Ma' 8 pin iri na xec nein ca pan' qui' nucun ne, wac xirac pan ac cain na taparinain ca xirac nucun. Ac i ma' na Isaque pain ca wanxi' pin con panxica Jacó pane quem, wac xirac ac cain na taparinain ca xirac nucun. Ac i ma' na Jacó pane quem. Wanxi' iri tata mana panxica co iri' hwanana nexi' ne, co ma' 12 nana pane, wac xirac ac cain na taparinain ca xirac nucucun quem, ac i ma' na ca tomi' cocon oro taramaxicon Estêvão ma'.

⁹ Oro hwanana nexi' cara pane, noc nonon coxa' caca José cara pane, noc mi' nonon con cote caca co tomi' querec te tamana pan non pane ac tococwa na. Vender mi' ac cocon na cocon tatirim co an mao nonon pain Egito. Taramaja mi' e' totoron oro wari' nein Egito pain i cain ta paxi' nonon pane. Ane pe ho' pan con Iri' Jam ne.

¹⁰ To' witan ca' non pain oro carawa ca to' jain jain non, oro wari' co to' jain jain nonon quem, to' witan ca' ac cocon con na. Mi' ac con na pain ca taxi' tamana wa quem. Je ca tomi' querec te pan con taramaxicon nucucun oro wari' nein Egito, wirico Faraó cara pane. Hohot mapa', xi om ne ca taxi' tamana ara ma ma' non. Mi' ac con na pain ca taramaxicon pe cain Egito quem. Wum tara co querec wet querec wet pi' pin nain oro carawa nein Egito, querec wet querec wet pi' pin rain oro caramajinain xuru ca' quem non.

¹¹ Pe' tamana ac caca na oro wari' co to nanain Egito, je pain Canaã ca to caca ca nari nucun José pane quem. Jain jain tamana nana pain ca pe' wa, ximin nana. Om ca mam' cacain carawa ca cao' wa oro hwanana nexi' quem.

¹² Ma' ma' wet na tocwi trigo pain Egito ta ac tocwa na Jacó quem. Mama' jein i cain ta ac tococwa na mana panxica pane, wiricoco hwanana nexi' cara pane. Mama' jein Egito ta, cut jein tocwi trigo ta ac tococwa na. Je ca xo' mama' qui' cacain Egito pane, in qui' ac caca na quem.

¹³ Ac i ma' ac i ma' nana. Aram aram cut mami' xin trigo ta ac caca na, in mama' ac caca na. Tan' mama' iri nanain i cain ne, tomi' xo' pan ac cocon na José: Wata' ta xere. Xa' mahu' ta ac cocon na. Tomi' hwet ac con na Faraó ma' quem. Caram cwa' xere ta ac con na.

¹⁴ Tomi' pan ac cocon xurucun na José: O qui' jun cotere' Jacó me. O qui' o qui' pi' pin jujun oro ca nari nexi' quem ta nonon. Mija nana oro ca nari nucucun pane. Ma' 75 nana pane.

¹⁵ Mama' ac cacain na Egito Jacó cocon oro hwanana nexi' pane. Je ca mi' pin pe ca ma' quem, je ca cono' to caca oro hwanana nexi' pane quem.

¹⁶ Cono' pin iri nana ne, pain pin iri na cocon ne, cut in ac xine na aracocon Jacó con José. Xuruxut xuruxut, wara ca' na cidade pain Siquém ma', pain manain pacun ca wara an ca Abraão cara pane, pain ca mi' cocon pain dinheiro mana panxica Hamor pane, cut corom to ac xine na aracocon.

¹⁷ Mon to wet ac cacain na Egito pane. Mon to wet mon to wet, pain pin iri na ne, wixicam pin ac ne na xec nein ca wara tomi' pe con Abraão Iri' Jam pane, pain ca main to' witan toton waram winam ta qui' con pane. Ca mija tiquin' mija tiquin' caca oro hwanana nexi' pain Egito pane, ca wixicam wixicam pin ne xec nein ca wara tomi' pe ca Iri' Jam pane, ca mija mija tiquin' caca pane, ca wixicam wixicam pin ne xec nein pane. Ma' mija tamana pin ac caca na oro hwanana nexi' pane.

¹⁸ Aram aram corom pin ac ca na xucun taramaxicon co om taxi' camain' non José cara pane. Om ca taxi' con pain ca quep xiho' tamana cocon oro wari' nein Egito pane.

¹⁹ Xucun taramaxicon ma', co xo' corom ma', mixein ac cocon na hwanana nexi' pane. Quep em' nonon, xin hwerehwet pin jujun mana panxihwe co xo' camara' nana ma', ma' ta cono' pin caca ta nonon pane.

²⁰ Je i ma' oro xec pain ca pan' qui' ca Moisés pane. Om ca xaxa' ca, tucu awi tamana na ca pije' nucun Moisés. Hohot napa' ta non Iri' Jam quem. Ma' 3 na panawo' pain ca querec wet noc xa tocwa pain xiricon cote ca pane.

²¹ Aram aram maqui' ac ne na xec nein ca om querec wet noc xa mami' ac tocwa pane. An terem' hwet pe ac tocwa na, mam' pan ac con na panxica taramaxicon. Pe horona ac con na, iri' cawiji na co cwa' ta ac con na quem.

²² Aram aram ca' na ac tocwa na pain oro ca taxi' nucucun oro wari' nein Egito, aram aram hwara' opa pin ac ca na pain oro ca tomi' nucun je pain oro ca ara nucun quem.

²³ Ma' 40 pin iri non cawaxi' ne, mo querec toton oro win ma' ne pain ca wari' nein Israel ta' ca' ac xucun na, mo hwet ac tococwa na.

²⁴ Querec ac con na win ma' ca ma', co quep em' wa ma'. Wari' nein Egito na co quep em' pan non ma'. Mo nain ho' ton ta ac xucun na, mo hwet ac con na, win mon win ma' ne cwa' ac con na, to' pa' pin ac con na quem.

²⁵ Querec pin' tatarapa' xi' ma tata oro win ma' ca pane. Mam' tarapari' con co cwa' Iri' Jam ta, mam' to' witan tarapari' con ta, ac i ma' tatarapa' ta, ac i ma' paxi' na ca coromicat nucun Moisés pane ira. Ane om ac i ma' ne ca coromicat pan nucucun ne. Om ta mam' capari' con Iri' Jam ta nonon pane.

²⁶ Xec pin iri na ne, in hwet ac tococwa na. Wara to' caracan xucucun oro win ma' ca ma'. Ma' 2 nana co to' caracan xucucun. Querec iri tata ne, mo hwet ac tococwa na. Cain' cain' xihwe quem ac tococwa na. Win ma' ne xujuhu' ma' ira. Para to' xujuhu' ma' quem ac tococwa na. Tomi' xo' toton paxi' pan nonon Moisés.

²⁷ Ane joc in pin tocwa ne. Joc in pin pan na co to' ma'. Ma' co taramaxicon pe ho' roron ta nem parut quem? Ma' co juiz pe ho' roron ta nem parut quem?

²⁸ To' pa' pin ton mapa' ra? Win ta' pain xec pane, pain ca to' pa' pin ton wari' nein Egito pain xec pane mapa' ra? Ac i ma' na ca tomi' ximao con Moisés co to' ma'.

²⁹ Taraju iri nain ca tomi' ximao nucun ne, jin' pin ac ca na Moisés. Mo mao ac ca na, mao ac cain na macarain Midiã, tatirim pe ac cain na i cain. Aram aram an ac cam na narima', wanxi' pin ac ca na quem. Ma' 2 nana mana panxica pane.

³⁰ Mon to wet ac ca na, mon to wet mon to wet. Pain pin iri na ne, ma' 40 pin iri na cawaxi' pain ca mon to wet cain i cain ne, hwet pa' ac con na Iri' Jam. Ac jam co taramaja mi' non na pain ca hwet pa' con ma'. Hwet pa' pe non pain wijimain pana ca wiran pe nain mahweri pane, ca pe ja' pan nain cote ne pacun pain Sinai pane.

³¹ Querec iri nain ca om wiran mao ne wijimain pana ne. He! Cain' cain' ne ne ac xucun na. In ac nain. Mo querec ta' e' ac xucun na. Xut xut wixicam pin iri nain ne, taraju ho' nain ca tomi' nucun Taramaxicon Iri' Jam.

³² Wata' ta, co Iri' Jam ne caca oro hwanana nem Abraão con Isaque con Jacó pane ta na ca tomi' tocwa ma'. Cocoroc ac ca na pain ca jin' nucun. Om ca noro ac cain xe pain ca jin' nucun.

³³ Tomi' ac con na Taramaxicon Iri' Jam: Hot rain caji caximam ma', xi awi tamana ara ne macan' ca xat pe ma ca'. Iri' macara ca'. Xi pe ara tain i ca' ta non.

³⁴ Querec inonon oro wari' ne pain Egito ac con na. Querec inonon pain ca jain jain caca pain ca quep em' tococwa. Taraju inain ca toron nucucun quem. Je ca quiji' qui' ta' ca'. To' witan pin toton ta ina. Hap ra, in mao rain Egito ta inem. Ac i ma' na ca tomi' con Moisés Iri' Jam pane.

³⁵ Moisés cara pane, wirico co noc caca oro win ma' ca pane, pain ca tomi' ximama' ca' cocon pane: Ma' co taramaxicon pe ho' roron nem ta naparut? Ma' co juiz pe ho' roron nem ta naparut, tomi' ximama' ac i ma' nonon pane. Ane tomi' pan con Iri' Jam ne. Hwet roron, taramaxicon pe ho' roron, to' witan pin roron pain ca taramaja mi' e' cocon oro wari' nein Egito ta non pane. Mam' tomi' non con jam co taramaja mi' non pane, pain ca hwet pa' con pain wijimain pana pane.

³⁶ Wirico Moisés co o qui' nonon oro hwanana nexi' pain ca cut ca' cocon pain Egito pane. An hwet pe tamana nain ca hwara' opa nucun Iri' Jam pain ca ara cain carawa ca om ara taxi' ne ca wari' wa pane. Ara an hwet pe nain pain Egito pain Cote ne Com Paca' Paca' pane. Ma' 40 na cawaxi' pain ca ara an hwet pe cain pain mahweri pane quem.

³⁷ Wirico Moisés co tomi' nonon oro hwanana nexi' pain ca wari' nein Israel iri' quem. Tomi' ca' nonon pane: Main mi' turuhu' con profeta Iri' Jam ma'. An xiho' tarapa' pain ca profeta ta' ca'. Iri' win ma' nuhu' tara ta nonon.

³⁸ Wirico Moisés co pe ho' nonon oro hwanana nexi' pain ca cut in xucucun pain xiquijinain pacun pain Sinai pain mahweri pane. Wirico co taraju nain ca tomi' nucun jam co taramaja mi' non Iri' Jam pane, an xin tiquin' mi' pan ac tococwa pain na oro hwanana nexi'. Taraju nain ca tomi' nucun pain ca tomi' hwet con pain capijacon Iri' Jam ca e' cara ma', an xin tiquin' mi' ac capari' pain na quem.

³⁹ Taraju paxi' nanain ca tomi' nucun Moisés hwanana nexi' pane. Ane om tomi' ha' je na cocon ne. Noc urut pum ta nonon, in mama' xixin Egito na urut ta ac cocon na quem.

⁴⁰ Je ca tomi' cocon Arão ma', cwaji' ca Moisés ma': Quep mi' xut pain caji pacun ta, ma' ta Iri' Jam ne xin, ma' ta o mama' capari' ta. Xi taxi' xun co om in cara ne, co cut in ca' napari' pain Egito pane. Ac ca pan' am ca a xira ta nana pain ca tomi' xirac cocon Moisés.

⁴¹ Quep ac cacain na caji pacun. Quep quep ac wijimain boi nanain. Iri' Jam nexi' ac cacain na quem. To' pa' mi' ac cacain na pain carawa ca wina caca, tom tain' mi' ac cacain pain na quem. Tomi' querec te ac xucucun na pain jami wijimain boi ca quep pan caca ma' quem pane.

⁴² Je ca xin in ca' tococwa pane. Xin in pan nonon Iri' Jam. To wet iri caca ma'. Howa ximama' ma' tatara ne tata. Mo ta pe torotop mi' querec te xun cocon panawo' con pijo' ma', je i ma' cocon, to wet iri caca ma'. Param ma' totoron ne tata. Win ne ca xirao' pe ca profeta pain cara pane. Ca' na con pane: Tomi' querec xuhu' oro wari' nein Israel: Wata' tara co to' pa' mi' hwe pain carawa pane ra? Wata' tara co tom tain' mi' hwe pane ra, pain ca ma' 40 ne cawaxi' pain ca to hwein mahweri pane?

⁴³ Om na ta! Oro pacun ca to' pa' mi' hwe pane, ca tom tain' mi' hwe pane. Oro xirinain jaminain ca corom to ne ma', je ca an mamam' hwe pane. Moloque na wixinain wirain ma' pahu', an mamam' hwein xirinain. Renfã na wixinain wirain ma' pahu', an mamam' hwein xirinain jamicon pijo' nein pane. Je i ma' oro caji pacun ca quep hwe pane, ma' ta pe torotop mi' querec te xin hwein pane. Je ca cut mama' jujun toton tatirim co noc nunuhu' ma'. Cut mama' tuturuhu' pain pira ta, pain xijein cacarain macaracocon oro wari' nein Babilônia ta. Ac i ma' na ca xirao' pe ca profeta pane, pain ca xirao' pe cain ca tomi' nucun Iri' Jam ca tomi' cocon oro hwanana nexi' pane.

⁴⁴ Pain cara pane, pain ca to cacain mahweri oro hwanana nexi' pane, ma' nonon xiricon Iri' Jam. Je ca to' querec pin' cocon pain ca pe ho' cara cocon Iri' Jam. Ac xirim paxi' na, tapari carawa na. Quep pan nanain. Quep an xiho' nanain jaminain ca an hwet mi' tocwa Moisés pain ca ac i ca' ra pain ca quep main xuru ta qui' tocwa pane.

⁴⁵ Mi' mi' tiquin' ac tococwa pain na waram winacocon cocon mana panxicaca. An tiquin' ac cacain na pain ca ja' ja' qui' cocon Josué pane quem, pain ca to pin cacain macaraxi' ca', pain ca ja' tequi' hwerehwet pin cocon oro tatirim pain macaraxi' Iri' Jam pane. Mon to wet ac nein i ca' na xiricon Iri' Jam pane. Mon to wet mon to wet taramaxicon pa' ma' ac cain na Davi cara pane.

⁴⁶ Hohot non Iri' Jam Davi pane. Tomi' ac con na: Ta nain ho' mapa' pain ca quep mi' xim pain iri' xirim me. Iri' xurum tara, je tara ca in ac to urut pum pain ca Iri' Jam nem ma', pain ca hwanana ne urut con hwanana nuxut Jacó cara pane ta non.

⁴⁷ Davi paxi' na co quep mi' xim pain non pane. Ane panxica pan ca co quep mi' non pain ne, wirico Salomão cara pane.

⁴⁸ Iri' Jam ma', co Iri' Taramaxicon pan ma', quep mi' paxi' ta pain iri' xirim pane. Ane om pe pan cain xirim ca quep pan ca wari' ne. Win ne ca xirao' pe ca profeta pane. Ca' na ca xirao' nucun pane:

⁴⁹ Tomi' ca' na Iri' Jam: Ac pana ca mam' xao pe xao pe ca taramaxicon napa' pawin ca xao pe pe ta' ca'. Ac pana mam' ton pe ton pe tain caxima napa' macan' ca' quem. Ma' tara ca quep mi' ac mahu' pain xirim ra? Cain' xi cwere ne xirim ca quep mi' xim mahu' ma' quem? Main xi xao pe wa pe capa' xumu pahu' quem?

⁵⁰ Om ca wata' ne co quep quep pi' pin nain oro carawa pain pawin je pain macan' ca' quem? Wata' cwa' ira. Ac i ma' na ca xirao' pe cain ca tomi' nucun Iri' Jam profeta pane.

⁵¹ Mija hwe xin ta ac cocon na oro taramaxicon Estêvão ma'. Wijimi tamana hwe. Om ca howa je na hun Iri' Jam. Om ca taraju wet je na hun quem. An an ari huhun oro hwanana nexi' cara pane. Tama' tomi' in pin hwein Tamataracon Iri' Jam.

⁵² Tomi' hwet paxi' nanain capijacon Iri' Jam oro profeta pain cara pane. Ma' xica' pe tara profeta co om ja' tequi' quep em' caca oro hwanana nexi' pane ra? Om na ta, om ca ma' xica' pe camain' ca cocon. Quep em' quep em' xam' tata pane. To' parapa' tata co wara tomi' pe nanain ca maqui' nucun co ma' co tama' ara xo' quem, co tomi' mi' pan hwe cocon co noc nonon pane, co to' pa' pin hwe pain xocori ca' quem.

⁵³ Wahu' paxi' na co mi' wawa pain ca xirao' nucun Moisés ca'. Wirico jam co taramaja mi' non Iri' Jam na co mi' nuhu' pain. Ane om tomi' ha' hwein ne. Ac i ma' na ca tomi' carapita cocon oro taramaxicon Estêvão ma'.

⁵⁴ Taraju iri nonon Estêvão oro taramaxicon ma' ne, mana' tamana ac cocon na, mija na ca hwerehwet pin ne mixitacocon con. Cacacao' nanain xicocon pain ca mana' tamana nucucun quem.

⁵⁵ Ane noro pawin ca Estêvão ma' ne. Pe ho' mip iri non Tamataracon Iri' Jam ne, noro pawin ac ca na. Querec ac cain na ca toc meremem nucun Iri' Jam. Querec non Jeju quem, pain ca xat pe ho' cain iri' curucun Iri' Jam ma'.

⁵⁶ Tomi' ac ca na: Noro je! Querec inain ca pa xat ne pawin ma'. Querec inon Jeju co Iri' Wari' cwain, pain ca xat pe ho' cain iri' curucun Iri' Jam ma'.

⁵⁷ Merem ac caca na: Noc urut pain ca taraju wa, tatep pa' ac cacain na taraxicocon. Jein hwet jein hwet pi' pin ac cocon na.

⁵⁸ Coc ororo coc ororo ac cocon na, wara ca' na cacarain cidade ma', xin pin ac cocon na. Cut ac cacain na pacun, to' to' mi' pin xun e' ac caca na, to' to' ac cocon pain na. Caram ma' co wara tomi' em' nonon Estêvão cocon oro taramaxicon ma', horohot pin nonon to' om capin' nucucun, cut mi' ac cocon na con co xo' hwara' ma', Saulo ma'. Cut ron womuxut cwa' nonon, to' to' ac cocon pain na pacun Estêvão.

⁵⁹ Ca to' to' cocon pain pacun Estêvão ma', ca tomi' pan ac con na Jeju: Taramaxicon ne Jeju. An mao rain tamatara ca' na pain ca tomi' con ma'.

⁶⁰ Pe torotop pe ac ca na, merem mip ac ca na: Taramaxicon ne. Ta mana' momon pain ca caracat nucucun me ta non. Merem ac i ma' iri na ne, mi' pin ac ca na.