Atos 21 - Tradução Bíblica Pacaas Novos

Ca mama' xin Jerusalém urut

¹ Mama' urut ta iri urut cocon caram ma' ne, co querec wet nonon co howa nonon Jeju pain Éfeso ma', corom mama' ac urut pain na mam' horoho wa ma'. Horoho mama' ac urut pain na xixi pan nein macan' Cós ma'. Xec pin iri na ne, horoho tiquin' mama' ac urut na. Horoho horoho hwet ac urut pain na xijein xixi pan nein macan' ma', Rodes ma'. Paca' ac urut pain na Rodes ma', horoho horoho hwet ac urut pain na Pátara ma', je i ma' wixinain cidade ca hwet urut.

² Je ca mam' pe urut pain wirain mam' horoho wa ca mao tain nain xijein macan' ma', pain Fenícia ma'. Corom mama' ac urut pain na, horoho mama' ac urut na.

³ Horoho horoho querec pira ac urut pain na xixi pan nein macan' ma', Chipre ma'. Tiquin' ca' ac urut pain na, horoho horoho hwet ac urut pain na Tiro ma', je i ma' wixinain cidade ca pe nain xijein macan' ma', Síria ma'. Piri' mama' ac urut na. Waximain mam' horoho wa ca to urut ma', cut piri' to tain na pain Tiro oro caramaji mam' horoho nucun.

⁴ Pirao' xuxun xerexi' co to nanain Tiro ca' ac urut na, pirao' pirao' mam' ac urut cocon na, to ho' ac urut cocon na. Ma' 7 na xec pain ca to ho' urut cocon. Xerexi' co to nanain Tiro ma', an hwet mi' tata pain carawa ca ara ton non Paulo pain Jerusalém ma'. Je Tamataracon Iri' Jam ca an hwet mi' nonon pain. Je ca hu cocon quem. Ta mao main Jerusalém me ta paxi' nonon.

⁵ Ane om ha' cocon Paulo ne. Maqui' iri na xec nein ca tiquin' mama' xi' urut ne, mama' xi' urut ta ac urut na, ja' mama' ac cacaparut na pain wanaji cacarain com quem. Ja' ja' ja' ja' pi' pin nanaparut, wiricoco pain ca tarama' nucucun ma', jicocon mana panxicaca cacam mana panxicaca ma' quem, ja' ja' ac cacaparut na quem. Torotop to ac urut na pain caramaxut ma', pain cacarain com ma', tomi' ac urut con na Iri' Jam.

⁶ Mama' urut ta ac urut cacam na, je i ma', mama' je e' ac cacaparut na. Corom mama' ac urut pain na mam' horoho wa ma', in mama' ac cacamain na xiricacam.

⁷ Paca' iri urut pain Tiro ne, horoho tiquin' mama' ac urut na. Horoho horoho hwet ac urut pain na xijein cidade ma', Ptolemaida na wixinain. Piri' mama' iri urut ne, hwet ac urut cocon na oro xerexi'. Maqui' urut, maqui' hwe ra ac cacaparut na. Xica' pe na xec pain ca to ho' urut cocon.

⁸ Xec pin iri na ne, paca' ac urut cocon na, xuruxut xuruxut tan' mama' ac urut pain na xijein xirim ma', Cesareia ma'. Hwet ac urut con na Filipe ma', to ho' ac urut con na pain xiricon. Filipe ma', pijim' hwet taxipa' nain capijacon Iri' Jam con Jeju. Wirico Filipe co to' 7 nonon oro win ma' ca co cut mi' taxipa' nonon pain carawa ca cao' wa oro xerexi' pain Jerusalém pane quem.

⁹ Ma' 4 nana mana panxica ma'. Om om wet nanam tarama'. Tomi' hwet taxipa' nanain capijacon Iri' Jam ca an hwet mi' cacam Tamataracon ma'.

¹⁰ Om ca tocwan homa ne xec pain ca to ho' urut con Filipe ma', maqui' ac cain Judeia na wari' co tomi' hwet taxipa' nain capijacon Iri' Jam ca an hwet mi' con Tamataracon Iri' Jam. Ágabo na wixicon.

¹¹ Hwet ac caparut na, an ca' ac con na pain cinturão nucun Paulo. Mam' pao' pe pan ac xucun na pain caximacon pain micon. Tomi' ca' na Tamataracon Iri' Jam ta ac ca na. Ac i ma' tara ca pao' pe tocwa waximain cinturão ca'. Pao' pe totoron oro taramaxicon nucucun oro judeu pain Jerusalém. An mi' ac tococwa con tara co om judeu nana ta. Ma' ta tao' pe cocon ta totoron na ca tomi' ca Ágabo ma'.

¹² Taraju iri urut pain ca tomi' nucun ne, tomi' ac urut con na Paulo, tomi' mip urut con. Ta mao main Jerusalém me urut con. Warut cocon oro xerexi' co to nanain Cesareia ma', tomi' tomi' pi' pin paxi' urut con.

¹³ Ane tomi' in pin caparut ne. Para tomi' ac i ma' mahu' quem? Para ja' naro xim mahu' pain ca awaran nuhu' ma' quem? Je i ma' ira ina ta. Hohot napa' pain ca pao' pe xim cacapa' pain Jerusalém ma', hohot napa' pain ca to' pa' pin xim cacapa' pain ca taramaja mi' ton Taramaxicon nexi' Jeju ma' quem, ac i ma' na ca tomi' in pin caparut.

¹⁴ Querec pin' iri urut con pain ca om ha' caparut pain ca tomi' mip urut con ne, tomi' tomi' om ac urut con na. Je i ma' ta, param e' urut pain ca param pan nucun Iri' Jam ta ac urut na.

¹⁵ Cut xo' ac urut pain na caramajuxut, maji pain Jerusalém ta ac urut na.

¹⁶ Ma' nana xerexi' co wari' nein Cesareia ma', co joc tan' pin nanaparut pain Jerusalém ma' quem. Joc tan' nanaparut pain xiricon Mnasom. Je tara ca pi'am to hwe ma', pain xiricon Mnasom cwa' nanaparut. Wari' nein xixi pan nein Chipre na Mnasom ma'. Wara howa non Jeju pane. Pain cara pane, pain ca xo' howa ten qui' tocwa Jeju pane, je ca howa pin ca Mnasom pane.

Ca tomi' xo' xucucun Paulo con Tiago

¹⁷ Tan' mama' iri urut pain Jerusalém ne, tomi' querec te ac cacaparut na oro xerexi'.

¹⁸ Xec pin iri na ne, maji tomi' xun Tiago ta ac caparut na Paulo, ja' ja' ac urut con na. Wara cut in cut in pi' pin xucucun oro xerexi' co querec wet nonon co howa nonon Jeju ma'.

¹⁹ Maqui' ma, maqui' ina ta ac xucucun na, tomi' hwet tomi' hwet pi' pin ac tococwa na pain oro ca ara pan ca Iri' Jam pane, pain ca quep xiho' con pain ca taramaja nucun pain ca pijim' hwet tococwa pain capijacon oro wari' co om judeu nana pane.

²⁰ Taraju iri nanain ca tomi' nucun ne, tomi' querec te ac caca na. Awi tamana na Iri' Jam ta nana. Tomi' ac cocon na Paulo: Taxi' momon oro win ma' nexi' pain ca judeu iri' ca', taxi' momon pain ca howa cocon Jeju quem. Mija nana, om ca paric camain' caca. Tomi' ha' tomi' ha' pi' pin nanain ca xirao' nucun Moisés quem. Om ca an to camain' cacain.

²¹ Taraju nanain xaji' pum quem. Ca' nana co xina nana pum: Pijim' pan tem na Paulo ta nenem. Pijim' pan tem tata oro win ma' nexi' pain ca judeu iri' ca' nenem. An pe pin jein ca xirao' nucun Moisés ta. Ta wac xirac hwein taparinain ca xirac nucucun mana panxihwe me, ta an xiho' mami' huhun oro hwanana nexi' me ta, pijim' ac i ma' pijim' ac i ma' pi' pin tata oro win ma' nexi' co to ho' nonon co om judeu nana ma', ac i ma' na ca xina caca pum.

²² Cain' cain' xixi' cocon quem ac cocon na. Taxi' ho' teterem pain ca maqui' nem ca' quem.

²³ Je ca tomi' urut pum ca', tomi' ha' xut pain ca tomi' xim urut pum ca' ac cocon na. Ma' 4 nana xerexi' cwa', co ara ho' xin nanain ca wara tomi' pe pin cocon Iri' Jam pane.

²⁴ Ja' ja' roron pain ca mama' xin cacain cote ne xiricon Iri' Jam ma', pain ca hohoc xo' xi' xucucun pain com. Ara wi ra cocon, cut mi' pan ac momon pain tara carawa ca tom tain' mi' querec te xi' caca ma' quem. Ma' ta na cocon pain ca wijac pin cacain tununucucun. Mo ta ara wi ac i ma' ma cocon, querec pin' ac quequem tara oro win judeu iri' ma'. Querec pin' teterem pain ca om iri'o' ne oro xaji' ca taraju caca pum. Querec pin' teterem pain ca xut xo' ma ma', je pain ca tomi' ha' pan main ca xirao' nucun Moisés ma' quem.

²⁵ Je ca tomi' urut pum pain ca win judeu iri' ca'. Ane tomi' ni urut cocon co howa pin nana pain ca om judeu caca ma' quem. Wara xirao' mi' urut cocon pain carta pane, xirao' mi' urut cocon pain ca tomi' xo' xujuxut pane. Na e' na pain ca ein hwein carawa ca mi' querec te xine pain oro caji pacun ca Iri' Jam xi' ma wa, na e' na pain ca ein hwein quinain carawa, je pain ca ein hwein cwerein carawa ca juhum' pa' xine quem urut cocon. Ta quep hwem xequem narima' me, oro narima' ma' quem, quep e' tataram waram taxicacam quem, ac i ma' na ca xirao' mi' urut cocon pane. Ac i ma' na ca tomi' xo' cocon Paulo oro xerexi' co querec wet nonon co howa nonon Jeju ma'.

²⁶ Ma ac ca na Paulo. Xec pin iri na ne, maji ta ac tococwa na caram ma' co ara xin nanain ca wara tomi' pe pin cocon Iri' Jam ma', hohoc xo' xijexi' pain com ta ac xucucun na. Mama' ac cacain na cote ne xiricon Iri' Jam ma', tomi' xo' ac tococwa na oro sacerdote. Pi' pin iri tara oro xec pain ca hohoc xo' xujuxut ca' ne, in qui' ac urut tara, an an xam' ac urut pain tara carawa ca mi' querec te tocwa Iri' Jam parut ta, ac i ma' na ca tomi' xo' xucucun ma'.

Ca quep cocon Paulo

²⁷ Pi' pin ta' iri na oro xec pain ca hohoc xo' xucucun pain com pane ne, querec ac cocon na Paulo oro judeu co maqui' nanain Ásia. Querec pe nonon pain ca tao' caho' nein cote ne xiricon Iri' Jam. Ja' teretem ac tococwa na oro wari' co to nanain i ma' quem. Mija nana wari' co ja' teretem wawa ma'. Quep ac cocon na Paulo.

²⁸ Merem ac caca na: Quep xiho' xut ta oro ca nari nuxut pain ca wari' nein Israel hwe ma'! Quep xiho' xut con co cwa', co pijim' pan tem nonon oro wari' pain oro xijein macan'. Tomi' napat napari' pain ca judeu iri' ca', tomi' napat nain ca xirao' nucun Moisés, tomi' napat nain cote ne xiricon Iri' Jam ca' quem. Om ca xica' pe ne ca tomi' napat ca ma', o corom qui' tata pain ca tao' caho' nein cote ne xiricon Iri' Jam oro wari' co om judeu nana ma' quem. To' em' pin ac cain na iri' ca pe pan ca Iri' Jam ca' quem, ac i ma' na ca merem caca ma'.

²⁹ Merem ac i ma' nana, xi om ne ca wara querec ara cocon Trófimo ma', co wari' nein Éfeso ma'. Querec nonon pain ca xut wi ca con Paulo pain ca xuruxut in to cacain oro wanaji Jerusalém ma'. Querec iri nonon Paulo pain ca pe cain ca tao' caho' nein cote ne xiricon Iri' Jam ne, coromicat ximama' ac caca na: He! O corom qui' toron tatirim pain cote ne xiricon Iri' Jam ta nana, o corom qui' toron pain ca tao' caho' nein ta nonon.

³⁰ Ca merem merem caca ma', ca ja' teretem ja' teretem pi' pin ac tococwa na oro wari' pain Jerusalém ma'. Mija nana wari' ta. Jein hwet ac cocon na Paulo ma', quep ac cocon na. Coc ororo coc ororo an hwet ca' ac cocon na pain ca tao' caho' nein xiricon Iri' Jam ma', tao' pa' hap ac cacain na cote ne manain quem.

³¹ To' pa' pin xun ta nonon. Taraju ac ca na comandante nucucun oro soldado co romano nana ma'. Teretem teretem pi' pin nana oro wari' pain Jerusalém ta non wari'.

³² Maji cocon ta ac tococwa na oro taramaxicon cocon oro soldado nucucun ma', jein hwet hap ac tococwa na oro wari' ma'. Jein hwet tata pain ximijacocon. Querec iri nonon comandante cocon oro soldado nucun ma' ne, to' to' om pin ac cocon na Paulo.

³³ Mo hwet ac con Paulo na comandante ma', quep ac con na. Pao' pe jun pain arain too, ma' 2 tara arain too ta ac tococwa na oro soldado nucun, pao' pe ac cocon na. Tomi' querec ac tococwa na oro wari' ma': Cain' ca wari' ca co cwa' co to' hwe cwa'? Ma' carawa ca ara ca quem ac tococwa na.

³⁴ Mija na ca teretem caca oro wari' ma'. Merem ximama' e' nana, merem ni merem ni ca' xucucun. Taxi' xitoton pain ca mana' nucucun na paxi' na comandante ira. Ane om taraju pa' ac tococwa ne, xi teretem ara caca ta. Je ca tomi' tococwa oro soldado nucun ma': An corom mao jun pain xirim ca to iri' ca' tata.

³⁵ O corom mao ac cocon na. Hwet iri nanain ca piri' piri' ac wa ma' ne, na e' na pain ca an mamam' piri' mao cocon Paulo pain xirim ma'. Xi xao xao ara cocon oro wari' pain ca to' to' cocon ma', pain ca to' pa' pin xun paxi' cocon ma'. Mija ara xi' na ca mana' caca oro wari' ta.

³⁶ Merem merem tiquin' nana oro wari' co ja' ja' nonon ma' quem. To' pa' pin jun, to' pa' pin jun ta nana pain ca merem nucucun.

Ca tomi' pan ton cocon oro wari' Paulo

³⁷ An mamam' corom mao xun iri nonon Paulo pain xirim ca to caca ma' ne, tomi' pan ac ca na, tomi' non comandante ma', tomi' non pain capijacocon oro grego. Tomi' xim inem quem non. He! Tomi' taxi' main capijacocon oro grego ra ac con na.

³⁸ Om ca wum ne co wari' nein Egito co ja' teretem nonon oro wari' pane, co o mama' 4.000 nonon oro win ma' ca co to' parapa' taxipa' nana wari' pain cara pane ra? Wirico xi' ma inem ta non.

³⁹ Om na, judeu ina ta ac ca na Paulo. Maqui' inain Tarso, je ca pan' pe ta' pane. Cote ne cidade na Tarso, hwara' opa nana oro wari' nein. Ta nain ho' mapa' pain ca tomi' xo' toton oro wari' co mana' nanapa' cwa' na ca tomi' con comandante Paulo ma'.

⁴⁰ Ma ac ca na comandante ma'. Xat pe ac cain tamain piri' piri' ac wa na Paulo ma' quem. An piri' ac cain na micon. Tacana to je, tomi' xuhu' ta tata oro wari' ma'. Tacana to iri nana ne, tomi' pan ac cocon na pain hebraico, je i ma' wixinain capijacocon oro judeu.