Apocalipse 22 - Tradução Bíblica Pacaas Novos

Iri' cwerein com ca mi' nain ca e' cara wa

¹ An hwet mi' ac capa' na pain iri' cwerein com ca mi' nain ca e' cara wa. Awi tamana na comi, om na homiri, om ca tocohon camain' ne. Weweweo qui' nain ca xao pe pe ca Iri' Jam, je ca xao pe pe ca co ma' co ac Wijimain Taramaji Ovelha ma' quem.

² Weweweo ac nain ximijain wana ca xuruxut ac caca oro wari' ma', pain ximijain cidade ma'. To nain cacarain com panaji memem ca mi' nain ca e' cara wa, pain xijein cacarain, je pain xijein cacarain ma' quem. Oro winain memem ca mi ne ma', mi mi xam' non oro panawo', mi mi hwet pa' nain xijein cawaxi' quem. Oro tenenein ma', je ca mam' to' om pin xine ca caxi nucucun oro wari' co to nanain oro xijein macan'.

³ Om tarain cidade nucun Iri' Jam oro ca tomi' noro ca, om tatara oro wari' co tomi' noro ca quem, om om tara oro ca om querec awi non. Pe tarain i ma' ca mam' xao pe pe ca Iri' Jam con co ma' co ac Wijimain Taramaji Ovelha quem. Oro co taramaja mi' e' nonon ma', pe torotop mi' querec te totoron quem.

⁴ Querec pin' tatarain iri' tocon Iri' Jam. Xirao' ac xine tara wixicon pain jitaracocon oro wari' nucun quem.

⁵ Om ta xim mami' ne pain i cain. Om ta ma' xirapari' naran na caca oro wari', om ta ma' xira xina co toha mi' napari' na caca quem, xi om ne ca toha mi' pan toton ara cocon Taramaxicon Iri' Jam ta. Taramaxicon cara ac caca tara quem.

⁶ Tomi' ac capa' na jam co taramaja mi' non Iri' Jam. Oro ca tomi' xim cara ne, na e' na pain ca howa cacapa' pain ca tomi' ne oro wari' ta. Xi om ne ca tomi' iri'o' ara ta' ta. Om ca mixein ta'. Taramaxicon nexi' ma', co Iri' Jam ma', co mi' nonon pain ca tomi' hwet wa oro profeta ma', wirico co tomi' ca' napa' pain ca taramaja mi' ton ca'. Hwet roron oro wari' ne co taramaja mi' nanapa' ma', an hwet mi' roron pain oro carawa ca maqui' ta' ma'. Om ta om om ne, maqui' ho' tara ta napa'. Ac i ma' na ca tomi' capa' ta.

Ca in qui' ta' nucun Jeju

⁷ Je ca tomi' ca Jeju cwa': Taraju wet je e'. Maqui' ho' ta' ina. Om ta om om ta', maqui' hap ta' ina. Wari' co tomi' ha' nain oro ca xirao' pe xine pain tapari carawa ca joc top ca', ca tomi' mi' nain oro carawa ca maqui' ta' ma', param mi' ac tocwa tara pain oro ca awi wa. Ac i ma' na ca tomi' ca ma'.

⁸ Wata' pain ca João ta' ca', wata' co taraju nain oro ca ara ta' ne ma', ca xirao' pe ta' ca'. Querec inain quem. Taraju iri inain ne, querec iri inain ne, pan' hwet ac ton na pain caximacon jam co taramaja mi' non Iri' Jam ma', co an hwet mi' napa' pain oro ca taraju ta' pain oro ca querec ta' quem. Ma' ta pe torotop mi' querec te ton inon ira.

⁹ Ane tomi' capa' ne, ta pe torotop mi' querec te mapa' me ta. Ac wum ina, taramaja mi' e' inon Iri' Jam ta. An xiho' inem, an xiho' inonon co win howa ma ma', an xiho' inonon oro co tomi' hwet nanain capijacon Iri' Jam ma'. An xiho' inonon co tomi' ha' nanain oro ca xirao' pe xine pain tapari carawa ca joc top ca'. Pe torotop mi' querec te pan ron Iri' Jam ta! Ac i ma' na ca tomi' capa' ma'.

¹⁰ Tomi' tomi' tiquin' ac capa' na: Ta joc xim main oro ca xirao' pe ma pain tapari carawa ma', ca tomi' mi' nain oro carawa ca maqui' ta' ma' me ta. Xi wixicam pin ara ne oro xec nein ca maqui' ta' ne ta.

¹¹ Co pan teretem nana ma', pan teretem cara ma' tatara ne. Co to' em' xucucun pain ca caracat nucucun ma', to' em' cara ma' ac xucucun tara. Oro wari' co ara xo' taxipa' nana ma' iri na ne, ara xo' taxipa' cara ma' tatara ne. Co win xumu cara nonon Iri' Jam ma', win xumu cara ma' totoron ne. Ac i ma' na ca tomi' capa' jam co taramaja mi' non Iri' Jam.

¹² Je ca tomi' ca Jeju cwa': Taraju wet je e'. Maqui' ho' ta' ina. Om ta om om ta', maqui' hap ta' ina. Maqui' wi tarapa' carawa ca mi' toton toton oro wari' ma'. Win ne ca ara hwe pane toton, mi' mi' ac toton pain tara.

¹³ Wata' co Alfa cwa', wata' co Ômega cwa'. Wata' co ma' cain' pane, pain ca om om wet ne oro carawa pane, wata' co ma' cara ta' ma' quem, pain ca win pi' pin ta' ne oro carawa quem. Wata' co tomi' ma' pin nain oro carawa, wata' co to' pi' pin nain quem.

¹⁴ Param mi' tata pain ca awi wa oro wari' co hohoc nonon womicocon ma'. Om ta narain ho' tococwa pain ca xac wa winain panaji memem ca mi' nain ca e' cara wa. Ha' nonon pain ca corom mama' cacain cidade pain oro manain ca mam' corom ac xine quem.

¹⁵ Om ta corom ac caca oro caracat co ac caxicon oromijac. Mo nana: Co ara xirac nonon oro wari' ma', co quep ximama' xequequem ma', co to' parapa' pin nonon wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co hohot nonon ca tomi' mixein wa ma', co tomi' mixein taxipa' nana ma' quem. Oro wari' co ara nanain i ma', om ta corom ac cacain cidade nucun Iri' Jam.

¹⁶ Wata' pain ca Jeju ta' ca', mam' inuhu' con jam co taramaja mi' napa' ma'. Tomi' hwet roron pain oro carawa ca maqui' pa' toton nonon pain ca cut in taxipa' xucucun pain ca howa cacapa' ta inon pahu'. Wata' co iri' winacon taramaxicon Davi co tomi' pe ca Iri' Jam pain cara pane. An xiho' inon pijo' co toc meremem mip ma', co hwet na pain xo' xec. Ac i ma' na ca tomi' ca Jeju.

¹⁷ Tomi' ac ne na Tamataracon Iri' Jam cam narima' co an ta' ca co ma' co ac Wijimain Taramaji Ovelha ma', maqui' hap ra ta ac caca na. Oro wari' co taraju nana ma', tomi' tatara quem, maqui' hap ra ta tatara. Oro wari' co pe' nana ma', co toc xi' com nana ma', maqui' tatara quem. Oro wari' co toc xi' nana ma', toc ac cacain tara comicon hoi hoi ma', ca mi' nain ca e' cara wa ma'. Comicon hoi hoi ma', mi' e' ac tococwa pain tara, om ta pagar cacain ta.

Ca pi' pin ne ca xirao' nucun João

¹⁸ Wahu' pain ca taraju huhun co noro mi' nunuhu' pain oro ca xirao' pe tain tapari carawa ca joc top ca', ca tomi' mi' nain oro carawa ca maqui' ta' ma', tomi' mip ca' inuhu': Wari' co an in nain ca xirao' nein ca', pain ca xirao' hwara' pin cain, wap ac tocwa tara, wirico Iri' Jam tara co mam' wap ton non pain oro ca xirac wa ca xirao' pe ta' pain tapari carawa ca', ca to' jain jain xun nonon oro wari' ma'.

¹⁹ Wari' co xic am nain ca xirao' nein ma', am xic am wijimain e' tarain, wap ac tocwa tara quem. Wirico Iri' Jam tara co wap ton non. Nain ho' toron pain ca xac wa winain panaji memem ca mi' nain ca e' cara wa, nain ho' toron pain ca corom wa cidade nucun quem.

²⁰ Co ma' co tomi' hwet napa' pain oro ca xirao' pe ta' ca', tomi' ca' na: Maqui' ho' ta' ina. Om ta om om ta', maqui' hap ta' ina. Iri'o' na ca tomi' ne ca' na. Amém, iri'o' na ca tomi' nucun. Maqui' hap ra ta Taramaxicon!

²¹ Param inon Taramaxicon nexi' Jeju pain ca quep xiho' quep xiho' xam' cuhu' ma', pain ca mi' e' cuhu' pain ca param nucun ta. Amém, iri'o' na ca tomi' nucun ta.