Apocalipse 20 - Tradução Bíblica Pacaas Novos

Ca ma' 1.000 ne cawaxi' pain ca pao' pe tocwa Caxicon Jam, je pain ca taramaxicon pe cain macan' Jeju Cristo

¹ Querec ac ton na jam co taramaja mi' non Iri' Jam. Quiji' qui' nain pawin. An nain ca mam' pa xine cote ne man ca om tawirinain. An nain cote ne arain too quem.

^2-3 Quep xat ac con na co ma' co ac caji hop ma', co caxicon em' pain cara pane, co Caxicon Jam ma', co Satanás na xijein wixicon. Pao' pe ac con na pain arain too, xin mi' ac con na pain cote ne man ca om tawirinain cain. Tao' pa' ac cain na, tao' pa' mip nain, ma' ta om mixein mami' momon oro wari' co to nanain oro xijein macan' ta non. Tao' pa' cara ac tocwa tara, maqui' pa' toron ca 1.000 nein cawaxi' pain ca tao' pa' tocwa ta. Pi' pin iri tara ca 1.000 nein cawaxi' ne, pa hwet wijimain ac tocwa tara, ame hwe e'.

⁴ Querec ac tain na oro ca mam' xao to nucucun oro taramaxicon. Ma' tocwan na. Xao to to nanain caram ma' co mi' wawa pain ca hwara' opa wa ma', pain ca tomi' xo' jujun oro wari' pain oro carawa ca ara caca pain ca e' e' wet nucucun pane wawa ma'. Querec inain tamataracocon co wara cono' nana ma' quem, co ton tapit pin wawa pain winacocon pane, xi om ne ca tomi' hwet ara cocon con Jeju oro wari' pane. Pijim' nanain capijacon Iri' Jam pane, je ca ton tapit pin xine winacocon pane. Om ca pe torotop mi' querec te cocon co ma' co ac caji carawa co hwet qui' cain' pane, om ca pe torotop mi' querec te cacain pacun ca an xiho' nain curucun pane quem. Om ca xirao' xirac tococwa pain wixinain pain jitaracocon pain micocon pane quem. E' mami' nana, taramaxicon wi ac cocon na Cristo quem. Ma' 1.000 na cawaxi' pain ca taramaxicon wi cocon Cristo.

⁵ Caram ma' co e' mami' nana ma', co taramaxicon wi nonon Cristo ma', wiricoco co e' mami' cain' nana. (Oro xucucun co wara cono' nana pain cara pane, om ca e' mami' querec caca. Pi' pin cain' tara ca 1.000 nein cawaxi' cocon, ame hwe e'.)

⁶ Param mi' tata pain ca awi wa oro co e' mami' cain' nana ma', co iri' wari' nucun Iri' Jam nana ma'. Om ta cono' mami' caca, om ta wixicaracao' mi' tococwa pain cote ne xe. Sacerdote pin tatara pain ca taramaja mi' xun cocon Iri' Jam con Cristo ma', taramaxicon wi ac cocon tara, ma' 1.000 tara cawaxi' pain ca taramaxicon wi xun cocon ta.

Ca to' quiji' pin tocwa Satanás

⁷ Pi' pin iri tara ca 1.000 nein cawaxi' ne, pa hwet pin ac tocwa tara Satanás ma', pain ca tao' pa' pe tocwa pain cote ne man ca om tawirinain cain, pa hwet pin ac tocwa tara.

⁸ Mixein toton oro wari' co to nanain Gogue je Magogue ma' ac ca tara, hwet ac tococwa tara pain ca to cacain oro xijein macan'. Cut in xi', mixita xuxun oro wari' nucun Iri' Jam ta ac tococwa tara. Mija tatara oro wari' co cut in xi' nana, ac namaji pain cacarain cote ne com tatara pain ca tamana nucucun.

⁹ Maqui' ac cacain tara oro xijein macan', to to mam' pin ac tococwa tara oro wari' nucun Iri' Jam pain ca cut in xucucun ma', pain cidade ca tomi' querec te pan ca Iri' Jam ma' quem. Ca to to mam' pin xun cocon ma', pan' qui' ac nein pawin tara xe ma', to' om pin ac tococwa tara ta.

¹⁰ Xin mi' ac tocwa tara pain cote ne xe Caxicon Jam ma', co mixein nonon oro wari' ma', xin mi' ac tocwa tara pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Wara xin mi' ta pain cote ne xe co ma' co ac caji carawa co hwet qui' cain' ma', wara xin mi' ta pain co ma' co ac caji carawa co hwet qui' pa'ao' ma' quem, co profeta mixein ma', pain ca tomi' hwet taxipa' cain oro ca tomi' nucun co ma' co hwet qui' cain' ma' quem. Je ta xin mi' pe tocwa Caxicon Jam ma' quem. Jain jain cara ac caca tara pain xec je pain xim quem. Om ta pi' camain' ne ca jain jain nucucun, mao ac ne ma' tara cocon ta.

Ca wap tococwa oro caracat

¹¹ Querec ac tain na cote ne ca mam' xao pe ca taramaxicon. Towo' na. Querec inon co xao pe pe nain quem. Jein ca' non macan' je pawin quem. Om ca querec mami' xine.

¹² Querec inonon co wara cono' nana ma' quem. Co hwara' opa nana ma', co om hwara' opa nana ma' quem, querec inonon pain ca coco' quima hwet cacain ca mam' xao pe nucun. Pa ac xine na oro tapari carawa ca xirao' to xine oro ca ara caca pain ca e' e' wet nucucun pane. Pa ac xine na wirain tapari carawa ca xirao' to xine wixicocon oro wari' co e' cara xi' nana quem. Noro iri ta ca xirao' to xine oro ca ara nucucun ne, win ne ca ara hwe pane ac tococwa na, wap wap ac tococwa na.

¹³ Oro wari' co wara cono' nana pane, co cono' to nanain cote ne com pane, co cono' to nanain macan' pane, co wara mama' nanain ca to pan caca oro co cono' nana ma' quem, coco' quima hwet nonon co ma' co xao pe pe nain cote ne ca mam' xao pe ca taramaxicon ma'. Win ne ca ara hwe pane ac tococwa na, wap wap xam' ac tococwa na quem.

¹⁴ Oro wari' co wara cono' nana ma', wiricoco co to nanain ca to pan caca oro co wara cono' nana ma', wixicaracao' mi' ac tococwa na pain cote ne xe ca ac xuterem' ma'. Cote ne xe ma', ca ac xuterem' ma', tomi' joc mam' mi' nain ca cono' mami' wa.

¹⁵ Oro wari' co om xirao' to wa wixicocon pain tapari carawa ca xirao' to xine wixicocon co e' cara xi' nana ma', wixicaracao' mi' ac tococwa na pain cote ne xe ca ac xuterem' ta.