Atos 22 - Tradução Bíblica Pacaas Novos

Ca tomi' xo' cocon oro wari' Paulo

¹ Taraju wet xine me xere cocon waram te ac ca na Paulo. Taraju wet jein ca tomi' xo' xuhu' ca', pain ca tomi' caho' xije pain ca tomi' em' mahu' ca' tata.

² Wara tacana to paxi' nana. Tacana to mip nana pain ca taraju cocon pain ca tomi' cain iri' capijacocon ma', pain hebraico ma'. Tomi' ac ca na Paulo:

³ Judeu ina ta. Pan' pe inain Tarso ca pe nain Cilícia ma', je i ma' wixinain macan' ca pan' pe ta' pane. Pan' pe paxi' inain Tarso pane, ane hwara' pe tain Jerusalém ca' ne. Wirico Gamaliel na co ca' na napa' pain capijacon Iri' Jam pane. Ca' na ca' na xam' napa' pain oro ca xirao' nucun Moisés ca tomi' ha' caca oro hwanana nexi' pane. Win xumu taxipa' inon Iri' Jam quem, tomi' ha' taxipa' inon. Win hwe ma', pain ca win xumu taxipa' hun ma'.

⁴ Je ca ja' tequi' quep em' toton oro wari' co howa nanain ca pijim' wa con Jeju pane. Tama' to' parapa' xitoton na ina pane. Ca tarama' nucucun, ca narima' nequequem ma' quem. Pao' to iri inanam ne, wara ca' na xirinain ca tao' to tao' to to wa ma', tao' to ac tacacama na.

⁵ Taxi' napa' sacerdote co iri' taramaxicon ma', cocon oro taramaxicon nexi' co cut in taxipa' xucucun pain ca Sinédrio caca ma'. Iri'o' na con ta tuturuhu' pata'. Mi' nanapa' pain oro carta ca xirao' mi' cocon oro win judeu iri' co to nanain Damasco pane quem. Ma' ta taxi' quequem pain ca quep roron co howa nonon Jeju ta pan urut pum ca', ac i ma' nanapa' pain ca mi' cacapa' pain carta nucucun. Je ca mao tain Damasco pane. Quep toton, pao' to toton, cut in qui' ac toton tara pain Jerusalém ca' ina pane. Ma' ta wap tococwa ta ina pane. Mao ac ta' na pane.

⁶ Mo mo mo, wixicam pin iri inain Damasco ne, pain iri' tocon xina ma', ane ane joc xec pa' ac capa' na naran. Joc xec qui' nain pawin. Joc xec joc xec mam' pin napa' quem.

⁷ Pan' mao ac tain na macan'. Taraju ac tain na ca tomi' wa. Tomi' ac capa' na: Saulo. Saulo. Para quep em' mapa' ma' Saulo napa'.

⁸ Cain' ca wari' ma quem Taramaxicon ne ac ta' na. Jeju ina, co maqui' nain Nazaré pane napa'. Wata' co quep em' ma ma' ac capa' na quem.

⁹ Querec paxi' nanain naran oro win ma' ne co ja' ja' nanapa' ma', ane om taraju pa' cacain capijacon co tomi' napa' ne.

¹⁰ Cain' cain' xita' quem Taramaxicon ne ac ta' na. Tequi' pe ra ta, mao rain Damasco ma'. Ma' pe nain i cain wari' co tomi' xo' xim nem pain oro ca ara ra quem Iri' Jam ma'. Ac i ma' na ca tomi' capa' pane.

¹¹ Om pin napa' tucu, xi joc xec mi' ara capa' naran ta. Je ca coc papan cacapa' oro win ma' ne co ja' ja' nanapa' ma'. Coc papan wa' mao nanapa' pain Damasco.

¹² Pe nain Damasco wari' co win xumu nain ca param nucun Iri' Jam ma'. Tomi' ha' taxipa' nain ca xirao' nucun Moisés. Querec pin' querec pin' pi' pin nonon oro win judeu iri' co to nanain Damasco pane. Xut xo' nana ta nonon, xi om ne ca querec pin' ara cocon pain ca xut xo' nucun ta. Ananias na wixicon.

¹³ Hwet ac capa' na Ananias, xat pe ho' ac capa' na. Querec mami' ra ta xa' Saulo, ac i ma' na ca tomi' capa' ma'. Ane ane querec pin' ac ta' na, ha' napa' pain ca querec ton quem.

¹⁴ Tomi' ac capa' na: Tora' nem Iri' Jam co howa caca hwanana nexi' cara pane. Mi' ton pain ca taxi' cain oro ca param ne nem, mi' ton pain ca querec con Panxita' co tama' ara xo', mi' ton pain ca taraju cain iri' ca tomi' nucun ta nem quem.

¹⁵ Tomi' hwet ne cocon oro wari' ta ara xi' nem. Tomi' hwet tomi' hwet xam' roron pain oro ca querec ma pata', je pain oro ca taraju ma pata' quem nem.

¹⁶ Je ca tomi' xim ca' ac capa' na: Para hehe ma ma'? Hap ra, tequi' pe ra, an hwet rain ca howa nem pain ca ja' ma com ta. Hohoc pin ne pain ca caracat ne ta ron Jeju quem. Ac i ma' na ca tomi' capa' Ananias pane.

¹⁷ Aram aram in qui' ac tain na Jerusalém pane. Mo tomi' pe ton Iri' Jam pain cote ne xiricon ta ac ta' na. Tomi' tomi' ca' inon, tohwein' ac ta' na quem. Ac ca tohwein' ta' na, om paxi' na ca pi'am ta', querec ina.

¹⁸ Ac ca querec ton na Taramaxicon ne Jeju. Hap ra ac capa' na. Paca' hap rain Jerusalém ca', xi howa je na caca oro wari' cwa'. Om ta howa quequem pain ca tomi' hwet mapa' cocon ta napa'.

¹⁹ Cain' cain' xirara ne ac ton na. Taxi' paxi' nanapa' pain ca corom corom tain oro xirim ca cut in to xujuxut pain ca judeu urut pane. Taxi' paxi' nanapa' pain ca quep toton co howa nenem, taxi' nanapa' pain ca wap wap toton quem.

²⁰ Taxi' paxi' nanapa' pain ca xat pe ho' toton co to' pa' pin nonon Estêvão cara pane, co tomi' hwet taxipa' nem pane. Taxi' paxi' nanapa' pain ca hohot capa' ca mi' pin nucun, taxi' paxi' nanapa' pain ca cut in xo' ton womicocon co to' pa' pin nonon quem. Je xi howa cacapa' pain ca tomi' hwet toton pum quem? Ac i ma' na ca tomi' ton Jeju pane.

²¹ Om na ta ac capa' na. Mao ra, mao rain pira inem. Tomi' hwet ne cocon oro wari' co om judeu nana inem ta napa'. Ac i ma' na ca tomi' cocon oro wari' Paulo ma'.

²² Taraju wet taraju wet ca' nonon oro wari' ma'. Taraju iri nonon pain ca tomi' hwet ne cocon oro wari' co om judeu nana inem ta capa' Jeju ta ca ne, merem tamana ac caca na. Merem merem pi' pin nana: To' pa' pin xun, to' pa' pin xun. Om ca na camain' ne pain ca e' ca co cwa' ta na ca merem nucucun.

²³ Ca merem merem caca ma', ca horohot joc xococo cocon iri' curucun womicocon ma', ca wixicaracao' piri' cacain tajain macan' ma' quem.

²⁴ Tomi' ac ca na comandante: O corom mao jun pain xirim ca to iri' ca' ac tococwa na oro soldado nucun. Wap jun ta, ma' ta tomi' hwet capari' pain ca ara ca ma', ca para merem merem caca oro wari' cwa' quem ac tococwa na. O corom mao ac cocon na.

²⁵ Pao' pe ac cocon na pain macon, ma' ta wap xun ta nonon. Tomi' pan ac ca na Paulo, tomi' non taramaxicon nucucun oro soldado co xat pe nain i ma'. Hohot na pain ca wap mahu' pain ca romano ta' ca' ra? Xi wap jun wari' co romano ta xihwe ta non.

²⁶ Taraju iri nain i ma' taramaxicon ma' ne, pain ca romano ina ta ca Paulo ma', mo hwet ac con na comandante. Cain' cain' ton ma quem? Xi romano ina ta ara ca ta na ca tomi' con ma'.

²⁷ Mo hwet pan ac con Paulo na comandante ma' quem. Iri'o' na ca romano ma ma' non. E'e'. Romano ina ta ac ca na Paulo.

²⁸ Na ra ac ca na. Pagar inonon pain cote ne dinheiro oro taramaxicon pane, romano pin ac ta' na quem na comandante ma'. Ane wara romano capa' te pane ne. Je ca romano mi' ta' pain ca xo' pan' qui' ne pane na Paulo.

²⁹ Taraju iri nanain i ma' oro soldado co wap xun nonon Paulo ma' ne, coco' hap ca' ac cocon na. Jin' pin na comandante ma' quem, xi om ne ca taxi' pin ara con Paulo pain ca romano ca ma'. Om xi pao' pe jun toton, xi romano ara ca ta xucun.

Ca tomi' xo' cocon oro taramaxicon Paulo

³⁰ Para mana' cocon Paulo oro judeu cwa' ne na comandante ma' quem. Para tomi' em' cocon ne, ac i ma' na ca coromicat nucun. Xec pin iri na ne, tomi' ac tococwa na oro soldado nucun: Tacom' pin jun Paulo ta tata. Cut in xujuhu' quem ac tococwa na oro taramaxicon nucucun oro sacerdote cocon oro taramaxicon co cut in xucucun pain ca Sinédrio caca ma' quem. Cut in iri xucucun ne, o qui' jun Paulo ma' quem ac tococwa na. Mon cwa' ta ac tococwa na oro taramaxicon.