Atos 23 - Tradução Bíblica Pacaas Novos

¹ Paulo ma', noro tamana ac cocon na oro taramaxicon nucucun oro judeu ma', co cut in xucucun pain ca Sinédrio caca ma'. Tomi' xim inuhu' ta xere ac cocon na. Tama' tomi' ha' iri'o' inon Iri' Jam pain iri' xumu pain ca taramaja mi' ton ca' na ca tomi' tococwa ma'.

² Wap jein capijacon ta ac ca na sacerdote co iri' taramaxicon ma', Ananias ma'. Tomi' tata co coco' ho' nonon Paulo ma' quem, wap ac cacain na.

³ Tomi' in pin pan ac con iri' taramaxicon na Paulo ma' quem: Ac ca iri'o' ta' ca' tara me ma ra? Wap pan terem Iri' Jam ta. Tomi' ha' inain xi' ma main ca xirao' nucun Moisés pain ca tomi' querec xim mapa' ra? Je xi om wap jun momon pata' quem? Xi wap hap ron wari' pain ca om querec pin' cain' tocwa pain ca pan tem wa ta quem ca xirao' nucun Moisés ta non.

⁴ He! Om ca tomi' xirac jin' mon sacerdote co iri' taramaxicon ma ra ac cocon na co coco' to ho' nonon ma'.

⁵ Na ra ac ca na Paulo. Om ta sacerdote co iri' taramaxicon ca ma' inon ira xere. Mo xi querec pin' ton, om xi tomi' ac i ma' ton ta. Xi xirao' pe ara xine pain capijacon Iri' Jam: Ta tomi' napat mon wari' co taramaxicon pe ho' nem me ta napari'. Ac i ma' na ca tomi' ca ma'.

⁶ Paulo ma', querec pin' nonon caram ma' co cut in xucucun pain ca Sinédrio caca ma'. Ma' nana co saduceu nana ma', ma' nana co fariseu nana ma' quem. Je ca merem mip ca ma': Fariseu ina ta xere. Fariseu na te cocon waram jeo' pane quem. Howa inon Iri' Jam pain ca main to' e' mami' toton cocon oro wari' co wara cono' nana pane. Je ca tomi' querec xim mahu' ca' na pain ca merem mip tococwa ma'.

⁷ Tomi' iri nain i ma' Paulo ne, tomi' caracan ac xucucun na oro fariseu cocon oro saduceu ma'. Mija na ca mana' xucucun pain ca tomi' caracan xucucun ma'. Xi coromicat ni ca' ara xucucun pain ca to' e' mami' tococwa co wara cono' nana ta.

⁸ Coromicat ca' nana oro saduceu ma': Om ta e' mami' caca co wara cono' nana ta nana. Om nana oro jam co taramaja mi' nonon Iri' Jam, om na tamataraxi' quem ta nana. Oro fariseu ma' iri nana ne, coromicat ni nana quem. E' mami' tatara co wara cono' nana ta nana, ma' nana oro jam co taramaja mi' nonon Iri' Jam, ma' na tamataraxi' quem nana.

⁹ Mija na ca teretem caca pain ca tomi' caracan xucucun. Ca teretem caca ma', ca teretem caca ma', tequi' to ac caca na co ca' na taxipa' nanain ca xirao' nucun Moisés. Fariseu nana. Tomi' mip ac caca na: Om ca mam' camain' urut pain ca pan tem wa con co cwa' ta! Am iri'o' ne ca tomi' nucun, am tomi' con jam, am jam co taramaja mi' non Iri' Jam ca con, am wirico co tomi' non pane, ac i ma' na ca tomi' caca ma'.

¹⁰ Ca tomi' in pin xucucun ma', ca tomi' in pin xucucun ma'. Mija na ca tomi' caracan xucucun pain ca mana' caracan xucucun ma'. Cuc tapiripit pin totoron Paulo xi' na comandante ma' quem. Je ca tomi' tococwa oro soldado nucun ma': Quiji' hwet jun, cuc ca' jujun con, o in qui' ac hun tara pain xirim ca to iri' ca' tata.

¹¹ Xim pin iri na ne, ane ane xat pe ho' ac con Paulo na Taramaxicon nexi'. Tomi' ac con na: Quereme ra, ta jin' ma me ta. Win ne ca tomi' hwet mapa' cocon oro wari' co to nanain Jerusalém ca', na e' na pain ca tomi' hwet mapa' cocon oro wari' co to nanain Roma quem na ca tomi' con ma'.

Ca tomi' xo' xucucun oro judeu pain ca to' pa' pin xun Paulo ta xucucun

¹² Xec pin iri na ne, tomi' xo' ac xucucun na oro judeu. Tomi' an pe xin ca tomi' nexi' ta. To' pa' pin xun Paulo. An to pin xin ca cao' wa je ca toc wa quem. Om ta cao' iri', om ta toc iri' pain ca om to' pa' querec xun ta. To' pa' pin iri xun ne, cao' mami' ac iri' tara, toc mami' ac iri' tara quem, ac i ma' xucucun.

¹³ Om ca paric caca co to' pa' pin xun nonon ma' quem. Ma' mija nana, tiquin' ca' nanain ca 40 nucucun.

¹⁴ Hwet xuxun oro taramaxicon nucucun oro sacerdote cocon oro xucucun taramaxicon nexi' ta ac xucucun na, tomi' ac tococwa na: To' pa' pin xun urut con Paulo ta. Tomi' an pe pin urut pain ca tomi' nuxut quem. Pain ca om to' pa' pin querec urut con, om ta cao' camain' urut. To' pa' pin iri xut con ne, cao' mami' ac urut tara. Mo ta om to' pa' pin urut con, quep xirac ma' tarapari' Iri' Jam ne urut ta na ca tomi' tococwa ma'.

¹⁵ Je i ca' ca coromicat nuxut ac tococwa na. Wahu' cocon oro win taramaxicon hwe pain ca Sinédrio hwe ca', tomi' jun comandante ma'. O in qui' mi' xut con Paulo me jun. Tomi' querec mami' xun pain ca pan tem nucun ta urut tara pain ca tomi' mixein hun ma'. Wara coco' ho' pan xut con pain wana pain ca o in qui' xun cocon quem. Om ta hwet querec cuhu' pain ca to hwe ca', wara to' pa' pin ac xut con tara pain wana ta na ca tomi' tococwa ma'.

¹⁶ Ane taxi' pin tococwa pain ca to' pa' pin xun cocon Paulo ne. Wirico xinacon Paulo na co taxi' pin nonon. Taxi' pin iri tata ne, mo tomi' hwet ton pain aji' e' ac ca na, mao ac cain na xirim ca to caca oro soldado ma', tomi' hwet ac con pain na cwaji' ca. To' pa' pin xim nenem ta aji' non.

¹⁷ Na ra ac ca na, hap ra ac con na taramaxicon nucucun oro soldado ma'. O mi' ron con comandante co cwa' co xo' hwara' cwa'. Ma' na carawa ca tomi' hwet ton ca ca' non.

¹⁸ Ma, hap ra ta arain ac ca na, o mi' ac con na con comandante. Tomi' napa' Paulo ma' ne, co tao' pe ma ma' ne ac con na. O mi' ron con co cwa' co xo' hwara' cwa' e' napa' pum. Ma' na carawa ca tomi' hwet xim quem ta ac con na.

¹⁹ Iri'o' ac ca na comandante ma', coc papan ac con na pain micon ma', xut to ac caca na. Ma' carawa ca tomi' xim mapa' quem arain ac con na.

²⁰ Om na, tomi' xo' xucucun oro judeu pum ne ac con na. Tomi' ca' teterem: Xec o in qui' mi' xut con Paulo me teterem. Xat pe ho' taraparut pain ca cut in to xujuxut ca', pain ca Sinédrio urut ca' teterem. Tomi' querec mami' xut con pain ca pan tem nucun ta teterem. Tomi' ac i ma' paxi' teterem, ane mixein caca ne.

²¹ Ta ha' momon me ta. Xi mija ara caca co coco' ho' nonon Paulo pain wana ta. Tiquin' ca' nanain ca 40 nucucun. To' pa' pin xun nonon quem. Tomi' ca' xucucun: An to pin xin ca cao' wa je ca toc wa ta. Pain ca om to' pa' pin querec xun ca', om ta cao' mami' xi', om ta toc mami' xi' quem. To' pa' pin iri xun ne, cao' mami' ac iri' tara, toc mami' ac iri' tara quem, ac i ma' na ca tomi' xucucun. Wara awori xo' nana quem, winim' e' nenem pain ca ha' momon ma'. Ha' xirapari' na nenem quem, ac i ma' na ca tomi' con comandante xinacon Paulo ma'.

²² Na ra ac ca na comandante ma'. In mao ra ta arain ac con na. Ca tomi' hwet mapa' ca', ta tomi' hwet camain' momon pain oro wari' me ta ac con na quem.

²³ Harahap je e' ac tococwa na taramaxicon nucucun oro soldado ma', co taramaja mi' nonon ma'. Ma' 2 nana co tomi' ca ma'. Wara awori xo' je jujun oro win soldado hwe ma'. Ma' 200 tatara co xuruxut e' nanain macan', ma' 70 tatara co to nanain cavalo, ma' 200 tatara co cut nanain cote ne quit ca mam' xucun' tape wa quem, ca' tatara pahu'. Xim pin iri tara ne, pain 9 hora ma', mama' ac hwein tara Cesareia.

²⁴ Tucu an to mi' jun pain cavalo Paulo ma' quem. Querec wet xo' jun, o mi' jun con taramaxicon Félix pain Cesareia cain ac tococwa na.

²⁵ Comandante ma', co Cláudio Lísias na wixicon ma', xirao' ac cain na carta ca', xirao' mi' non pain Governador Félix. Ca' na ca xirao' nucun:

²⁶ Cláudio Lísias ina pain ca xirao' mi' xim ca'. Xirao' mi' inem pain ca iri' taramaxicon ma ma' Governador Félix.

²⁷ Mam' inem con wari' cwa', co quep caca oro judeu cwa'. To' pa' pin xun nonon ira. Taxi' pin iri inon pain ca romano ca ne, mo hwet ac ton na. Wata', wiricoco oro soldado ne cwa', jein hwet ac urut con na, narain ho' ac urut con na cocon oro judeu.

²⁸ Para tomi' em' cocon ma' ne ac xije na. Je ca o mi' toton con oro taramaxicon nucucun oro judeu cwa', pain ca cut in xucucun pain ca Sinédrio caca ca'.

²⁹ Taraju iri inonon pain ca tomi' querec cocon ne, taxi' pin ac toton na pain ca tomi' caracan e' xucucun pain ca tomi' ha' xo' xine oro ca xirao' nucun Moisés nucucun ca tomi' ha' je tococwa pane. Om paxi' na ca pan tem ca. Om xi to' pa' pin tocwa, om xi tao' pe tocwa quem.

³⁰ Tomi' hwet iri napa' wari' ne, pain ca coco' ho' xun cocon pain wana pain ca to' pa' pin xun ta cocon ma', tomi' ac xije na: O mi' hap ton con Governador Félix cwain ac ta' na pum. Tomi' ac toton na oro judeu co tomi' em' nonon cwa' quem: Oro ca tomi' em' nuhu' pain ca pan tem na Paulo ta hun ma', na e' na pain ca tomi' hwet hun pain iri' taramaxicon Governador Félix cwain ta inonon pum. Ac i ma' na carta nucun comandante Cláudio Lísias ca xirao' mi' con Governador Félix pane.

³¹ Tomi' ha' nonon comandante oro soldado ma'. O mao towa nonon Paulo. Xuruxut xuruxut hwet ac cacain na xijein cidade ma', Antipátride na wixinain.

³² Xec pin iri na ne, in mama' ac cacain na xirim ca to caca pain Jerusalém oro soldado co xuruxut nanain macan' ma'. Joc wa' pan xun Paulo ta ac caca na co to nanain cavalo ma', tiquin' mama' ac caca na.

³³ Tan' mama' iri nanain Cesareia ne, mi' ac cocon na pain carta taramaxicon Félix. Mon cwa' Paulo cwa' ac cocon na.

³⁴ Noro pan ac cain na carta taramaxicon ma', noro noro. Tomi' querec ac con na Paulo: Main ca maqui' ma quem? Cain' cain' ne wixinain macaram quem? Om na, maqui' inain Cilícia ta ac ca na. Taraju iri nain ca tomi' nucun ne,

³⁵ tomi' ac ca na: Je i ma'. Maqui' iri tatara co tomi' em' nenem ne, taraju wet ac toton tara pum ta na. Tomi' ac tococwa na oro soldado nucun ma' quem: Querec wet pe jun pain cote ne xirixi' ma', ca quep ca taramaxicon Herodes cara pane, ac i ma' na ca tomi' tococwa ma'.