Apocalipse 9 - Tradução Bíblica Pacaas Novos

¹ On ac cain na caji taracom nucun xucun ma', co ja' corom mao non ma', ma' 5 pin ac caca na jam co on nanain ma'. On iri nain ne, querec ac ton na co ma' co ac pijo' ma', co wara pan' hwet nain macan'. Mi' ac tocwa na pain ca mam' pa xine capijain cote ne man ca om tawirinain.

² Pa pin iri nain ne, hwet qui' ac ne na tain'. Mija na tain', ac tajain iri' cote ne xe na. Mixem pin ac ne na tocon xina je pawin ma'. Xi mija ara ne tain' ca hwet qui' nain cote ne man ca om tawirinain cain ta.

³ Hwerehwet qui' ac cain tain' na caxicon can ma'. Toin wawaran mama' ac cain na oro xijein macan'. Mi' ac tocwa na pain ca tan caxi wa quem. Ac ca tan tan qui' capari' cun cwa' na ca tan nucun.

⁴ Tomi' ac tocwa na: Ta cao' main oro tononoin je pana je oro ca oin' ximama' wa me. Tan caxi e' roron oro wari' co om xirao' wawa pain jitaracocon pain ca mam' xirao' nucun Iri' Jam ta.

⁵ Ta to' parapa' momon me ta ac tocwa na. Tan caxi e' roron, caxi tamana tatara pum. Ma' 5 tara panawo' pain ca to' caxi momon ta na ca tomi' tocwa oro caxicon can ma'. Tan iri tata oro wari' ne, caxi tamana ac caca na. Ac ca caxi caxi qui' ca cun na pain ca caxi cocon ma'.

⁶ Pain oro xec pain ca tan caxi xun tococwa oro wari' ma', jain jain tamana tatara. Cono' xixi' na paxi' tatara, om ta ha' cocon ca cono' wa. Param tamana paxi' tatarain ca cono' wa, om ta ha' cocon ta.

⁷ Oro caxicon can ma', an xiho' nain cavalo ca wara awori xo' ma', pain ca mixita xi' caca oro waximain ma'. Ma' non carawa pain winacon ma', ac caji waji' nucun taramaxicon na, ca mam' toto pa' xine pain ouro ma'. Ac tocon wari' na tocon ma' quem.

⁸ Quiji' non xun quem, ac tenenequem narima' na. Ac xicon leão na xicon ma' quem.

⁹ Ma' na carawa pain quimacon ma', ac tocoxicon paxi' na, ac arain too na con. Pe caho' nain quimacon. Awaran iri na tapaxicon ne, ac ca iriman iriman ne ca mija ne cavalo pain ca cuc nein oro carroça ma', pain ca mixita xi' caca oro waximain ma', ac i ma' na ca iriman ne tapaxicon.

¹⁰ Ma' na cahurucun, ma' na xiquinacon quem, ac xiquinacon cun na. Je xiquinacon ca mam' to' jain jain tamana xun tococwa oro wari' ma', pain ca tan caxi xun tococwa ma'. Ma' 5 tara panawo' pain ca to' jain jain tamana xun tococwa.

¹¹ Ma' na caxicon jam co taramaxicon pe ho' non quem, wirico caxicon jam co taramaxicon pe nain cote ne man ca om tawirinain. Abadom na wixicon pain hebraico ma', je i ma' wixinain capijacocon oro judeu. Pain capijacocon oro grego ma' iri na ne, Apoliom na wixicon.

¹² Je i ma' carawa ca om awi ca hwet pa' cain' nonon oro wari' pain macan' ca', pain ca to' ximin tamana cain' cocon ma'. Ame hwe e', ma' 2 ma' 2 wet na carawa ca om awi ca hwet pa' ton nonon quem.

¹³ On ac cain na caji taracom nucun xucun ma', co ja' corom mao non ma', ma' 6 pin ac caca na jam co on nanain ma'. On iri nain ne, taraju ac tain na ca tomi' wa ma', ca maqui' nain ca puxu xirac nein pana ca tom tain' pe xine waraqui pana ca hu awi ma', ca mam' quep xine pain ouro ma', ca pe quima hwet non Iri' Jam ma'.

¹⁴ Tomi' ac tocwa na jam co xo' on nain caji taracom ma': Tacom' horohot pin roron oro jam co ma' 4 nana ma', co pao' to ja' pan wawa pain cacarain cote ne iri' cwerein com ma', ca Eufrates ne wixinain ma'. Ac i ma' na ca tomi' nucun ca maqui' nain ca puxu xirac nein pana ma'.

¹⁵ Tacom' horohot pin ac tococwa na. Wara awori xo' nana, xi om ne ca wara an pe xo' pan ara cain ca coromicat nucun Iri' Jam pane ta. Wara an pe xo' nain jamicon xina pain xec con panawo' pain cawaxi' ma' quem, pain ca to' parapa' um terço pin xun tococwa oro wari' ma'.

¹⁶ Mija nana oro soldado nucucun quem. Ma' 200 milhões nana ta, ac i ma' na ca taraju ta' pain ca tomi' hwet cain ca mija nucucun ma'.

¹⁷ Querec inonon pain ca tohwein' ne ca', querec inain oro cavalo nucucun, querec inonon co xao to nanain quem. Oro arain too ca to caho' nain quimacocon ma', paca' na, ac ca paca' nein xe na. Tum na, ac ca tum nein pacun ca awi ma' na, ca safira caca oro wari' ma'. Coxic na quem, ac ca coxic nein pacun ca weo ma' na, ca enxofre caca quem. Ac winacon leão na winain cavalo nucucun ma'. Hwerehwet qui' nain capijain xe je tain' je pacun ca weo ma' quem.

¹⁸ To' parapa' um terço pin ac tococwa na oro wari'. Mam' to' parapa' tata pain oro ca xirac wa ca ma' 3 ma', ca hwerehwet qui' nain capijain cavalo ma', je tain' pain xe pain pacun ca weo ma'.

¹⁹ Pe ho' ara xi' nain capijain ca hwara' opa nein ma', pe ho' nain cahwerein ma' quem. Ac caxicon em' na cahwerein, ac winacon em' na pain tamain quem. Je ca mam' quep em' tococwa oro wari'.

²⁰ Oro xucucun wari' co om to' parapa' wawa pain oro ca xirac wa ma', witan ca' paxi' nanain, ane om cwirin' pin cacain oro ca pan teretem nucucun ne. Om ca pe torotop mi' querec te maho' cocon oro caxicon jam, om ca pe torotop mi' querec te maho' cacain oro ca Iri' Jam xi' ma caca ma' quem, ca mam' quep pan caca pain ouro je bronze je pana je pacun ma' quem. Om paxi' na ca querec ac ne, om paxi' na ca taraju ac ne, om paxi' na ca xuruxut ac ne quem, ane pe torotop mi' querec te cara cacain ne.

²¹ Om ca cwirin' cacain oro ca ara caca ma', pain ca to' parapa' cocon oro wari', je pain ca ara xirac cocon, je pain oro ca quep ximama' xucucun, je pain ca an noc xa cacain caramaxicocon oro win ma' caca quem. Om ca cwirin' camain' caca ta.