Atos 25 - Tradução Bíblica Pacaas Novos

Ca taraju wet con Paulo Festo ma', pain ca tomi' caho' pan xucun cocon co tomi' em' nonon ma'

¹ Festo ma', co taramaxicon pe pin nain Judeia ma', wa' mao ac cain na Cesareia. Ma' 3 pin iri na xec pain ca pe cain Cesareia ne, mao tain Jerusalém ta ac ca na.

² Wa' mao iri nain Jerusalém ne, hwet pan ac cocon na oro taramaxicon nucucun oro sacerdote. Oro taramaxicon co hwara' opa nana ma' quem, hwet ac cocon na Festo. Tomi' hwet ac cocon na pain oro ca coromicat nucucun pain ca tomi' em' cocon Paulo.

³ Xiram pa' xut pain ca tomi' xim urut pum ca' taramaxicon Festo ac cocon na. Tomi' roron oro soldado nem ma', o qui' totoron pain Jerusalém Paulo ta na ca tomi' cocon ma'. Om ca xiram pa' camain' cocon Paulo. Param mi' e' nonon pain ca o qui' tocwa pain Jerusalém ma', ma' ta to' pa' pin xun nonon ma'. Wara tomi' xo' xucucun: Ma' tatara wari' co coco' ho' nonon pain wana ma', to' pa' pin ac cocon tara ta nana.

⁴ Om na, tao' pe pe nonon pain Cesareia Paulo ma' ac ca na Festo. In mao ho' ta' ina.

⁵ Awi na pain ca tomi' xo' xujuhu' ma'. Tora' ac huhun tara oro win ma' nuhu' co hwara' opa nana ma'. Ja' ja' ac cacapa' tara pain ca in mao tain Cesareia. Je i cain tara ca tomi' hwet to cacapa' pain ca coromicat nuhu' pain ca tomi' em' hun Paulo. Tara pahu' ta, am iri'o' ne ca pan tem ca ma'. Ac i ma' na ca tomi' tococwa ma'.

⁶ Mon pe ho' ac tococwa na pain Jerusalém. Ac ca ma' 8 ne na xec, ac ca ma' 10 ne na xec pain ca pe ho' tococwa ma'. In mao ta' ta ac ca na, in mao ac cain na Cesareia. Xec pin iri na ne, mao ac cain na xirim ca taraju pe toton ca ma', xao pe ac cain na ca mam' xao pe nucun pain ca taramaxicon ca ma'. Tomi' cut in ac tococwa na oro wari' nucun. O corom mi' xine con Paulo ta ac tococwa na oro soldado nucun ma' quem.

⁷ Corom iri na Paulo ne, coco' coco' mam' pin ac cocon na oro taramaxicon nucucun oro judeu ma', co maqui' nanain Jerusalém ma'. Mija na ca tomi' em' cocon ta. Mija na ca pan tem ca co cwa' ta, caracat tamana na, om ca awi camain' ca, ac i ma' na ca tomi' em' cocon. Ane tomi' ximama' e' caca ne. Om ca iri'o' na ta ac cocon taramaxicon. Xi ma' caca wari' co an an ari ne ca tomi' nucucun pain ca iri'o' na ta cocon ta.

⁸ Tomi' caho' pan ac xucun na Paulo ma' quem. Om ca pan tem camain' ta' ta. Om ca tomi' in pin tain capijacocon oro taramaxicon nuxut pain ca judeu urut ca', om ca to' em' tain cote ne xiricon Iri' Jam nuxut, om ca tomi' in pin tain capijacon iri' taramaxicon César cwain, co taramaxicon pe nain Roma cain, ac i ma' na ca tomi' ca pain ca tomi' caho' pan xucun.

⁹ Coromicat ca' xucun Festo ma': Mo ta xin ne toton oro taramaxicon nucucun oro judeu cwa', tomi' querec te ac cacapa' tara ta, ac i ma' na ca coromicat nucun. Je ca tomi' con Paulo ma': Noc main xin ca mao wa Jerusalém ne? Je i cain tara ca tomi' querec pe xima. Je i cain tara ca taraju wet pe toton pain oro ca tomi' em' nucucun pum quem. Noc main ra? Ac i ma' na ca tomi' con Paulo Festo ma'.

¹⁰ Noc inain ta ac ca na Paulo. Xi wara tomi' querec xim ara mapa' pain xirim ca juiz pe ma ca'. Wirico iri' taramaxicon César cwain, co pe nain Roma cain, wirico co mi' nem pain ca juiz pe main i ca'. Na e' na pain ca tomi' querec pe pan mapa' pain i ca' quem. Xi ara cup toton oro win judeu ta' ta. Taxi' pan mapa' pain ca om ara cup toton ca' quem.

¹¹ Mo xi pan tem ta', mo xi mi' pin ma' tara ne capa' Iri' Jam ma', je i ma' xira, om xi nain ho' xije pain ca mi' pin wa. Ane om iri'o' ne ca tomi' nucucun pain ca tomi' em' cacapa' ca' ne. Om na wari' co hwara' opa ma', pain ca an mao jun ta ac cocon caram cwa' pata' ta. Je ca tomi' xim ca' taramaxicon. Tomi' querec pan xirapa' iri' taramaxicon César na ina ta na ca tomi' con ma'.

¹² Tomi' xo' ac xucucun na Festo cocon wari' co quep xiho' nonon pain ca win tomi' xo' xucucun pain oro carawa ma'. Tomi' xo' tomi' xo' ca' xucucun, tomi' pan ac con Paulo na Festo ma': Tomi' querec pan xirapa' iri' taramaxicon César na ina ta ma ra? Je i ma' ta, tomi' querec pan terem ta na ca tomi' con ma'.

Ca tomi' hwet con con Paulo Rei Agripa Festo

¹³ Ac i ma' ac i ma' nana. Om ca pain homa ne, tan' mama' ac cacamain na Cesareia taramaxicon Rei Agripa cam coxa' ca ma', Berenice ma'. An hwet mi' xut pum pain ca tomi' querec te nuxut pain ca taramaxicon pe pin main Judeia ca' nonon Festo ira.

¹⁴ Tocwan na xec pain ca to cacamain Cesareia ma'. Aram aram tomi' xo' ac con na Agripa Festo ma', tomi' hwet non pain ca tomi' em' cocon Paulo oro taramaxicon nucucun oro judeu. Tomi' ca' non: Ma' pe nain i ca' wari' co tao' pe wa. Paulo na wixicon. Hwet mao ta' iri na Félix cara pane ne, pain ca taramaxicon taramaxicon om pin ca pane, om ca pa hwet pin con quem. Tao' pe cara ac tocwa na.

¹⁵ Mao iri inain Jerusalém pane ne, hwet ac cacapa' na oro taramaxicon nucucun oro sacerdote cocon oro xucucun taramaxicon nucucun oro judeu ma'. Tomi' hwet ac cacapa' na pain oro ca coromicat nucucun pain ca tomi' em' cocon Paulo ma' quem. Mija na ca pan tem ca. Awi na pain ca tomi' mi' mon pain ca wap wa, ma' ta to' pa' pin tocwa ta nanapa'.

¹⁶ Ac i ma' paxi' na ca tomi' cacapa' pane, ane tomi' in pin toton ne. Om ca ac i ma' urut pain ca romano urut ca' ac toton na. Om ca to' pa' pin ximao urut con wari'. Na e' na pain ca tomi' querec cain' tocwa ta. Wirico, wiricoco co tomi' em' nonon, tomi' querec xo' pan ac tococwa tara. Om ca na ne pain ca em' ma ta tocwa pain ca om tomi' caho' cain' pan xucun pain ca tomi' em' tocwa ta inonon pane.

¹⁷ Ja' ja' ac cacapa' na pain ca in qui' tain Cesareia ca' quem. Om ca oro xijein xec tara e' toton, xec cut in xi' ta ac toton na. Xec pin iri na ne, mao ac tain na xirim ca taraju pe toton ta' ma', xao pe ac tain na ca mam' xao pe ne pain ca taramaxicon ta' ca'. Tomi' cut in ac toton na oro wari' ne. O corom mi' xine con Paulo ta ac toton na oro soldado ne quem.

¹⁸ Tequi' to ac caca na co tomi' em' nonon ma', tomi' hwet ac cacapa' na pain oro ca coromicat nucucun pain ca tomi' em' cocon ma'. Iri' caxicon wari' tara ma' inon pain ca om tomi' hwet querec cacapa' con. Taraju iri inonon ne, querec pin' ac toton na pain ca tomi' em' ximama' e' cocon ta.

¹⁹ Tomi' caracan ximama' e' xucucun pain ca howa tocwa Iri' Jam nucucun je pain ca tomi' ha' tocwa quem. Tomi' caracan ximama' e' xucucun con wari' co Jeju na wixicon. Mi' pin na Jeju pane. Ane e' mami' na ta ca Paulo cwa' ne.

²⁰ I'ina ac capa' na xumu cocon. Xi taraju pa' tain oro ca howa nucucun ta. Cain' xi tomi' querec xo' toton ca' ne ac xije na. Je ca tomi' ton Paulo ma': Noc main xin ca mao wa Jerusalém ne? Je i cain tara ca tomi' querec pe xima. Je i cain tara ca taraju wet pe xima pain oro ca tomi' em' nucucun pum quem. Noc main ra inon pane.

²¹ Ane noc inain ta ca ne. Tao' pe cara ximapa' pain i ca' ta ac capa' na. Maqui' iri tarapa' xec nein ca tomi' querec pan ton capa' iri' taramaxicon César ne, tomi' querec pan ac capa' tara ta na ca tomi' capa'. Na ra ac ton na, tomi' ac toton na oro soldado ne cwa': Querec wet xo' jun pain xirinain ca tao' to tao' to to wa ca'. Maqui' iri tara xec nein ca na capa' pain ca o mi' jun con César xuhu' ne, o mi' ac hun con tara ta inonon, ac i ma' na ca tomi' con Agripa Festo ma'.

²² Taraju xiton na inon ta ac ca na Agripa ma'. Je i ma' ta. Xec taraju ron ta ac con na.

Ca taraju wet con Paulo taramaxicon Agripa

²³ Xec pin iri na ne, corom qui' ac ca na Agripa cam Berenice. Corom nanain cote ne manain xirim ca cut in to xucucun oro wari'. Xec xec tamana nana. To nonon iri' ca awi nucun wom. Mija na ca tomi' querec te tacacama quem. Corom wi nonon oro comandante nucucun oro soldado, corom wi nonon co hwara' opa nana pain cidade ma' quem. O corom qui' jun Paulo ta ac ca na Festo ma', o corom qui' ac cocon na.

²⁴ Tomi' ac ca na Festo: Tomi' xim inem taramaxicon Rei Agripa. Tomi' tomi' xam' inuhu' pain ca cut in xijexi' ca'. Querec jun wari' cwa'. Wirico co cwa' co tomi' em' caca oro judeu. Pe iri inain Jerusalém pane ne, tomi' hwet ac cacapa' con na, je pain Cesareia ca' quem, iri' caxicon wari' na ta nanapa' con. Merem nanapa' con quem, na e' na pain ca to' pa' pin tocwa ta nanapa' con.

²⁵ Taraju iri inonon pain ca tomi' querec toton ne, taxi' pin ac toton na pain ca tomi' em' ximama' e' cocon ma'. Om paxi' na ca pan tem ca, om xi to' pa' pin xun cocon ta. Tomi' pan ac capa' na: Tomi' querec pan xirapa' iri' taramaxicon César na ina ta ac capa' na. Je i ma' ta, o mi' jun con César pain Roma ta toton oro soldado ne pum ta ac ton na.

²⁶ Xirao' mi' ton pain carta paxi' inon taramaxicon César cwain. Cain' xi xirao' mi' ton quem? Ac ca om pan tem ca a xira ta. Je ca hap ra ton pahu'. Taraju wet jun pain ca tomi' nucun inuhu'. Taraju wet pan ron quem taramaxicon Rei Agripa. Tomi' querec iri xun ne, taxi' ac ton tara, na ac capa' tara pain ca xirao' mi' ton pain carta taramaxicon César cwain.

²⁷ Xi na ne pain ca mam' ximao e' ton con pain ca om xirao' xo' mi' ton pain oro ca pan tem nucun pain carta ta. Ac i ma' na ca tomi' xo' con taramaxicon Agripa cocon oro wari' co cut in to xucucun pain i ma'.