Atos 27 - Tradução Bíblica Pacaas Novos

Ca o mao tocwa Paulo pain Roma

¹ Tomi' ac ca na Festo: Na e' na pain ca horoho mama' ho' hwein Itália ta naparut. Tomi' xo' ac con na taramaxicon nucucun oro soldado ma'. Júlio na wixicon. Oro soldado nucun iri' taramaxicon César nana co taramaxicon ne nonon ma'. Tomi' xo' non Júlio Festo ma'. Querec wet xo' ron Paulo cocon oro win pao' to ca cwa'. Joc tan' xo' pin roron pain Roma ta non.

² Wara pe nain wapit mam' horoho wa ma', ca maqui' nain Adramítio, je i ma' wixinain cidade ca maqui' ne. Wara maji ta na waximain quem. Corom mama' ac urut pain na. Ja' ja' naparut Aristarco ma', co maqui' nain Tessalônica pain Macedônia ma'. Corom mama' iri urut ne, horoho mama' ac urut pain na cote ne com.

³ Xec pin iri na ne, piri' to ac urut pain na xijein cidade ma', Sidom na wixinain. Xiram pa' ac con Paulo na Júlio ma' quem. Hohot na pain ca mo hwet momon oro win ma' ma co to nanain Sidom ca' ac con na. Ma' ta quep xiho' quequem, ma' ta mi' quequem pain oro ca param ma ma' non.

⁴ Paca' iri urut pain Sidom ma' ne, nuru cam' ac caparut na hotowa. Je ca ac tiquin' ca' urut pain xijein cacarain xixi pan nein macan' Chipre ma'. Xi om ne ca pe caho' ara caparut pain hotowa xijein cacarain ma' ta.

⁵ Horoho mama' ac urut pain na cote ne com ma', ac tiquin' ac tiquin' ca' ac urut pain na oro xijein macan' ma' quem, je pain Cilícia pain Panfília ma', piri' to ac urut pain na xijein cidade ma', pain Mirra ca pe nain xijein macan' pain Lícia ma' quem.

⁶ Je ca mam' pe cain wirain mam' horoho wa taramaxicon nucucun oro soldado Júlio ma'. Maqui' nain Alexandria mam' horoho wa ca mam' ca ma'. Mama' xin Itália na waximain. Wara maji ta na quem. Je ca corom mama' jein ta caparut taramaxicon nucucun oro soldado Júlio ma', corom mama' ac urut pain na.

⁷ Horoho mama' ac urut na. Mija na xec pain ca momon horoho e' urut pane. I'ina urut pain ca aram aram wixicam pin urut pain xijein cidade ma', pain Cnido ma'. Horoho tiquin' xi' paxi' urut, ane nuru cam' caparut hotowa ne. Je ca ac ni ca' urut pain ma', horoho mama' ac urut pain na xijein cacarain xixi pan nein macan' ma', Creta ma'. Ac tiquin' ca' ac urut pain na cacarain ca om nuru mip ne hotowa ma', tiquin' ca' ac urut na pain xijein cidade ma', Salmona ma'.

⁸ I'ina urut pain ca ac tiquin' ca' urut pain cacarain Creta ma'. Aram aram tan' mama' ac urut pain na wapit ma'. Wapit Ca Awi ta nanain oro wari' ma', je i ma' wixinain cocon. Pe ja' pan nain cidade pain Laseia ma' quem.

⁹ Wara mija pin na xec pain ca horoho mama' urut pane. Cono' pin xuxut xi horoho horoho tiquin' mama' urut quem. Xi wara maqui' pin ara ne oro xec ca xio tamana ma', pain ca nuru tamana ne hotowa ma', wara om pin na oro xec pain ca tomi' querec te xucucun oro judeu pain ca an to pin cacain ca cao' wa quem. Je ca tequi' pe ca Paulo ma'. Hu ac i ma' paxi' tata co taramaja to nanain mam' horoho wa.

¹⁰ Je ca tomi' xuhu' ca' oro win ma' ne ac tococwa na. Mo ta horoho tiquin' mama' xi', to' i'ina tamana ac capari' tara hotowa. Ximin xi'. Am pan corom mao ne mam' horoho nexi' ca'. Am pan corom mama' ne carawa ca cut ho' iri' ca'. Am cono' pan xi' quem, je i ca' ca coromicat ne ca'. Hu mip ac i ma' paxi' tata.

¹¹ Ane om tomi' na ca taramaxicon nucucun oro soldado Júlio ma' ne. Om ca taraju wet con Paulo. Taraju wet pan non co joc wat nain mam' horoho wa ma', taraju wet pan non waximain ma' quem.

¹² Pain wapit ca to pan urut pane, om ca hohot ne pain ca nuru pa' pe caparut towapiji pain i cain. Om ca hohot ne pain ca cawaxi' pa' pe caparut pain i cain quem. Xi nuru taxipa' ara ne camana' pain oro xec ca xio tamana ta. Je ca ma' mija caca oro win ma' nuxut co awi na pain ca tiquin' mama' xi' ta nana ma'. Mama' querec xin wirain wapit pain Creta ca', pain xijein cidade pain Fenice cain nana. Am ha' capari' pain ca hwet xin. Mon to wet ac xin tara i cain. Pi' pin iri tara towapiji ne, tiquin' mama' ac xi' tara ta nana. Wapit pain Fenice cain, pe nain xijein cacarain Creta cain. Om ca nuru mip ne hotowa pain i cain.

Camana' pain cote ne com

¹³ Pahop toto ac ne na hotowa ca maqui' ac nain quiricon xina ma', pain ca nuru qui' nein cote ne com ma'. Om ca nuru xio ne, pahop toto na. Awi na, hohot tarapari' pain ca mama' ho' xi' ta ac caca na, cut piri' ca' ac cacain pain com na arain too ca xite tamana ma', ca to' om ho mao nain mam' horoho wa ma'. Horoho mama' ac urut na. Ac tiquin' ac urut pain na cacarain com ma', pain Creta ma'.

¹⁴ Om om ca' na, xin jami in ac ne na hotowa. Iri' cote ne camana' ta. Nuru mip na, nuru qui' nain xijein quiricon xina, nuru qui' nain xixi pan nein macan' Creta ma'. Camana' Maqui' Maqui' Quiricon Xina ta nanain oro wari' ma', je i ma' wixinain cocon.

¹⁵ Nuru cam' nain mam' horoho wa hotowa ma'. Om ca ha' mami' caparut pain ca joc wat xo' urut pain mam' horoho wa, xi om ne ca nuru mip ara ne hotowa ta. Pin ne ma', an mao pan tarapari' ne ac urut na.

¹⁶ Horoho ximama' ac urut na. Horoho ximama' horoho ximama', horoho ca' urut pain wijimain xixi pan nein macan' Cauda ma'. Ac urut pain cacarain ca om nuru mip ne hotowa. An xin wijimain mam' horoho wa ca tucu tapan' iri' ca' ac urut na quem. Om ca tetere ne! Cuc piri' ca' ac urut pain na pain com.

¹⁷ Cuc piri' iri urut pain ne, cut ac cacain na cote ne macon co taramaja to nanain mam' horoho wa ma'. Ma' ta tucu pa' xin nanain mam' horoho wa ma', ma' ta om pa caracat mao ne ta nanain. Jin' nana quem. Am joc mi' capari' hotowa pain namaji pain cacarain com cain, pain Sirte cain, am xoto xi' pain i cain ta nana. Je ca tacom' quiji' cocon cote ca wom nein mam' horoho wa ma', ma' ta om joc mami' ne hotowa nana. An mao ximao pan tarapari' hotowa ne ac caca na quem.

¹⁸ Mija na ca wap tamana caparut com pain camana'! Xec pin iri na ne, wixicaracao' pocorocom ac cacain na oro carawa ca cut ho' urut ira.

¹⁹ Xijein xec iri na ne, cut ac cacain na coximi mam' taramaja caca pain mam' horoho wa ma', wixicaracao' pocorocom ac cacain na quem.

²⁰ Ca horoho ximama' ac urut na, ca nuru nuru mip ac caparut na camana' ma' quem. Mija pin na xec pain ca om hwet camain' ca xina con pijo'. Cote ne camana'! Jain jain tamana urut. Ximin tamana ac urut na quem. Om ta witan ca' xin camana' ca' ma' urut pane.

²¹ Mija pin na oro xec pain ca om cao' urut quem. Tequi' pe ac ca na Paulo pain ximijacocon co taramaja to nanain mam' horoho wa ma'. Tomi' ac tococwa na: Je ca tomi' xuhu' pane ta oro win ma' ne. Tomi' ha' ximahu' pain ca hu xuhu' pane. Om xi paca' xin Creta pane. Mo xi mon to wet xin Creta pane, je xi om ximin iri' pain xocori ca'. Om xi waraju xine oro carawa ca cut ho' iri' pane, om xi waraju xine oro coximi mam' taramaja hwe quem ac tococwa na.

²² Je i ma' ira inuhu' ta ac tococwa na. Ta jin' hwe me, quereme je. Om ta pan corom mama' xi', witan witan pi' pin xi'. Pan corom mao e' tara mam' horoho wa ta. Pa caracat pa caracat pi' pin ac xine tara ta.

²³ Taxi' ina, xi hwet pa' ara capa' jam co taramaja mi' non Iri' Jam ta. Hwet pa' napa' pain xim cara ne. Wirico Iri' Jam co wari' ne napa' cwa', co pe torotop mi' querec te ta' cwa', wirico co mam' napa' con jam co taramaja mi' non. Tomi' ac capa' na:

²⁴ Ta jin' main camana' me ta Paulo ac capa' na. Wa' mao ra, xi om ne ca na e' ara ne pain ca xat quima hwet mon iri' taramaxicon César pain Roma ta. Taraju wet ne quem ac capa' na. Ha' nem Iri' Jam pain ca tomi' mon ma'. Xiram pa' nonon oro wari' co win horoho ma cwa'. Om ta pan corom mama' caca, witan witan pi' pin tatara ta napa' pahu'.

²⁵ Je ca tomi' xuhu' ca' oro win ma' ne ac tococwa na. Ta jin' hwein camana' me, quereme je. Howa inon Iri' Jam pain ca ara tain cain ca tomi' pe nucun ta. Ac capijacon ma' quem tara. Win ne ca tomi' capa' ne.

²⁶ Witan xi' paxi' iri'. Ane na e' ne pain ca joc ximao joc ximao tiquin' capari' hotowa ne. Joc joc piri' mao tarapari' pain xixi pan nein macan' pain ximijain cote ne com ca'. Ac i ma' na ca tomi' tococwa ma'.

Ca pan corom mao ne mam' horoho nuxut

²⁷ Juc in ximao ac caparut na hotowa pain cote ne com ma', pain Adriático ma', je i ma' wixinain cote ne com. Ca juc in ximao caparut ma', ca joc in ximao caparut ma', ma' 14 pin ac ne na xec pain ca joc in ximao caparut hotowa ma'. Xim pin iri na ne, pain iri' ximijain xim ma', toron ac ne na ximicocon co taramaja to nanain mam' horoho wa ma'. Ac ca wixicam pin xin na macan' ta nana. Taraju pin' nanain.

²⁸ Xopain tara com ca' ra ac caca na. Tacan querec xin ta ac caca na, tucu pe ac cacain na arain too pain tamain macon, xin pocom ac cacain na, an piri' ac cacain na quem. Ma' 37 na metro nein ca xopain nein ta nana. Om om, ara mami' xin ta ac caca na, xin pocom mami' ac cacain na quem. Ma' 27 pin na metro nein ca xopain nein ta ac caca na.

²⁹ Jin' pin ac caca na quem. Joc mi' tarapari' pain pacun hotowa ma' nana. Je ca xin caracam mi' cacain arain too ca xite tamana ma', ca to' om ho mao nain mam' horoho wa ma'. Ma' 4 na arain too cocon. Xin caracam to nanain pain nomoji mam' horoho wa ma'. Jain jain nana. Xec pa' hap xirapari' na nana quem.

³⁰ Ma' ac caca na co taramaja to nanain mam' horoho wa ma', co tomi' xo' xucucun ma'. Jein noc xa ca' xuxun pain mam' horoho wa ca' nana, jein hwet ac cacain na tamain ma'. Ac ca xin caracam xin cote ne arain too pain tamain ca' tara me nana quem. Je ca an quiji' xin cacain wijimain mam' horoho wa pain com ma'.

³¹ Ane querec pan cocon Paulo pain ca paca' xin cacain mam' horoho wa ne. Tomi' ac con na taramaxicon nucucun oro soldado Júlio cocon oro soldado nucun. Mo ta om to ho' cacapari' pain mam' horoho wa wari' ma', om ta witan ac iri' ta nonon.

³² Na ra ac caca na oro soldado ma'. Je ca wac piripit pin cacain macon ca mam' tucu xine wijimain mam' horoho wa ma'. Pan' mao ac nein na com, ho mao ac ne na quem.

³³ Xec pin ta' iri na ne, tomi' mip ac caparut na Paulo. Na e' na pain ca cao' cao' xam' xi' ta. Ma' 14 pin ara xi' na xec pain ca toron ne ximixi' ca'. Om ca cao' xo' camain' iri' quem.

³⁴ Je ca tomi' xuhu' ca' ac tococwa na. Cao' xi'. Na e' na pain ca cao' iri', ma' ta hwara' opa iri', ma' ta om cono' iri'. Om ta xica' pan' am iri' ta, taxi' ina, ac i ma' na ca tomi' caparut ma'.

³⁵ Tomi' ac i ma' iri naparut ne, an ac cain na capam', tomi' ac con na Iri' Jam. Tomi' querec te inem pain ca mi' maparut pain capam' ca' Te Iri' Jam ac con na. Taraju taraju xam' urut con pain ca tomi' con Iri' Jam quem. Jicaracat pin iri nain ne, cao' ac ca na.

³⁶ In ac ne na xumuxut. Cao' ac urut na quem.

³⁷ Ma' mija urut pain ca to urut pain mam' horoho wa pane. Ma' 276 urut pane.

³⁸ Ma'am ma'am pi' pin iri urut ne, wixicaracao' pocorocom wixicaracao' pocorocom pi' pin ac urut pain na oro tocwi trigo ca cut ho' urut ira. Ma' ta xite xite om pin ne mam' horoho wa ca' urut.

³⁹ Xec pin iri na ne, querec paxi' urut pain macan' ma'. Ane om querec pin' cacain co taramaja to nanain mam' horoho wa ne. Querec e' nanain ca we' xuc mao ne com ca ma' namaji ma'. Tomi' xo' ac xucucun na: Ha' tarapari' pain ca joc piri' an tac xin mam' horoho wa pain namaji cain ra? Ara querec xi' e' ac xucucun na.

⁴⁰ Wac piripit ac cacain na macon ca mam' tucu cacain oro arain too ca xite ma', ca to' om ho mao mami' nain mam' horoho wa ma'. Ca wac piripit pocorocom cacain macori arain too oro xucucun ma', ca tacom' tacom' ac cacain na macon ca wara pao' to caca pain arain xinain pain nomoji oro xucucun ma' quem. Ma' ta na capari' pain ca joc wat xin ta nana. Cuc piri' ac cocon na cote ca wom nein mam' horoho wa quem. Ma' ta joc nein hotowa ta nana. Joc mi' xin paxi' nanain mam' horoho wa pain namaji pain cacarain com ma'.

⁴¹ Ane tac mip nein namaji tamain mam' horoho wa ne. Om ca meo ac ne. Nomoji ma' iri na ne, caracat pin ac ne na pain ca wap tamana nein com.

⁴² To' parapa' pi' pin xuxun co pao' to iri' cwa' ac caca na oro soldado ma' quem. Mo ta na cocon pain ca pan caracam pan caracam hwet cacain cacarain com cain, jein mama' ac caca tara ta, tomi' ac i ma' paxi' nana.

⁴³ Ane nain ho' con Paulo taramaxicon nucucun oro soldado ma' ne. Om na ta, ta to' parapa' pin huhun me ta tata. Tomi' ac caparut na: Wahu' pain ca pan caracam taxi' hwe ma', pocorocom cain' jein com ta. Wara pan caracam hwet jein cacarain cain.

⁴⁴ Wahu' pain ca om pan caracam taxi' hwe ma' iri na ne, quep e' jein oro pana ma', je oro panaji mam' horoho wa ca caracat ma', mam' horoho hwet ac hwein tara cacarain ma' naparut pane. Ac i ma' urut quem, tomi' ha' urut con taramaxicon nucucun oro soldado. Ac i ma' na ca hwet hwet pi' pin urut pain macan'. Witan witan pi' pin ac urut na quem.