Apocalipse 6 - Tradução Bíblica Pacaas Novos

Ca pa xine oro ca ac catocwan' ca hupa' caho' nain tapari carawa ca joc top ma'

¹ Querec ac ton na co ma' co ac Wijimain Taramaji Ovelha ma'. Querec inon pain ca pa cain ca hupa' caho' nein tapari carawa ca joc top ma'. Ma' 7 na ca hupa' caho' nein ma'. Pa ac cain na ca ma' cain' nein. Taraju ac ton na win ma' caca co e' nana ma', co ac jam paxi' nana ma'. Tomi' mip na, ac comerem na ca tomi' nucun. Hap ra ta ac ca na.

² Noro ac ta' na, pe quima hwet ac capa' na cavalo ca towo'. An nain temem' co ma' co xao pe nain. An pe mi' ac tocwa na pain winacon caji waji' nucun taramaxicon. Hwet mao ac ca na, ma' ta to' quiji' pin toton oro co noc nanapa' ta, win ta' pane na.

³ Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 2 pin ac ne na ca pa nein. Pa pin iri nain ne, taraju ac ton na wiracocon co e' nana ma', co ac jam paxi' nana ma'. Hap ra ta ac ca na quem.

⁴ Hwet qui' ac ne na wirain cavalo ma'. Paca' na. Co ma' co xao pe nain ma', mi' ac tocwa na pain ca hwara' opa wa, tomi' pan ac tocwa na: Ja' teretem pin roron oro wari' pain oro xijein macan' ma', ma' ta mana' xucucun, ma' ta mixita xucucun, ma' ta to' parapa' xucucun ta na ca tomi' tocwa ma'. Mi' ac tocwa na pain cote ne quit quem.

⁵ Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 3 pin ac ne na ca pa nein. Pa pin iri nain ne, taraju ac ton na wiracocon co e' nana ma', co ac jam paxi' nana ma'. Hap ra ta ac ca na quem. Noro ac ta' na, pe quima hwet ac capa' na cavalo ca mixem. Co ma' co xao pe nain ma', an nain arain too ca mam' querec pin' xine ca xite nein carawa. An nain pain micon.

⁶ Taraju ac ta' na, ac ca tomi' nucun wari' paxi' na ca taraju ta'. Maqui' nain ximijacocon caram ma' co e' nana ma', co ac jam paxi' nana ma', co ma' 4 nana ma'. Tomi' ac ne na: Mija pin tara dinheiro nein oro carawa ca cao' wa. Co ma' non ca xica' pe ne denário ma', om ta cut homa cain carawa ca cao' wa. Am an xica' pe tain ca quilo nein trigo, am cut 3 e' tain ca quilo nein cevada ma', ac i ma' e' tara carawa ca cut ta' ca pain ca xica' pe nein denário. Ta to' em' main oro panaji oliva je oro macori winain uva me ta, ac i ma' na ca taraju ta' ma'.

⁷ Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 4 pin ac ne na ca pa nein. Pa pin iri nain ne, taraju ac ton na wiracocon co e' nana ma', co ac jam paxi' nana ma'. Hap ra ta ac ca na quem.

⁸ Noro ac ta' na, pe quima hwet ac capa' na cavalo ca coxic. Ma' na wixicon co ma' co xao pe nain. To' Cono' Wari' na wixicon. Ma' na xucun co ja' ja' non ma'. Ma' na wixicon co ma' quem, Maxicocon Co Cono', ac i ma' na wixicon. Mi' ac tococwa na ca hwara' opa wa quem. Tomi' ac tococwa na: To' parapa' um quarto pin jujun oro wari' pain oro xijein macan' ma'. Mi' jujun pain ca mixita caracan xucucun. Mi' jujun pain ca pe' tamana wa, mi' jujun pain oro ca xirac wa. Mi' jujun pain oro caji carawa ca mana' tamana quem, ac i ma' tara ca to' parapa' pin tococwa ta. Ac i ma' na ca tomi' tococwa ma'.

⁹ Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 5 pin ac ne na ca pa nein. Pa pin iri nain ne, querec ac tain na tamataracocon co to' parapa' pin wawa pain ca howa cacain capijacon Iri' Jam, je pain ca tomi' hwet cocon con Jeju oro wari' ma'. To nanain xiquijinain maxinain ca tomi' querec te pe tocwa Iri' Jam.

¹⁰ Merem mip ca' nana: Cain' cain' ta' ma ma' quem Iri' Taramaxicon co iri'o' ma', co awi tamana pain ca pe ni ca' main ca caracat wa ma'? Cain' cain' ta' ma ma' quem? Je xi wap hap momon oro wari' co to nanain oro xijein macan' quem? Em' hwe, mama' jein cote ne xe ta ximomon quem? Win ne ca to' parapa' pin cacaparut pane, ac i ma' na ca merem mip cocon ma'.

¹¹ Mi' mi' xam' ac tococwa na con wom co towo'. Ame cain' hwe e', ma' ma' wet ara xi' nana oro xuruhu' co win howa hwe ma', co taramaja wi nunuhu' pain ca taramaja mi' mahu' ma'. Xam' cain' tatara pain ca to' parapa' pin xun wawa, win xihwe ma', ac i ma' na ca tomi' tococwa ma'.

¹² Querec ac ton na co ma' co ac Wijimain Taramaji Ovelha ma', pain ca pa cain wirain ca hupa' caho' nein tapari carawa ca joc top ma', ma' 6 pin ac ne na ca pa nein. Pa pin iri nain ne, cocoroc mip ac ne na macan'. Mixem pin ac ne na tocon xina. Iri' mixem na, win ca wom co mixem mip ma', ac i ma' na ca mixem pin ne tocon xina. Paca' pin ac ca na panawo'. Win ne wic pain ca paca' nein ma' quem, ac i ma' na ca paca' pin ca panawo'.

¹³ Camara' qui' ac cain na pawin oro pijo'. Win ne ca camara' ne orowaji memem pain ca nuru mip ne camana' ma', ac i ma' na ca camara' hwet cain macan' oro pijo'.

¹⁴ Ane ane om pin ac ne na nanawin ma'. Win ne tapari carawa pain ca joc top in xine ma', ac i ma' pin na nanawin pain ca ane ane om pin ne ma'. Oro pacun je oro xixi pan ne macan' ma', cut in pin ac xijein na pain oro maxinain quem.

¹⁵ Jin' tamana ac caca na oro wari', xaraxa mama' xi' ta ac caca na quem. Oro taramaxicon co taramaxicon to nanain oro xijein macan' ma', oro xucucun taramaxicon ma' quem, oro comandante nucucun oro soldado ma', oro wari' co caramaju nana ma', oro co hwara' opa paxi' nana ma', xam' nana oro wari'. Co taramaja mi' e' nonon xucun wari' ma', co om taramaja mi' e' nonon xucun wari' ma' quem, xaraxa mama' xaraxa mama' pi' pin ac cacain na oro manain pacun. Mo corom to nanain xiquiji cote ne pacun ma' quem.

¹⁶ Merem ac cacain oro pacun na: Camara' hwet xut ta pacun! Tequi' pa' xut, ma' ta om querec caparut co cwain co xao pe pe nain ca mam' xao pe nucun cwain. Narain ho' xut pain ca mana' nucun co cwain co ac Wijimain Taramaji Ovelha cwain.

¹⁷ Xi maqui' pin ara xi' ne xec nein ca wap xim cacapari'. Om na wari' co witan ca' nain ca wap wa ta na ca merem nucucun.