Atos 19 - Tradução Bíblica Pacaas Novos

Ca mao cain Éfeso Paulo

¹ Pe pe wet iri nain Corinto Apolo ma' ne, xut mao ac cain na xijein macan' Paulo ma'. Mao nain oro xijein cidade pain oro pacun pain Galácia je Frígia ma', aram aram wa' mao ac cain na Éfeso. Je ca mam' to tococwa co howa nonon Jeju.

² Tomi' querec ac tococwa na: Corom hwet nuhu' Tamataracon Iri' Jam pain ca xo' howa qui' hun Jeju quem ac tococwa na. Ma' na Tamataracon Iri' Jam ra ac caca na. Om ca ma' na Tamataracon Iri' Jam camain' cacaparut wari' pane. Om ca tomi' hwet cacaparut pain ta nana.

³ Cain' cain' xihwe quem? Ma' ca pijim' nein ca howa hwe pain ca ja' xihwe pain com pane quem ac tococwa na. Om na, howa urut pain ca pijim' nucun João co ja' taxipa' com cara pane. Je ca ja' urut com pane, ac i ma' na ca tomi' cocon ma'.

⁴ Tomi' xo' ac tococwa na: João cara pane, ja' nonon pain com oro wari' co cwirin' pin nanain ca caracat nucucun pane, co an to pin nanain ca caracat nucucun pane. Tomi' ca' nonon quem: Main maqui' tara pa'ao' xucun ma', Jeju ma'. Wirico tara co howa hwe ta nonon oro wari' João pane, tomi' xo' ac i ma' nonon Paulo ma'.

⁵ Taraju iri nanain ca tomi' nucun Paulo ne, ja' ac tococwa na pain com. Ma' ta querec pin' xihwe pain ca howa pin hun Taramaxicon nexi' Jeju ta tata.

⁶ Quep iri nonon pain winacocon Paulo ne, corom hwet pan ac cocon na Tamataracon Iri' Jam, tomi' ac cacain na oro xijein ca capija wa ca om wara tomi' taxi' caca ma', pijim' hwet pijim' hwet ac cacain na capijacon Iri' Jam quem.

⁷ Oro co ja' wawa pain com ma', co corom hwet ne Tamataracon Iri' Jam ma', ac ca ma' 12 caca na.

⁸ Paulo ma', corom taxipa' nain oro xirim ca cut in to xucucun oro judeu ma' quem. Ma' 3 na panawo' pain ca pijim' tococwa ma'. Pijim' hwara' opa tata, om ca pijim' jin' tococwa. Tomi' xo' tata con Iri' Jam quem, pain ca taramaxicon pe ho' xuhu' ta nuhu' Iri' Jam ta tococwa ma'. Tomi' tomi' na xitoton na tata pain ca pijim' tococwa ma' quem.

⁹ Ane ma' caca co ari nana ne. Om ca howa je na caca. Tomi' napat ac cacain na oro ca pijim' wa con Taramaxicon nexi' Jeju. Taraju taraju xam' nonon oro wari' pain ca tomi' napat cacain ma'. Je ca in ca' pan cocon Paulo ma'. Maji ta ac tococwa na co howa nana ma', o mama' ac tococwa na pain xirim ca ca' na pe ca Tirano ma', je i ma' ca ca' na to tococwa pain capijacon Iri' Jam pain oro xec quem.

¹⁰ Om ca an pe cain ca ca' na pe wa pain i ma' quem. Maqui' pa' non xijein cawaxi', maqui' pa' ac con na xijein ma' quem. Aram aram taraju ac cacain na capijacon Iri' Jam con Jeju oro wari' co to nanain oro xijein cidade pain Ásia ma'. Ca judeu nucucun ma', ca om judeu nucucun ma' quem, taraju taraju pi' pin ac cacain na capijacon Iri' Jam con Jeju.

¹¹ Quep xiho' tamana non Paulo Iri' Jam ma', pain ca mi' con pain ca ara tamana cain ca om ara taxi' ne ca wari' wa ma'. Wa wa tamana nonon oro wari' ma' quem, xi wara querec xine oro ca ara ca pain cara pane ta.

¹² Om ca cut qui' e' tococwa co caxi nana ma'. Cut mi' tata con womicon Paulo ma' quem, wirico wom co mam' xic ca pain ca nahwere' nucun, wirico wom co pe ca pain ca taramaja nucun ma' quem, cut mi' tata con. Mam' tatep pa' iri tata con ne, xio pin ac caca na. Oro caxicon jam co corom to ho' nonon ma', hwerehwet ca' ac cocon na quem.

¹³ Ma' nana oro judeu co xuruxut mama' nanain oro xijein cidade pane. Mam' iri tata oro wari' co corom to ho' nonon oro caxicon jam ne, tomi' jein tomi' jein pin ac tococwa na oro caxicon jam nucucun. An hwet querec xin wixicon Jeju cocon ta ac caca na, tomi' ac tococwa na: Hwerehwet ca' jujun. Win ne ca an hwet urut pain wixicon Jeju co pijim' hwet ca Paulo pane tata.

¹⁴ Mana panxica Ceva nana co ara ac i ma' nana pane. Ma' 7 nana. Win ma' caca oro taramaxicon nucucun oro sacerdote na cote caca.

¹⁵ Ac i ma' ac i ma' nana, maqui' ac ne na xec nein ca hwet ca' ron wari' cwa' paxi' cocon caxicon jam ma'. Ane tomi' in pin pan cocon caxicon jam ma' ne. Querec pin' inon Jeju. Querec pin' inon Paulo quem. Wahu' iri na ne, om ca querec pin' xuhu'. Cain' ca wari' hwe quem tata.

¹⁶ Wari' co corom pe ho' non caxicon jam ma', taqui' hwet ac cocon na, joc camara' ac tococwa na. To' to' ac tococwa na, to' wein ca' ac tococwa na con womicocon ma'. Mija na ca to' ao pin tococwa. Jein ca' ac cacain na xirim ma', jein mama' ac caca na quem.

¹⁷ Taxi' ac cocon na oro wari' co to nanain Éfeso ma'. Ca judeu nucucun, ca om judeu nucucun quem, taxi' taxi' pi' pin ac cocon na. Jin' jin' pi' pin nana. In ac tamana nanain wixicon Taramaxicon nexi' Jeju quem. Hwara' opa tamana na xin ne nanain.

¹⁸ Maqui' mija ac caca na co howa pin nana ma' quem, tomi' hwet tomi' hwet ac cacain na oro ca ara nucucun ca om awi camain'. Taraju taraju pi' pin nonon oro wari' ma'.

¹⁹ Ma' mija nana co ara xirac nonon oro wari' ira. Cut in qui' ac cacain na oro tapari carawa ca xirao' to xine oro ca ara ximama' nucucun ma', ca ca' rain mao cocon co ara xirac nana ma'. Cut in qui' ac cacain na, tom pin ac cacain na quem. Querec querec pi' pin nonon oro wari' pain ca tom pin cacain. Mija na oro tapari carawa ca xirao' to caca ma'. Mija tamana na dinheiro nein quem. Ac ca ma' 50.000 ne na dracma nein cocon.

²⁰ Je ca pijim' pijim' tiquin' xine capijacon Iri' Jam con Taramaxicon nexi' Jeju. Ca pijim' pijim' xine ma', ca taraju taraju tiquin' caca oro wari' ma' quem. Aram aram mija pin ac caca na oro wari' co howa nonon Jeju ma'.

²¹ Mao tain Jerusalém ta ac ca na Paulo. Ac tain wana ca mao nain Macedônia je Acaia ma', xut tiquin' mao ac tain tara Jerusalém ta na. Ca' na ca tomi' nucun: Mon to wet wijimain e' tain Jerusalém ma', xi na e' ara capa' pain ca mao tain Roma ta na ca tomi' nucun.

²² Wara mama' jein Macedônia ta ac tococwa na co quep xiho' nonon ma'. Ma' 2 nana co tomi' ca ma', Timóteo con Erasto ma'. Wara mama' je, mon to wet wijimain ca' tain Ásia ca' quem tata.

Ca teretem to cacain Éfeso

²³ Mama' iri nanain Macedônia Timóteo con Erasto ne, teretem tamana ac caca na oro wari' nein Éfeso. Xi om ne ca mana' ara caca pain ca pijim' hwet xine capijacon Iri' Jam con Jeju ta.

²⁴ Pe nain Éfeso wari' co mam' taramaja taxi' nain prata. Demétrio na wixicon. Quep taxi' nain wijimain jami xirim ca in ac pe tacama Ártemis ma', co Iri' Jam xi' ma caca oro wari' nein Éfeso ma'. Quep taxipa' nain, vender vender ac cain na quem. Cut tamana nanain dinheiro oro wari' co win taramaja nonon ma' quem.

²⁵ Harahap je ta ac tococwa na co win taramaja ca ma', wiricoco oro xucucun wari' co quep nanain wijimain jaminain xirim ca in ac pe tacama Ártemis ma' quem, cut in ac xucucun na. Tomi' xim inuhu' ta oro win ma' ne ac tococwa na. Taxi' hwein i ca', pain ca mam' cut tamana xin dinheiro pain ca taramaja nexi' ca', pain ca quep xin wijimain jaminain xiricam Ártemis ca'.

²⁶ Taxi' hun co ma' quem, Paulo ma' quem. Querec hwein ca taramaja nucun, taraju hwein ca pijim' nucun quem. Om ca Iri' Jam ne oro too ca quep pan ca wari' ta na. Mija nana wari' co howa pin nanain ca pijim' nucun ma'. Om ca xica' to caca oro win ma' nexi' pain Éfeso ca', ac ca howa howa pi' pin xi' caca na oro wari' pain oro xijein cidade pain macaraxi' pain Ásia ca' quem.

²⁷ Cain' cain' xixi' quem ac tococwa na. Mo ta taraju taraju tiquin' cacain ca pijim' nucun Paulo oro wari' ma'. Tara cocon, am tomi' napat tamana pin cacain ca taramaja nexi' pain ca quep taxipa' xin wijimain jaminain xiricam Ártemis ca'. Om ta xica' pe ne ca tomi' napat cacain ca taramaja nexi' ca' quem, am in ac in ac om pin cacain xiricam iri' jam nexi' Ártemis cwa', co hwara' opa tamana cwa', co pe torotop mi' querec te pi' pin caca oro wari' nein Ásia ca', je pain oro xijein macan' pain pira quem. Am querec pin' querec pin' om pin xim cacam oro wari' ma', am querec pin' querec pin' om pin xim cacam pain ca hwara' opa nequem pain ca iri' jam nequem quem, ac i ma' na ca tomi' cocon oro win ma' ca Demétrio ma'.

²⁸ Taraju iri nonon Demétrio oro wari' ma' ne, mana' tamana ac caca na. Mija na ca mana' caca. Merem ac caca na: Hwara' opa tamana na iri' jam nexi' Ártemis cwa', co howa iri' pain ca wari' nein Éfeso iri' ca'. Ac i ma' na ca merem nucucun.

²⁹ Mija nana wari' co taraju nonon pain ca merem nucucun ma' quem. Ca merem merem caca ma', ca merem merem caca ma', mija ac caca na co jein hwet nonon ma'. Teretem teretem pi' pin ac caca na oro wari' nein Éfeso ma'. Quep ac tococwa na oro win ma' ca Paulo ma', wirico Gaio con Aristarco ma', co wari' nein Macedônia nana ma'. Quep iri tata ne, coc ororo mama' ac tococwa na pain cote ne ca tao' caho' nein ca cut in to taxipa' xucucun ma'.

³⁰ Hwet toton paxi' na Paulo ma', pijim' xo' toton oro wari' ta paxi' na. Ane quep xat pan cocon oro win howa ca ne. Om na, ta hwet momon me ta nonon.

³¹ Ma' nana oro taramaxicon nein Ásia co tomi' querec te nonon Paulo ma'. Tan' hwet ac cocon na. Mo tomi' ron Paulo ta nonon wari' nucucun ma'. Tomi' ca' ron: Mo ta mao main ca cut in to xucucun oro wari' ma', am quep em' quequem, am to' pa' pin quequem. Ta mao main i cain me ta ron, ac i ma' na ca tomi' cocon wari' nucucun. Mo tomi' hwet ac tocwa na pain ca tomi' nucucun quem.

³² Mija na ca teretem caca oro wari' co cut in nana ma'. I'ina na ximicocon quem. Para cut in tamana iri' ca' ne xucucun. Ma' paric ca' e' nana co taxi' nanain i ma'. Merem ximama' e' nana, merem ni merem ni ca' xucucun quem.

³³ Querec ac tococwa na oro judeu ma', pain ca joc hwet mi' cocon pain tamain Alexandre ma'. Coromicat ac caca na: Wirico tara co em' ma', co ja' teretem napari' ma', ac i ma' na ca coromicat nucucun con Alexandre. An piri' pan ac cain na micon Alexandre ma'. Tacana to je, tomi' xuhu' ta paxi' na. Tomi' narain ho' xije cocon oro wari' cwa' paxi' na.

³⁴ Ane querec pin' pan cocon oro wari' ne, querec pin' nonon pain ca judeu ca ma'. Merem mip ac caca na. Ac ca xica' pe ne na capijacocon pain ca merem caca ma'. Hwara' opa tamana na iri' jam nexi' Ártemis co howa iri' pain ca wari' nein Éfeso iri' ca' nana. Ca merem merem caca ma', ca merem merem caca ma', momon merem momon merem nana. Ac ca 2 ne na hora pain ca momon merem momon merem caca ma'.

³⁵ Om na, tacana to je ta pan ac cocon na oro wari' taramaxicon nucucun ma'. Xirao' pe taxipa' nain oro ca tomi' nucucun iri' taramaxicon nucucun oro romano ma', je i ma' ca taramaja nucun. Tacana to pin iri nana oro wari' ma' ne, tomi' pan ac cocon na taramaxicon nucucun: Taraju wet xine me oro win ma' ta' pain ca wari' nein Éfeso iri' ca'. Taxi' taxi' xam' nanapari' oro wari' pain oro xijein macan' ma'. Taxi' nanapari' pain ca querec wet pan xin xirim ca in ac pe tacama Ártemis nexi' co hwara' opa tamana cwa'. Taxi' nanapari' pain ca querec wet pan xin jamicam ca pan' qui' nain pawin pane quem.

³⁶ Iri'o' na, taxi' taxi' xam' nanapari' oro wari' ta. Je ca tomi' xuhu' ca' ac tococwa na: Tacana to je. Coromicat xo' je, ta tamanain to hwe me.

³⁷ Para cut qui' huhun caram cwa' quem? Xi cut noc xa cacain caramaji xiricam iri' jam nexi' cwa' ta. Om ca tomi' napat cacam quem.

³⁸ Mo ta tomi' em' xun cocon wari' Demétrio cocon oro co win taramaja ca ma', na e' na pain ca hwet xo' tococwa oro taramaxicon ta. Ma' nana oro taramaxicon co taraju wet nanain oro ca tomi' em' wa, ma' na xirim ca taraju wet to caca ma' quem. Je tara i cain ca tomi' hwet to tococwa pain ca tomi' em' nucucun ta.

³⁹ Mo ta ma' ma' wet ne carawa ca tomi' xo' xi' hwe ma' quem, na e' na pain ca tomi' xo' xijexi' pain ca aram aram cut in xo' je cacapari' oro taramaxicon nexi' ta.

⁴⁰ Om xi cut in xijexi' pain xocori ca' quem, xi cut in xo' xujuhu' ta cacapari' oro taramaxicon ta. Am tomi' em' cacapari' pain ca ari xuxun pain ca tomi' caho' cacapari' pain ca teretem wa quem. Mo ta para teretem hwe pain xec ca' ne cacapari', hehe ac iri' tara, om ta na capari' pain ca tomi' narain ho' xijexi' pain ca teretem nexi' ca', xi teretem ximama' ara iri' ta. Ac i ma' na ca tomi' cocon taramaxicon nucucun co xirao' pe taxipa' nain oro ca tomi' nucucun oro romano ma'.

⁴¹ Pi' pin iri na ca tomi' nucun ne, je i ma' ta, in mama' jein xuruhu' ta ac tococwa na oro wari' ma'.