Apocalipse 4 - Tradução Bíblica Pacaas Novos

Ca querec cain ca taramaxicon pe nucun Iri' Jam João

¹ Pi' pin iri na ca tomi' capa' ne, noro ac ta' na, querec ac tain na man ca pa xat pain pawin ma'. Tomi' mami' ac capa' na co wara tomi' napa' ma', co an xiho' nain caji taracom ca tomi' nucun ma'. Tomi' ac capa' na: Piri' qui' ra, an hwet mi' ac xim tara pain oro carawa ca maqui' ta' ma' quem, ac i ma' na ca tomi' capa' ma'.

² Ane ane pe ho' mip ac capa' na Tamataracon Iri' Jam. Pe quima hwet ac capa' na ca mam' xao pe ca taramaxicon ma', pain pawin ma'. Querec inon co xao pe pe nain ma'.

³ Toc meremem na co xao pe pe nain, awi tamana na ca toc meremem nucun. An xiho' nain ca toc meremem nein pacun ca awi, je jaspe, je sárdio. Morojam' in nain ca mam' xao pe nucun wanaxicon comerem. Awi tamana na, tom mip na, an xiho' nain pacun ca tum awi, esmeralda na wixinain.

⁴ To to mam' pin nain ca mam' xao pe nucun oro wirain ca mam' xao pe wa, ma' 24 nana xucucun taramaxicon co xao to nanain quem. To nonon wom co towo', to nanain caji waji' nucun taramaxicon pain winacocon quem. Mam' quep ta pain ouro caji waji' nucucun.

⁵ Mija na ca coc wein ca comerem ma', coc wein qui' nain ca mam' xao pe nucun taramaxicon ma'. Toroho mip na comerem quem, mija na. To quima hwet non naran ca wara tom ma', ca ma' 7 ma', ca ac Tamataracon Iri' Jam ma' quem.

⁶ Pe quima hwet nain ca mam' xao pe nucun cote ne com ma' quem. Ac ca mam' querec ca jamu wa paxi' na. Awi tamana na, om na homiri, om ca tocohon camain' ne. To nanain ximijain caram ma' co e' nana ma', co ac jam paxi' nana ma'. Ma' 4 nana. Mija na tococon, to to xam' na tococon pain quimacocon, je pain waracocon. To to mam' pin nanain ca mam' xao pe nucun taramaxicon ma'. Pe nain quimacon xucun, pe nain waracon xucun, pe nain quiricon xucun, pe nain xijein quiricon xucun ma' quem.

⁷ Ac leão na xucun. Ac boi na xucun. Ac tocon wari' na tocon xucun. Ac wajo co ho pe pawin na xucun.

⁸ Tapaxu nana quem, ma' 6 ma' 6 xam' na tapaxicocon. Mija na tococon pain curucucun je pain tequipain tapaxicocon quem. Com cara nanain tamara' quem, pain xec je pain xim. Om ca maho' camain' cacain ca com wa tamara'. Com mi' ac i ca' nonon Iri' Jam: Wum co awi tamana ma', co pe ni ca' nain ca caracat wa ta Iri' Jam. Iri'o' ta, wum co awi tamana ma', co pe ni ca' nain ca caracat wa ta. Wum co Taramaxicon ne urut ta Iri' Jam. Hwara' opa pan ma. Wum co wara ma' pain cara pane, wum co ma' cara cwa', wum co maqui' ta' ma' quem. Ac i ma' na ca com mi' cara cocon Iri' Jam caram ma' co e' nana ma', co ac jam paxi' nana ma'.

⁹ Caram ma' co e' nana ma', co ac jam paxi' nana ma', com mi' nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. Wum co awi tamana, querec pin' urut pum pain ca awi tamana nem. Tomi' querec te tamana urut pum ta nonon. Com mi' ac i ma' iri nonon ne,

¹⁰ pe torotop mi' pan ac cocon na xucucun taramaxicon ma', co ma' 24 nana ma'. Pe torotop mi' querec te nonon co xao pe pe nain ca mam' xao pe nucun ma', co e' cara ma', co om pi' camain' ca e' nucun ma'. An toco' mi' ac cocon na pain caji waji' nucucun. Tomi' ho' tomi' ho' ac cocon na:

¹¹ Taramaxicon ne urut pum ta Iri' Jam. Iri' Jam ne urut pum quem. Na e' na pain ca tomi' hwet urut pain ca awi tamana nem. Na e' na pain ca querec pin' urut pum pain ca awi tamana ma ma', je pain ca hwara' opa tamana ma ma' quem. Xi om ne ca to' ma' to' ma' pi' pin ara main oro carawa ta. Je i ma' ca param nem pane. Je ca ma' ne oro carawa ma' quem. Ac i ma' na ca tomi' cocon ma'.