Apocalipse 3 - Tradução Bíblica Pacaas Novos

Ca xirao' mi' tococwa oro co howa to nanain Sardes

¹ Tomi' ac capa' na: Xirao' mi' ron co ma' co querec wet nonon co howa to nanain Sardes. Xirao' mi' ac i ca' ron: Je i ca' ca tomi' xim cuhu' co ma' co taramaxicon pe ho' nain Tamataracon Iri' Jam ma', ca ma' 7 ne ca hwara' opa nein ma', co ma' co taramaxicon pe ho' nonon oro co ac pijo' co ma' 7 nana ma' quem. Tomi' ca' xim nuhu': Taxi' inuhu' pain oro ca ara hwe ma'. Ac ca howa xo' mahu' na, howa xo' totoron xi' ma nunuhu' oro wari' pata'. Ane om howa iri'o' mahu' ne.

² Ma' tara xumuhu' me. Naro maho' je, hwara' opa mami' je pain ca howa nuhu' ma'. Wijimain pin ara xi' na ca howa nuhu' ma', ac ca om pin ta' ne na ca howa nuhu' ma'. Xi tomi' ha' tomi' ha' pi' pin hwein oro ca tomi' ha' je cuhu' Iri' Jam ta. Taxi' inuhu' pain ca om hohot ne oro ca ara nuhu' ma', om ca querec hohot cuhu' Iri' Jam ne cwa'.

³ Je ca tomi' xuhu' ca': Mam' pe wet jein oro capijacon Iri' Jam ca ca' na xihwe pane, ca taraju hwe pane. Tomi' ha' jein. Cwirin' pin jein ca caracat nuhu'. Mo ta om cara ne xumuhu' ma', mo ta naro cara hwe ma', ane ane maqui' pa' ac xuhu' tara, win ne ca ane ane maqui' ca wari' co an noc xa ta' ma', ac i ma' tara ca ane ane maqui' pa' xuhu'. Jaxicao' xuhu', om ta taxi' mahu' pain xec nein ca maqui' pa' xuhu' ta.

⁴ Ac i ma' paxi' hwe, ane ma' paric ca' e' caca oro win ma' nuhu' co om ara em' xucucun pain Sardes ma' ne. Om ca ara mixem pin cocon womicocon. Ame hwe e', main to totoron wom co towo', xuruxut wi ac cacapa' tara. Xi querec pin' ara tococwa pain ca hohot cacapa' ta.

⁵ Ac i ma' tatara oro wari' co hwara' opa cara nana pain ca howa nucucun ma', to totoron wom co towo' ma' quem. Om ta xic am camain' tain wixicocon pain tapari carawa ca xirao' to xine wixicocon oro wari' co e' cara xi' nana. Wari' ne inonon caram cwa' ta ac ton tara Te cocon oro jam co taramaja mi' nonon ma', taraju taraju xam' tatarapa' pain ca tomi' ac i ma' toton ta.

⁶ Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Je ca xirao' mi' roron oro co howa to nanain Sardes ta capa' pane.

Ca xirao' mi' tococwa oro co howa to nanain Filadélfia

⁷ Tomi' ac capa' na: Xirao' mi' ron co ma' co querec wet nonon co howa to nanain Filadélfia. Xirao' mi' ac i ca' ron: Je i ca' ca tomi' xim cuhu' co ma' co wara tora' ca Iri' Jam pane, co pe ni ca' nain ca caracat wa ma', wirico co iri'o' ma'. Je i ca' ca tomi' xim cuhu' co pe ho' non ca mam' pa xine manain ca corom ac xine cidade nucun Taramaxicon Davi cara pane. Mo ta pa cain manain, om ca tao' pa' ac cain xucun wari'. Mo ta tao' pa' cain, om ca pa ac cain xucun wari' quem. Tomi' ca' xim nuhu':

⁸ Taxi' inuhu' pain oro ca ara hwe ma'. Om paxi' na ca hwara' opa hwe ma', xi om ne ca paric to ara hwe ta. Ane tomi' ha' cara mahu' ne. Om ca an pe pin mahu', howa cara mahu'. Noro je, pa mi' inuhu' pain man ma'. Om ca tao' pa' ac cacain oro wari' quem.

⁹ Taraju wet je e'. Cut in toton caram ma' co judeu urut paxi' nana ma'. Xi iri' judeu caca ta. Mixein nana, wari' nucun Satanás caca ma' ira. Cut in toton, tomi' mip ac toton tara, pe torotop mi' jujun pain caximacocon caram cwa' co howa nanapa' cwa', querec pin' xine pain ca om noc toton ta toton pahu'.

¹⁰ Wara hu inuhu' pane, quereme cara jein oro ca to' i'ina nuhu' me inuhu' pane. Tomi' ha' mahu' quem. Je ca narain ho' xim xuhu' pain ca jain jain wa pain oro xec pain ca to' jain jain toton ta' oro wari' co to nanain macan' ma'.

¹¹ Maqui' ho' ta' ina, om ta om om ta', maqui' hap ta' ina. Win xumu cara xine, ta an to camain' hwein oro ca ara xo' hwe ma', ma' ta om cut ca' xihwe pain carawa ca awi ca main mi' xim xuhu' ta.

¹² Oro wari' co hwara' opa cara nana pain ca howa nucucun ma', to' hwara' opa ac toton tara, quep ac xipain xirim pin toton, pain xiricon Iri' Jam ne cwa', coco' to cara ac cacain tara, om ta hwerehwet ca' camain' cacain. Xirao' toton pain wixicon Iri' Jam co taramaja mi' ta' cwa', xirao' toton pain wixinain cidade nucun quem, je wixinain Xocori Jerusalém ca quiji' qui' nain ca pe pan ca pain pawin cain quem. Xirao' toton pain xocori wuxu ca' quem.

¹³ Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Je ca xirao' mi' roron oro co howa to nanain Filadélfia ta capa' pane.

Ca xirao' mi' tococwa oro co howa to nanain Laodiceia

¹⁴ Tomi' ac capa' na: Xirao' mi' ron co ma' co querec wet nonon co howa to nanain Laodiceia. Xirao' mi' ac i ca' ron: Je i ca' ca tomi' xim cuhu' Iri' Wari' co wara tora' ca Iri' Jam pane, wirico co iri'o' ma'. Je i ca' ca tomi' xim cuhu' co Amém na wixicon ma', co om mixein camain' pain ca tomi' hwet cain oro ca iri'o' wa con Iri' Jam ma', co taramaxicon pe ho' nain oro carawa jimao ca tomi' ma' pin ca Iri' Jam pane. Tomi' ca' xim nuhu':

¹⁵ Taxi' inuhu' pain oro ca ara hwe ma'. Om paxi' na ca ari mahu', ane om win xumu mahu' ne. Win xumu xirarapa' na inuhu'. Tara pahu', mo ta om win xumu mip mahu', je i ma' xira ca ari mip mahu' ta.

¹⁶ Je i ma' ira mahu'. Mo xi win xumu mip mahu'. Xi om ne ca an xiho' ara hwein com ca xain wijimain ma'. Noro jun wari' co toc nain com ma'. Toc iri nain ca xain wijimain nein ne, we' hwet pin ac cain na. Ac i ma' xuhu' quem, an xiho' ara xi' hwein com ca xain wijimain ma'. We' hwet pin ac xuhu' tara ta.

¹⁷ Tomi' ac i ca' hwe: Caramaju urut, mija naparut oro carawa. Om na carawa ca om naparut, ma' ma' pi' pin naparut oro carawa ca param urut, ac i ma' paxi' na ca tomi' hwe ma'. Ane om querec pin' hwein ca ximin nuhu' ne. Xiram pa' inuhu' ta. Xi querec pin' xujuhu' pain ca om cuhu' iri' carawa ta. Om na tucuhu', om na womuhu' quem.

¹⁸ Hu ca' inuhu': Cut xine pain ouro ne ca om em' camain' ca', ma' ta caramaju iri'o' pin hwe ta inuhu'. Cut jun wom co towo' cwa' quem, ma' ta to hun, ma' ta wixipa' wixipa' om pin hwe pain ca om cuhu' wom ma', pain ca hwet pe e' ne curuhu' ma' inuhu'. Cut jein aramao aramao toc ma', ma' ta aramao xio pin hwein tucuhu' ma', ma' ta querec iri'o' hwe ta inuhu'.

¹⁹ Tomi' inain taraxicocon oro wari' co om noc ta' cwa'. Hu xo' hu xo' pi' pin inonon. Je ca tomi' xuhu' ca': Ma' tara xumuhu' me, win xumu jein ca xuruxut xo' wa, cwirin' pin jein ca caracat nuhu' ta.

²⁰ Taraju wet xine me. Xat pe inain manain xuruhu'. Tataca ina quem. Mo ta taraju mahu' pain ca corom hwet xim xuhu' ca', mo ta pa mahu' pain, corom hwet ac xuhu' tara, cao' wi ac xijexi' tara ta.

²¹ Oro wari' co hwara' opa cara nana pain ca howa nucucun ma', mi' ac toton tara pain ca xao to ho' cacapa' pain ca mam' xao pe ne pain ca taramaxicon pin ta' ta' ca'. Taramaxicon wi ac cacapa' tara. Win ta' pain xocori ca', pain ca to' quiji' pin ton Caxicon Jam pane, je pain ca xao pe ho' pin ton Te pain ca mam' xao pe nucun pain ca taramaxicon nucun quem.

²² Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Je ca xirao' mi' roron oro co howa to nanain Laodiceia ta capa' pane.