Atos 28 - Tradução Bíblica Pacaas Novos

Ca to urut pain xixi pan nein macan' Malta ma'

¹ Hwet pin iri urut pain cacarain com ne, tomi' querec ac urut cocon na oro wari' co to nanain i ma'. Cain' cain' ne wixinain xixi pan nein macan' ca' urut cocon. Malta na wixinain ta ac cacaparut na.

² Xiram pa' tamana nanaparut oro wari' nein Malta. Caraho' mi' nanaparut pain xe, xi capin' ara urut ta. Pan' na xowi' quem. Harahap je, nonoc jein xe ta ac cacaparut na.

³ Cut moin' nain oro wijimain taparain pana Paulo ma' quem. Caraho' tain ta na. Caraho' tain iri na ne, hwet qui' ac ca na iri' caxicon em' ma'. Taqui' hwet ca' nain ca xain nein xe. Quio xat ac cain na micon.

⁴ Querec iri nonon em' oro wari' ma' ne, pain ca quio xat cain micon ma', tomi' ac xucucun na: Ac ca iri' caracat ca na co ma' ta, iri' caracat ca ma' ira. Am to' pa' pin con wari' pane. Witan ca' paxi' nain cote ne com ca', ane nain ho' pan con pain ca e' wa iri' jam nexi' co ara xo' taxipa' ma' ne, ac i ma' na ca tomi' xucucun.

⁵ Ane xin wirao' xin wirao' pan' mi' con em' pain xe Paulo ma' ne. Om ca quio caxi camain' con.

⁶ Ja' noro ac cocon na oro wari' ma' quem. Mom ho' tara con ra? Ane ane mi' pin tara, pan' mao ac ca tara ra? Ac i ma' na ca tomi' xucucun. Momon winim' momon winim' paxi' nonon pain ca to' ara con em' ma'. Ane om quio xirac camain' con ne. He ac caca na. Xucun iri' jam paxi' tara co cwa' ta na ca tomi' nucucun.

⁷ Pe nain Malta taramaxicon ma'. Taramaxicon pe ho' nonon oro wari' ma' quem. Públio na wixicon. Ma' non oro macan'. Oro macaracon, totacon, xiricon ma' quem, om ca pira ca' nein ca nonoc to urut pain xe ma'. Harahap je, to ho' xine pain xuru ca' ac caparut na Públio. Hwet ac urut con na. Tomi' querec te tamana naparut. Ma' 3 na xec pain ca to ho' urut con pane.

⁸ Caxi na cote ca quem. Terem' e' na. Xain na, conco' na quem. Mo querec ta' e' ac ca na Paulo ma', corom hwet ac con na. Tomi' mi' iri non con Iri' Jam ne, quep ac con na pain micon, quep xio pin ac con na quem.

⁹ Quep xio pin iri non ne, maqui' maqui' pi' pin ac caca na oro wari' co caxi nana ma', co to nanain xixi pan nein macan' Malta ma'. Quep xio quep xio pi' pin ac tococwa na.

¹⁰ Tomi' querec te tamana nanaparut pain ca quep xiho' cacaparut quem. Je ca cut mi' tamana cacaparut pain oro carawa. Je pain ca aram aram horoho mama' xi' urut ma' quem, cut ho' mi' nanaparut pain oro carawa pain mam' horoho wa. Ma' ta cao' hwe pain wanaji com ta nanaparut.

Ca paca' urut pain Malta ma', ca tan' mama' ac urut pain na Roma

¹¹ Ac i ma' ac i ma' urut, aram aram ma' 3 pin ac ca na panawo' pain ca mon to wet urut pain Malta. Maji ta ac urut na, corom mama' ac urut pain na mam' horoho wa ma', ca maqui' nain Alexandria pane, ca wara piri' pe nain wapit pain Malta pane. Wara piri' pe nain Malta pain ca om nuru querec ne hotowa ira. Cawaxi' pa' pe tarapa' pain i ca' ta na waximain ira. Pain tamain mam' horoho nucun ma', wara ara an xiho' nanain jamicocon oro iri' jam nucucun co horoman toco' nana pain ca howa nucucun. Cástor na wixicon xucun, Pólux na wixicon xucun ma' quem. Corom mama' iri urut pain ne, horoho mama' ac urut na.

¹² Horoho horoho piri' to ac urut pain na wapit pain xijein cidade ma', Siracusa na wixinain. Ma' 3 na xec pain ca mon to wet urut pain Siracusa.

¹³ Horoho tiquin' mama' ac urut na, tan' mama' ac urut pain na xijein cidade ma'. Régio na wixinain. Xec pin iri na ne, pahop qui' ac nein quiricon xina na hotowa ma', pahop qui' nain waraxut. Horoho horoho tiquin' ac urut na. Xec pa' ac caparut na pain ximijain com. Xec pa' mami' iri naparut ne, tan' mama' ac urut pain na wapit pain xijein cidade ma'. Potéoli na wixinain.

¹⁴ Je ca mam' to urut cocon xerexi' co howa nonon Jeju quem. To ho' xut pain xuruxut me ac cacaparut na, ma ac urut cocon na. Ma' 7 na xec pain ca to ho' urut cocon. Maqui' pin iri na xec nein ca xuruxut mama' xin Roma urut ne, paca' ac urut cocon na, xuruxut mama' ac urut na.

¹⁵ Oro xerexi' co to nanain Roma cain, wara taraju nanaparut pain ca maqui' xi' urut quem. Maji xuruxut cam' xuxun e' ac caca na, winim' to ac cacaparut na pain ximijain wana. Ma' nana co winim' to nanaparut pain Ápio, ma' nana co winim' to nanaparut pain 3 Vendas ma', je i ma' oro wixinain xirim ca winim' to cacaparut pain ximijain wana. Querec iri nonon xerexi' Paulo ne, tomi' querec te ac ca na, tomi' ac con na Iri' Jam. Tomi' querec te inem pain ca xuruxut cam' cacaparut xuruxut cwa' ta Te non pain ca tomi' con ma'. Wa pin ac ne na ximicon.

Ca pijim' pe cain Roma Paulo

¹⁶ Tan' mama' iri urut pain Roma ne, tomi' ac con Paulo na taramaxicon ma'. Noro rain xirim ca pe pan ta' ma ma'. Ma' xica' pe tara soldado co querec wet nem. Pe ho' terem pain xurum ta non.

¹⁷ Ma' 3 pin iri na xec pain ca tan' mama' urut ne, mo tomi' cut in jujun oro taramaxicon nexi' pain ca judeu iri' ca', co to nanain Roma ca' ac ca na Paulo, maqui' ac caca na. Cut in iri xucucun ne, tomi' ac tococwa na. Pijim' xim inuhu' ta oro win ma' ne. Om paxi' na ca ara cup toton oro win ma' nexi' pane. Om paxi' na ca ari tain oro ca ara je cacapari' oro hwanana nexi' pane quem. Ane quep cacapa' pain Jerusalém oro win ma' nexi' ne. Tao' pe jun ta ac cocon na oro romano, tao' pe ac cacapa' na.

¹⁸ Tomi' querec ac cacapa' na oro romano. Ma' carawa ca ara ma? Para quep quequem ma' quem ac cacapa' na. Taxi' pin ac cacapa' na, om ca pan tem ma, om xi to' pa' pin xima, xi pan tem ma ta ac cacapa' na quem. Pa hwet xim paxi' nanapa' pane ira.

¹⁹ Ane tomi' in pin pan cocon oro romano oro taramaxicon nexi' pain ca judeu iri' ne. Ta pa hwet hun me ta nonon oro romano pata'. Je ca na e' capa' pain ca tomi' toton oro romano pane, tomi' querec pan xirapa' iri' taramaxicon César na ina ta inonon pane. Je ca maqui' ta' ca' quem. Om paxi' na ca tomi' em' pan toton oro win judeu iri' ca'.

²⁰ Je ca maqui' ca' je e' xuhu' ca' quem. Querec xuhu' inuhu'. Tomi' xo' xuhu' inuhu'. Pao' pe nanapa' pain arain too ca', xi om ne ca howa ara ton Cristo co winim' iri' pain ca wari' nein Israel iri' ca'. Ac i ma' na ca tomi' cocon oro taramaxicon nucucun oro judeu Paulo ma'.

²¹ Tara pum ta ac caca na. Oro win ma' nuxut co to nanain Judeia cain, om ca xirao' mi' cacaparut pum. Co maqui' nanain i cain quem, om ca tomi' hwet cacaparut pum, om om nana. Om paxi' na ca tomi' napat quequem quem.

²² Ane taxi' urut cocon oro wari' pain oro xijein macan' ne, taxi' urut cocon pain ca tomi' napat tomi' napat xam' cocon oro win ma' nem co howa nonon Jeju ma'. Je ca taraju xim urut pum pain ca tomi' hwet maparut pain ca coromicat nem ma', pain ca howa nem con Jeju ma' na ca tomi' cocon ma'.

²³ Je i ma' ta ac ca na Paulo ma', an pe xo' ac cacain na xec nein ca cut in mami' xi' caca ma'. Maqui' iri na xec nein ne, in hwet ac cocon na Paulo pain xiricon. Ma' mija nana oro win ma' caca co o qui' caca ma' quem. Hwet nonon Paulo pain xo' xec, pijim' pijim' ac tococwa na. Pijim' xo' tata con Iri' Jam ma', pain ca taramaxicon pe ho' xim capari' con Jeju. Noro mi' tata pain oro ca xirao' nucun Moisés je oro ca xirao' nucucun oro profeta ma' quem. Momon pijim' pijim' mi' ac tococwa pain na. Ma' ta taraju pa' hwe ta tata. Howa xiroron Jeju na paxi' tata pain ca pijim' nucun. Momon pijim' momon pijim' irawin pa' ac tococwa na.

²⁴ Ma' paxi' nana co xin ne nana ma', ane om howa caca oro xucucun ne.

²⁵ Tomi' caracan pan ac xucucun na, in mama' xi' ta ac xucucun na quem. Mama' xi' iri nana ne, tomi' mam' pan ac cocon na Paulo. Tomi' iri'o' nonon hwanana nexi' Tamataracon Iri' Jam pane, pain ca an xin tiquin' mi' roron pain ca tomi' ne ta con profeta Isaías pane. Ca' na ca tomi' tococwa pane:

²⁶ Mo hwet roron oro wari' ne ma'. Ca' na ca tomi' cuhu' Iri' Jam ta roron: Taraju wet ho' taraju wet ho' paxi' hwein capija ca', ane om taraju pa' hwein ne. Om ta taraju pa' camain' hwein quem. Querec ho' querec ho' paxi' hwein oro ca ara ta' quem, ane om querec pin' hwein ne. Om ta querec pin' camain' hwein quem.

²⁷ Xi coromicat xo' je na hwe ta. Ac ca tatep pa' hwein na tarajuhu'. Ac ca pi'am to hwe na quem. Xi miri'om ara mahu' ta. Mo xi om ac i ma' hwe, na ac cuhu' xira pain ca querec pin' mahu'. Na ac cuhu' xira pain ca taraju wet mahu'. Na ac cuhu' xira pain ca taraju pa' hwe pain iri' xumuhu'. In hwet ac mahu' xira, to' witan ac xuhu' xira quem. Ac i ma' na ca tomi' cocon hwanana nexi' Tamataracon Iri' Jam pane ta tata.

²⁸ Je ca tomi' xuhu' ca', taraju pa' jein ca tomi' xuhu' ca' ac tococwa na. Noc paxi' hwein ca howa wa capijacon Iri' Jam ca tomi' hwet napari' pain ca to' witan xim ta capari' ca'. Ane pijim' mi' xun tococwa pain oro wari' co om judeu nana ne. Howa tatarain ta na ca tomi' tococwa ma'.

²⁹ Tomi' ac i ma' iri tata ne, hwerehwet mama' ac caca na. Ca hwerehwet mama' caca ma', ca mana' mana' caracan xucucun ma'. Mija na ca tomi' caracan xucucun.

³⁰ Mon to wet ac cain xiricon na Paulo ma'. Xiricon paxi' na, mi' mi' non pain dinheiro waximain xirim, pe pan ac cain na. Ma' 2 na cawaxi' pain ca pe cain pane. Oro wari' co tomi' xun nonon ma', co hwet xun nonon pain xiricon ma', hwet ac cocon na. Maqui' hwe, maqui' urut ta ac xucucun na, tomi' querec te tomi' querec te ac xucucun na.

³¹ Pijim' mi' ac tococwa na pain ca taramaxicon pe ho' capari' Iri' Jam ca'. Ca' na tata con Taramaxicon nexi' Jeju Cristo quem. Om ca pijim' jin' tococwa, pijim' hwara' opa tata. Om ca nain ho' tocwa pain ca pijim' wa quem. Je i ma'.