Apocalipse 2 - Tradução Bíblica Pacaas Novos

Ca xirao' mi' tococwa oro co howa to nanain Éfeso

¹ Tomi' ac capa' na: Xirao' mi' ron co ma' co querec wet nonon co howa to nanain Éfeso. Xirao' mi' ac i ca' ron: Je i ca' ca tomi' xim cuhu' co cut 7 non pijo' pain micon ma', pain iri' curucun ma', co xut in pe nain ximijain oro ca mam' tom pe ne naran ma', ca ma' 7 ma', ca mam' quep xine pain ouro ma' quem, tomi' ca' xim nuhu':

² Taxi' inuhu' pain oro ca ara hwe ma'. Taxi' inuhu' pain ca taramaja tamana hwe ma', je pain ca quereme cara hwein oro ca to' i'ina nuhu' ma'. Taxi' inuhu' pain ca noc mip huhun oro wari' co pan teretem nana ma', je pain ca tomi' querec huhun caram ma' co apóstolo urut mixein nana ma'. Xi iri' apóstolo caca ta. Querec pin' huhun pain ca mixein nucucun ma'.

³ Taxi' inuhu' pain ca quereme cara hwein oro ca to' i'ina nuhu' ma', je pain ca hwara' opa hwe pain ca jain jain nuhu' cocon oro wari' co quep em' nunuhu' pata'. Taxi' inuhu' pain ca om an pe mahu' ma' quem.

⁴ Taxi' paxi' inuhu' pain ca ara ac i ma' hwe ma', ane ma' ne carawa ca om hohot napa' pahu' ne. Win xumu win xumu om pin mahu'. Win ne ca tomi' querec te qui' mahu' pain ca xo' howa qui' mahu' pane quem.

⁵ Je ca tomi' xuhu' ca': Mam' pe wet jein ca tomi' querec te nuhu' pane, pain ca tomi' ha' xixim na mahu' pain ca xo' howa ten qui' mahu' pane. Cwirin' pin jein ca caracat nuhu', jain jain mami' xine pain ca tama' tomi' ha' xixim na mahu' ma', tomi' querec te ac i ma' mami' xine. Ac pain cara pane tara pain ca xo' howa qui' mahu' pane. Mo ta om cwirin' pin hwein ca caracat nuhu' ma', hwet ac xuhu' tara, an ca' ac xuhu' tara pain ca mam' tom pe ne naran nuhu' ma'. Pe pe om pin ac nein tara maxinain pahu'.

⁶ Ac i ma' paxi' na ca om hohot mahu' ma', ane ma' ne carawa ca hohot pan napa' pahu' ne, pain ca noc mip hwein oro ca ara caca oro nicolaíta ma'. An xiho' mahu' pain ca noc tain oro ca ara caca quem.

⁷ Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Main tomi' ca' toton oro wari' co hwara' opa cara nana pain ca howa nucucun ma': Xac jein winain panaji memem ca mi' nain ca e' cara wa ma', ca tarama' pe nain totacon Iri' Jam ta toton. Om ta narain ho' toton pain, xac jein ta toton. Je ca xirao' mi' roron oro co howa to nanain Éfeso ta capa' pane.

Ca xirao' mi' tococwa oro co howa to nanain Esmirna

⁸ Tomi' ac capa' na: Xirao' mi' ron co ma' co querec wet nonon co howa to nanain Esmirna. Xirao' mi' ac i ca' ron: Je i ca' ca tomi' xim cuhu' co ma' cain' pane, pain ca om om wet ne oro carawa pane, co ma' cara ta' ma' quem, pain ca win pi' pin ta' ne oro carawa quem, wirico co mi' pin pane, co e' mami' ma' quem. Tomi' ca' xim nuhu':

⁹ Taxi' inuhu' pain ca jain jain nuhu' pain ca quep em' xihwe ma'. Taxi' inuhu' pain ca ximin hwe ma', pain ca om cuhu' oro carawa ma' quem. Om paxi' nuhu' carawa, ane ma' cuhu' iri' carawa pata' ne. Taxi' inuhu' pain ca tomi' napat cucuhu' caram ma' co judeu urut paxi' nana ma'. Xi iri' judeu caca ta. Oro wari' nucun Satanás ara xi' nana pain ca ca' na cacain oro ca tomi' nucun ta.

¹⁰ Ta jin' hwein oro ca jain jain wa ca maqui' pa' xim nuhu' con Caxicon Jam me ta. Ma' tatara oro win ma' nuhu' co wixicao' mi' ca pain xirinain ca tao' to tao' to to wa, quep em' querec ac tococwa tara, am an pe pin xin hwein ca howa nuhu' ta ac tococwa tara quem. Ma' 10 tara xec pain ca jain jain xi' hwe pain ca quep em' xim cuhu' Caxicon Jam. Win xumu cara xine me. Mo ta to' parapa' pin xim cucuhu' pain ca howa mahu' ma', je i ma' ira, to' parapa' pin ma' tatarapa' ne ac huhun tara. Mi' pan ac xuhu' tara pain ca om pi' ra ha' ne ca e' wa ta.

¹¹ Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Oro wari' co hwara' opa cara nana pain ca howa nucucun ma', om ta cono' mami' caca, om ta mama' cacain cote ne xe, om ta to ni ca' cocon Iri' Jam ta. Je ca xirao' mi' roron oro co howa to nanain Esmirna ta capa' pane.

Ca xirao' mi' tococwa oro co howa to nanain Pérgamo

¹² Tomi' ac capa' na: Xirao' mi' ron co ma' co querec wet nonon co howa to nanain Pérgamo. Xirao' mi' ac i ca' ron: Je i ca' ca tomi' xim cuhu' co ma' non cote ne quit ca xa xa pi' ca'. Tomi' ca' xim nuhu':

¹³ Taxi' inuhu' pain ca to hwein i ma', pain ca taramaxicon pe ca Satanás ma'. Ane win xumu mahu' ne. Om ca an pe pin mahu', howa cara mahu'. To' pa' pin paxi' ta Antipas co win xumu napa' pain ca tomi' hwet capa' cocon oro wari' pane, to' pa' pe paxi' ta pain ca to pan nuhu' pain Pérgamo ma', ca pe pan ca Satanás ma'. Ane howa cara pan mahu' ne.

¹⁴ Taxi' paxi' inuhu' pain ca ara ac i ma' hwe ma', ane ma' ne oro carawa ca om hohot napa' pahu' ne. Ma' nana win ma' nuhu' co tomi' ha' nanain oro ca hu nucun Balaão cara pane, pain ca hu qui' con Balaque pain cara pane, pain ca ara ac i ca' roron oro wari' nein Israel ma', ma' ta caracat caca ta con pane. To' caracat pin ac tococwa na, cao' cao' pin ac cacain na cwerein carawa ca mi' querec te xine pain oro caji pacun ca Iri' Jam xi' ma caca oro wari' pane. Quep ximama' quep ximama' ac tacacama na oro xequem narima' pane, quep quep ne ac cocon na oro xucun tarama' oro narima' pane quem.

¹⁵ Ac i ma' ara xi' nana oro win ma' nuhu' ma' quem, pain ca tomi' ha' cacain ca hu nucucun oro nicolaíta ma'.

¹⁶ Je ca tomi' xuhu' ca': Cwirin' pin jein ca caracat nuhu'. Mo ta om cwirin' pin hwe, hwet hap ac xuhu' tara, mam' mixita ac toton tara pain cote ne quit ca hwet qui' nain capija ta.

¹⁷ Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Oro wari' co hwara' opa cara nana pain ca howa nucucun ma', mi' toton pain capam' ca maná caca oro wari' nein Israel pane, ca joc xa xine pain xocori ca' quem. Mi' toton pain wijimain pacun ca towo' quem, ca xirao' to xine xocori wixicocon. Taraju pa' xica' to e' pan tatarain xocori wixicocon caram ma' co cut pan nanain quem. Je ca xirao' mi' roron oro co howa to nanain Pérgamo ta capa' pane.

Ca xirao' mi' tococwa oro co howa to nanain Tiatira

¹⁸ Tomi' ac capa' na: Xirao' mi' ron co ma' co querec wet nonon co howa to nanain Tiatira. Xirao' mi' ac i ca' ron: Je i ca' ca tomi' xim cuhu' co Panxica Iri' Jam cwa', co ac ca tom ne xe na tocon pain ca joc xec nein ma', co toc meremem caximacon pain ca an xiho' nein bronze ca xic mip xine ma' quem. Tomi' ca' xim nuhu':

¹⁹ Taxi' inuhu' pain oro ca ara hwe ma'. Taxi' inuhu' pain ca om noc mahu', je pain ca om noc xujuhu' ma'. Taxi' inuhu' pain ca howa mahu' ma', je pain ca quep xiho' xujuhu' ma', je pain ca quereme cara hwein oro ca to' i'ina nuhu' ma' quem. Oro ca ara hwe pain xocori ca', tiquin' ca' nain oro ca ara hwe pain ca xo' howa qui' mahu' pane.

²⁰ Taxi' paxi' inuhu' pain ca ara ac i ma' hwe ma', ane ma' ne carawa ca om hohot napa' pahu' ne: Om ca tomi' in pin hwem caxicam narima' ma', co an xiho' nam Jezabel cara pane. Profeta ina, tomi' hwet inain capijacon Iri' Jam ta na. Mixein na, tomi' mixein nonon oro co taramaja mi' nanapa' ma'. To' caracat tata pain ca tomi' ca' tococwa ca': Hohot na pain ca quep ximama' xujuhu'. Hohot na pain ca cao' hwein cwerein carawa ca mi' querec te xine pain oro caji pacun ca Iri' Jam xi' ma caca oro wari' ma', ac i ma' na ca tomi' tococwa ma'.

²¹ Cwirin' pin rain ca caracat nem ta paxi' inam, winim' paxi' inam pain ca an pe pin camain ca caracat nequem ma', ane noc camain ca cwirin' wa ne. Quep ne quep ne tiquin' nonon oro xucun tarama' ma'.

²² Je ca tomi' xuhu' ca': To' caxi tamana tam, jain jain ac cama tara. To' jain jain tamana toton co quep nanam quem, mija tara ca jain jain caca. Mo ta om cwirin' pin cacain ca caracat nucucun ma', mo ta om an to pin cacain ca pan teretem nucucun ma', to' jain jain ho' toton ta.

²³ To' parapa' pin toton oro co an xiho' nanam ma', co ac humaxicam nana ma'. Querec pin' ac cacapa' tara oro co howa nana ma', pain ca cut in xucucun pain oro cidade ma', querec pin' tatarapa' pain ca taxi' tain oro ca coromicat nucucun oro wari' ma', je pain ca taxi' tain oro ca param nucucun ma' quem. Wahu' pain ca pan teretem hwe ma', wap wap xam' xuhu'. Win hwe pane xuhu', win ne ca ara ara hwe pane xuhu', ac i ma' tara ca wap xuhu' ta.

²⁴ Tomi' ho' inonon oro xucucun co to nanain Tiatira ma': Wahu' pain ca om an xiho' hwem caxicam narima' ma', pain ca om taxi' xixi' na hwein oro coximinain caramaxicon Satanás ca tomi' hwet cama ma', ca wirico Satanás co an hwet mi' napari' pain ta pan caca oro wari' nequem ma', tomi' ca' inuhu': Wara tomi' ha' hwein oro xijein ca tomi' ne ca'. Om ta hu mami' xuhu' pain xocori ca', om na xijein ca tomi' ne ca tomi' ha' je xuhu' ca'.

²⁵ Param e' inuhu' pain ca win xumu cara mahu'. Ta an pe camain' mahu' me ta. Aram aram maqui' pa' ac xuhu' tara ta.

²⁶ Oro wari' co hwara' opa cara nana pain ca howa nucucun ma', co tomi' ha' cara nanapa' ma', co mi' pin pa' ma' tain ca tomi' ha' ne ne nana ma', mi' ac toton tara pain ca taramaxicon to ho' cocon oro wari' pain oro xijein macan'.

^27-28 Win ne ca mi' pan capa' pain ca taramaxicon wa Te cwa', mi' mi' tiquin' ac toton pain tara quem. Iri' taramaxicon tatara, taramaxicon hwara' opa tatara. Om ta xiram pa' camain' cocon oro wari' co om tomi' ha' nonon Iri' Jam. To' quiji' pin totoron, ac ca to' taparapa' pin xine oro tapaxi' ma' tara pain ca to' parapa' pin xun tococwa ta. Oro wari' co hwara' opa cara nana pain ca howa nucucun ma', co tomi' ha' cara nanapa' ma', mi' ac toton tara con pijo' co hwet nain xo' xec quem.

²⁹ Mo ta taraju pa' xixi' na hwe ma', je ta taraju wet qui' hwein ca tomi' nein Tamataracon Iri' Jam ca', pain ca tomi' cocon oro co cut in xucucun pain ca howa cacapa' ma'. Je ca xirao' mi' roron oro co howa to nanain Tiatira ta capa' pane.