Atos 14 - Tradução Bíblica Pacaas Novos

Ca pijim' to cacain Icônio Paulo con Barnabé

¹ Tan' mama' iri nanain Icônio Paulo con Barnabé ne, corom mama' ac cacain na xirim ca cut in to xucucun oro judeu. Je curucucun mao na pain ca mama' cacain oro xijein cidade, corom mama' taxipa' nanain xirim ca cut in to xucucun oro judeu. Pijim' hwara' opa ac cacain na capijacon Iri' Jam quem. Ca pijim' hwara' opa caca ma', je ca howa mija caca wari' ma' quem. Co judeu nana ma', co om judeu nana ma' quem, mija nana co howa pin nonon Jeju. Om ca paric camain' caca.

² Ane ma' caca oro judeu co om howa je na nana ne. Ja' teretem ac tococwa na co om judeu nana co om howa nana ma'. Mana' in pin jujun co howa nana ta ac tococwa na.

³ Mon to wet ac cacain i cain na Paulo con Barnabé ma'. Mija na xec nein ca mon to wet cacain i cain. Pijim' mi' tata con Taramaxicon nexi' oro wari' ma'. Om ca pijim' jin' caca, pijim' hwara' opa nana. An hwet nanain ca hwara' opa nucun Iri' Jam pain ca ara cacain oro ca om ara taxi' ne ca wari' wa ma'. Wirico Taramaxicon nexi' na co mi' nonon pain. Ma' ta querec pin' tococwa pain ca pijim' iri'o' nucucun pain ca xiram pa' e' toton ta na.

⁴ Oro wari' co to nanain Icônio ma', coromicat ni ca' xucucun. Ma' nana co na ra nonon oro taramaxicon nucucun oro judeu ma', ma' nana co na ra nonon oro apóstolo ma', Paulo con Barnabé ma'.

⁵ Tomi' xo' ac xucucun na oro wari' ma', wiricoco co om judeu nana ma', wiricoco oro taramaxicon nucucun oro judeu ma' quem, tomi' xo' ac xucucun na: Quep em' xun Paulo con Barnabé ta ac xucucun na. Quep em' xuxun, to' to' cono' pin xuxun pain pacun ta, ac i ma' na ca tomi' xucucun.

⁶ Ane taxi' pin tococwa ne. Taxi' pin iri nonon Paulo con Barnabé ne, jein mama' pan ac cacain na Listra je Derbe, je i ma' wixinain oro cidade ca jein mama' caca ma'. Jein mama' nanain oro xijein cidade ca to ja' pan nain quem.

⁷ Pijim' pijim' tiquin' ac cacain na capijacon Iri' Jam con Jeju pain i cain.

Ca mama' cacain Listra je Derbe

⁸ Pe nain Listra wari' co carama pe. Wara carama pe qui' nain ca xo' pan' qui' nucun pain ca pije' nucun pane. Om ca xut camain' ca.

⁹ Taraju wet non Paulo pain ca pijim' ca quem. Noro pan ac con na Paulo ma' quem. Howa non xin Jeju co ma' ne, ha' non Jeju pain ca quep xio capa' ta na ca coromicat nucun co ma' ne na ca coromicat nucun Paulo.

¹⁰ Tomi' ac con na, tomi' mip non: Tequi' pe ra e', ac i ma' na ca tomi' mip con ma'. Tequi' pe hap ac ca na, xut pin ac ca na quem.

¹¹ Querec iri nanain ca ara ca Paulo oro wari' ma' ne, merem ac caca na pain iri' capijacocon ca tomi' pan caca pain ca wari' nein Listra ma'. Merem ca' nana: Wari' pin nana oro iri' jam nexi' co howa iri' cwa' nana. Quiji' hwet nanapari' ta na ca merem nucucun.

¹² O' ma' ni ac cocon na. Barnabé ma', o' ma' mi' nonon con Zeus ma', co taramaxicon nucucun oro jam co Iri' Jam xi' ma caca ma'. Paulo ma' iri na ne, o' ma' mi' ac cocon na con Hermes ma' quem, co an xin tiquin' taxipa' nain ca tomi' nucucun oro jam co Iri' Jam xi' ma caca ma' quem. Xi wirico ara ca Paulo co pijim' ta nana.

¹³ Pe nain i ma' xirim ca tomi' querec te to cocon Zeus ma', co taramaxicon nucucun oro jam co Iri' Jam xi' ma caca ma'. Pe ja' pan nain cote ne man ca corom mao ac xine cidade nucucun. Maqui' ac ca na wari' co taramaja pe nain. Cut qui' nain boi, wara an warawa na pain hwijein pana pain paramain. To' parapa' mi' xuxun pain Paulo con Barnabé ta na. Oro wari' ma' quem, to' parapa' mi' xuxun pain, ma' ta querec pin' cacapari' pain ca in ac xuxun ca' nana.

¹⁴ Oro apóstolo ma', Barnabé con Paulo ma', taxi' pin iri nonon pain ca to' parapa' mi' xuxun pain boi ta caca ma' ne, i' pin ac cocon na womicocon. Ma' ta querec pin' cacapari' pain ca noc xin i ma' ta nana. Jein hwet ac cacain na ximijacocon ma', merem ac caca na:

¹⁵ Para to' parapa' mi' xim maparut pain boi ca' quem caram ma'? Xi Iri' Jam urut ta. Wari' urut ca' ira. Win hwe ma'. Pijim' urut pahu' pain capijacon Iri' Jam ca awi ca' ira, je ca hwet urut pahu' ca'. Howa maho' jujun oro jam co Iri' Jam xi' ma hwe ma', co om quep xiho' taxi' nunuhu' ma'. Howa pin jun Iri' Jam co e' cara cwa', co quep nain pawin je macan' je oro com ca', co quep quep pi' pin nain oro carawa ca to nain ca' quem.

¹⁶ Om paxi' na ca tomi' in pin cocon oro wari' pain oro xijein macan' Iri' Jam pain cara pane. Om ca narain ho' tococwa pain ca howa ximama' nucucun pane. Xi querec pin' pan cocon pane ta.

¹⁷ Ane mi' tococwa pain ca querec pin' cocon pain ca xiram pa' nucun pane ne. Mi' tata pain xowi', mi' tata pain ca tarama' xo' ne oro caramaji xitot, mi' tata pain carawa ca cao' wa, mi' tata pain ca tomi' querec te tamana wa quem. Ac i ma' na ca tomi' cocon Paulo ma'.

¹⁸ Tomi' ac i ma' paxi' tata, ane om ha' pan caca ne. I'ina tamana tata Paulo con Barnabé pain ca tomi' tomi' na pin xun cocon ma', pain ca maho' jein ta cocon ma'. Aram aram tomi' tomi' na pin ac cocon na.

¹⁹ Ma' ac caca na oro judeu co maqui' nanain xijein cidade ma', maqui' nanain Antioquia ca pe nain Pisídia ma', maqui' nanain Icônio ma' quem. Ja' teretem ac tococwa na oro wari' ma'. Om na, ta howa huhun me ta tata, tomi' tomi' na pin ac tococwa na, to' to' ac cocon na pain pacun Paulo ma'. Coc ororo coc ororo, wara ca' na cacarain cidade ma', xin pin ac cocon na. Mi' pin tara ma' nonon.

²⁰ Ane coco' coco' mam' pin cocon co howa nonon Jeju ma' ne. Tequi' pe pin ac ca na, in mao ac cain na cidade. Xec pin iri na ne, maji ta ac con na Barnabé ma', mama' ac cacain na Derbe, je i ma' wixinain cidade ca mama' caca ma'.

Ca in mama' cacain Antioquia ca pe nain Síria

²¹ Tan' mama' iri nanain Derbe Paulo con Barnabé ne, pijim' pijim' ac cacain na capijacon Iri' Jam ca tomi' hwet napari' con Jeju. Mija ac caca na oro wari' co howa pin nana ma'. Ac i ma' ac i ma' nana, in mama' xi' ta ac caca na, in mama' ac cacain na Listra, je Icônio, je Antioquia ca pe nain Síria ma' quem.

²² Hwet iri tata co howa nonon Jeju pain oro cidade ma' ne, quep xiho' ac tococwa na pain ca howa nucucun. Hu ca' tata: Ta an to hwein ca howa wa me, howa cara jun Jeju ta ac tococwa na. To' i'ina tatarapari' oro wari' co om howa nonon Jeju ma' ac tococwa na. Quep em' xim paxi' tatarapari'. Je i ma' ira, na e' na pain ca jain jain iri' pain ca to' i'ina to' i'ina cacapari' ma', aram aram to ho' pin ac xun tara Iri' Jam ma', pain ca aram aram taramaxicon pe ho' toton cocon oro wari' nucun ta, ac i ma' na ca quep xiho' tococwa pain ca to' hwara' opa tococwa ma'.

²³ Ma' iri nana co howa nonon Jeju pain oro xijein cidade ca mama' caca ne, tora' mi' ac tococwa na cocon co querec wet nonon pain ca cut in xucucun ma'. Xuruxut tiquin' xi' urut iri nana ne, tomi' mam' xun Iri' Jam ta ac tococwa na. An to nanain ca cao' wa pain, tomi' mi' ac tococwa na con Taramaxicon nexi'. Querec wet roron caram cwa' co howa nenem cwa' nana.

²⁴ Xuruxut tiquin' ac caca na quem. Xuruxut tiquin' iri nanain Pisídia ne, hwet ac cacain na Panfília ma'.

²⁵ Tan' mama' iri nanain Perge ne, pijim' to ac cacain i cain na capijacon Iri' Jam ca tomi' hwet napari' con Jeju. Tiquin' mama' ac caca na quem. Xuruxut xuruxut hwet ac cacain na Atália ma', ca pe cacarain cote ne com ma'.

²⁶ Corom mama' iri nanain mam' horoho wa pain Atália ma' ne, horoho in mama' ac cacain na Antioquia. Je i cain ca to pan caca oro win howa caca co tomi' mi' nonon con Iri' Jam pain ca xo' pijim' xi' caca pain cara pane, pain ca momon cwa' Paulo con Barnabé cwa' Coturut Iri' Jam, quep xiho' roron pain ca pijim' mama' cacain oro xijein cidade ta cocon pain cara pane. Je win in qui' ca Paulo con Barnabé ma'. Xi om ne ca pi' pin ara ne ca taramaja nucucun ta.

²⁷ Tan' mama' iri nanain Antioquia ne, tomi' cut in ac tococwa na co howa nonon Jeju ma'. Tomi' hwet ac tococwa na pain oro ca ara pan ca Iri' Jam ma', pain ca quep xiho' cocon pain ca pijim' cacain capijacon ma', je pain ca mi' pan tococwa pain ca howa wa oro wari' co om judeu nana ma' quem.

²⁸ Mon to wet ac caca na. Mija na xec nein ca momon to ho' cocon oro win howa caca pain Antioquia pane.