Atos 24 - Tradução Bíblica Pacaas Novos

Ca taraju wet con Paulo Félix ma', pain ca tomi' caho' pan xucun cocon co tomi' em' nonon ma'

¹ Ma' 5 pin iri na xec pain ca querec wet cocon Paulo oro soldado ne, pain ca querec wet pe cocon pain cote ne xirim ca to pan caca ma', maqui' ac cain Jerusalém na Ananias ma', co sacerdote co iri' taramaxicon ma'. Ma' nana oro xucucun taramaxicon nucucun oro judeu co maqui' wi nana con ma', ma' na xucun ma' quem, co tomi' hwet xo' taxi' nain oro ca tomi' nucucun oro taramaxicon ma'. Tértulo na wixicon. Tan' mama' iri nanain Cesareia ne, hwet ac cocon na taramaxicon Félix ma', tomi' hwet ac cocon na pain oro ca coromicat nucucun pain ca tomi' em' cocon Paulo.

² O corom qui' jun Paulo ta ac cocon oro soldado nucun na Félix. O corom qui' iri nonon ne, tomi' ac ca na Tértulo ma'. Ca' na ca tomi' con taramaxicon pain ca tomi' em' con Paulo: Tomi' xim urut pum pain ca iri' taramaxicon ma ma' Félix. Pain ca xo' taramaxicon pe ho' qui' maparut pain cara pane, je ca hohot tamana caparut oro carawa. Om om na carawa ca to' i'ina naparut. Xi om ne ca taramaxicon awi ara ma ta. Quep xiho' tamana maparut pain ca ara xo' main oro carawa ca pan tem pain macaraxut ca'. An to xo' main quem.

³ Tomi' querec te tamana urut pum pain. Oro win ma' nuxut pain oro xijein cidade pain macaraxut quem, tomi' querec te tomi' querec pi' pin nenem pain oro ca ara ma pain ca quep xiho' maparut quem.

⁴ Om ca hwara' ne ca tomi' xim urut pum ca' taramaxicon, xi noc ara urut pain ca to' i'ina urut pum pain ca taramaja nem ta. Je ca xiram pa' xut urut pum pain ca taraju wet xut urut pum ca'. Wijimain e' tara ca tomi' ne ca'.

⁵ Querec pin' urut con wari' cwa', Paulo cwa', querec pin' urut con pain ca iri' caxicon wari' ca ca'. Ja' teretem taxipa' nonon oro win judeu urut pain oro xijein macan'. Wirico co taramaxicon pe ho' nonon oro wari' co howa nonon co pacara pane, co maqui' nain Nazaré pane. Howa pan teretem ara xi' nana ta.

⁶ To' em' pin tain paxi' nain cote ne xiricon Iri' Jam nuxut pain ca judeu urut pane. Ane quep urut con ne. Tomi' mi' xun pain ca wap wa pain ca pan tem nucun paxi' urut ira. Win ne ca xirao' mi' capari' Moisés pain ca xirao' nucun ca' paxi' urut ira.

⁷ Ane hwet pa' caparut comandante Lísias ne. To' i'ina naparut. Joc in pin iri naparut ne, quep ca' ac caparut con na, tomi' ac caparut na: Mo ta tomi' em' xun hun pain ca pan tem wa Paulo cwa', na e' na pain ca tomi' hwet hun pain taramaxicon cwain ta naparut pum.

⁸ Mo ta tomi' querec pan mon, taxi' ac maparut tara pain ca iri'o' ne ca tomi' nuxut ca', pain ca pan tem na ta urut con ca'. Ac i ma' na ca tomi' con taramaxicon Tértulo ma'.

⁹ Iri'o' na ca tomi' nucun Tértulo cwa' ac caca na oro taramaxicon nucucun oro judeu co coco' to ho' nonon ma' quem. Oro ca tomi' nucun pain ca tomi' hwet quem, pain ca pan tem nucun Paulo cwa', iri'o' na ta nonon taramaxicon.

¹⁰ An piri' ac cain na micon taramaxicon ma', tomi' ra ta ac con na Paulo. Tomi' xo' ac ca na: Tomi' xim inem pain ca iri' taramaxicon ma ma' taramaxicon. Mija na cawaxi' pain ca juiz pe ho' maparut pain macaraxut ca'. Je ca hohot tamana capa' pain ca tomi' xo' xim ca', pain ca tomi' caho' xije pain ca tomi' em' cacapa' ca'.

¹¹ Om ca pain homa ne pain ca mao tain Jerusalém pane. Hwet tain na ca 12 nein xec pain ca mao tain ta' pane. Pe torotop mi' querec te ton Iri' Jam ina ira. Mo ta tomi' querec momon caram cwa' co tomi' em' nanapa' cwa', om ta i'ina taxi' mapa' pain ca tomi' iri'o' ta' ca'.

¹² Tomi' em' ca' paxi' nanapa': Tomi' caracan pe nonon oro wari' pain ca tao' caho' nein cote ne xiricon Iri' Jam ta nanapa'. Ja' teretem nonon oro wari' ta nanapa' quem. Xi querec cacapa' pain ca tomi' caracan toton je pain ca ja' teretem toton ta! Ac i ma' paxi' nanapa' pain ca tomi' em' cacapa' ca'. Ane om tomi' caracan pe camain' toton oro wari' pain ca tao' caho' nein cote ne xiricon Iri' Jam ta. Om ca ja' teretem toton oro wari' pain oro xirim ca cut in to xujuxut pain ca judeu urut ca', om ca ja' teretem toton oro wari' pain oro xiricocon pain Jerusalém ma' quem.

¹³ Pain ca tomi' caracan nonon oro wari' ta cacapa' ca', je pain ca ja' teretem nonon oro wari' ta cacapa' ca' quem, om ca iri'o' na ta ac quequem ta taramaxicon. Xi ma' ca wari' co iri'o' na ta wi nonon ta.

¹⁴ Om paxi' na ca iri'o' na ta ac quequem pain ca pan tem na ta quequem pata'. Ane iri'o' ne i ca' pata' ne: Howa inain oro ca pijim' wa con Jeju ta. Howa pan tem na ta ara xi' nanapa' oro taramaxicon nucucun oro win judeu ta' cwa'. Je i ma' ira inonon. Howa inain oro ca pijim' nucun Jeju cara pane, howa inain oro ca pijim' nucun pain ca pe torotop mi' querec te ton Iri' Jam co howa caca oro hwanana nuxut pain ca judeu urut ca'. Howa inain oro ca xirao' nucun Moisés cara pane, howa inain oro ca xirao' nucucun oro profeta cara pane.

¹⁵ Howa inon Iri' Jam pain ca main to' e' mami' toton cocon oro wari' co wara cono' nana quem. Ac i ma' nana caram cwa' quem. Howa howa pi' pin urut con Iri' Jam pain ca main to' e' mami' toton cocon oro wari' co wara cono' nana ma'. Je je ari na ca howa nuxut cocon pain ca main to' e' mami' xun tococwa quem. Co tomi' ha' nonon pain ca e' e' wet nucucun, co om tomi' ha' nonon pain ca e' e' wet nucucun ma' quem, main to' e' mami' toton nonon oro wari' Iri' Jam ta urut.

¹⁶ Je ca win xumu tain oro ca xut xo' wa ca'. Oro ca awi wa ca taxi' ta' pain ca hohot con Iri' Jam cocon oro wari' ma' quem, je ca ara ta' ca'.

¹⁷ Je ca tomi' xim ca' ac con na taramaxicon Paulo. Mija na cawaxi' pain ca om in mao tain Jerusalém pane. Je win in mao ta' pain xocori ca'. Cut mi' toton pain dinheiro oro win judeu ta' co om nonon carawa ta ina ira. Mi' querec te ton pain carawa Iri' Jam quem ina ira. Je ca mao tain Jerusalém pane.

¹⁸ Wara hohoc xo' pin xije, wara mi' querec te ton pain carawa Iri' Jam ina quem. Querec ac cacapa' na oro win judeu ta' co maqui' nanain Ásia. Querec pe nanapa' pain ca tao' caho' nein cote ne xiricon Iri' Jam nuxut. Xica' pe ina, om om napa' win ma' ne. Om ca teretem caca oro wari' pata'.

¹⁹ Oro win judeu ta' co maqui' nanain Ásia ma', wiricoco pan xirara co tomi' hwet nenem pain carawa ca ara ta' pane, xi iri'o' ne ca tomi' nucucun pain ca pan tem na ta cacapa' ta.

²⁰ Tara cocon caram cwa' quem. Am tomi' em' cacapa' pain ca pan tem wa pain ca tomi' querec qui' cacapa' pain ca cut in to nucucun pain ca Sinédrio caca ma'. Wiricoco xirara co tomi' hwet nenem pain.

²¹ Am tomi' em' e' cacapa' pain ca merem mip ca' toton: Howa inon Iri' Jam pain ca main to' e' mami' toton nonon oro wari' co wara cono' nana ta ta' pane. Je ca tomi' querec xim mahu' ca' inonon pane. Ac i ma' na ca tomi' con Félix Paulo ma'.

²² Félix ma', taxi' tamana paxi' nain oro ca pijim' wa con Jeju. Je ca je i ma' ta tococwa ma'. Je i ma' ta, maho' xi'. Maqui' iri tara comandante Lísias ne, tomi' mami' ac xijexi' tara, tomi' xo' ac xuhu' tara. Am em' na ta ton Paulo cwa', am om em' na ta ton, tomi' xo' ac xuhu' tara pain ca coromicat ne ta na ca tomi' tococwa ma'.

²³ Tao' pe ron ta ac con na taramaxicon nucucun oro soldado ma' quem. Hohot na pain ca om pao' pe mon, tao' pe e' ron pain xirinain ca tao' to tao' to to wa ca'. Ta nain ho' mon pain ca xut in wa pain tequipain xirim quem. Mo ta quep xiho' xun cocon oro win ma' ca ma', mo ta mi' xun pain carawa ca cao' wa caca ma', ta narain ho' momon con me ta non.

²⁴ Mon to wet ac caca na. Om ca tocwan homa ne xec pain ca mon to wet caca ma', in qui' ac ca na Félix. Maqui' wi na cam manacon ma', Drusila ma'. Judeu na Drusila. Hap ra jun Paulo, taraju xin ca pijim' nucun urut ta ac tococwa na oro guarda ma'. Maqui' iri na ne, taraju wet ac cacamain na ca pijim' nucun ma', pain ca tomi' hwet pan tacacama pain ca howa tocwa Cristo Jeju ma'.

²⁵ Ca pijim' tacacama ma', ca pijim' tacacama ma', tomi' xo' ac tacacama na pain ca xut xo' wa pain ca ara xine oro ca param nucun Iri' Jam. Tomi' xo' tata pain ca om ara e' xine ca param pan nexi', tomi' xo' tata pain ca main tomi' querec xun tococwa oro wari' pain oro carawa ca ara caca pain ca e' e' wet nucucun quem. Pijim' ac i ma' iri nanam Paulo ma' ne, jin' pin ac ca na Félix ma'. Je i ma' ta, in mao cain' ra ta ac con na. Mo ta na capa', mo ta om to' i'ina capa' ca taramaja ne ca', hap ra jun ta mami' toton pum ta non.

²⁶ Jin' paxi' nain ca taraju wa ca pijim' nucun Paulo Félix ma'. Ane param cain dinheiro nucun ne. Je ca tama' hap ra, tomi' xi' quem con ma'.

²⁷ Ac i ma' ac i ma' nana. Ma' 2 pin iri na cawaxi' cocon ne, hwet mao ac ca na Félix. Taramaxicon taramaxicon om pin na, corom ac ca na xucun taramaxicon. Pórcio Festo na wixicon xocoricon taramaxicon. Pain ca om hwet mao querec ca Félix ma', om ca pa hwet mam' con Paulo ma' quem. Ma' ta tomi' querec te cara cacapa' oro judeu cwa' na.