Apocalipse 21 - Tradução Bíblica Pacaas Novos

Xocori pawin pain xocori macan'

¹ Querec ac tain na xocori pawin je xocori macan'. Wara om pin ara xi' na wara pawin je wara macan' pane. Wara om pin na cote ne com quem.

² Querec ac tain na cidade nucun Iri' Jam ma', Xocori Jerusalém ma'. Quiji' qui' nain ca pe pan ca pain pawin cain. Awi tamana na, an xiho' nam narima' co ara awi pan xequem con wom co awi ma', pain ca winim' con taxicam co an tam nam ma'.

³ Taraju ac tain na ca tomi' wa ca maqui' nain ca mam' xao pe ca Iri' Jam. Tomi' mip ac i ca' na: Aram aram pe ho' pin toton nonon oro wari' Iri' Jam ta. Pe ho' pin toton nonon, wari' ne pin ac tococwa tara. Wirico Iri' Jam pan tara co pe ho' toton nonon, Iri' Jam ne pan ac cocon tara oro wari' nucun quem.

⁴ Xic cawain' xic cawain' pi' pin tarain oro comi tococon pain ca awaran nucucun. Om ta cono' mami' wa, om ta tomi' xaxa' mami' wa, om ta awaran mami' wa, om ta caxi mami' wa quem. Xi om pin ara ne oro coximi wara macan' ta. Ac i ma' na ca tomi' wa ca maqui' nain ca mam' xao pe ca Iri' Jam.

⁵ Tomi' ac ca na co ma' co xao pe pe nain ca mam' xao pe nucun taramaxicon: Ara xocori ara xocori pi' pin inain oro carawa ta na. Tomi' tomi' tiquin' na quem: Xirao' rain oro ca tomi' xim cara ne. Iri'o' na oro ca tomi' ne. Om ca mixein ta', na e' na pain ca howa cacapa' pain ca tomi' ne oro wari' ta. Ac i ma' na ca tomi' ca co ma'.

⁶ Tomi' tomi' tiquin' ac capa' na: Ara ara pi' pin inain oro ca ara ta' ta' ca'. Wata' co Alfa cwa', wata' co Ômega cwa', wata' co tomi' ma' pin nain oro carawa, wata' co to' pi' pin nain quem. Wari' co pe' ma', co toc ta' com ma', mi' ac ton tara pain ca toc wa comicon hoi hoi ma', ca mi' nain ca e' cara wa. Mi' e' ton pain, om ta pagar ne pain ton.

⁷ Oro wari' co hwara' opa cara nana pain ca howa nucucun ma', mi' ac toton tara pain oro ca wara tomi' pe ta' ca'. Iri' Jam ne tatarapa', mana panxita' ac toton tara quem.

⁸ Ac i ma' paxi' toton oro co hwara' opa cara nana pain ca howa nucucun ma', ane om ac i ma' toton oro xucucun co caracat cara nana ne. Mo nana: Co jin' nanain ca quep em' wa pain ca howa nucucun ma', co om howa je ha' nana ma', co ara taxipa' nanain oro ca om querec awi non Iri' Jam ma', co to' parapa' pin nonon wari' ma', co quep ximama' xequequem ma', co ara xirac nonon oro wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co tomi' mixein nana ma' quem, wixicaracao' mi' ac tococwa tara pain iri' maxicocon ma', je pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Cote ne xe ma', tomi' joc mam' mi' nain ca cono' mami' wa pain ca to ni cara ca' xun cocon Iri' Jam ta.

Xocori Jerusalém

⁹ Hwet ac capa' na jam co taramaja mi' non Iri' Jam ma', co win ma' ne nonon co cut nanain too ca ma' 7 ma', ca moin' pe nain oro ca xirac wa ca ma' 7 ma' quem, tomi' ac capa' na: Hap ra, an hwet mi' xim cam narima' ma', co an ta' ca co ma' co ac Wijimain Taramaji Ovelha ma', ac i ma' na ca tomi' capa' ma'.

¹⁰ Pe ho' mip ac capa' na Tamataracon Iri' Jam. O mao ac capa' na jam co taramaja mi' non quem, o mao napa' pain cote ne pacun ca mao tamana pawin. An hwet mi' ac capa' na pain Jerusalém ma', iri' cidade nucun Iri' Jam ma', ca quiji' qui' nain pawin ma'. Maqui' nain ca pe pan ca Iri' Jam.

¹¹ Toha tamana na, xi om ca Iri' Jam co toc meremem mi' nain ta. An xiho' nain ca toc meremem nein pacun ca awi tamana, an xiho' nain jaspe. Om na homiri, om ca tocohon camain' ne.

¹² Ma' na cote ne pacun ca tao' caho' nain, mao nain pawin. Ma' 12 na oro ca corom ac xine, ma' 12 nana co coco' to ho' nanain quem. Oro jam co taramaja mi' nonon Iri' Jam ma', wiricoco co coco' to ho' nanain oro manain ca corom ac xine. Xirao' pe xirao' pe xam' ta wixicocon mana panxica Israel pain cacarain oro manain ca corom ac xine quem, xirao' xirao' xam' ta oro wixicocon pain ca ma' 12 ne ca xucun wari' xucun wari' xam' caca pane.

¹³ Ma' 3 ma' 3 xam' na manain ca corom ac xine pain oro quirinain quem. Quirinain ca maqui' ac ca xina ma', ma' 3 na manain ca corom ac xine. Quirinain ca corom mao ac ca xina ma', ma' 3 na manain ca corom ac xine. Xijein quiricon xina ma', ma' 3 na manain ca corom ac xine, xijein quiricon ma' quem, ma' 3 na manain ca corom ac xine quem.

¹⁴ Ma' 12 na cote ne pacun ca to' teren nain caximain ca tao' caho' nein ma' quem. Iri' cote ne pacun pain oro caximain. Xirao' ta wixicocon oro apóstolo nucun co ma' co ac Wijimain Taramaji Ovelha ma', xirao' pe xirao' pe xam' ta pain oro cote ne pacun pain caximain.

¹⁵ Jam co taramaja mi' non Iri' Jam ma', co tomi' napa' ma', an nain taparain pana ca mam' tacan wa, ac taparain pana paxi' na, mam' quep ta pain ouro. Tacan tain cidade ma', je oro manain ca corom ac xine ma', je cote ne pacun ca tao' caho' nain ma' quem ac ca na.

¹⁶ Om ca hwara' paxica' ne oro quirinain cidade, an an ari xijein oro quirinain. Tacan ac cain na cidade pain ca mam' tacan nucun. Iri' cote ne cidade ta, ma' 2.200 na quilômetro pain ca hwara' nein. An an ari xijein oro quirinain pain ca hwara' nein pain pawin quem.

¹⁷ Tacan ac cain na ca tao' caho' nein quem. Iri' cote ne, ma' 65 na metro pain ca iriquito nein. Ca mam' tacan ca jam co taramaja mi' non Iri' Jam ma', an an ari nain ca mam' tacan nexi' pain ca wari' nexi' pain xocori ca'.

¹⁸ Ca tao' caho' nein ma', mam' quep ta pain jaspe, je i ma' wixinain pacun ca mam' quep xine ca tao' caho' nein. Cidade ma' iri na ne, mam' quep ta pain ouro ca awi tamana quem. Om ca em' camain' ne. Ac ca mam' querec ca jamu wa na. Awi tamana na, om ca tocohon camain' ne.

¹⁹ Ma' 12 na oro cote ne pacun pain caximain ca to' teren nain ca tao' caho' nein quem, ara awi ta pain oro xijein pacun ca awi tamana. Mo na ca mam' ara awi xine ma': Ca ma' cain' ma', mam' ara awi ta pain jaspe. Wirain ma' iri na ne, mam' ara awi ta pain safira. Wirain ma' iri na ne, mam' ara awi ta pain calcedônia. Wirain ma' iri na ne, mam' ara awi ta pain esmeralda.

²⁰ Wirain ma' iri na ne, mam' ara awi ta pain sardônio. Wirain ma' iri na ne, mam' ara awi ta pain sárdio. Wirain ma' iri na ne, mam' ara awi ta pain crisólito. Wirain ma' iri na ne, mam' ara awi ta pain berilo. Wirain ma' iri na ne, mam' ara awi ta pain topázio. Wirain ma' iri na ne, mam' ara awi ta pain crisópraso. Wirain ma' iri na ne, mam' ara awi ta pain jacinto. Wirain ma' iri na ne, mam' ara awi ta pain ametista. Ac i ma' na oro wixinain pacun ca mam' ara awi xine oro cote ne pacun pain caximain oro manain ca mam' corom ac xine cidade ma'.

²¹ Ca mam' tao' pa' nein oro manain ca mam' corom ac wa ma', quep ta pain pérola, je i ma' wixinain pacun ca mam' quep xine oro manain ca corom ac wa ma'. Awi tamana na. Mam' quep mam' quep xam' ta pain ca xica' pe nein pérola. Wana pain ximijain cidade ma' iri na ne, ca xuruxut ac caca oro wari' ma', mam' quep ta pain ouro ca awi tamana quem. Om ca em' camain' ne, ac ca mam' querec ca jamu wa na. Awi tamana na quem, om ca tocohon camain' ne.

²² Om ca querec camain' tain xirim ca in ac pe tocwa Iri' Jam pain cidade ma' quem. Xi om ne ca pe pan ara cain Taramaxicon Iri' Jam co hwara' opa tamana pan ta. Pe nain co ma' co ac Wijimain Taramaji Ovelha ma' quem. In ac pan tata, to pan nanain maxinain xirim ca in ac to tococwa.

²³ Om ca ma' xira xina co toha mi' napari' na caca oro wari' co to nanain cidade. Om ca ma' xira panawo' co toha mi' napari' na caca quem. Xi toha mi' pan ara cocon ca toc meremem nucun Iri' Jam ta. Co ma' co ac Wijimain Taramaji Ovelha ma', toha mi' nonon quem, wirico pan co ac naran nonon.

²⁴ Oro wari' co to nanain oro xijein macan' ma', toha mi' tata pain ca toc meremem nein cidade. Oro co taramaxicon to nanain oro xijein macan' ma', cut tan' tatarain oro caramaxicocon quem.

²⁵ Om ta irawin tao' pa' camain' xine oro manain ca corom ac xine, xi ma' ta' ne xim pain i cain ta. Xec cara e' tara.

²⁶ Oro wari' co to nanain oro xijein macan' ma', cut tan' tatarain oro caramaxicocon ca awi tamana, oro caramaxicocon ca mam' to' querec pin' tococwa pain ca hwara' opa nucucun ma', cut tan' tatarain pain cote ne cidade ma'.

²⁷ Om ta corom camain' caca oro wari' co to' em' xucucun pain ca pan teretem nucucun ma', cocon oro co ara taxipa' nanain oro ca om querec awi non Iri' Jam ma' quem, cocon co mixein nonon oro win ma' caca ma' quem, om ta corom camain' caca. Corom xica' to e' tatara oro wari' co xirao' to wa wixicocon pain tapari carawa nucun co ma' co ac Wijimain Taramaji Ovelha ma', corom xica' to e' tatara co xirao' to wa wixicocon pain ca e' cara xi' caca ma'.