Atos 16 - Tradução Bíblica Pacaas Novos

Ca ja' ja' pin con Paulo Timóteo

¹ Xuruxut mama' ac cacain na Derbe ma'. Paca' ac cacain na, aram aram tan' mama' ac cacain na Listra ma' quem. Pe nain Listra wari' co howa non Jeju. Timóteo na wixicon. Judeu na jicon ma'. Howa non Jeju quem. Cote ca ma' iri na ne, om ca judeu ca. Grego na.

² Awi na ta nonon Timóteo oro wari' co howa nonon Jeju pain Listra je pain Icônio ma'. Xut xo' na, om ca hwet camain' ne wixicon ta nonon.

³ Maji ta, ja' ja' ne pain ca mao tain oro xijein cidade ta ac con na Timóteo Paulo ma'. Je ca wac xirac cain taparinain ca xirac nucun. Xi taxi' pan ara cocon oro judeu co to nanain oro cidade ca mama' xi' caca ma', taxi' nonon pain ca om judeu ca cote ca pane.

⁴ Xuruxut mama' ac caca na Paulo con Silas con Timóteo ma'. Ca hwet hwet tococwa oro wari' co howa pin nonon Jeju pain oro cidade ma', ca tomi' hwet tomi' hwet ac tococwa na pain ca xirao' to nucucun oro apóstolo cocon co querec wet nonon co howa nana pain Jerusalém ma'. Tomi' ha' jein ca xirao' nucucun ta ac tococwa na quem.

⁵ Ac i ma' na ca to' hwara' opa tococwa oro wari' co cut in xucucun pain ca howa cocon Jeju ma'. Ca mija mija tiquin' caca ma', ca mija mija tiquin' caca ma', aram aram mija pin ac caca na co howa nonon Jeju.

Ca ac ca tohwein' ca ne Paulo pain Trôade

⁶ Pijim' mama' xin oro xijein cidade pain Ásia ta paxi' na Paulo cocon oro win ma' ca ma', ane tomi' caho' pan cocon Tamataracon Iri' Jam ne. Om ta pijim' mama' hwein Ásia me nonon, na ra ac xucucun na, xuruxut mama' ac cacain na oro cidade pain Frígia je pain Galácia ma'.

⁷ Mama' xin xijein macan' ma', Mísia ma' ac caca na quem. Wixicam pin iri nanain cacarain Mísia ne, mama' xin paxi' nanain xijein macan' pain i cain, pain Bitínia cain, ane tomi' caho' mami' tococwa ne. Je Tamataracon Jeju ca tomi' caho' nonon ma'. Ta mama' hwein Bitínia me nonon, na ra ac caca na.

⁸ Xuruxut tiquin' ac cacain na xijein cidade pain cacarain cote ne com ma'. Trôade na wixinain cidade.

⁹ Xim pin iri na ne, ac ca tohwein' ca na Paulo. Om paxi' na ca pi'am ca. Querec na. Ac ca querec con na wari' nein Macedônia. Xijein macan' na Macedônia, je i ma' wixinain. Ac ca xat ho' con na, ac ca tomi' con na: Hap ra, hwet xut pain Macedônia ca'. Quep xiho' xut ta, ac i ma' na ca tomi' con ma'.

¹⁰ Mamiram pin iri na Paulo ne, tomi' hwet ac caparut na pain ca querec nucun. Je ca param mi' capari' Iri' Jam ta ac xujuxut na. Hwet jujun oro wari' nein Macedônia cwain, pijim' mi' jujun pain capija con Jeju ta napari' ta xujuxut. Noro ho' xin mam' horoho wa ta, horoho mama' xin Macedônia cain ac xujuxut na.

Ca howa pin cama Lídia

¹¹ Paca' iri urut pain Trôade ne, horoho mama' ac urut pain na xixi pan nein macan' Samotrácia ma'. Xec pin iri na ne, horoho tiquin' mama' ac urut na. Horoho horoho hwet ac urut pain na xijein cidade ma', Neápolis na wixinain.

¹² Macedônia na wixinain macan' ca pe ne Neápolis ma'. Hwet pin iri urut pain Neápolis ne, xuruxut mama' ac urut na, xuruxut xuruxut tan' mama' ac urut pain na Filipos ma'. Iri' cote ne cidade na Filipos. Mija nana oro romano co to nanain Filipos. Om ca tocwan homa ne xec pain ca mon to wet urut pain i cain.

¹³ Sábado pin iri na ne, tomi' ac xujuxut na: Maji pain cacarain com ta. Am ma' pe nein i cain ca cut in to xucucun oro judeu co tomi' xun nonon Iri' Jam ma' ac xujuxut na. Hwerehwet ca' urut pain cidade, xuruxut hwet ac urut pain na cacarain com ma'. Xao to ac urut na. Wara ma' nana oro narima' co cut in xequequem ma'. Tomi' ac urut cacam na.

¹⁴ Pe nain i ma' narima' co taraju wet naparut quem. Lídia na wixicam. Maqui' nain Tiatira, je i ma' wixinain cidade nequem. Vender taxipa' non wom co awi tamana. Iri' wom cam, ca paca' nucun womicocon co caramaju nana ma', wirico co vender taxipa' cama ma'. Wara tomi' ha' paxi' non Iri' Jam Lídia ma'. Taraju iri nain ca tomi' nucun Paulo ne, mi' pan ac cam na pain ca taraju pa' wa Taramaxicon nexi', howa pin ac cama na.

¹⁵ Ja' ac tacama na pain com. Wiricam, wiricoco oro win ma' cama co to ho' nanam pain xiricam ma' quem, ja' ac tacacama na pain com. Ja' iri tata ne, tomi' mip ac caparut na: Mo ta querec pin' mahu' pain ca howa ton Taramaxicon nexi' cwa', je ta to ho' qui' mahu' pain xuru ta naparut, tomi' tomi' na ac caparut na. Ma ac urut cam na, to ho' ac urut cam na.

Ca tao' to pin tococwa Paulo con Silas pain xirinain ca tao' to tao' to to wa ma'

¹⁶ Maqui' ac ne na xec pain ca in mama' xin urut pain ca tomi' to cocon Iri' Jam ma'. Xuruxut xuruxut, win quima ac caparut na xojam' ma', co taramaja mi' e' nonon oro taramaxicon nequem. Corom pe ho' nam caxicon jam. Caxicon jam co corom pe ho' nam ma', tomi' hwet taxi' nain oro carawa ca ara ton nonon oro wari'. Wari' co taramaja mi' cama ma', cut tamana nana dinheiro pain ca tomi' hwet ximao nequem ma'.

¹⁷ Win quima iri naparut ne, ja' ja' ac caparut na. Ca ja' ja' caparut ma', ca merem merem cama ma' quem. Ca' na ca merem cama parut: Mon tarama' cwa', taramaja mi' nonon Iri' Jam co Iri' Taramaxicon pan ta. Pijim' hwet nunuhu' pain ca to' witan pin xim cuhu' ta na ca merem nequem.

¹⁸ Ca merem merem cama ma', ca merem merem cama ma', je cwerequem pain oro xijein xec. Mija na xec pain ca merem ac i ma' e' cama parut. Aram aram tomi' xiram ac con na Paulo. Tucu in hwet pan ac cam na, tomi' mip ac con na caxicon jam nequem: Hwet ca' ram cam cwa' ta. Wirico Jeju Cristo co mi' napa' pain ca tomi' mip xim ca' non. Mam' hwet ca' ac cam na quem.

¹⁹ Wari' co taramaja mi' cama ma', querec pin' ac cacam na pain ca pe ho' pe ho' om pin cam caxicon jam nequem. He! Cut cut om pin xin dinheiro cam cam cwa' ra ac xucucun na. Quep ac tococwa na Paulo con Silas ma', coc ororo mi' ac tococwa na cocon oro taramaxicon pain ximijain cidade ma', pain ca xao to to caca oro wari' ma'.

²⁰ Coc ororo coc ororo mi' ac tococwa na cocon iri' taramaxicon ma', co iri' juiz nana cocon oro romano ma'. Judeu nana caram cwa' ta ac tococwa na. Ja' teretem nonon oro wari' pain cidade nexi' ca' quem ac tococwa na

²¹ Ca' je ca' je nanapari' pain oro ca ara pan caca ma', pain ca judeu nucucun ma'. Om ca an xiho' ac tococwa, xi romano ara iri' ta. Ta tomi' ha' huhun me ta nanapari' oro taramaxicon nexi' quem, ac i ma' na ca tomi' tococwa ma'.

²² Oro wari' co taraju nonon pain ca tomi' nucucun ma', mana' tamana ac caca na, quep xuxun ta ac caca na. Tomi' pan ac caca na oro juiz ma': Horohot ca' jujun con womicocon ta, wap jujun ta ac caca na, to' to' ac tococwa na pain pana.

²³ Wap tamana iri tata ne, wixicao' mi' ac tococwa na pain xirinain ca tao' to tao' to to wa ma'. Querec wet xo' roron ta ac tocwa na co tao' to nonon ma'.

²⁴ Wixicao' mi' ac tococwa na pain man pain iri' tequipain xirim ma'. Pao' to ac tococwa na pain caximacocon pain cote ne pana. Win ne ca querec wet xo' roron ta cacapa' oro juiz ma' na.

²⁵ Xim pa' ac cocon na. Ximijain xim pin iri na cocon ne, tomi' tomi' ac con Iri' Jam na Paulo con Silas ma'. Com querec te mi' nonon pain tamara' quem. Taraju wet nonon co win tao' to caca ma' quem.

²⁶ Ane ane cocoroc ac ne na macan'. Cocoroc mip na. Cocoroc na oro cote ne pacun ca xat pe ne xirinain ca tao' to tao' to to wa ma' quem. Pa pa pi' pin hap ac ne na oro manain xirim. Oro wari' co tao' to wawa ma', camara' pi' ca' tata oro arain too ca mam' pao' to tococwa ma' quem.

²⁷ Querec ac ca na wari' co tao' to nonon ma', co querec wet nonon ma'. Querec iri nain ca pa pa pi' pin ne oro manain xirim ma' ne, jain jain ac ca na. Jein mama' nana xi' ma nonon. Hot ac cain na cote ne quit nucun ma'. To' pa' pin xije ta paxi' na ira.

²⁸ Ane merem mip con Paulo ne: Om na ta! Ta to' pa' pin xijem me. To wet to wet pi' pin urut ca' ira na ca merem nucun.

²⁹ Tom mi' xine pain naran me ac ca na co tao' to nonon ma', corom hwet hap ac tococwa na. Pe torotop mi' ac con na Paulo con Silas ma'. Cocoroc na pain ca jin' nucun.

³⁰ O qui' ac tococwa na, tomi' ac tococwa na: Cain' cain' xita' quem ta caram ma'? Param inon Iri' Jam pain ca to' witan ca' capa' pain ca caracat ne ca' na.

³¹ Om na, howa ron Taramaxicon nexi' Jeju ta. Witan ac ma tara ta ac cocon na. Ac i ma' tatara oro win ma' ma co to ho' nenem pain xurum ma' quem, mo ta howa cocon Taramaxicon nexi' ma', witan ac caca tara quem nonon.

³² Tomi' xo' ac cocon na pain capijacon Iri' Jam con Jeju. Wirico, wiricoco oro win ma' ca co to ho' nonon pain xiricon ma' quem, tomi' xo' tata pain capijacon Iri' Jam con Jeju.

³³ Tomi' pan ac cocon na co tao' to nonon ma': Harahap je, hohoc tain nonahu' ca wap ac xihwe ma' ac tococwa na. Om ca xec tara e' ca, hohoc towa tata. Ja' ac tococwa na pain com pain ca howa cocon Iri' Jam quem, wirico, wiricoco oro win ma' ca co to ho' nonon ma' quem.

³⁴ Maji pain xuru ta ac tocwa na Paulo con Silas ma', mi' ac tococwa na pain carawa ca cao' wa. Tomi' querec te tamana na co ma'. Oro win ma' ca co to ho' nonon pain xiricon ma' quem, tomi' querec te tamana nana quem. Xi om ne ca howa pin ara cocon Iri' Jam ta.

³⁵ Xec pin iri na ne, tomi' pan ac caca na oro juiz ma', tomi' tata oro soldado nucucun. Mo tomi' jun co tao' to nonon wari' ma' ac tococwa na. Pa hwerehwet pin roron Paulo con Silas ta jun ca' tata. Hwet ac cocon na co tao' to nonon wari' ma', tomi' ac cocon na.

³⁶ Ma ac ca na, tomi' hwet ac con na Paulo: Pa hwerehwet pin roron ta nanapa' pahu' ac con na. Je ca tomi' xuhu' ca' ac tococwa na: Mama' ho' je. Param inuhu' pain ca querec wet cara cuhu' Iri' Jam pain ca mama' nuhu' ta, ac i ma' na ca tomi' tococwa ma'.

³⁷ Ane tomi' in pin pan cocon oro soldado Paulo ma' ne: Cain' cain' xirara quem? Mo xi om romano urut ta. Romano urut ca' ira! Je xi om wap qui' cacaparut quem? Wap e' nanaparut. Querec querec xam' nanaparut oro wari' quem. Wixicao' mi' ma' ac cacaparut na pain xirinain ca tao' to tao' to to wa ca' quem. Je xi tomi' querec xo' cain' cacaparut quem? Xi pan teretem urut ta. Cain' cain' xirara quem? Mama' noc xa je nanaparut ra? Om ta mama' hohomu urut ta. Hwet pan tataraparut oro juiz ta! Mama' je ta xo' pan tataraparut ta, ac i ma' na ca tomi' in pin nucun Paulo ma'.

³⁸ In hwet ac cocon oro juiz na oro soldado ma', tomi' hwet ac cocon na pain ca tomi' nucun Paulo. Taraju iri nanain ca tomi' nucucun ma' ne, pain ca romano urut ca' ira na Paulo ne caca ma', jin' pin ac caca na quem.

³⁹ Hwet ac cocon na, tomi' toto ac cocon na. Mana' mana' om pin xut pain ca quep em' urut pahu' ne ac cocon na, cut hwerehwet qui' ac cocon na, paca' jein cidade nuxut ta ac cocon na quem.

⁴⁰ Hwerehwet ca' iri nanain xirinain ca tao' to tao' to to wa ma' ne, mama' ac cacain na xiricam Lídia ma'. Je ca cut in to xucucun cocon oro win howa caca ma'. Tomi' tomi' ac cocon na, hwara' opa je pain ca howa nuhu' pa'ao' ac cocon na, mama' ac caca na.