Atos 17 - Tradução Bíblica Pacaas Novos

Ca mama' cacain Tessalônica Paulo con Silas

¹ Xuruxut mama' ac cacain na oro cidade Paulo con Silas. Xuruxut tiquin' nanain Anfípolis ma', xuruxut tiquin' ac cacain na Apolônia ma', aram aram tan' mama' ac cacain na Tessalônica ma', je i ma' wixinain cidade. Ma' pe nain Tessalônica xirim ca cut in to xucucun oro judeu ma'.

² Sábado pin iri na ne, pain ca xao to wa taxipa' cacain ximicocon oro judeu ma', corom ac cain na Paulo. Je curucun, corom taxipa' nain oro xirim ca cut to xucucun oro judeu pain oro sábado pane. Corom hwet ac tococwa na co wara cut in xucucun pain i ma', tomi' xo' tomi' xo' ac xucucun na pain capijacon Iri' Jam ca xirao' to caca oro profeta cara pane. Ma' 3 na sábado pain ca tomi' xo' xucucun pane.

³ Ca' na ca tomi' xo' pan cocon Paulo ma': Wari' nucun Iri' Jam co Cristo ma', na e' na pain ca jain jain ca pain ca to' pa' pin tocwa. Na e' na pain ca e' mami' ca. Win ne ca xirao' to caca oro profeta cara pane ta tata. Je ca tomi' xuhu' ca' ac tococwa na. Jeju cwa', co pijim' hwet xuhu' cwa', wirico co Cristo ta. Ac i ma' na ca tomi' tococwa ma'.

⁴ Ma' nana oro judeu co howa pin nana, taxipa' pin ac cocon na Paulo con Silas. Ma' mija nana oro grego co xuruxut xo' nana pain ca win xumu taxipa' cacain ca param nucun Iri' Jam ma'. Ma' mija nana oro narima' co hwara' opa nana ma' quem. Howa pin nana caram ma' quem. Taxipa' pin ac cocon na Paulo con Silas.

⁵ Ane mana' pan caca oro taramaxicon nucucun oro judeu ma' ne. Noc mi' nonon Paulo con Silas pain ca howa mija caca oro wari' ma'. Maji tomi' cut in xuxun oro caxicon wari' co to ximama' e' nana ma' ac xucucun na, mija ac caca na wari' co cut in nana ma'. Ja' teretem ac tococwa na oro wari' pain Tessalônica. Jein hwet nanain xiricon Jasom ma', to' pa hot pin ac cacain na manain ca corom ac xine ma' quem. Mon Paulo con Silas ma' quem? An hwet mi' xuxun cocon oro wari' cwa' urut cocon ta paxi' nana.

⁶ Ane om mam' tococwa ne. Je ca quep tocwa Jasom ma'. Ma' nana co win howa ca co quep wawa ma' quem, coc ororo mi' ac tococwa na cocon oro taramaxicon nein Tessalônica. Merem ac caca na: Mija a xirara caram cwa' co ja' teretem nonon oro wari' pain oro xijein cidade ca mama' caca ne. Je win hwet cacapari' pain cidade nexi' ca' quem.

⁷ Pi'am to ho' xine pain xuru ca' me ac cocon na Jasom cwa'. Om ca tomi' ha' cacain oro ca tomi' capari' taramaxicon nexi' César co pe nain Roma quem. Taramaxicon na xucun wari' ta nana, wirico Jeju co iri' taramaxicon ta nana, ac i ma' na ca merem caca caram ma' co coc ororo mi' nonon cocon oro taramaxicon nein Tessalônica ma'.

⁸ Ja' teretem ac tococwa na oro taramaxicon cocon oro wari' co taraju nanain ca merem nucucun ma'.

⁹ Tomi' ac caca na oro taramaxicon ma', tomi' tata Jasom cocon oro win ma' ca ma'. Om na, mi' xut pain cote ne dinheiro mam' querec pin' xun urut pahu' pain ca om pan teretem mami' nuhu' ma' ac tococwa na. Na ra ac caca na, mi' ac cocon pain na, om pin ac tococwa na, in mama' ac cacain na xiricocon.

Ca mama' cacain Bereia Paulo con Silas

¹⁰ Xim pin iri na cocon ne, tomi' ac caca na co howa nonon Jeju. Tomi' nonon Paulo con Silas ma': Mama' jein xijein cidade cain, pain Bereia cain ac cocon na, mama' towa ac caca na. Xuruxut xuruxut tan' mama' iri nanain Bereia ne, corom mama' ac cacain na xirim ca cut in to xucucun oro judeu ma'.

¹¹ Oro judeu co to nanain Bereia ma', jimama' ca' nonon oro judeu co to nanain Tessalônica. Xumu xo' nana, tomi' querec te tamana nana pain ca taraju cacain ca pijim' nucun Paulo con Silas ma', pain ca pijim' cacain capijacon Iri' Jam con Jeju. Tama' noro nanain capijacon Iri' Jam ca xirao' to caca oro profeta pane, tama' noro noro nanain pain oro xijein xec. Am iri'o' ne cocon, am om iri'o' ne cocon, noro xin quem, ma' ta querec pin' xin cocon ta pan nana.

¹² Ma' mija ac caca na oro judeu co howa pin nonon Jeju. Co om judeu nana ma' quem, ma' mija nana oro narima' co hwara' opa nana ma', ma' mija na ca tarama' nucucun ma' quem, mija nana co howa pin nonon Jeju ma' quem.

¹³ Oro judeu co to nanain Tessalônica ma', taxi' pin iri nonon Paulo pain ca pijim' pe cain Bereia capijacon Iri' Jam con Jeju ma' ne, maji pain Bereia ta ac caca na, ja' teretem ac tococwa na oro wari' pain Bereia. Teretem tamana nana quem.

¹⁴ Tomi' hap ac cocon Paulo na co howa pin nonon Jeju ma': Mao ra, mao rain oro xijein cidade pain cacarain cote ne com cain ac cocon na, mao ac ca na. Silas con Timóteo ma' iri nana ne, to wet nanain Bereia pa'ao'.

¹⁵ Oro win ma' nucun co o mao nonon Paulo ma', joc wa' pin ac cocon na pain xijein cidade cain, Atenas na wixinain. In mama' xin Bereia ta iri nana ne, tomi' pan ac cocon na Paulo: Tomi' ca' jun Silas con Timóteo ta ac tococwa na. Ha' iri turuhu' pain ca hwet mahu' pain Atenas ca' ne, hwet hap ac mahu' tara ta nuhu' ta jujun me tata. Ma, in mama' ac caca na. Tomi' hwet ac tococwa na pain ca tomi' nucun Paulo ma' quem.

Ca pijim' pe cain Atenas Paulo

¹⁶ Winim' pe ac cocon na pain Atenas Paulo ma'. Winim' nonon Silas con Timóteo. Ca winim' winim' cocon ma', ca toron toron ne ximicon pain ca querec cain oro caji pacun ca Iri' Jam xi' ma caca oro wari' nein Atenas ma'. Toron tamana na ximicon, xi mija ara ne oro caji pacun ca Iri' Jam xi' ma caca pain Atenas.

¹⁷ Je ca tomi' xo' tococwa oro wari' pain oro xijein xec ma. Tomi' xo' tata oro judeu pain xirim ca cut in to xucucun ma', tomi' xo' tomi' xo' ac tococwa na co om judeu nana co xuruxut xo' nana pain ca win xumu cacain ca param nucun Iri' Jam ma' quem. Mao nain ca xao to to caca oro wari' pain ximijain cidade ma', tomi' xo' tomi' xo' ac tococwa na co xuruxut in nana ma' quem.

¹⁸ Ma' nana co ca' na taxipa' nanain oro xijein ca howa ximama' wa ma', co howa nanain ca coromicat nucun Epicuro, ma' nana co howa nanain ca coromicat nucucun oro estoico ma' quem. Taraju iri nonon Paulo pain ca pijim' ca con Jeju ne, ma' ac caca na co tomi' ximama' ca' nana: Cain' cain' ca co cwa' ne ta? Ma' carawa ca tomi' ca quem? Para tomi' ximao ca ne nana. Oro win ma' caca ma' iri nana ne, tomi' ac caca na: Om na, ac ca pijim' hwet cocon na oro xucucun jam ma' quem nana, xi pijim' hwet pan ara cocon pain capijacon Iri' Jam con Jeju Paulo ta. Mi' pin iri na Jeju ne, e' mami' ac ca na quem na ca pijim' cocon con Jeju.

¹⁹ Hap ra ta ac cocon na Paulo ma', o mao ac cocon na pain ca cut in to xucucun oro taramaxicon nucucun ma'. Areópago na wixinain ca cut in to nucucun. Tomi' ac cocon na: Tomi' xo' xut pain ca pijim' nem cara ne. Je win taraju urut pain.

²⁰ Jimao naparut ca pijim' nem. Om ca taraju pa' camain' urut pain. Taraju pa' xixin na urut pain ta nonon.

²¹ Je curucucun oro wari' nein Atenas cocon oro tatirim co to ho' nonon pane. Taraju pin iri nanain oro xocori ca pijim' wa ne, tomi' hwet ac xucucun pain na. Taraju toto nonon oro xocori ca pijim' wa, tomi' hwet toto nonon quem, je curucucun pane.

²² Xat pe ac cain i ma' na Paulo. Ximija pe tata oro taramaxicon pain Areópago ma'. Pijim' ac tococwa na: Tomi' xim inuhu' oro wari' nein Atenas. Querec pin' inuhu' pain ca win xumu tamana hwein oro ca howa nuhu'.

²³ Xut in iri inain cidade nuhu' ca' ne, noro ac tain na oro pacun ca pe torotop mi' querec te hwe ma'. Mam' ac tain na pacun ca xirao' pe hwein i ca' quem: Je i ca' pacun ca to' coromicat napari' con jam co om querec iri' cwa' na ca xirao' nein pahu'. Je ca tomi' xuhu' ca': Jam co in ac paxi' hwe ma', co om querec hwe ma', wirico co pijim' hwet xuhu' ca', ac i ma' na ca pijim' tococwa ma'.

²⁴ Jam co pijim' hwet xuhu' ca', wirico co Iri' Jam ta ac tococwa na. Wirico co quep nain macan' pane. Quep quep pi' pin nain oro carawa ca to nain quem. Je ca om pe ho' e' cain oro ca in ac in ac pe tocwa ma', ca quep pan ca wari' ma'. Xi wirico ara ca co taramaxicon pe ho' nain oro pawin, wirico co taramaxicon pe ho' nonon oro wari' je oro carawa pain macan' ca' quem.

²⁵ Om ca mi' xirarapa' pain carawa na capari' pain ca wari' nexi' ca' quem. Xi ma' ne carawa ca om non ta. Wirico co mene mene pi' pin nain oro carawa. Wirico co mi' pan napari' pain ca e' nexi' ca', mi' napari' pain ca wereme nexi' ca' quem. Wirico co mi' mi' pi' pin napari' pain oro carawa ca ma' napari' ca'.

²⁶ Ma' xica' pe na wari' co quep ca Iri' Jam pain cara pane, pain ca xo' quep ten qui' tocwa wari' pane, aram aram camara' qui' ac caca na oro waram winacon co hwanana ne iri' quem. Xucun wari' xucun wari' pi' pin ac caca na oro hwanana nexi' pane, wawaran mama' ac cacain na oro xijein macan' pain pira. Wirico Iri' Jam co wara coromicat an to mi' nonon pain oro xec nein ca e' nucucun, je pain ca cono' nucucun, wara coromicat an to mi' tata pain oro macaracocon quem.

²⁷ Ma' ta querec pin' xuxun na cacapa' ta tata. Momon pirao' tatarapa', am mam' cacapa', ac i ma' na ca coromicat nucun cocon oro hwanana nexi' pane. Ac i ma' napari' pain xocori ca' quem. Na napari' pain ca mam' xun Iri' Jam. Xi pe pira ca' capari' ta. Pe ho' pe ho' xam' capari' ca' ira.

²⁸ Ma' na wari' co tomi' ac i ca' pane quem: Wirico Iri' Jam co to' e' napari'. Wirico co to' meo napari'. Wirico co to' ma' pin napari' quem na ca tomi' nucun pane. Ma' nana oro win ma' nuhu' co xirao' taxi' nana ma' quem, mana panxica iri' ca' quem, ac i ma' na ca xirao' nucucun.

²⁹ Je ca tomi' xuhu' ca' ac tococwa na. Cain' xi coromicat mi' xun Iri' Jam pain ca mana panxica iri' ca' quem? An xiho' nain ouro je prata ra? An xiho' nain pacun quem ra? Quep toto paxi' nanain wari' quem. Iri' Jam na rain? Om na ta. Om ca na ne pain ca coromicat mi' ac i ma' xun Iri' Jam ta.

³⁰ Iri' Jam ma', om ca wap hap cocon oro hwanana pain cara pane, om ca wap hap cocon pain oro ca coromicat ximama' nucucun pain ca om taxi' querec cocon pane. Ane cwirin' pin jein ca caracat nuhu' pain xocori ca' capari' ne, tomi' tomi' xam' napari' pain oro xijein macan' ca to iri'.

³¹ Cwirin' je napari', xi wara an pe xo' ara cain xec pain ca tomi' querec xim capari' pain oro carawa ca ara iri' pain ca e' e' wet nexi' ca'. Tomi' xo' roron, querec pin' roron co em' nana ta, wara tomi' ac i ma' non wari' co wara tora' ca ma'. Wari' co wara tora' ca ma', mi' pin na pane, to' e' mami' ac con na quem. Ma' ta querec pin' hun pain ca wara tora' pan ton ca' napari'. Ac i ma' na ca pijim' cocon oro taramaxicon Paulo pane.

³² Oro taramaxicon ma', taraju iri nonon Paulo pain ca to' e' mami' non Jeju Iri' Jam ta ca ma' ne, ma' ac caca na co tatam' e' nonon. Tomi' xirac nonon quem. Ma' ac caca na oro xucucun co taraju wet nonon quem. Taraju mami' xixin na urut pain ca pijim' mi' maparut ca' nonon.

³³ Pi' pin iri na ca tomi' xucucun ne, hwet mao ac ca na Paulo, paca' ac tococwa na.

³⁴ Ane ma' caca co ja' ja' nonon ne. Howa pin ac cocon na Jeju. Ma' na taramaxicon co howa ma'. Dionísio na wixicon. Ma' na narima' co howa ma' quem. Dâmaris na wixicam. Ma' nana xucucun co howa pin nonon Jeju ma' quem.