Atos 13 - Tradução Bíblica Pacaas Novos

Ca pijim' mama' tatarain pira tococwa Barnabé con Saulo

¹ Ma' nana wari' co cut in to xucucun pain Antioquia ma', pain ca howa cocon Jeju pane. Ma' nonon co tomi' hwet nanain xocori capijacon Iri' Jam ma', ma' nonon co ca' na nonon con Jeju quem. Mo nana: Barnabé ma'. Simeão co Níger na xijein wixicon ma'. Lúcio co maqui' nain Cirene ma'. Manaém co win ma' ne non taramaxicon Herodes pain ca hwijima' nucucun pane. Ma' na Saulo ma' quem.

² Ac i ma' ac i ma' nana, cut in ac xucucun na pain ca tomi' xun cocon Iri' Jam. An to xin ca cao' wa, ma' ta momon tomi' e' xun Iri' Jam ta nana, ara ac cacain na. Pain ca tomi' cocon ma', tomi' ho' pan ac cocon na Tamataracon Iri' Jam: An to ni mi' xine con Barnabé con Saulo ma'. Ma' na ca taramaja wa ca ara je toton ta. Ac i ma' na ca tomi' cocon Tamataracon Iri' Jam.

³ An to an to tiquin' ac cacain na ca cao' wa pain ca momon tomi' tomi' cocon Iri' Jam ma'. Quep ac tococwa na pain winacocon Barnabé con Saulo. Mama' je, ara jein ca taramaja wa ca ara je cuhu' Iri' Jam ta ac tococwa na.

Ca mama' cacain Chipre Barnabé con Saulo

⁴ Mama' ac caca na Barnabé con Saulo. Xi om ne ca mama' je pan ara cocon Tamataracon Iri' Jam ta. Xuruxut xuruxut hwet ac cacain na cacarain com pain Selêucia, je i ma' wixinain cidade pain cacarain com. Corom mama' ac cacain na mam' horoho wa, horoho mama' ac caca na. Horoho horoho hwet ac cacain na xixi pan nein macan' Chipre.

⁵ Piri' mama' ac cacain na wapit pain Salamina ma', je i ma' wixinain cidade ca pe nain cacarain com pain Chipre. Tan' mama' iri nanain i cain ne, pijim' xin capijacon Iri' Jam ta ac caca na, corom mama' ac cacain na oro xirim ca cut in to xucucun oro judeu. João Marcos ma', co ja' ja' nonon ma', quep xiho' nonon quem.

⁶ Xuruxut mama' ac cacain na oro xijein cidade pain Chipre ma'. Aram aram tan' mama' ac cacain na xijein cidade. Pafos na wixinain. Mam' pe nonon pain i cain wari' co judeu. Barjesus na wixicon. Ara xirac nonon oro wari'. Tomi' ximao na quem. Tomi' hwet inain capijacon Iri' Jam ta paxi' na ira. Ane mixein ca ne, om ca capijacon Iri' Jam ne ca tomi' hwet ca pane.

⁷ Barjesus ma', taxipa' non Sérgio Paulo ma', co taramaxicon pe ho' nonon oro wari' nein Chipre ma'. Taxi' tamana na Sérgio Paulo ma', taraju pa' nain oro carawa. Taraju xitain capijacon Iri' Jam na na quem. Je ca harahap je ta tococwa Barnabé con Saulo ma'.

⁸ Ane ari con Barnabé con Saulo co ma' co ara xirac ma' ne, Elimas ma'. Je i ma' xijein wixicon Barjesus pain capijacocon oro grego ma'. Ari non Barnabé con Saulo. Noc tata pain ca pijim' mi' cocon pain capijacon Iri' Jam taramaxicon ma'. Ta howa mon Jeju me ta pan non taramaxicon ma' quem.

⁹ Tamataracon Iri' Jam ma', pe ho' mip pan ac con na Saulo ma', co Paulo na xijein wixicon. Pe ho' mip iri ta Paulo ne, noro mip ac con na co ara xirac ma'. Tomi' ac con na:

¹⁰ An xiho' a ximon Caxicon Jam ta! Ari ari pi' pin main oro ca awi wa ta. Iri' waximain ca mixein wa pain ca pan tem wa a xima. Je xi tomi' napat maho' qui' mon Iri' Jam pain ca iri'o' nucun quem? Mixein taxipa' a xima, tomi' ni ca' a ximain capijacon ca iri'o' ta na ca tomi' carapita con ma'.

¹¹ Tomi' noro ac con na quem: Wap ho' terem Iri' Jam ta. Om pin tara tucum. Om ta ha' quem pain ca querec hap mami' ma quem, om om tara. Ac xim tara xec ma' pum, om ta ha' quem pain ca querec mami' main ca toha ca xina ma' quem. Maqui' pa' iri terem xec nein ca querec mami' ra ta nem Iri' Jam ne, querec mami' ac ma tara ta. Ac i ma' na ca tomi' noro con ma'. Om pin hap ac ne na tocon. Ac ca tatep pa' con na ca mixem ne tain'. Xom mapam' xut ximao ac ca na, ma' xirapa' wari' co coc papan napa' na na.

¹² Taramaxicon ma', querec iri nain i ma' ca ara non co ara xirac ma' ne, howa pin ac con na Jeju. Wa wa tamana nain capijacon Iri' Jam con Taramaxicon nexi' ma', ca pijim' hwet ca Barnabé con Paulo ma'.

Ca mama' cacain xijein Antioquia ca pe nain Pisídia

¹³ Paca' ac cacain na Pafos. Wirico Paulo, wiricoco oro win ma' ca ma' quem, horoho mama' ac cacain na Perge, je i ma' wixinain cidade ca mama' caca ma'. Pe nain xijein macan' Perge ma', pain Panfília. Tan' mama' iri nanain Perge ne, paca' xuhu' ta ac cocon na João Marcos, in mao ac cain na Jerusalém.

¹⁴ Xuruxut tiquin' ac caca na Paulo cocon oro win ma' ca quem. Paca' nanain Perge, xuruxut mama' ac cacain na xijein cidade ma', Antioquia na wixinain. Xijein Antioquia ta. Om na Antioquia ca wara to caca pane, xijein Antioquia ca xo' hwet caca ma'. Pisídia na wixinain macan' ca pe ne. Sábado pin iri na ne, pain ca xao to wa taxipa' cacain ximicocon oro judeu ma', corom mama' ac cacain na xirim ca cut in to xucucun ma'. Xao to ac caca na.

¹⁵ Pe nain i ma' wari' co noro mi' nonon pain ca xirao' nucun Moisés oro wari' co xao to nana ma'. Noro mi' nonon pain ca xirao' nucucun oro profeta ma' quem. Pi' pin iri na ca noro nucun ne, tomi' ac caca na co querec wet taxipa' nonon pain ca cut in xucucun ma', tomi' ac cocon na wari' ma': Mo tomi' ron Paulo cocon oro win ma' ca ma': Mo ta ma' cuhu' ca pijim' wa ma' oro win ma' nuxut, mo ta hu xim maparut ma', pijim' mi' xut pain me roron ta nonon. Tomi' ac tococwa na.

¹⁶ Pijim' ta' e' ac ca na Paulo. Tequi' pe na, an piri' ac cain na micon. Tacana to je ta tata. Pijim' xim inuhu' ta oro win judeu ta'. Wahu' quem, pain ca om judeu hwe ma', pain ca tomi' ha' taxipa' hun Iri' Jam ma' quem. Taraju wet xine me ac tococwa na.

¹⁷ Iri' Jam ma', co howa iri' pain ca wari' nein Israel iri' ca', wirico co tora' nonon oro hwanana nexi' pain cara pane. To' mija pin ac tococwa na pain ca tatirim to cacain Egito pane. Pain pin iri na cocon ne, mam' quep xiho' ac tococwa na pain ca hwara' opa tamana nucun, o in ca' ac tococwa na pain i cain pane.

¹⁸ Tan' mama' iri nanain mahweri ne, xuruxut ximama' ac caca na. Ac ca ma' 40 ne na cawaxi' pain ca xuruxut ximama' cacain mahweri pane. Wijimi paxi' nonon Iri' Jam quem, ane om an to pan tococwa pane ne. Querec wet querec wet tata pane.

¹⁹ Aram aram mi' ac tococwa na pain macan' pain Canaã quem, je i ma' wixinain macan' ca mi' tococwa pane. Ma' mija paxi' nana oro waximain macan' pain Canaã. Ma' 7 na ca xucun wari' nucucun pane. Ane quep xiho' pan cocon hwanana nexi' Iri' Jam ne. Mi' ac tococwa na pain ca to' quiji' pin cocon oro wari' nein Canaã. To' om pin ac cocon na, mene pin ac cacain na macaracocon. Iri' macaraxi' ac cacain na.

²⁰ Pain ca xo' mama' ten qui' cacain Egito pain cara pane, pain ca aram aram in ca' cacain Egito je pain ca to' quiji' pin cocon oro wari' nein Canaã quem, ac ca ma' 450 pin ne na cawaxi' pain ca aram aram macaraxi' pin cacain Canaã. To pin iri nanain macaracocon pain Canaã ne, mi' pan ac cocon na cocon oro juiz Iri' Jam. Juiz pin na xucun, mi' pin ac ca na. Ja' corom mao ac ca na xucun, mi' pin ac ca na co ma' quem. Ja' corom mao ac ca na xucun, mi' pin ac ca na quem. Cono' cono' iri nana ne, ma' pin ac ca na profeta Samuel pane.

²¹ Tomi' ac cocon na Iri' Jam oro hwanana nexi': Ma' xiraparut na urut con iri' taramaxicon co rei ta nonon. Na ra ac ca na, mi' ac tococwa na con panxica Quis pane, Saul na wixicon panxica Quis. Hwanana ne non Benjamim Saul. Taramaxicon pin ac ca na. Ma' 40 na cawaxi' pain ca taramaxicon ca Saul pane.

²² Aram aram tomi' pan ac con na Saul Iri' Jam: Noc pin inem pain ca taramaxicon mami' wa ta non. Taramaxicon pan tara Davi ta non. Tomi' ac con na: Querec pin' inon Davi panxica Jessé cwa'. Hohot tamana napa'. Taxi' inon pain ca ara cara tain cain oro ca param ne ta, ac i ma' na ca tomi' ca Iri' Jam con Davi pane.

²³ Wanxi' tiquin' wanxi' tiquin' iri nana waram winacon Davi co wanxi' tiquin' nana pa'ao' ne, aram aram pan' qui' ac ca na Jeju. Wirico Iri' Jam co mi' napari' con. Mi' napari' con Jeju pain ca wari' nein Israel iri' ca'. Ma' ta to' witan ca' xim cuhu' pain ca caracat nuhu' ta napari'. Win ne ca wara tomi' pe mi' ton con Davi cara pane ta na.

²⁴ Om om wet iri na ca pijim' ca Jeju ne, wara pijim' na João pane. Mija nana wari' nein Israel co taraju nonon João pain ca pijim' nucun pane. Pijim' ca' tata: Na e' na pain ca cwirin' cwirin' pi' pin hwein ca caracat nuhu' ta. Ja' ac hwe com tara ta tata pane.

²⁵ Maqui' pin ta' iri na xec nein ca taramaja taramaja om pin ca João ne, tomi' ac tococwa na oro wari': Cain' ca coromicat mi' mahu' quem? Wirico tara co winim' iri' cwa', co wara tomi' pe mi' capari' Iri' Jam pane mahu' ra? Ac i ma' na ca coromicat mi' mahu' ra? Om ca wirico ta' ta. Wara maqui' paxi' ina, ane maqui' ta' pa'ao' ca xucun co hwara' opa tamana ma'. Iri' wari' na. Om ca hohot ne pain ca tacom' mi' ton pain macorinain caji caximacon ma', xi iri' wari' ta' ta na ca tomi' ca João pane.

²⁶ Taraju wet je me xere ac tococwa na. Wahu' pain ca waram winacon Abraão hwe ma', wahu' pain ca tomi' ha' taxipa' hun Iri' Jam pain ca om judeu hwe ma' quem, taraju wet je me. Iri' Jam ma', mi' pan napari' pain ca taraju wa capijacon con Jeju. To' witan ca' xim nuhu' pain ca caracat nuhu' Jeju ta napari'.

²⁷ Om ca querec pin' cocon Jeju oro wari' nein Jerusalém pane. Om ca querec pin' cocon oro taramaxicon nucucun quem. Om tara wirico co to' witan ca' xim napari' pain ca caracat nexi' ta nonon pane. Noro taxipa' paxi' nanain oro ca xirao' to nucucun oro profeta pain oro sábado pain ca xao to wa cacain ximicocon, ane om taraju pa' cacain ne. Mi' pin ma' tara ne iri nonon Jeju ne, ara pin ac cacain na ca xirao' to caca oro profeta con pane.

²⁸ Om paxi' na ca mam' cacain ca pan tem wa con, ane tomi' tomi' na cocon Pilatos ne. Na e' na pain ca to' pa' pin jun ta momon oro soldado nem ta nonon.

²⁹ Ara mi' ara mi' pi' pin iri nonon pain oro ca xirao' to nucucun oro profeta ne, pain ca tatatain mi' jun pain pana tococwa oro soldado nucun Pilatos pane, an quiji' ca' ac cacain na curucun pain pana, an corom pe ac cacain na pain manain pacun quem.

³⁰ Ane to' e' mami' con Iri' Jam ne.

³¹ Querec ac tocwa na quem. Mija na xec pain ca hwet pa' ho' hwet pa' ho' tococwa co taxipa' ca pane, co ja' ja' nonon pain ca maqui' wi cocon pain Galileia pane, pain ca tan' mama' cacain Jerusalém pane quem. Wiricoco co tomi' hwet nonon con oro wari' cwa'.

³² Je ca pijim' urut pahu' ca' ac tococwa na. Pijim' mi' urut pahu' pain capijacon Iri' Jam ca tomi' hwet napari' con Jeju ca', pain ca to' witan xim capari' ca'. Capijacon Iri' Jam ca wara tomi' pe mi' tococwa oro hwanana nexi' pane,

³³ je ca win hwet pin ne con. To' e' mami' non Jeju Iri' Jam. Ac i ma' na ca ara pin cain oro ca wara tomi' pe nucun pane. Ara mi' pan napari' pain, pain ca waram wina cacapari' oro hwanana nexi' ca' quem. Win ne ca xirao' pe xine pain capijacon ma', pain Salmo capítulo 2 ma'. Ca' na con: Panxita' inem. Je ca an hwet mi' toton oro wari' pain xec ca'. An hwet mi' inonon pain ca iri' Te mapa' ca'. Ac i ma' na ca xirao' pe xine ca tomi' nucun pain capijacon Iri' Jam.

³⁴ Iri'o' na ca to' e' mami' con Jeju Iri' Jam pane. Iri'o' na ca nain ho' con pain ca cunu mao ne curucun pain manain pacun pane quem. Je ca tomi' mao ne ca xirao' pe nucun profeta pane, pain ca xirao' mi' cocon oro hwanana nexi' pane. Ca' na cocon: Quep xiho' cara xuhu', om ca mixein ta'. Win ne ca wara tomi' pe mi' ton Davi cara pane, pain ca quep xiho' cara xim, om ca mixein ta' ta ton pane. Ac i ma' na ca wara tomi' pe mi' tococwa pane.

³⁵ Ma' na wirain ca xirao' pe wa pain capijacon Iri' Jam quem: Nain ho' xim mapa' pain ca cunu mao ne cwere. Xi miri'om xim mapa' pain ca Iri' Wari' ta' ca', pain ca win xumu xim pain ca tama' tomi' ha' xim ca'. Ac i ma' na ca tomi' con Iri' Jam Davi pane.

³⁶ Pain ca xirao' pe cain i ma' Davi pane, pain ca nain ho' xim mapa' pain ca cunu mao ne cwere ta ca pain ca xirao' pe nucun pane, taxi' urun pain ca om tomi' mi' pan xucun. Xi om ne ca mi' pin pan ara ca pane ta. Ara ara pi' pin iri nain oro ca taramaja nucun ca ara ra con Iri' Jam pane, mi' pin ac ca na, an corom pe ac xine na curucun pain manain pacun ca cut corom to xine curucucun oro hwanana nucun pane. Cunu mao ac ne na curucun quem.

³⁷ Jeju ma' iri na ne, om ca cunu mao ne curucun. Mi' pin iri na ne, to' e' mami' ac con na Iri' Jam.

³⁸ Je ca tomi' xuhu' ca' xere ac tococwa na. Na e' na pain ca taraju pa' hwein ca pijim' hwet urut pahu' ca'. Mo ta howa hun Jeju ma', pain ca mi' pin caho' cuhu' ma', xic am pin ac cain tara ca caracat nuhu' Iri' Jam.

³⁹ Taraju pa' jein i ca' quem: Wari' co howa non Jeju ma', to' hohot pin ac tocwa na. Ac ca tomi' pan con na Iri' Jam: Hohot pin mapa'. Querec querec ac wari' co om caracat ta mapa', xi om ne ca howa ara mon Jeju ta non. Oro ca xirao' nucun Moisés cara pane, tomi' ha' cara paxi' xixin. Ane om to' hohot taxi' capari' ne. To ho' cara napari' ca caracat nexi' ta.

⁴⁰ Je ca tomi' xuhu' ca': Ma' tara xumuhu' me, ma' ta om hwet cuhu' ca xirao' to cacain ca tomi' nucun Iri' Jam oro profeta pain cara pane.

⁴¹ Ca' na cocon pane: Wahu' pain ca tomi' napat mahu' ma', taraju wet xine ta. Querec iri jein carawa ca ara ta' ta' pain oro xec nein ca e' e' wet nuhu' ne, joc herehe ac ne tara tucuhu'. Ma' paxi' tara wari' co tomi' hwet xim nuhu' pain, ane om howa xin hwein ca tomi' nucun ne. Joc herehe e' tara tucuhu', cono' pin ac hwe tara ta. Ac i ma' na ca xirao' to cacain ca tomi' nucun Iri' Jam oro profeta pane ta nonon Paulo pain ca pijim' mi' cocon pain capijacon Iri' Jam pane.

⁴² Hwerehwet ca' iri nanain xirim Paulo con Barnabé ne, pain ca hwerehwet ca' cacain xirim ca cut in to xucucun ma', tomi' ac caca na oro wari' co taraju nanain ca pijim' nucun Paulo: In qui' je pain xijein sábado me. Pijim' mami' xut pain oro ca pijim' maparut ca' ne nonon.

⁴³ Hwerehwet hwerehwet pi' pin ac caca na co cut in nana ma'. Ma' mija ac caca na co ja' ja' nonon Paulo con Barnabé quem. Co judeu nana ma', co om judeu nana co an xiho' e' nonon oro judeu pain ca howa nucucun ma' quem, ja' ja' ac cocon na Paulo con Barnabé. Tomi' pan nonon Paulo con Barnabé ma' quem: Howa howa tiquin' jein capijacon Iri' Jam ca tomi' hwet napari' pain ca xiram pa' capari' ca' nonon.

⁴⁴ Sábado pa' mami' ac cocon na. Mija nana wari' co cut in xucucun ma'. Ac ca maqui' maqui' pi' pin caca na oro wari' co to nanain cidade ma'. Taraju xin capijacon Taramaxicon nexi' ta nana.

⁴⁵ Querec iri nana oro taramaxicon nucucun oro judeu ma' ne, pain ca maqui' mija caca oro wari' ma', mana' tamana ac caca na. Noc mi' nonon Paulo con Barnabé pain ca hwet mija pan cocon oro wari' ma'. Tomi' napat nonon, tomi' in pin nonon Paulo pain ca pijim' nucun ma' quem.

⁴⁶ Tomi' mip pan ac cocon na Paulo con Barnabé ma'. Om ca tomi' jin' camain' caca, tomi' ca' tata: Na e' na pain ca pijim' cain' xihwe pain ca judeu hwe ma'. Je ca pijim' urut pahu' ca', pijim' urut pahu' pain capijacon Iri' Jam con Jeju. Ane noc hwein ne. Je ca querec pin' xihwe pain ca om na ne pain ca mi' xihwe pain ca e' cara wa ta. Je ca in ca' xim urut pahu' ca'. An to pin xut pahu'. Pijim' e' xut cocon co om judeu nana cwa'.

⁴⁷ Je ca tomi' mip caparut Iri' Jam cwa', pain ca xirao' pe cain capijacon profeta Isaías cara pane. Tomi' ca' naparut: Ac naran ma pata'. Toha mi' roron co om judeu nana. Ma' ta taraju pa' taraju pa' pi' pin caca oro wari' pain oro xijein macan' pum. Taraju pa' tatarain capija pain ca to' witan toton ta' ca'. Ac i ma' na ca tomi' caparut ca'. Ac i ma' na ca tomi' cocon Paulo ma'.

⁴⁸ Taraju iri nanain i ma' co om judeu nana ma' ne, tomi' querec te tamana ac caca na. Awi tamana na capijacon Taramaxicon nexi' ta ac caca na, howa howa pi' pin ac caca na co wara tora' ca Iri' Jam ma', co ma' totoron ca om pi' ra ha' ne ca e' wa ca' ca ma'.

⁴⁹ Pijim' pijim' tiquin' ac xine na capijacon Iri' Jam pain oro xijein cidade ma'.

⁵⁰ Ane noc cacain i ma' oro taramaxicon nucucun oro judeu ma' ne. Ja' teretem ac tacacama na oro narima' co hwara' opa nana ca nari nequequem, co an xiho' nonon oro judeu pain ca howa nucucun ma'. Ja' teretem tata co hwara' opa nana ma' quem. Mana' hwerehwet pin xun Paulo con Barnabé ta ac tococwa na. Paca' jein cidade nuxut ca' ac tococwa na, mana' mana' hwerehwet pin ac tococwa na.

⁵¹ Paulo con Barnabé ma', wap camara' ac cacain na ximirinain macaracocon pain caximacocon ma' quem. Ma' ta querec pin' xujuhu' pain ca pan teretem nuhu' pain ca noc hwein ca taraju wa capijacon Iri' Jam ta tata. Paca' ac cacain na cidade nucucun pain Antioquia ma', mama' ac cacain na xijein cidade cain, Icônio cain.

⁵² Caram ma' co howa pin nonon Jeju pain Antioquia ma', tomi' querec te tomi' querec te tiquin' nana pa'ao'. Pe ho' mip nonon Tamataracon Iri' Jam quem.