Atos 18 - Tradução Bíblica Pacaas Novos

Ca mao cain Corinto Paulo

¹ Pi' pin iri na ca pijim' cocon oro taramaxicon Paulo ma' ne, pain Atenas ma', mao ac ca na. Paca' nain Atenas, mao ac cain na Corinto. Je i ma' wixinain cidade ca mao ca ma'.

² Mam' pe non wari' pain i cain. Áquila na wixicon. Judeu na. Pan' pe paxi' nain Ponto, je i ma' wixinain macaracon Áquila. Ane xo' maqui' cain Itália ne, je i ma' wixinain macan' ca xo' maqui' ca. Wirico, wiricam manacon Priscila ma' quem, xo' maqui' nanain Itália. Xi om ne ca tomi' nucun taramaxicon Cláudio ma', cocon oro judeu pane. Paca' paca' pi' pin jein Roma ta tata oro judeu pane. Mam' iri nanam pain Corinto Paulo ne, hwet ac cacam na pain xiricacam.

³ Oc taxipa' nain caji xirim Paulo pane, je i ma' ca taramaja nucun. Oc taxipa' nain caji xirim Áquila cam Priscila ma' quem. Je ca pe ho' cacam Paulo ma'. Taramaja to ho' ac xequequem na.

⁴ Maqui' iri na oro sábado ne, pain xec nein ca xao to wa taxipa' cacain ximicocon oro judeu ma', mao taxipa' nain xirim ca cut in to xucucun Paulo ma'. Pijim' pijim' ac tococwa na oro judeu cocon oro wari' co om judeu nana ma' quem. Howa xiroron Jeju na tata.

⁵ Maqui' pin iri nain Macedônia Silas con Timóteo ne, an pe pin ac cain na ca taramaja nucun Paulo ma'. Oc oc om pin nain caji xirim. Pijim' e' ac cain na capijacon Iri' Jam. Tomi' hwet tomi' hwet tata con Jeju oro judeu ma'. Wirico Jeju co Cristo ta tata.

⁶ Ane tomi' in pin pan cocon ne. Tomi' napat nonon quem. Je ca wap camara' cain ximirinain macaracocon con womicon Paulo ma' quem. Ma' ta querec pin' xujuhu' pain ca pan teretem nuhu' pain ca noc hwein ca taraju wa capijacon Iri' Jam con Jeju ta tata. Tomi' ca' tata: Mo ta wap cuhu' Iri' Jam ma', pain ca noc hun Jeju ma', om ca wata' ne co em' ma' pahu'. Wahu' co em' pan nana ta. Maho' pin inuhu' pain ca judeu hwe ma'. Pijim' pijim' om xuhu'. Pijim' mi' ho' toton pain capijacon Iri' Jam con Jeju oro wari' co om judeu nana ta na ca tomi' tococwa ma'.

⁷ Hwet mao ac ca na Paulo ma', hwet ca' nain xirim ca cut in to xucucun oro judeu ma', mao ac cain na xiricon Tício Justo ma', co om judeu ma'. Xut xo' na Tício Justo pain ca win xumu taxipa' cain oro ca param nucun Iri' Jam. Pe ja' pan nain xirim ca cut in to xucucun oro judeu ma' quem.

⁸ Ma' na wari' co querec wet taxipa' nonon oro win judeu ca pain ca cut in xucucun ma' quem. Crispo na wixicon. Howa pin non Taramaxicon nexi' Jeju quem. Oro win ma' ca co to ho' nonon pain xiricon ma' quem, howa howa pi' pin nonon Jeju. Ma' mija nana oro wari' nein Corinto co taraju nonon Paulo pain ca pijim' mi' cocon con Jeju ma' quem. Ja' ac tococwa na pain com quem.

⁹ Maqui' ac ne na xim nein ca tomi' con Paulo Taramaxicon nexi'. Ac ca tohwein' ca paxi' na, om ca pi'am ca, querec na. Ac ca querec con na Taramaxicon nexi', ac ca tomi' con na: Ta jin' momon co noc nenem pain ca pijim' nem ma' me ta. Pijim' cara ra. Ta an pe pin main ca pijim' wa me.

¹⁰ Xi pe ho' ara xim ta. Om ta na cocon pain ca quep em' quequem oro wari' co quep em' xim nenem ma'. Xi ma' mija ara cacapa' oro wari' ne pain Corinto ta. Ac i ma' na ca tomi' con Paulo Taramaxicon nexi' pain ca ac ca tohwein' ca ne ma'.

¹¹ Je ca mon pe ho' tococwa pain Corinto ma'. Momon ca' na tata pain capijacon Iri' Jam oro wari'. Om ca paca' hap tococwa. Maqui' pa' non xijein cawaxi', maqui' pa' ac con na ximijain xijein ma' quem.

¹² Taramaxicon pin ac ca na Gálio ma'. Taramaxicon pe ho' pin nonon oro wari' nein Acaia ma', je i ma' wixinain macan' ca taramaxicon pe ca ma'. Taramaxicon pin iri na Gálio ne, tomi' xo' ac xucucun na oro judeu: Maji quep xun Paulo ta xucucun, o mi' ac cocon na con taramaxicon Gálio ma', co hwara' opa tamana ma', pain ca iri' juiz ca ma'. Tomi' hwet ac cocon na con Paulo:

¹³ Pan tem na co cwa' ta! Pijim' iri nonon oro wari' ne, pijim' ni ca' nain oro ca howa nuxut pain ca in ac urut con Iri' Jam pain ca pe torotop mi' querec te urut con ca'. Om ca tomi' ha' ac tocwa, xi tomi' in pin ara cain ca xirao' nucun Moisés ta nana pain ca tomi' em' cocon ma'.

¹⁴ Tomi' caho' xije ta iri na Paulo ma' ne, tomi' pan ac ca na taramaxicon Gálio. Tomi' ca' nonon oro judeu co tomi' em' nonon Paulo ma': Tomi' pan inuhu' pain ca judeu hwe ma'. Taraju wet xine ta. Mo xi caracat pan ca co cwa', mo xi tomi' in pin cain ca tomi' nucun oro taramaxicon nuxut pain ca romano urut ca'. Hohot ac ne xira pain ca taraju wet xuhu' pain ca tomi' em' hun ca'.

¹⁵ Ane tomi' caracan pan xujuhu' ne. Tomi' caracan e' xujuhu' pain oro xijein ca pijim' wa ma', je pain oro ca wuxu wa, je pain oro ca xirao' pe wa ca tomi' ha' taxipa' hwe pain ca judeu hwe ma'. Je xi tomi' xo' pan xujuhu' pain ta! Noc inain ca taraju wa. Om ca juiz ta' pahu', om ta tomi' xo' xuhu' pain ta na ca tomi' in pin tococwa ma'.

¹⁶ Tomi' hwerehwet pin jujun ta ac tococwa na oro guarda ma', tomi' hwerehwet pin ac tococwa na pain xirim ca taramaja pe ca taramaxicon Gálio ma'.

¹⁷ Oro wari' co mana' nonon Paulo ma', hwet hwet pi' pin ac cocon na Sóstenes co querec wet nonon oro win judeu ca ma', pain xirim ca cut in xucucun ma'. Quep ac cocon na, to' to' ac cocon na. Querec paxi' pan na taramaxicon Gálio ma', querec paxi' tata pain ca to' cocon ma'. Ane miri'om tococwa ne. Om ca tomi' in pin tococwa pain ca to' cocon ma'.

Ca in mao cain Antioquia ca pe nain Síria Paulo

¹⁸ Mon to wet ac cain na Corinto Paulo ma'. Pain pin iri na ne, in mao ta' ina ta ac tococwa na oro xerexi' ma', paca' ac tococwa na. Ja' ja' nonon Priscila con Áquila ma'. Xuruxut mama' ac cacama na. Xuruxut xuruxut hwet ac cacamain na cacarain cote ne com pain Cencreia ma', je i ma' wixinain cidade pain cacarain com ma'. Tan' mama' iri nanain Cencreia ne, wijac pin ac cain tununucun na Paulo. Ma' ta querec pin' cacapa' oro wari' pain ca ara pin tain carawa ca wara tomi' pe mi' ton Iri' Jam pane ta na. Wijac pin iri nain tununucun ne, corom mama' ac cacamain na mam' horoho wa, horoho mama' ac cacama na.

¹⁹ Horoho horoho tan' mama' iri nanain Éfeso ne, quiji' ca' ac cacamain na mam' horoho wa. Main tiquin' mao ta' na Paulo quem, mon to wet jein Éfeso pa'ao' tata Priscila con Áquila ma', ame hwe e'. Pain ca pe pe wet cain Éfeso Paulo ma', corom mao nain xirim ca cut in to xucucun oro judeu ma'. Tomi' xo' tomi' xo' ac xucucun na pain capijacon Iri' Jam.

²⁰ Amon pe ho' xut me paxi' nonon quem. Om na, om ca pe ho' ac xuhu', wara mao ta' ina ta ac tococwa na.

²¹ Mo ta param capa' pain ca in qui' wa Iri' Jam, in hwet ac xuhu' tara ta ac tococwa na, corom mao ac cain na mam' horoho wa, mao ac ca na.

²² Horoho horoho wa' mao iri nain Cesareia ne, quiji' ca' ac cain na mam' horoho wa, xut mao ac cain na Jerusalém ma' quem. Querec hap toton co howa nonon Jeju ta ac ca na, hwet ac tococwa na. Mao tain Antioquia ta ac tococwa na, xut mao ac ca na. Xut xut wa' mao ac cain na Antioquia ca pe nain Síria.

²³ Pain pin iri na pain ca mon to wet cain i cain ne, mao ta' ina ta ac ca na. Xut mao ac cain na oro xijein cidade pain Galácia je Frígia ma'. To' hwara' opa ac tococwa na co howa nonon Jeju.

²⁴ Ac i ma' ac i ma' na. Wa' mao ac cain na Éfeso wari' co judeu. Apolo na wixicon. Maqui' nain Alexandria, je i ma' wixinain macaracon. Pijim' taxi' tamana na Apolo ma'. Taxi' tamana nain capijacon Iri' Jam ca xirao' to caca oro hwanana pane.

²⁵ Wara pijim' mi' paxi' ta con Taramaxicon nexi' Jeju pane. Jain jain paxi' nain ca tomi' hwet wa oro ca taxi' nucun con Jeju. Pijim' xo' taxi' nain quem. Ane taxi' e' cain oro ca pijim' nucun João co ja' taxipa' com cara pane ne.

²⁶ Pijim' ta' ta ac ca na, corom mao ac cain na xirim ca cut in to xucucun oro judeu ma', pijim' ac ca na. Om ca pijim' jin' ca. Taraju iri nonon Priscila con Áquila ma' ne, hap ra pain xuruxut ta ac cocon na, hwet ac cacam na. Tomi' xo' ac cocon na pain capijacon Iri' Jam ca om taxi' querec ca ma', ca an hwet mi' napari' pain ca to' witan xim capari' ca'.

²⁷ Mao tain xijein macan' pain Acaia ta iri na Apolo ne, quep xiho' ac cocon na oro xerexi' co howa nonon Jeju pain Éfeso ma'. Xirao' mi' ac tococwa na oro wari' co howa nonon Jeju pain Acaia quem. Hwet xim nuhu' Apolo cwa'. Tomi' querec te jun me na ca xirao' mi' tococwa. Mao ac ca na. Wa' mao iri nain i cain ne, quep xiho' tamana ac tococwa na co howa nonon Jeju ma', co wara xiram pa' pan ca Iri' Jam pain ca mi' tococwa pain ca howa wa ma'.

²⁸ Quep xiho' tamana tata, xi hwara' opa ara ca pain ca pijim' cocon oro win judeu ca co tomi' in pin nonon ma'. Pijim' pijim' ca' tata: Je ca tomi' ne capijacon Iri' Jam ca xirao' to caca oro profeta cara pane. Wirico Jeju na co winim' iri' cwa'. Wirico co Cristo ta, ac i ma' na ca tomi' in pin tococwa oro win judeu ca co tomi' in pin nonon ma'. Taraju nonon oro wari' pain ca pijim' ac i ma' cocon ma' quem. Hehe ac caca na, to' quiji' pin ac tococwa na pain ca tomi' in pin nucucun ma' quem.