Apocalipse 8 - Tradução Bíblica Pacaas Novos

Ca pa xine tawirinain ca hupa' caho' nein tapari carawa ca joc top ma'

¹ Pa pin iri ta tawirinain ca ac catocwan' ca hupa' caho' nein tapari carawa ca joc top ma' ne, ma' 7 pin ac ne na ca pa nein. Tacana to pin ac caca na oro co to nanain pawin. Tacana to tacana to pi' pin nana, om ca tomi' camain' caca. Ac ca ma' 30 ne na minuto nein ca om tomi' camain' caca ma'.

² Querec ac toton na oro jam co taramaja mi' nonon Iri' Jam ma', pain ca coco' quima hwet cocon ma'. Ma' 7 nana. Mi' mi' xam' ac tococwa na pain caji taracom.

³ Querec ac ton na xucun jam co taramaja mi' non Iri' Jam. An nain ouro ca mam' tom pe xine incenso ma'. Xut hwet ac cain na pana ca in ac pe tocwa Iri' Jam. Pe ja' pan nain. Cut mi' moin' pin ac tocwa na pain incenso. Moin' tamana na. Tomi' ac tocwa na: Tomi' xim iri tatarapa' oro wari' ne ne, win tom pe ac main tara incenso pain pana ca tom tain' pe xine ma', ca mam' toto pa' xine pain ouro ma', ca pe quima hwet nain ca mam' xao pe ne ca', ac i ma' na ca tomi' tocwa ma'.

⁴ Tom pin iri nain incenso jam co taramaja mi' non Iri' Jam ma' ne, piri' hwet ac con Iri' Jam na tajain. Piri' hwet wi nain ca tomi' nucucun oro wari' nucun ma' quem.

⁵ An ac cain na too ca mam' tom pe xine waraqui pana ma', cut ho' moin' ac cain na pain tirijein xe ca to nain pana ca in ac pe tocwa Iri' Jam, wixicaracao' camara' mi' ac cain na pain macan' ma' quem. Toroho mip ac ca na comerem, mija na. Coc irija' ac ca na, cocoroc ac ne na macan' quem.

Ca on xine oro caji taracom

⁶ Coco' xo' ac caca na oro jam co taramaja mi' nonon Iri' Jam ma', co ma' 7 nana ma', co cut nanain caji taracom ma'. On xin ac cacain na.

⁷ Xucun ma', co on cain' ta' ma', on ac cain na. On iri nain ne, wixicaracao' camara' mi' ac xine na pain macan' caji pacun nein xowi'. Wixicaracao' camara' mi' ta pain macan' xe ca joc wanan xine pain wic quem. Wiran um terço pin ac xine na macan', je oro pana, je oro tononoin ma'.

⁸ On ac cain na caji taracom nucun xucun ma', co ja' corom mao non ma', ma' 2 pin ac caca na jam co on nanain ma'. On iri nain ne, ma' ac ne na carawa ca xin pocom mi' wa pain cote ne com. Ac iri' cote ne pacun ca mao tamana pawin na. Wiran na. Wic um terço pin ac ne na cote ne com ma' quem.

⁹ Cono' um terço pin na oro carawa ca to nain com, pa caracat um terço pin ac xine na oro mam' horoho wa ma' quem.

¹⁰ On ac cain na caji taracom nucun xucun ma', co ja' corom mao non ma', ma' 3 pin ac caca na jam co on nanain ma'. On iri nain ne, pan' qui' ac cain pawin na cote ca pijo'. Weo tamana na xe nucun. Pan' mao um terço pin nain oro iri' cwerein com je oro ca hoi hoi ne com ma' quem.

¹¹ Ma' na ca o' ma' tocwa, To' Wijein' na wixicon. Wijein' um terço pin ac ne na oro com ma'. Mija ac caca na oro wari' co cono' nana quem, xi toc ara cacain ca wijein' nein com ta.

¹² On ac cain na caji taracom nucun xucun ma', co ja' corom mao non ma', ma' 4 pin ac caca na jam co on nanain ma'. On iri nain ne, to' em' um terço pin ac tocwa na xina con panawo' con oro pijo'. Mixem um terço pin na xina pain xec, mixem um terço pin na panawo' con pijo' pain xim quem.

¹³ Noro noro wet inain, taraju ac ton na wajo co ho pe pawin. Tomi' mip ac ca na: Ximin tamana tatara oro wari' ta. On iri tatarain caji taracom oro xucucun jam co taramaja mi' nonon Iri' Jam ma' ne, co ma' 3 nana ma', co om on querec nanain caji taracom nucucun ma', ximin tamana ac caca tara oro wari' co to nanain macan' ma', pain ca maqui' pa' toton cocon carawa ca om awi. Wa inonon me, wa inonon me, wa inonon me, ac i ma' na ca tomi' mip ca ma'.