Apocalipse 7 - Tradução Bíblica Pacaas Novos

Ca xirao' tococwa pain jitaracocon oro wari' nucun Iri' Jam

¹ Pa 6 pin iri ta ca hupa' caho' nein tapari carawa ca joc top ma' ne, querec ac toton na oro jam co taramaja mi' nonon Iri' Jam. Ma' 4 nana. Coco' to nanain oro cacarain macan'. Pe nain ca maqui' ac ca xina xucun, pe nain ca corom mao ac ca xucun, pe nain xijein quiricon xucun, pe nain xijein quiricon xucun ma' quem. Quep xat caho' nanain hotowa. Ma' ta om nuru pa' nein macan' je oro cote ne com je oro pana ta nanain.

² Querec ac ton na xucun jam co taramaja mi' non Iri' Jam. Piri' ca' nain ca maqui' ac ca xina. An nain ca mam' xirao' nucun Iri' Jam co e' cara. Merem mip ac ca na, merem mip tata oro jam co taramaja mi' nonon Iri' Jam ma', co ma' 4 nana ma', co to' em' jein macan' je oro cote ne com je oro pana ta wawa ma'.

³ Ame hwe e', ta to' em' querec hwein macan' pain oro cote ne com pain oro pana me ta ac tococwa na. Xirao' cain' xut pain jitaracocon oro co taramaja mi' nonon Iri' Jam nexi' cwa', to' em' pin ac hwein tara macan' je oro cote ne com je oro pana ta ac tococwa na.

⁴ Taraju ac ton na co tomi' hwet nain ca mija nucucun ma', co xirao' wawa pain ca mam' xirao' nucun Iri' Jam pain jitaracocon ma'. Ma' 144.000 nana ta na. Wari' nucucun oro waram winacon Israel pi' pin nana ta na.

⁵ Ma' 12.000 nana waram winacon Judá. Ma' 12.000 nana waram winacon Rúben. Ma' 12.000 nana waram winacon Gade.

⁶ Ma' 12.000 nana waram winacon Aser. Ma' 12.000 nana waram winacon Naftali. Ma' 12.000 nana waram winacon Manassés.

⁷ Ma' 12.000 nana waram winacon Simeão. Ma' 12.000 nana waram winacon Levi. Ma' 12.000 nana waram winacon Issacar.

⁸ Ma' 12.000 nana waram winacon Zebulom. Ma' 12.000 nana waram winacon José. Ma' 12.000 nana waram winacon Benjamim. Ac i ma' nana oro waram winacon Israel co xirao' wawa pain ca mam' xirao' nucun Iri' Jam pain jitaracocon ma'.

Oro wari' co to nonon wom co towo'

⁹ Xirao' pin iri tata pain jitaracocon oro waram winacon Israel ne, noro ac ta' na, querec ac toton na oro wari' pain ca cut in tamana nucucun. Mija nana wari' ta, om ca tomi' ac tococwa, xi paric caca ta. Maqui' nanain oro xijein macan'. Xucun wari' xucun wari' pi' pin nana, to ni ca' nonon oro xucucun wari' pain macaracocon, capija ni ca' xucucun quem. Coco' quima hwet nanain ca mam' xao pe pe ca Iri' Jam co Iri' Taramaxicon ma', coco' quima hwet nonon co ma' co ac Wijimain Taramaji Ovelha ma' quem. To nonon wom co towo', cut nanain tahot pain micocon quem.

¹⁰ Merem mip ac caca na: Tomi' querec te xun Iri' Jam nexi' cwa', co xao pe pe nain ca mam' xao pe nucun ma', Tomi' querec te xun co ma' co ac Wijimain Taramaji Ovelha ma' quem. Wiricoco nana co to' witan nanapari' ta. Ac i ma' na ca merem mip caca ma'.

¹¹ Oro jam co taramaja mi' nonon Iri' Jam ma', coco' coco' mam' pin nonon pain ca mam' xao pe pe ca ma'. Coco' coco' mam' pin nonon xucucun taramaxicon ma', coco' coco' mam' pin nonon caram ma' co e' nana ma', co ac jam paxi' nana ma', co ma' 4 nana ma'. Pe torotop mi' ac cacain na ca mam' xao pe nucun ma', ca camara' tucu hwet mi' ac cacain na macan' ma', pe torotop mi' querec te ac cocon na Iri' Jam ma' quem.

¹² Tomi' ac caca na: Amém, iri'o' na ca tomi' urut pum ca'. Wum co Iri' Jam ne urut cwa'. In ac cara xim urut pum. Tomi' hwet cara xim urut pain ca awi tamana nem. Querec pin' cara xim urut pum pain ca taxi' tamana ma ma'. Tomi' querec te cara xim urut pum pain oro ca ara mi' maparut ca'. Querec pin' cara xim urut pum pain ca awi tamana nem ma', je pain ca Iri' Taramaxicon ma ma', je pain ca hwara' opa tamana ma ma' quem. Amém, iri'o' na ca tomi' urut pum ca'! Ac i ma' na ca tomi' caca ma'.

¹³ Tomi' ac capa' na co ma' co win ma' ne nonon oro taramaxicon ma', co ma' 24 nana ma'. Cain' ca wari' caca caram cwa' co to nonon wom co towo' cwa'? Main ca maqui' caca quem? Ac i ma' na ca tomi' capa'.

¹⁴ Om ca taxi' toton ta taramaxicon. Tomi' hwet ne cocon ac ton na. Tomi' hwet ac capa' na: Wiricoco co jain jain tamana nana pain oro cawaxi' pain ca quep em' tamana tococwa pain ca howa cocon Jeju pane. Hohoc hohoc towo' pin nonon womicocon pain quicon co ma' co ac Wijimain Taramaji Ovelha ma'.

¹⁵ Je ca coco' quima hwet cacain ca mam' xao pe ca Iri' Jam ma' ac capa' na. In ac to nonon pain xiricon ma', pe torotop mi' querec te nonon pain xec, je pain xim quem. Co ma' co xao pe pe nain ca mam' xao pe nucun ma', pe ho' cara totoron, querec wet cara totoron quem.

¹⁶ Om ta pe' mami' caca, om ta toc xi' com mami' caca quem. Om ta jam' cocon xina, om ta xain camain' cocon xina.

¹⁷ Xi om ne ca querec wet xo' toton ara cocon co ma' co ac Wijimain Taramaji Ovelha ma', co pe ja' pan nain ca mam' xao pe ca Iri' Jam ma'. O mama' ac tococwa tara pain ca hoi hoi ne com ca mi' nain ca e' cara wa. Xiram pa' totoron Iri' Jam quem, xic cawain' xic cawain' pi' pin tarain comi tococon pain ca awaran nucucun ma'. Ac i ma' na ca tomi' capa' ma'.