Apocalipse 19 - Tradução Bíblica Pacaas Novos

Ca tomi' querec te xucucun pain pawin

¹ An hwet mi' iri napa' pain oro ca hwet pa' tain nain Babilônia ne, taraju ac tain na ca tomi' pa tamana wa. Ac ca mija caca na oro co tomi' querec te xucucun pain pawin ma'. Merem mip ca' nana: Aleluia! Tomi' querec te xun Iri' Jam nexi' cwa'! Wirico co to' witan napari'. Tomi' hwet xin ca awi tamana nucun. Querec pin' xun pain ca hwara' opa tamana nucun.

² Xi om ne ca iri'o' taxipa' ara ca ta. Ara xo' taxipa' na pain ca wap tococwa oro caracat co to nanain Babilônia ma', co hwara' opa tamana paxi' nana ma', co ara em' pin nonon co to nanain oro xijein macan' ma', pain ca an xiho' xut ta tococwa pain ca param ni ca' cocon Iri' Jam pane. Wap pin nonon Iri' Jam, wahu' pan co em' nana ta nonon, xi om ne ca to' parapa' pin ara tococwa oro wari' ne co taramaja mi' nanapa' ta nonon. Ac i ma' na ca merem mip caca co tomi' querec te xucucun pain pawin ma'.

³ Merem mami' ac caca na co tomi' querec te xucucun pain pawin: Aleluia! Tomi' querec te xun Iri' Jam ta! Piri' cara tarain tajain xe pain ca tom pin cam ta. Ac i ma' na ca merem nucucun.

⁴ Torotop to ac caca na oro taramaxicon co ma' 24 nana ma'. Pe torotop mi' querec te nonon Iri' Jam ma', co xao pe pe nain ca mam' xao pe nucun pain ca Taramaxicon ca ma'. Merem ac caca na: Amém, iri'o' na ca tomi' nuxut ta. Aleluia! Tomi' querec te xun Iri' Jam ta! Ac i ma' na ca merem caca ma'.

⁵ Taraju ac xine na ca tomi' wa ca maqui' nain ca mam' xao pe ca Iri' Jam ma'. Merem ac ca na: Tomi' querec te jun Iri' Jam nexi' cwa'. Tomi' tomi' pi' pin inuhu' pain ca taramaja mi' hun ma', pain ca tomi' ha' taxipa' hun ma', wahu' pain ca om hwara' opa hwe ma', wahu' pain ca hwara' opa hwe ma' quem, tomi' querec te jun Iri' Jam ta! Ac i ma' na ca merem ca ma'.

⁶ Taraju ac tain na ca tomi' pa tamana wa quem. Ac ca mija caca na wari' co tomi' pa pan xucucun. Ac ca xain ne pacun pain ca weweweo tamana ne com na, ac ca toroho mip ca na comerem ma' quem. Merem ac caca na: Aleluia! Tomi' querec te xun Iri' Jam nexi' ta! Xi om ne ca Iri' Taramaxicon ara ca ta. Hwara' opa pan na ta.

⁷ Tomi' querec te xi', tomi' querec te tamana xi'! Awi tamana ma ta xun. Xi om ne ca maqui' pin ara ne xec nein, pain ca an tam cam narima' co ma' co ac Wijimain Taramaji Ovelha ma'. Wara ara xo' pan xequem narima' co an ta' ca ma'.

⁸ Wara mi' nam con iri' wom co awi tamana Iri' Jam. Toc meremem na, om ca em' camain' ca quem. Ac i ma' na ca merem caca ma'. Ma' na ca tomi' joc mam' mi' ca wom co pe cama ma', co awi tamana ma'. Tomi' joc mam' mi' nain oro carawa ca awi ca ara caca oro wari' nucun Iri' Jam.

⁹ Xirao' ca' ra ta ac capa' na jam co taramaja mi' non Iri' Jam: Param mi' tata pain ca awi wa oro wari' co tomi' wawa pain ca harahap je, cao' querec te wi xijexi' con co ma' co ac Wijimain Taramaji Ovelha ma', co an pin tam nam narima' ta na. Tomi' tomi' tiquin' ac capa' na: Je ca tomi' ca Iri' Jam cwa'. Iri'o' na ca tomi' nucun ta na.

¹⁰ Pan' hwet ac ton na pain caximacon jam co taramaja mi' non Iri' Jam. Ma' ta pe torotop mi' querec te ton inon ira. Ane tomi' capa' ne: Ta pe torotop mi' querec te mapa' me ta. Xi ac wum ara ta' ta, taramaja mi' e' inon Iri' Jam. An xiho' inem, an xiho' inonon oro win howa ma ma', co win xumu cara nonon Jeju ma', pain ca om an to camain' cacain oro ca tomi' hwet xine con. Pe torotop mi' querec te pan ron Iri' Jam ta! Xi wirico pan ara ca Jeju co tomi' hwet iri' pain ca pijim' hwet xuxun con oro wari' ta. Ac i ma' na ca tomi' capa' jam co taramaja mi' non Iri' Jam.

Co ma' co xao pe nain cavalo ca towo'

¹¹ Querec ac tain na pawin pain ca pa xat ne ma'. Pe quima hwet napa' cavalo ca towo'. Wari' co xao pe nain ma', tocwan na wixicon. Co Om Mixein Camain', Co Iri'o' Taxipa', je i ma' oro wixicon. Tomi' xo' iri tata oro wari' pain oro carawa ca ara caca ne, om ca wap ximao tococwa, wap xo' e' tata. Mixita xo' tata oro co noc nonon ma', om ca mixita ximao camain' tococwa.

¹² Joc xec na tocon ma', ac ca tom ne xe na. Tocwan na caji waji' nucun taramaxicon pain winacon. Wara xirao' pe ta pain curucun iri' wixicon quem. Xica' pe pan na co taxi' nain wixicon, om na xucun wari' co taxi' nain wixicon.

¹³ Wara xin cam ta womicon pain wic. Ma' na wirain wixicon quem, Capijacon Iri' Jam na wirain wixicon.

¹⁴ Ja' ja' nonon oro wari' nucun co to nanain pawin quem. To nonon iri' wom co awi tamana. Ac soldado nucun nana. Xao to nanain cavalo ca towo' quem.

¹⁵ Hwet qui' nain capijacon cote ne quit ca xa ma', ca mam' to' quiji' pin toton cocon oro wari' co to nanain oro xijein macan'. Iri' taramaxicon tara, taramaxicon hwara' opa tamana tara. Om ta xiram pa' camain' cocon oro wari' co om tomi' ha' nonon. To' quiji' pin totoron, ac ca xom xom torotot pin xine tara winain uva pain manain cote ne pacun ca tomi' joc mam' mi' nain ca mana' nucun Iri' Jam ma', co hwara' opa tamana pan.

¹⁶ Xirao' ta wirain wixicon con womicon ma', je pain hocon ma' quem. Ca' na ca tomi' mao ne wirain wixicon: Taramaxicon co hwara' opa tamana ma', co taramaxicon hwara' opa tiquin' ca' nonon oro taramaxicon. Taramaxicon co tomi' ha' xine nonon oro taramaxicon. Ac i ma' na ca tomi' mao ne wirain wixicon.

¹⁷ Querec ac ton na jam co taramaja mi' non Iri' Jam. Xat pe non xina. Merem mip ac con na oro maho co ho to nain iri' pawin: Harahap ra, cut in xijem, cao' querec te rain carawa ca mi' xim quem Iri' Jam cwa', mija tara carawa ta.

¹⁸ Cao' rain curucucun oro taramaxicon cocon oro comandante cocon oro soldado nucucun ma'. Cao' rain cwerein cavalo, cao' rain curucucun co xao to nanain, cao' rain curucucun oro wari' co noc nonon Iri' Jam ma'. Co taramaja mi' pan xucucun ma', co taramaja mi' e' nonon xucun wari' ma', co om hwara' opa nana ma', co hwara' opa nana ma' quem, cao' pin rain curucucun ta. Ac i ma' na ca merem mip con oro maho jam co taramaja mi' non Iri' Jam.

¹⁹ Querec ac ton na co ma' co ac caji carawa co mana' tamana ma', co hwet qui' nain cote ne com ma'. Querec inonon oro taramaxicon co taramaxicon to nanain oro xijein macan', querec inonon oro soldado nucucun ma' quem. Wara cut in xucucun pain ca mixita xun cocon co ma' co xao pe nain cavalo ma'. Mixita xun nonon oro soldado nucun ma' quem.

²⁰ Mixita xun paxi' totoron, ane quep pan tococwa ne. Quep ta co ma' co ac caji carawa co hwet qui' cain' ma', quep wi ta con co ma' co profeta mixein ma', co tomi' hwet taxipa' nain oro ca tomi' nucun ma'. Wirico co ma' co mi' ca pain ca hwara' opa nucun pain ca ara taxipa' cain oro ca om ara taxi' ne ca wari' wa ira. To' wa wa tamana nonon oro wari' pane ira. Oro ca ara ca ma', je i ma' ca mam' mixein cocon oro wari' co xirao' xirac wawa pain wixicon co ma' co ac caji carawa ma', co pe torotop mi' querec te nanain pacun ca ara an xiho' xine curucun ma'. Xin mi' ac tocwa na pain cote ne xe ma', ca ac xuterem' ma'. Co ma' co ac caji carawa co hwet qui' nain com ma', wirico win ma' nucun ma' quem, wixicao' mi' nunucun ac tococwa na pain cote ne xe ca wiran wi nain pacun ca weo tamana ma', ca enxofre caca oro wari' ma' quem.

²¹ Oro taramaxicon cocon oro soldado nucucun ma' iri nana ne, to' parapa' pin ac tococwa na, mam' to' parapa' tata pain cote ne quit ca hwet qui' nain capijacon co ma' co xao pe nain cavalo ma'. Cao' cao' pi' pin ac cocon na maho. Ma'am ca' nonon quem.