Atos 15 - Tradução Bíblica Pacaas Novos

Ca to' i'ina tococwa co om judeu nana ma', pain ca na e' na pain ca wac xirac xihwe ta tococwa ma'

¹ Ma' ac caca na wari' co maqui' nanain Judeia. Xuruxut xuruxut tan' mama' iri nanain Antioquia ne, tomi' ac tococwa na co om judeu nana ma', co howa nonon Jeju ma': Xirao' mi' ca' napari' Moisés pane: Na e' na pain ca wac xirac hwein taparinain ca xirac nuhu' pain ca tarama' nuhu' ta napari' pane. Je ca tomi' urut pahu' ca'. Mo ta om wac xirac hwein taparinain ca xirac nuhu' ma', om ta witan ac hwe ta ac tococwa na co om judeu nana ma'.

² Tomi' in pin ac xucucun na. Mija na ca tomi' caracan xucucun. Om na ta, om ca hohot camain' ne ca tomi' nuhu' ta ac ca na Paulo con Barnabé. Je i ma' ira, hohot na ta ac caca na co tomi' nanain ma', co maqui' nanain Judeia ma'. Je ca tomi' xo' pan xucucun co howa nonon Jeju ma'. Tomi' ac tococwa na Paulo con Barnabé cocon oro xucucun win ma' caca ma'. Mama' jein Jerusalém ta. Tomi' querec jujun oro apóstolo cocon oro xucucun co querec wet nonon co howa nonon Jeju pain i cain ta ac tococwa na. Mo ta hohot ne pain ca wac xirac xine taparinain ca xirac nucucun co om judeu nana. Mo ta om hohot ne cocon. Tomi' querec jujun ta ac tococwa na.

³ Mama' je ta pan ac cocon na co howa nonon Jeju pain Antioquia ma', mama' ac caca na. Xuruxut tiquin' ac cacain na Fenícia je Samaria ma', je i ma' wixinain oro xijein macan' ca xuruxut tiquin' caca ma'. Ca querec querec tococwa co howa pin nonon Jeju ma', pain ca mama' cacain oro xijein cidade ma', ca tomi' hwet tomi' hwet ac tococwa na cocon co om judeu nana co howa pin nonon Jeju ma' quem. Taraju iri nanain i ma' ne, tomi' querec te tomi' querec te pi' pin ac caca na. Mija na ca tomi' querec te caca, xi om ne ca howa pin ara cocon Jeju caram ma' co om judeu nana ma'.

⁴ Aram aram tan' mama' ac cacain na Jerusalém. Maqui' hwe? Maqui' urut ta ac caca na. Co howa nonon Jeju pain Jerusalém ma', cocon oro apóstolo ma', cocon co querec wet nonon co howa nana ma' quem, tomi' querec te nonon Paulo cocon oro win ma' caca pain ca maqui' nucucun. Tomi' hwet ac tococwa na pain oro ca ara pan ca Iri' Jam ma', pain ca quep xiho' cocon pain ca pijim' cacain capijacon ma' quem.

⁵ Ane ma' caca caram ma' co fariseu nana ne. Howa nonon Jeju quem. Taraju iri nanain i ma' ne, pain ca howa pin cocon Jeju oro wari' co om judeu nana ma', tequi' to ac caca na, tomi' ac caca na: Co om judeu nana ma', mo ta howa xun Jeju caca, na e' na pain ca wac xirac cacain taparinain ca xirac nucucun ta. Na e' na pain ca tomi' ha' cacain oro ca xirao' nucun Moisés ma' quem, ac i ma' na ca tomi' caca ma'.

⁶ Cut in xi', tomi' xo' xijexi' ta ac xucucun na oro apóstolo cocon co querec wet nonon co howa nonon Jeju ma'.

⁷ Momon tomi' ac xucucun na, momon tomi', momon tomi'. Momon tomi' caracan iri xucucun ne, tequi' pe ac ca na Pedro. Tomi' ac tococwa na: Taxi' mahu' pain ca tora' capa' Iri' Jam pain cara pane ta xere. Tora' ca' napa' pahu', pain ca wum tara co pijim' mi' nonon pain capija oro wari' co om judeu nana ta capa' pane. Pijim' mi' roron pain capija ca tomi' hwet nuhu' con Panxita' ta napa' pane, ma' ta taraju cacain pum, ma' ta howa cacain pum quem napa' pane.

⁸ Iri' Jam ma', co querec pin' nain ximicocon oro wari' ma', an hwet mi' napari' pain ca hohot cocon oro wari' co om judeu nana ma'. Hohot nonon pain ca howa pin cacain capijacon. Xi om ne ca mi' ara tococwa pain Tamataracon ta. Win capari' pain ca mi' capari' pain Tamataracon pane quem.

⁹ Querec querec ac wiricoco pi' pin mahu' ta napari' pain ca judeu iri' ca', je pain ca om judeu caca ma' quem. Om ca querec jimama' mahu' cocon ta napari'. To' hohot pin nonon co om judeu nana ma', xi om ne ca howa ara cocon Jeju ta. Win ne ca to' hohot capari' pain ca judeu iri' ca' quem, pain ca howa xun Jeju ca' quem.

¹⁰ Je ca tomi' xuhu' ca' ac tococwa na. Ac ca tomi' in pin xun Iri' Jam hwe na pain ca to' i'ina xuxun huhun oro xerexi' co om judeu nana ma', pain ca na e' na pain ca tomi' ha' cacain oro ca xirao' nucun Moisés ta huhun ma'. Am mana' capari' Iri' Jam pain ca to' i'ina xuxun ca', am om mana' capari' pain, tomi' in pin querec xun e', ac i ma' na ca mixein querec hun Iri' Jam ta. Cain' cain' xihwe quem? Mixein maho' jun ta. Xi ha' pan capari' pain ca tomi' ha' wa oro ca xirao' nucun Moisés ta. Om ca ha' cocon pain ca tomi' ha' wa oro hwanana nexi' cara pane quem.

¹¹ Om ca to' witan camain' capari' ca tomi' ha' wa oro ca xirao' nucun Moisés ta. Ca' na ca howa iri' ca': To' witan pan napari' Taramaxicon nexi' Jeju ma', xi om ne ca xiram pa' pan ara capari' ta. Om xi to' witan capari', xi iri' wari' iri' ta. Ane xiram pa' e' capari' ne. Je ca witan iri' ca'. Je ca witan caca oro xerexi' co om judeu nana ma' quem. Ac i ma' na ca tomi' cocon Pedro ma'.

¹² Tacana to tacana to xam' ac caca na co cut in xucucun ma'. Taraju wet ac cocon na Barnabé con Paulo ma', pain ca pijim' hwet tococwa pain oro ca ara pan ca Iri' Jam ma'. Tomi' ca' tata: Quep xiho' naparut Iri' Jam pain ca pijim' mi' urut cocon pain capijacon oro wari' co om judeu nana ma', je pain ca an hwet mi' urut cocon pain oro ca hwara' opa wa ca om ara taxi' ne ca wari' wa ta tata.

¹³ Pi' pin iri na ca pijim' nucucun ne, tomi' ac ca na Tiago. Taraju wet xine ta xere ac ca na.

¹⁴ Je ca tomi' capari' Simão cwa'. Tomi' hwet napari' con Iri' Jam ma', pain ca xo' xiram pa' ten qui' cocon oro wari' co om judeu nana pain cara pane. Ma' tatara co tora' ta', co wari' ne ta' ta na Iri' Jam ta napari'.

¹⁵ Je ca xirao' to caca oro profeta pane quem, an an ari nain ca tomi' nucun Simão cwa'. Ca' na ca xirao' pe cacain ca tomi' nucun Iri' Jam pane:

¹⁶ Ac ca jao hot ne tara xiricon Davi ma', pain ca hwara' opa hwara' opa om pin xi' caca waram winacon cwa'. Ame hwe e', aram aram in qui' ta', ac ca quep mami' tain tara xiricon pain ca to' hwara' opa mami' toton waram winacon. Mi' mami' toton con winacon Davi co taramaxicon.

¹⁷ Ma' ta param param xam' cacapa' oro xucucun wari' pain oro xijein macan' ma'. Oro wari' co om judeu nana ma' quem, co howa xine ta ta' quem, mi' toton con taramaxicon, ma' ta jain jain jain jain xam' cacapa' ta inonon. Je ca tomi' ta' ca', pain ca Iri' Taramaxicon ta' ca'.

¹⁸ Wara an hwet pe inain ca coromicat an pe xo' ta' pain cara pane, pain ca xo' ma' ten qui' ne oro carawa pane. Ac i ma' na ca xirao' pe cacain ca tomi' nucun Iri' Jam oro profeta pane.

¹⁹ Je i ca' ca coromicat ne ca' xere ac ca na Tiago. Om ca na ne pain ca to' i'ina xuxun co om judeu nana co an to pin nanain oro ca howa ximama' nucucun ma', co howa pin nonon Iri' Jam ma'. Om ca na ne pain ca to' i'ina xuxun pain ca tomi' ha' e' jein oro ca xirao' nucun Moisés ta xuxun ca'.

²⁰ Ara ca' xi', na e' na pain ca xirao' mi' xuxun pain carta. Ca' tara ca xirao' mi' xuxun: Wahu' pain ca tarama' nuhu' ma', ta quep hwem xequem narima' me. Wahu' quem oro narima', quep e' turuhu' waram taxuhu' quem, ac i ma' tara ca xirao' mi' xuxun ta. Xirao' mi' ca' xuxun quem: Ein jein carawa ca mi' querec te xine pain oro caji pacun ca Iri' Jam xi' ma caca oro wari'. Xi to' em' pan ara nein oro caji pacun ta. Ein jein carawa ca juhum' pa' xine quem, pain ca pe ho' nein quinain pain cwerein ma' quem. Ein jein quinain carawa ma' quem, ac i ma' tara ca xirao' mi' xuxun ta.

²¹ Xi pain xocori ara ne ca pijim' hwet xine oro ca xirao' nucun Moisés pain oro xijein cidade ta. Noro noro wet irin pain oro xijein sábado pain oro xirim ca cut in to xijexi' quem. Ac i ma' na ca tomi' cocon oro win ma' ca Tiago ma'.

Carta nucucun ca xirao' mi' cocon co om judeu nana ma', co howa pin nonon Jeju ma'

²² Tomi' xo' ac xucucun na oro apóstolo cocon co querec wet nonon co howa nonon Jeju ma', wiricoco oro wari' co cut in xucucun pain ca howa nucucun ma' quem, tomi' ac xucucun na: Awi na pain ca tomi' xo' xuxun win ma' nexi' cwa'. Ja' ja' jujun Paulo con Barnabé pain ca in mama' xin cacain Antioquia ta xuxun ta xucucun. Ma ac xucucun na, tomi' ac cocon na Judas ma', co Barsabás na xijein wixicon ma'. Tomi' nonon Silas ma' quem. Oro co howa nonon Jeju pain Jerusalém ma', in ac tamana nonon Judas con Silas ma'. Xi om ne ca querec pin' ara tococwa pain ca xuruxut xo' nucucun pain ca howa cocon Jeju ta.

²³ An mi' jujun pain ca xirao' nexi' ca' ac tococwa na. Ca' na ca xirao' nucucun: Warut pain ca apóstolo urut ca', cocon co querec wet nonon oro co howa nana cwa', xirao' mi' urut pahu' pain ca xere xijexi' con Jeju. Tomi' querec te urut pahu' pain ca howa hun Jeju Cristo pain ca om judeu hwe ma', pain ca to hwein Antioquia, je pain Síria, je pain Cilícia ma'.

²⁴ Ma' nana wari' co tomi' hwet nanaparut cocon oro win ma' nuxut co hwet nunuhu' pane, co to' i'ina nunuhu' pain ca tomi' ca' cucuhu' pane: Mo ta om tomi' ha' tomi' ha' pi' pin hwein oro ca xirao' nucun Moisés ma', mo ta om wac xirac hwein taparinain ca xirac nuhu' ma', om ta witan ac hwe ta nunuhu' pane. Om ca pijim' ac i ma' je ta urut cocon pane ta.

²⁵ Je ca tomi' xo' xujuxut ca'. Tora' urut cocon win ma' nuxut cwa'. Hwet jujun oro xerexi' pain i cain ta urut cocon. Ja' ja' jujun Barnabé con Paulo co tomi' querec te tamana urut cwa' urut cocon quem.

²⁶ Barnabé con Paulo cwa', om ca xiram pa' camain' cacain curucucun pain ca taramaja mi' cocon Taramaxicon nexi' Jeju Cristo. Mo ta to' parapa' pin xim cacapari' pain ca pijim' xin capijacon Iri' Jam ca', to' parapa' pin ma' tatarapari' ne nana, je curucucun mao na.

²⁷ Je ca mam' xim urut pahu' con Judas con Silas cwa'. Tomi' hwet tuturuhu' pain ca coromicat nuxut pain ca xirao' mi' urut pahu' ca'. Ca tomi' hwet xim cucuhu' ma', ac ca xirao' nuxut ca' tara ta, an an ari tara.

²⁸ Je ca tomi' urut pahu' ca'. Tomi' xo' naparut Tamataracon Iri' Jam. Hohot naparut ca tomi' nein quem. Om ta tomi' mip ximama' urut pahu' pain ca tomi' ha' tomi' ha' pi' pin jein oro ca xirao' nucun Moisés ta urut pahu' ca'. Ma' e' na wijimain ca tomi' mip wa ca'. Hohot na pain ca tomi' ha' hwein ta.

²⁹ Tomi' ca' urut pahu': Ein jein carawa ca mi' querec te xine pain oro caji pacun ca Iri' Jam xi' ma caca oro wari' ma'. Ein jein quinain carawa ma' quem. Ein jein carawa ca juhum' pa' xine quem, pain ca pe ho' nein quinain pain cwerein ma' quem. Tomi' ca' urut pahu' pain ca tarama' nuhu' ma' quem: Ta quep hwem xequem narima' me. Wahu' quem oro narima', quep e' e' jujun taxuhu' quem. Mo ta tomi' ha' hwein ca xirao' mi' urut pahu' ca', hohot ac hwe tara ta. Je i ca' ca xirao' nuxut ca'. Ac i ma' na ca xirao' mi' tococwa co howa nonon Jeju pain Antioquia pane.

³⁰ Mama' je ta iri tata ne, mama' ac caca na. Xuruxut xuruxut tan' mama' ac cacain na Antioquia. Harahap je ta ac caca na, cut in ac xucucun na co howa nonon Jeju ma'. Mi' ac tococwa na pain carta ca xirao' mi' tococwa ma'.

³¹ Noro ac cacain na co howa nonon Jeju ma'. Noro iri nanain ne, tomi' querec te tamana ac caca na. Xi om ne ca quep xiho' ara tococwa pain ca hu xo' cocon ca xirao' nein ta.

³² Momon pijim' pijim' pan ac cocon na Judas con Silas ma', co pijim' hwet taxipa' nanain capijacon Iri' Jam ma'. Hu tamana tata, to' hwara' opa tata pain ca pijim' nucucun.

³³ Mon to wet ac caca na. Ac i ma' ac i ma' nana, in mama' xut ta iri nana caram ma' co maqui' nanain Jerusalém ma' ne, in mama' je ta ac tococwa na. Tomi' mi' urut pahu' con Iri' Jam cwa', pain ca querec wet roron pain ca mama' nucucun urut con pahu' ta ac tococwa na. Mama' ac caca na, in hwet ac tococwa na caram pacara pane co wara mama' jein Antioquia nonon pane.

³⁴ (Ane to wet ta' pa'ao' ca Silas ma' ne. Hohot napa' pain ca mon to wet tain i ca' ta na.)

³⁵ Mon to wet ac cacain na Antioquia Paulo con Barnabé ma'. Ca' na ca' na nonon pain capijacon Iri' Jam oro wari' ma', pijim' mi' pijim' mi' nonon pain capijacon ca tomi' hwet napari' con Taramaxicon nexi' ma' quem. Ma' mija nana oro win ma' caca co quep xiho' nonon pain ca taramaja nucucun ma' quem.

Ca mama' ni ca' xucucun Paulo con Barnabé

³⁶ Om ca pain homa ne, tomi' ac con Barnabé na Paulo ma'. In hwet xuxun oro xerexi' pain oro xijein cidade ca pijim' to xin capijacon Iri' Jam con Taramaxicon nexi' pane ta non. Am hwara' opa cara caca pain ca howa nucucun, am caracat caca, am hohot caca con Iri' Jam, mo querec xuxun ta, ac i ma' na ca tomi' con ma'. Ma ac xucucun na.

³⁷ O mao xun João cwa', co Marcos na xijein wixicon cwa' paxi' na Barnabé ma'.

³⁸ Ane hehe ca Paulo ne. Om ca hohot ne pain ca o mao xun ta, xi ja' ja' cara capari' pane ta na. In ca' ara xi' napari' pain Panfília pane ta na.

³⁹ Tomi' caracan ac xucucun na. Mija na ca tomi' in pin xucucun. Mama' ni ca' ac xucucun na quem. Barnabé ma', maji ta ac con na João co Marcos na xijein wixicon ma', horoho mama' ac cacain na xixi pan nein macan' Chipre ma'.

⁴⁰ Paulo ma' iri na ne, maji ta ac con na Silas ma'. Oro win howa caca pain Antioquia ma', tomi' mi' ac cocon na con Iri' Jam. Taramaxicon nuxut. Quep xiho' ron Paulo con Silas cwa' nana, xuruxut mama' ac caca na.

⁴¹ Xuruxut mama' ac cacain na oro xijein cidade pain Síria je Cilícia ma'. To' hwara' opa ac tococwa na co cut in xucucun pain ca howa cocon Jeju ma' quem.