Atos 26 - Tradução Bíblica Pacaas Novos

¹ Hohot na pain ca tomi' hwet maparut pain oro ca ara nem pane ac con Paulo na Agripa. Ma, tomi' ta' e' ac ca na, an piri' ac cain na micon, tomi' ac con na pain ca tomi' caho' pan xucun ma':

² Tomi' querec te ina pain ca taraju xim mapa' pain xec ca' taramaxicon Rei Agripa. Tomi' querec te ina pain ca taraju xim mapa' pain ca tomi' caho' xije cocon oro taramaxicon nucucun oro win judeu iri' cwa', pain ca tomi' em' cacapa' ca'.

³ Tomi' querec te tamana ina pain ca taraju pan mapa' quem. Xi om ne ca taxi' taxi' pi' pin ara main oro ca ara taxipa' iri' pain ca judeu iri' ta. Taraju pa' taraju pa' pi' pin main oro ca tomi' caracan xijexi' pain ca howa nexi' con Iri' Jam quem. Je ca tomi' querec te tamana ta' pum. Je ca taraju wet hot ne xim ca' taramaxicon Rei Agripa ac con na.

⁴ Taxi' taxi' xam' nanapa' oro win judeu iri' cwa', taxi' nanapa' pain ca xut xo' ne ca' ac con na. Pain ca pe pe wet qui' tain iri' macara ca pan' pe ta' pane, je pain ca pe pin tain Jerusalém ma' quem, taxi' nanapa' pain ca xut xo' ta' ca'.

⁵ Wara taxi' nanapa' pain cara pane, taxi' nanapa' pain ca wara fariseu ta' pane quem. An xiho' inonon oro xucucun oro fariseu pain ca tomi' ha' tomi' ha' pi' pin cacain oro ca xirao' nucun Moisés ma', pain ca joc in pin cocon oro xucucun win judeu iri' pain ca howa xun Iri' Jam. Mo xi ma' ne ximicocon ma', na ac cocon xira pain ca iri'o' na ca tomi' nucun ta pan quequem pata'.

⁶ Je ca tomi' xim ca' taramaxicon ac con na. Tomi' querec mahu' pain oro ca ara ne ca', xi om ne ca howa ara tain ca wara tomi' pe mi' cocon oro hwanana nexi' Iri' Jam pane ta, pain ca main e' mami' tatara co wara cono' nana ta cocon pane.

⁷ Howa howa pi' pin nanain ca wara tomi' pe nucun oro win judeu iri' cwa', pain ca ma' 12 ne ca xucun wari' iri' pain ca iri' hwanana ne xun Israel cara pane. Winim' winim' xam' irin ca hwet pin ta' ne ca wara tomi' pe nucun ca'. Je ca pe torotop mi' taxipa' xun ca'. Maqui' nain iri' ximixi' pain ca tomi' ho' tomi' ho' xun pain ca in ac xun ca'. Ac i ma' ina quem, howa inon Iri' Jam pain ca ara tain cain ca wara tomi' pe nucun ta taramaxicon Rei Agripa. Ane tomi' em' pan cacapa' oro taramaxicon nucucun oro win judeu iri' cwa' ne. Tomi' em' pan nanapa', xi om ne ca howa ara tain ca wara tomi' pe nucun Iri' Jam ta, ac i ma' na ca tomi' con taramaxicon Agripa Paulo ma'.

⁸ Tomi' querec ac tococwa na oro wari' co cut in to xucucun pain i ma: Para om howa hun Iri' Jam pain ca ha' con pain ca to' e' mami' cocon co wara cono' nana quem? Ac i ma' na ca tomi' querec tococwa ma'.

⁹ Pain cara pane, hohot tara ma' inain ca tomi' in pin tococwa oro wari' co howa nonon Jeju co maqui' nain Nazaré pane ac tococwa na. Na e' na pain ca to' quiji' pin tococwa ta ina pane ira.

¹⁰ Je ca ara ta' pain Jerusalém pane quem, to' quiji' pin toton inonon pane. Co howa nonon Jeju pane, ma' mija nana co tao' to ta' pain xirinain ca tao' to tao' to to wa ma'. Xi om ne ca tao' to roron ta ara cacapa' oro taramaxicon nucucun oro sacerdote pane. Tomi' mi' iri tata pain ca wap wa pain ca cono' tatara ne tococwa ne, je i ma' ira, cono' tatara ne ac ta' na quem.

¹¹ Mao ho' mao ho' inain oro xirim ca cut in to xijexi' pain ca judeu iri' pane. Mam' iri inonon co howa nonon Jeju ne, quep em' ac toton na, tomi' napat jun Jeju ta paxi' inonon quem. Mija na ca mana' toton pane. Pirao' pirao' inonon pain oro xijein cidade pain oro xijein macan' ma' quem, ma' ta quep em' to toton pain i cain ta inonon.

¹² Ac i ma' ac i ma' ina, maqui' ac ne na xec nein ca mao qui' tain Damasco pane. Wara mi' nanapa' pain carta ca xirao' pe cacain ca tomi' nucucun oro taramaxicon nucucun oro sacerdote ma', pain ca quep roron co howa nonon Jeju pain Damasco cain cacapa' pane.

¹³ Mao ac ta' na pane. Mo mo mo, tocon xina pin iri na ne, querec ac tain na naran ta taramaxicon. Joc xec qui' nain pawin. Toha mip na, amon toha pije' na xina ma', toha tamana napa' naran ca querec ta' pane. Joc xec joc xec mam' pin napa', joc xec joc xec mam' pin tata oro win ma' ta' co ja' ja' nanapa' quem.

¹⁴ Camara' mama' camara' mama' pi' pin ac urut na pain macan'. Taraju ac tain na ca tomi' wa. Tomi' napa' pain capijaxi' pain ca judeu iri' ca', pain hebraico ca': Saulo. Saulo. Para quep em' mapa' quem Saulo? To' ara pan xijem pain ca ari mapa' ta na ca tomi' capa' pane.

¹⁵ Cain' ca wari' ma quem Taramaxicon ne ac ton na. Wata' ta, co quep em' ma cwa'. Jeju ina ta. Ac i ma' na ca tomi' capa'.

¹⁶ Je i ma' ta ac capa' na. Tequi' pe ho' ra ta. Tora' inem, taramaja mi' ne ta inem. Je ca hwet pa' xim ca'. Tomi' hwet roron oro wari' pain ca querec mapa' ca', main tomi' hwet ac momon tara pain oro carawa ca an hwet mi' xim xim quem.

¹⁷ Narain ho' xim cocon oro win ma' ma pain ca judeu ma ma', pain ca quep em' xim quequem ma', narain ho' xim cocon co om judeu nana ma' quem. Hwet roron inem quem.

¹⁸ Ac ca to' querec pin momon tara pain tococon ma', ma' ta querec pin' cacapa'. Ac ca to' xuruxut ni ca' momon tara pain ca jitacat nein ma', pain ca xuruxut pin xin cacain naran ne ca', pain ca an to pin xin cacain ca caracat nucucun ma' quem. Taramaxicon pe ho' taramaxicon pe ho' om pin ac cocon tara Caxicon Jam, taramaxicon pe ho' pin ac cocon tara Iri' Jam ma' quem. Howa iri tatarapa' ne, xic am pin ac tococwa tara pain ca caracat nucucun, aram aram mi' mi' ac tococwa tara pain oro ca param nucun Iri' Jam ca cut to xo' mi' xun tococwa pain oro wari' nucun co to' hohot pin ca ma'. Ac i ma' na ca tomi' capa' Jeju pane.

¹⁹ Je ca tomi' xim ca' taramaxicon Rei Agripa ac ca na. Om ca tomi' in pin ton Jeju pain ca taraju tain ca tomi' nucun ca maqui' nain pawin pane. Tomi' ha' inon.

²⁰ Pijim' cain' inonon co to nanain Damasco, pijim' ac toton na co to nanain Jerusalém, wiricoco co to nanain oro xijein cidade pain Judeia ma' quem. Pijim' inonon co om judeu nana quem. Cwirin' jein ca caracat nuhu', howa jun Iri' Jam quem inonon. Ara jein ca awi wa, ma' ta querec pin' xihwe pain ca cwirin' pin hwein ca caracat nuhu' ta inonon pain ca pijim' toton pane.

²¹ Je ca quep cacapa' oro win judeu iri' pane. Quep pe nanapa' pain ca tao' caho' nein cote ne xiricon Iri' Jam. To' pa' pin xim paxi' nanapa' pane.

²² Ane quep xiho' tamana capa' Iri' Jam ne. Wara quep xiho' napa' pain ca xo' pijim' ten qui' ta' pane, quep xiho' quep xiho' wet napa' pain xocori ca' quem. Je ca ha' capa' pain ca pijim' pijim' wet ta' ca'. Pijim' inonon oro wari' ma', co om hwara' opa nana' ma', co hwara' opa tamana nana ma' quem, pijim' mi' e' inonon pain oro ca xirao' to caca oro profeta con Moisés pain cara pane, pain ca xirao' to cacain oro carawa ca ara ton non Cristo Jeju pane.

²³ Wara xirao' to ca' nonon pane: Jain jain tara co ma' co wara tomi' pe ca Iri' Jam pane nonon, jain jain tara pain ca to' pa' pin tocwa, e' mami' ac ca tara ta nonon. Wirico tara co e' mami' cain' ta nonon. Pijim' ac tococwa tara pain capijacon oro wari' ta nonon quem. Pijim' hwet xun tata oro win judeu iri', pijim' hwet xun tata co om judeu nana ma' quem, pain ca pijim' hwet xun tococwa pain capijacon ca an xiho' nain naran ma', pain ca to' taraju pa' tococwa pain ca to' witan xun tococwa ta nonon quem. Ac i ma' na ca tomi' con taramaxicon Agripa Paulo ma'.

²⁴ Ca tomi' tomi' wet ca Paulo pain ca tomi' caho' pan xucun ma', merem ac ca na Festo ma', merem mip na. Merem am pin non Paulo. Tamanain ma ta Paulo. To' tamanain pin nem ca tama' noro noro main oro ca xirao' wa ta non.

²⁵ Om ca tamanain ta' ta taramaxicon Festo ac ca na. Ma' napa' xumu pain ca tomi' ta' ca'. Iri'o' na ca tomi' ne ca'.

²⁶ Taxi' inon taramaxicon Rei Agripa cwa', pain ca wara taraju cain oro ca tomi' hwet ta' con Jeju ca'. Je ca om hehe ta' pain ca tomi' ton ca'. Hohot na pain ca tomi' xo' ton ca', xi taxi' ara ton pain ca taxi' taxi' pi' pin cain oro ca ara non Jeju pane ta. Xi ara taparu xine con ta na.

²⁷ Je ca tomi' querec xim ca' taramaxicon Rei Agripa ac ca na. Om ca howa main oro ca xirao' to caca oro profeta cara pane ra? Taxi' inem pain ca howa main ta na ca tomi' con ma'.

²⁸ He! Ha' tarapa' pain ca to' xin ne hap ton pain ca howa wa Jeju ma' mapa' ra? Ac i ma' na ca tomi' con ma'.

²⁹ Tara pum quem taramaxicon ac ca na Paulo. Mo ta howa hap ma. Mo ta ame mapa' e' ma. Howa xira na inem ta. Howa howa xam' xirara na inuhu' pain ca taraju wet mahu' ca' quem. Je ca tomi' mi' xuhu' con Iri' Jam quem. An xiho' xirarapa' na inuhu' pain ca howa ta' ca'. Noc e' inuhu' pain ca an xiho' mahu' pain ca tao' pe cacapa' pain xirinain ca tao' to tao' to to wa ca'. Ac i ma' na ca tomi' cacam Agripa cam Berenice Paulo pane.

³⁰ Tequi' pe ac ca na taramaxicon Agripa ma'. Governador Festo, wiricam Berenice, wiricoco oro xucucun co xao to ho' nanam ma' quem, tequi' to ac cacama na.

³¹ Hwerehwet mama' iri nana ne, tomi' tomi' ac xucucun na. Om paxi' na ca pan tem ca Paulo ma'. Je xi om to' pa' pin xun tocwa. Je xi om tao' pe tocwa quem xucucun.

³² Tomi' ac con Festo na Agripa ma': Mo xi om tomi' querec pan xirapa' iri' taramaxicon César na ina ta ca pane, na ac ne xira pain ca pa hwet pin tocwa ta xucucun.