Apocalipse 5 - Tradução Bíblica Pacaas Novos

Tapari carawa ca joc top ma', wirico co ma' co ac Wijimain Taramaji Ovelha ma' quem

¹ Querec ac tain na tapari carawa ca joc top ma', ca an ca co xao pe pe nain ca mam' xao pe nucun ma'. An na pain micon ma', pain iri' curucun ma'. Wara xirao' nain pain quimain je xonein. Mam' hupa' caho' na pain carawa ca ac catocwan' ma' quem. Ma' 7 na ca hupa' caho' nein. Ma' ta pa xica' pe cain co pa rain ta ta' ca' na.

² Querec inon jam co taramaja mi' non Iri' Jam quem. Hwara' opa na. Merem mip ac ca na: Ma' xi wari' co awi tamana ma', co hohot pain ca pa cain ca hupa' caho' nein ma', je pain ca pa pan cain tapari carawa ca joc top ma' quem? Ac i ma' paxi' na ca merem mip ca ma',

³ ane om mam' tocwa wari' co hohot pain ca pa cain ne. Pirao' paxi' ta pain pawin ma', je pain macan' ca', je pain ca to pan caca co wara cono' nana ma' quem. Ane om mam' camain' tocwa wari' co hohot pain ca pa cain ne. Om ca mam' tocwa wari' co hohot pain ca noro cain quem.

⁴ Aca tamana ac ta' na, xi mam' tocwa wari' co awi tamana, co hohot pain ca pa cain tapari carawa ca joc top ma', je pain ca noro cain quem.

⁵ Tomi' ac capa' na wiracon taramaxicon ma', co win ma' ne nonon oro taramaxicon co ma' 24 nana ma'. Am moin' ra. Noro ron co ma' co ac Leão ma', co Taramaxicon hwara' opa ma', co hwanana ne non Judá cara pane. Iri' winacon taramaxicon Davi cara pane. Hwara' opa pan na, xi om ne ca to' quiji' pin ara con Caxicon Jam pain oro ca om awi wa ta. Na e' na pain ca pa pan cain tapari carawa ca joc top ma', na e' na pain ca pa cain ca hupa' caho' nein ma', ca ma' 7 ma' quem. Ac i ma' na ca tomi' capa' ma'.

⁶ Querec ac ton na co ma' co ac Wijimain Taramaji Ovelha ma'. Xat pe nain i ma', pe ja' pan nain ca mam' xao pe nucun taramaxicon ma', pain ximijain ma'. To to mam' pin nonon caram ma' co e' nana ma', co ac jam paxi' nana ma', co ma' 4 nana ma'. To to mam' pin nonon oro taramaxicon ma' quem. Ac ca wara to' pa' pin tocwa na, ane e' mami' ca ne. Ma' 7 na pixicon, ma' 7 na tocon quem. Oro tocon ma', tomi' joc mam' mi' nain Tamataracon Iri' Jam ca ma' 7 ma' quem, ca mama' mama' xam' jein oro xijein macan' ta pan ca Iri' Jam ma'.

⁷ Co ma' co ac Wijimain Taramaji Ovelha ma', xut hwet ac con na iri' Taramaxicon co xao pe pe nain ca mam' xao pe nucun ma', an ca' ac con na pain tapari carawa ca joc top ma'. An ca' non pain micon ma', pain iri' curucun ma'.

⁸ An ca' iri non pain ne, pe torotop mi' pan ac cocon na caram ma' co e' nana ma', co ac jam paxi' nana ma', co ma' 4 nana ma'. Pe torotop mi' nonon caram ma' co ma' 24 nana ma' quem. Ma' ma' xam' nonon ca mam' tao' wa, ac violão paxi' na cocon. Ma' ma' xam' nonon too ca mam' quep xine pain ouro ma', ca moin' to pain incenso ma', ca tomi' joc mam' mi' nain ca tomi' nucucun oro wari' nucun Iri' Jam ma', pain ca tomi' cocon ma' quem.

⁹ Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.

¹⁰ Wari' ne momon pain ca taramaxicon pe ho' momon. Sacerdote je momon pain ca taramaja mi' xine momon. Taramaxicon to ho' ac cocon tara oro wari' pain oro xijein macan' ta. Ac i ma' na xocori tamara' ca com caca ma'.

¹¹ Noro ac ta' na, taraju ac toton na oro jam co taramaja mi' nonon Iri' Jam. Mija tamana nana, om ca tomi' ac tococwa, xi mija tamana ara caca ta. Coco' coco' mam' pin nanain ca mam' xao pe nucun iri' Taramaxicon ma', coco' coco' mam' pin nanain caram ma' co e' nana ma', co ac jam paxi' nana ma', coco' coco' mam' pin nanain oro taramaxicon ma' quem.

¹² Com mip ac caca na: Awi tamana na co ma' co ac Wijimain Taramaji Ovelha ma', co to' pa' pin wa pane. Na e' na pain ca querec pin' xun pain ca iri' Taramaxicon ca ma'. Na e' na pain ca caramaju tamana ca ma'. Na e' na pain ca querec pin' xun pain ca taxi' tamana ca ma'. Na e' na pain ca querec pin' xun pain ca hwara' opa tamana ca ma', je pain ca awi tamana ca ma'. Na e' na pain ca tomi' hwet xin ca awi tamana nucun. Na e' na pain ca in ac xun quem. Ac i ma' na ca com mip nucucun ma'.

¹³ Taraju ac tain na ca tomi' wa. Oro carawa ca tomi' ma' pin ca Iri' Jam ma', oro wari' quem, co to nanain pawin ma', co to nanain macan' ca', co to nanain ca to pan caca co cono' nana ma', pain tequipain macan' je pain cote ne com ma', oro carawa ca tomi' ma' pin ca Iri' Jam ma' quem, tomi' ac caca na: In ac cara xun iri' Taramaxicon co xao pe pe nain ca mam' xao pe nucun ma'. In ac cara xun co ma' co ac Wijimain Taramaji Ovelha ma' quem. In ac cara xuxun. Tomi' querec te cara xuxun. Tomi' hwet cara xin ca awi tamana nucucun. Querec pin' cara xuxun pain ca iri' Taramaxicon nucucun. Ac i ma' na ca tomi' nucucun ma'.

¹⁴ Amém, iri'o' na ca tomi' nuxut ta ac caca na caram ma' co e' nana ma', co ac jam paxi' nana ma', co ma' 4 nana ma'. Oro xucucun taramaxicon co ma' 24 nana ma', pe torotop mi' querec te ac cocon na co ma' co ac Wijimain Taramaji Ovelha ma', pe torotop mi' querec te nonon Iri' Taramaxicon co xao pe pe nain ca mam' xao pe nucun quem.