Atos 20 - Tradução Bíblica Pacaas Novos

Ca mao cain Macedônia je Grécia Paulo

¹ Teretem teretem om pin iri nana oro wari' pain Éfeso ne, tomi' pan ac ca na Paulo. Harahap je tata co howa nonon Jeju ma', cut in ac xucucun na. Tomi' ac tococwa na, quep xiho' tata pain ca to' hwara' opa tococwa pain ca hu tococwa ma' quem. Mao ina ta ac tococwa na, na ra, mao ra e', mao ac ca na, xut mao ac cain na xijein macan' ma', Macedônia na wixinain.

² Ca hwet cain oro xijein macan' pain Macedônia ma', ca pijim' ac tococwa na oro wari' co howa nonon Jeju. Quep xiho' tamana tata pain ca to' hwara' opa tococwa pain ca hu tococwa ma' quem. Aram aram wa' mao ac cain na xijein macan' ma'. Grécia na wixinain.

³ Mon to wet ac cain na Grécia ma'. Ma' 3 na panawo' pain ca mon to wet cain i ma'. Maqui' pin iri na xec nein ca corom mao tain cain mam' horoho wa pain ca mao tain cain xijein macan' pain Síria ma' ne, taxi' ac tococwa na oro judeu co to' pa' pin xun nonon ma'. Maho' inain ca mao wa pain Síria ta ac ca na, in mama' xin waraxi' ta, in mama' xin Macedônia ta ac ca na.

⁴ Maji ta ac tococwa na oro win ma' ca ma'. Mo nana: Sópatro ma', co wari' nein Bereia ma', co te non Pirro ma'. Aristarco con Secundo ma', co wari' nein Tessalônica nana ma'. Gaio ma', co wari' nein Derbe ma'. Timóteo ma'. Ma' na Tíquico con Trófimo ma' quem, co wari' nein Ásia nana ma' quem.

⁵ Oro win ma' nuxut cwa', wara mama' ca' nanaparut pain Trôade ma', je i ma' wixinain cidade ca wara mama' caca ma'. Winim' to ac cacaparut na pain Trôade.

⁶ Pi' pin iri na oro xec nein Páscoa ne, je pain ca cao' querec te e' xine capam' ca om joc wanan wa pain ca to' memerem nein ma', corom mama' ac urut pain na mam' horoho wa, paca' ac urut pain na Filipos. Horoho mama' ac urut na. Ma' 5 na xec pain ca horoho mama' urut ma'. Aram aram tan' mama' ac urut pain na Trôade. Wara tan' mama' nana oro win ma' nuxut quem. Hwet ac urut cocon na, mon to wet ac urut na. Ma' 7 na xec nein ca mon to wet urut pain Trôade ma'.

Ca to' e' mami' tocwa Êutico pain Trôade

⁷ Domingo pin iri na ne, cut in ac xujuxut na pain ca howa urut con Jeju. Cao' wi xi' urut quem. Pijim' pan ac cocon na Paulo ma' quem. Xec mama' xi' urut quem, je ca pijim' mam' xuhu' cocon ma'. Pijim' ac cocon na, mon pijim' mon pijim', cote ne con. Mon pijim' mon pijim' ximijain xim pa' ac caparut na.

⁸ Cut in to xujuxut pain manain xirim ca pe pawin ma'. Mija na naran.

⁹ Xao pe nain manain janela co xo' hwara' ma'. Êutico na wixicon. Xao pe nain i ma'. Ca pijim' pijim' ca Paulo ma', ca in in ac ne na matacon Êutico ma'. Ca pijim' pijim' ca ma', ca in in ac ne na matacon ma'. In tamana na matacon, pi'am mip ac ca na. Pan' mao ac ca na, pan' mao nain macan'. Pan' qui' nain pawin, je ca pan' qui' ca. Awin ac cocon na quem. Wara mi' pin na.

¹⁰ Quiji' hwet ac con na Paulo ma' quem. Wina quiji' hwet ac con na, pe horoman tapan' ac con na quem. Ta toron ne xumuhu' me, e' na ta ac tococwa na oro wari' ma'.

¹¹ Piri' mama' mami' ac urut na, cao' ac urut na. Cao' cao' pi' pin iri urut ne, pijim' pijim' tiquin' ac cocon na quem. Momon pijim' momon pijim', xec pa' ac caparut na. Mama' xi' urut ta ac urut na, mama' ac urut na.

¹² Co xo' hwara' ma', co mi' pin ma' ira, o mao ac tocwa na pain xiricon. Tomi' querec te tamana nana pain ca e' mami' nucun ma'.

Ca tomi' xo' mam' tococwa co querec wet nonon co howa nonon Jeju pain Éfeso

¹³ Tomi' ac caparut na Paulo: Wara horoho mama' jein xijein cidade cain, pain Assôs cain. Wata' iri na ne, ac tain wana pain mi ta. Winim' pe xine pain Assôs cain, ac i ma' na ca tomi' xo' caparut. Ma ac urut na, xuruxut xuruxut hwet ac urut pain na mam' horoho wa, corom mama' ac urut pain na, horoho mama' ac urut na quem.

¹⁴ Mam' to iri naparut pain Assôs Paulo ne, corom hwet ac caparut na pain mam' horoho nuxut, tiquin' mama' ac urut na. Horoho horoho hwet ac urut pain na xijein cidade ma'. Mitilene na wixinain.

¹⁵ Xec pin iri na ne, maji ta ac urut na, horoho mama' ac urut na. Horoho horoho tiquin' ca' ac urut pain na xixi pan nein macan' Quio ma'. Xijein xec pin iri na ne, horoho horoho tiquin' ac urut na, hwet ac urut pain na xijein xixi pan nein macan' Samos ma'. Xec pa' ac caparut na, horoho horoho tiquin' ac urut na, tan' mama' ac urut pain na xijein cidade ma'. Mileto na wixinain.

¹⁶ Om ca mama' urut pain Éfeso, xi om ne ca noc inain ca momon to to xin Ásia ca' ara caparut Paulo ma'. Coromicat ca' na: Mo ta mama' xin Éfeso ma', om ta na capari' pain ca tan' mama' hap xin Jerusalém quem, ac i ma' na ca coromicat nucun. Wara tan' mama' xi'. Am na capari' pain ca tan' ca' xin oro ca tomi' querec te wa pain xec nein Pentecostes ta na ca coromicat nucun.

¹⁷ Tan' mama' iri urut pain Mileto ne, tomi' ac con na wari' Paulo. Mao rain Éfeso cain, mo'o roron co querec wet nonon co cut in xucucun pain ca howa cocon Jeju cwain ta non. Mao ac ca na, mo'o ac tococwa na.

¹⁸ Maqui' iri nana ne, tomi' ac tococwa na: Taxi' mahu' pain ca xut xo' ne pain ca pe ho' qui' xuhu' pane. Querec mahu' pain oro carawa ca ara ta' pain oro xijein xec pahu' pain ca xo' wa' qui' tain Ásia pain cara pane.

¹⁹ Tama' to' i'ina paxi' nanapa' oro taramaxicon nucucun oro win ma' ta' pain ca judeu ta' ca', pain ca tama' to' pa' xim cacapa' pane. Ane momon taramaja mi' ton Taramaxicon nexi' ne. Om ca taramaja xec xec ta'. Aca ho' aca ho' ina pain ca xiram pa' xuhu' pane.

²⁰ Taxi' mahu' pain ca pijim' hwet xuhu' pain capijacon Iri' Jam pane. Om ca joc xim camain' xuhu' pain oro capijacon ca quep xiho' nuhu'. Ca' na pe inuhu' pain ca cut in to nuhu', ca' na pe inuhu' pain oro xuruhu' ma' quem.

²¹ Hu hu pi' pin inonon oro wari' quem, co judeu nana ma', co om judeu nana ma' quem. Na e' na pain ca coromicat ni hwe, an to pin jein ca caracat nuhu', tomi' hwet jun pain Iri' Jam quem inonon. Howa jun Taramaxicon nexi' Jeju ta inonon quem.

²² Mao ho' tain Jerusalém ta, xi om ne ca mao rain i cain ara capa' Tamataracon Iri' Jam ta ac tococwa na. Om ca taxi' tain carawa ca ara ton napa' pain i cain quem.

²³ Taxi' e' inain Tamataracon Iri' Jam pain ca tama' tomi' xo' capa' pain oro xijein cidade ma'. Tao' pe teterem, to' i'ina teterem, mija tara ca jain jain ma ta napa'.

²⁴ Je i ma' ira ina ta. To' pa' ma' tatarapa' ne ina. Om ca xiram pa' xije. Ma' xica' pe na carawa ca param ta' ca', param e' inain ca ara ara pi' pin wa ca taramaja ne ca ara ra capa' Taramaxicon nexi' Jeju cwa', pain ca pijim' mi' roron pain capijacon Iri' Jam oro wari' ta capa' pane. Je ca tomi' xuhu' ca', tomi' hwet toton pain capijacon Iri' Jam oro wari' ta. Tomi' hwet toton pain ca xiram pa' capari' Iri' Jam ta. Om xi xiram pa' capari', xi awi iri' ta. Ane xiram pa' e' capari' ne.

²⁵ Taraju wet ho' xine ta ac tococwa na. Wahu' ma', pain ca taraju mahu' pain ca pijim' hwet xuhu' pane, pain ca pijim' hwet xuhu' con Iri' Jam pain ca taramaxicon pe ho' xim capari' ca', om ta querec mami' mahu' ta. Taxi' ina, om ta querec mami' mahu'.

²⁶ Je ca tomi' xuhu' ca', tomi' iri'o' inuhu'. Wari' co taraju paxi' napa' pain ca pijim' tain capijacon Iri' Jam ma', mo ta om howa ca, mo ta mam' mi' pin cain ca caracat nucun ma', om ca wata' ne co em' con, xi param mi' ton pain ca mam' mi' pin wa pain ca caracat nucun ta. Wirico pan co param nain ta.

²⁷ Xi joc xim xuhu' pain oro ca param nucun Iri' Jam ta.

²⁸ Ma' tara xumuhu' me, ara xite xujuhu' pain ca xuruxut xo' hwe ma' ac tococwa na. Querec wet jujun oro wari' co howa nonon Jeju pain Éfeso ma'. Win ne ca querec wet jujun ta cuhu' Tamataracon Iri' Jam ca'. Ac oro ovelha nuhu' ara xi' nana. Ac pastor co querec wet taxipa' nain winacon je, querec wet jujun, pa' mi' jujun pain ca cut in xucucun pain ca wari' nucun Iri' Jam caca ma'. Mam' to' witan ara xi' tata pain quicon Panxica pane ta.

²⁹ Taxi' inuhu' pain i ca' quem ac tococwa na. Paca' iri xuhu' ne, corom hwet ac cucuhu' tara oro wari' co pijim' pan teretem xim nunuhu'. Ac orotapan tatara. Quep em' tuturuhu', om ta xiram pa' camain' cucuhu'. Win ne ca om quep em' xiram pa' xine ovelha ma', ac i ma' tatara co aram aram corom hwet xim nunuhu' ta.

³⁰ Ac i ma' tatara iri' win ma' nuhu' pain ca howa hun Jeju ma'. Main maqui' tara xec nein ca pijim' mixein xim cucuhu' ma'. Mixein tuturuhu', howa jein ca tomi' urut pahu' ca', ja' ja' xut ta tuturuhu', ja' ja' ac cocon tara co howa nonon Jeju.

³¹ Je ca ma' tara xumuhu' me xuhu' ca'. Mam' pe wet xine pain ca hu tamana qui' xuhu' pane, ma' 3 na cawaxi' pain ca hu hu xam' xuhu' pane, pain xec je pain xim quem. Xiram pa' inuhu' pane, aca ma' ina pahu' pane.

³² Je ca tomi' xuhu' ca' ac tococwa na. Tomi' mi' inuhu' con Iri' Jam. Querec wet roron me inon pahu'. Mi' roron pain ca howa cara cacain capijam ca tomi' hwet naparut pain ca xiram pa' pan maparut ta inon pahu'. Mo ta howa cara hwein capijacon Iri' Jam ca pijim' hwet xuhu' pane, to' hwara' opa ac cuhu' tara, aram aram mi' ac cuhu' tara pain oro ca param nucun ca an to xo' mi' cuhu' ma', ca mi' xun tococwa oro wari' nucun co to' hohot ca cwa'.

³³ Om ca querec param camain' tain dinheiro nuhu' pane, womuhu' ma' quem, om ca querec param camain' ton pane ac tococwa na.

³⁴ Taxi' mahu' pain ca taramaja pan ta' pane. Cut pan inain dinheiro ne, ma' ta cut tain carawa ca cao' wa je oro carawa ca param ta' ca' ina pane. Cut mi' inonon pain oro win ma' ta' quem.

³⁵ An hwet mi' inuhu' pain oro ca taramaja tamana ne pane, ma' ta win ca ne mahu' ta inuhu' pane. Na e' na pain ca taramaja tamana iri' ta, ma' ta ma' capari' oro carawa ca mam' quep xiho' xuxun oro wari' co ximin nana ma'. Mam' pe wet xin ca tomi' nucun Taramaxicon nexi' Jeju pane quem. Tomi' ca' na pane: Tomi' querec te paxi' iri' pain ca cut xin carawa. Ane tomi' querec te tamana pan iri' pain ca cut mi' tiquin' xin ne, ac i ma' na ca tomi' ca pane. Je i ca' ca tomi' xuhu' ca'. Ac i ma' na ca tomi' cocon Paulo pane.

³⁶ Pi' pin iri na ca tomi' nucun ne, pi'am to xi', tomi' xun Iri' Jam ac ca na, torotop pe ac ca na, torotop to torotop to pi' pin nana. Tomi' ac con Iri' Jam na.

³⁷ Awaran tamana nana quem, awaran awaran pi' pin nana. Pe horoman tapan' nonon, xup xup ac cocon na pain orocoxicon quem.

³⁸ Tomi' xaxa' tamana nana. Xi om ne ca tomi' ara tococwa pain ca om ta querec mami' mahu' ta tococwa ma'. Ja' ja' mao ac cocon na pain mam' horoho wa ma'.